| དེའི་ཚེ་རྗེ་སྐྱབས་མཆོག་དཔལ་བས་འདི་ལྟར་གསུངས་ཏེ།ད་ནི་རྨི་ལམ་ལ་བརྟན་པ་ཐོབ་ནས་འབད་མེད་དུ་ཟིན།ཁྱད་པར་ཚེས་བཅོ་ལྔ་དང་གནམ་གང་ལ་རྨི་ལམ་གྱི་ལུས་ཁྱད་པར་ཅན་བཟུང་ནས་ཐུབ་ཆེན་དང༌།བྱམས་པ་རྒྱལ་སྲས་འཇམ་དཔལ་སྙིང་པོ་སོགས་ཀྱི་སྤྱན་སྔར་གསོ་སྦྱོང་རྒྱུན་པར་བྱེད་ཅིང་ཆོས་མང་དུ་ཞུས།གཞན་ཡང་བདེ་བ་ཅན་དང༌།འོག་མིན་སྟུག་པོ་བཀོད་པ་དང༌།མངོན་དགའ་སོགས་ལོངས་སྤྲུལ་གྱི་ཞིང་ཁམས་མང་པོ་བལྟ་བར་ཕྱིན་པས་ཞིང་དེ་དག་གི་རྒྱལ་བ་སྲས་དང་བཅས་པ་ཡང་མཐོང༌།དབང་དང་བྱིན་རླབས་དཔག་ཏུ་མེད་པ་ཡང་དག་པར་སྩལ།བདག་ཉིད་ཀྱིས་ཀྱང་ལུས་ཚད་མེད་པ་སྤྲུལ་ནས་བདུན་རྣམ་དག་ཕུལ་གསུང་ངོ༌།།དེ་ནས་རྗེ་སྐྱབས་མཆོག་དཔལ་བ་དགུང་ལོ་བདུན་ཅུ་དོན་བརྒྱད་བཞེས་པའི་ཚེ་བཅོམ་ལྡན་འདས་འཁོར་ལོ་སྡོམ་པའི་སྒྲུབ་པ་ཞིག་མཛད་པའི་དུས་སུ།བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་ཡོངས་སུ་རྫོགས་པའི་ཞལ་གཟུགས་ཤིང་དེར་གཙོ་བོས་དབང་བཞི་རྫོགས་པར་བསྐུར་ནས་ད་མྱུར་དུ་མཁའ་སྤྱོད་དུ་འབྱོན་པའི་འདུན་པ་ཐོངས་ཞེས་གསུང་གི་གནང་བས་དབུགས་དབྱུང་བ་བརྙེས།དེའི་ཚེ་རྒྱལ་བ་དབེན་ས་པ་ཆེན་པོས་བདེ་མཆོག་གི་དབང་ཞུས་པས་ནང་མཆོད་ཁ་དོག་ལྔ་ལྡན་དུ་ཁོལ་བ་དང༌།རྗེ་སྐྱབས་མཆོག་དཔལ་བ་དཀྱིལ་འཁོར་གྱི་སྟེང་དུ་མདའ་གང་ཙམ་འཕགས་ནས་གར་མཛད་པ་སོགས་ཕུལ་དུ་བྱུང་བའི་ལྟས་དུ་མ་ཞིག་གཟིགས། ཉིན་གཅིག་གི་ཚེ་རྗེ་སྐྱབས་མཆོག་དཔལ་བ་དང་རྒྱལ་བ་དབེན་ས་པ་ཆེན་པོ་གཉིས་ཀས་དབུས་རིའི་རྩེར་ཕེབས་པ་ན་རྗེ་སྐྱབས་མཆོག་དཔལ་བ་སྤྱན་ནམ་མཁར་ཧྲིག་ཧྲིག་གཟིགས་ཤིང་ཕྱག་ཐུགས་ཀར་ཐལ་མོ་སྦྱོར་བར་མཛད།དེ་ལ་རྒྱལ་བ་དབེན་ས་པ་ཆེན་པོས་ཅི་འདྲ་ཞིག་མཆིས་ཞུས་པས།རྒྱལ་བ་རྡོ་རྗེ་འཆང་ལ་གྲུབ་ཆེན་བརྒྱད་ཅུས་བསྐོར་ནས་བྱིན་གྱིས་བརླབས་པའི་ཉམས་ཤིག་ཤར་གསུང༌།དེ་ནས་དགུང་ལོ་བརྒྱད་ཅུ་གྱ་གཅིག་བཞེས་པའི་སྟོན་ཞིག དོན་དུ་ན།དབེན་དགོན་འདི་ཉིད་འབྱུང་བའི་ས་གཞི་བྱིན་གྱིས་བརླབས་པར་འདུག་ཀྱང༌།ཐ་མལ་བ་རྣམས་ཀྱི་ངོར་ཞབས་འཆག་པར་སྙད་དེ། ཡབ་སྲས་གཉིས་ཀས་དབུ་ས་རིའི་རྩེ་མོར་ཕེབས་པ་ན་རྗེ་བཙུན་སྐྱབས་མཆོག་དཔལ་བཟང་ཕྱག་གཉིས་ཐལ་མོ་སྦྱར་ནས་དབུ་གུག་གུག་པ་ལན་མང་དུ་མཛད་ཅིང་འདུག་པ་ལ་རྒྱལ་བ་དབེན་ས་པ་ཆེན་པོས་དེ་འདྲ་ཅི་ཡིན་ཞུས་པས་རྒྱལ་བ་བློ་བཟང་གྲགས་པ་ལ་རྒྱ་བོད་ཀྱི་མཁས་གྲུབ་མང་པོས་བསྐོར་ནས་བྱོན།བྱིན་གྱིས་ཀྱང་བརླབས་གསུང༌།ལན་ཅིག་ད་ནི་དཔལ་མགོན་པོ་ཡབ་ཡུམ་དང༌།དམ་ཅན་ཆོས་རྒྱལ་འཁོར་བཅས་ཀྱིས་བྲན་བཞིན་བཀའ་ཉན་པར་འདུག་གསུང་ངོ༌།།དེའི་ཚེ་རྗེ་སྐྱབས་མཆོག་དཔལ་བས་རྒྱལ་བ་དབེན་ས་པ་ཆེན་པོ་ལ་ཞལ་གདམས་འདི་ལྟར་མཛད་དེ།ཁོ་བོས་ཀྱང་སྡེ་དགོན་གྱི་བདག་སྤངས།ལྟོ་གོས་གཏམ་གསུམ་ལ་གྱོང་བསྐུར།ལོ་འདོད་དང་ཁེ་གྲགས་སྤངས་ནས་སྦས་པའི་ཚུལ་བཟུང་སྟེ།དགེ་སྦྱོར་འབའ་ཞིག་ལ་འབུངས་པས་ཚེ་ཡང་རིང་དུ་སླེབས།སེམས་དབེན་དང༌།སྒྱུ་ལུས།འོད་གསལ།ཟུང་འཇུག་གི་བར་གྱི་རྟོགས་པ་ཁྱད་པར་ཅན་འདི་བཞིན་སྐྱེས་པ་ཡིན་ནོ།།ཁྱོད་ཀྱིས་ཀྱང་ཚེ་འདི་དོན་དུ་གཉེར་བའི་མིའི་ཁ་ལ་མ་ཉན་པར་དབེན་པར་དགེ་སྦྱོར་རྩེ་གཅིག་ཏུ་གྱིས་ཤིགཅེས་གསུངས་ཤིང༌།སྤྱིར་སངས་རྒྱས་ཀྱི་བསྟན་པ་དང་སེམས་ཅན་གྱི་དོན་བྱ་ཚུལ།ཁྱད་པར་རྒྱལ་བ་ཙོང་ཁ་པ་ཆེན་པོའི་སྙན་རྒྱུད་ཀྱི་བསྟན་པ་འཛིན་ཅིང་སྤེལ་ལུགས་སོགས་ཞལ་གདམས་མཐར་ཕྱིན་པར་གནང་སྟེ་རྗེ་སྐྱབས་མཆོག་དཔལ་བ་ཆོས་བདག་པོ་ལ་ཕྲོད་པས་ཐུགས་ཚིམ་ཞིང་དེད་དཔོན་ཡིད་བཞིན་གྱི་ནོར་བུ་ཐོབ་སྟེ་རང་ཡུལ་དུ་དགའ་བཞིན་དུ་འགྲོ་བ་ལྟར་རྒྱལ་བ་ཙོང་ཁ་པའི་མན་ངག་ལ་བརྟེན་ནས་ས་ལམ་རིམ་གྱིས་བགྲོད་དེ་ཟུང་འཇུག་དབང་གི་རྒྱལ་པོ་ཐོབ་པས་ནམ་མཁའ་མ་ཟད་ཀྱི་བར་དུ་འགྱུར་བ་མེད་པའི་གདེང་ཐོབ་ནས་རྣམ་སྨིན་གྱི་སྐུ་ལུས་རགས་པ་དོར་ཏེ་འཇའ་ལྟར་ཕྲ་ཞིང་རྒྱུན་འཆད་པ་མེད་པའི་ཟུང་འཇུག་གི་སྐུ་འཇམ་མགོན་བླ་མ་གང་དུ་བཞུགས་པའི་ས་སོགས་ཞིང་ཁམས་རབ་འབྱམས་སྤྲུལ་པས་འགེངས་ཤིང་བཞུགས་སོ།།དེ་ལྟར་རྒྱལ་བ་དབེན་ས་པ་ཆེན་པོས་རྗེ་བཙུན་སྐྱབས་མཆོག་དཔལ་བཟང་གི་ཞབས་དྲུང་ནས་གསང་བདེ་འཇིགས་གསུམ་གྱི་དབང་ལུང་མན་ངག་སོགས་སྔགས་ཀྱི་ཟབ་ཆོས་མཐའ་ཡས་པ་གསན་ཞིང་རྫུ་འཕྲུལ་གྱི་བཀོད་པ་མཐའ་ཡས་པ་བསྟན་པ་སོགས་བླ་མ་ལྷའི་གཟིགས་སྣང་ངོ་མཚར་རྨད་དུ་བྱུང་བའི་ཚུལ་དེ་ལ་མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ནི།འཇམ་དབྱངས་བླ་མས་དབང་བསྐུར་བྱིན་རླབས་ཚེ།།རྫུ་འཕྲུལ་དག་པའི་སྣང་བ་དཔག་མེད་དང༌།།བླ་མ་ལྷག་པའི་ལྷར་གཟིགས་དབེན་ས་པ།།བློ་བཟང་དོན་གྲུབ་ཞབས་ལ་གསོལ་བ་འདེབས།།ཞེས་གསུངས་སོ།།དེ་ནས་རྒྱལ་བ་དབེན་ས་པ་ཆེན་པོ་དགུང་ལོ་བཅུ་བདུན་བཞེས་པ་ན།ཕྱོགས་ཀུན་ཏུ་འབྲུམ་ནད་ཀྱིས་ཁྱབ་ཅིང༌། རྗེ་ཉིད་ཀྱང་སྐུ་འབྲུམ་གྱིས་བསྙུན་ནས་ཡོད་པ་ལ།ཉིན་གཅིག་ཆབ་སྒོར་རྟེན་འབྲེལ་བསྟོད་པ་ཁ་ཏོན་དུ་བྱེད་པ་ཞིག་བྱུང་བ་ན་དེའི་གསུང་གི་གདངས་ཐོས་པ་ཙམ་གྱིས་ལུས་ཀྱི་སྤུ་ཟིང་ཞེས་བྱེད་ཅིང་སྣང་བ་གཏིང་ནས་འགྱུར་བ་ཞིག་བྱུང་བས།ཕྱིར་ཕེབས་ཏེ་གཟིགས་པ་ན་དགེ་སློང་སྨ་ར་དཀར་པོའི་ཨག་ཚོམ་ཅན།ཕྱག་དར་ཁྲོད་ཀྱི་ཆོས་གོས་གསོལ་བ།ཤིན་ཏུ་དང་བ་འདྲེན་པ་ཅིག་འདུག་པས།ནང་དུ་སྤྱན་དྲངས་པ་ན་གྲུབ་ཆེན་གྱིས་དོན་དུ་འགྱུར་བ་མཁྱེན་ནས།ཆ་རྐྱེན་དང་འཚམ་པར་བསྙེན་བཀུར་བ་ཡང་ལེགས་པར་བཞེས། དེ་ལྟར་རྒྱལ་བ་དབེན་ས་པ་ཆེན་པོས་གྲུབ་ཆེན་ཆོས་རྡོ་རྗེ་དང་ཐོག་མར་མཇལ་བའི་ཚུལ་དེ་ལ་མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ནི།ཁྱད་པར་ངང་བའི་རྒྱལ་པོས་པད་མཚོར་བཞིན།།རྟོགས་པའི་མངའ་བདག་ངྷརྨ་བཛྲ་ཞབས།།བསམས་བཞིན་ཡོངས་དག་སྐྱེས་བུ་ཁྱོད་དྲུང་ཕེབས།།དང་པོའི་རྟེན་འབྲེལ་ལེགས་འགྲིག་དབེན་ས་པ།།བློ་བཟང་དོན་གྲུབ་ཞབས་ལ་གསོལ་བ་འདེབས།།ཞེས་གསུངས་སོ།།དེའི་ཚེ་རྒྱལ་བ་དབེན་ས་པ་ཆེན་པོའི་ཐུགས་ལ་འདི་ནི་གྲུབ་པ་མཆོག་གི་དངོས་གྲུབ་བརྙེས་པ་ཞིག་གོར་མ་ཆག་གོ་སྙམ་དུ་དགོངས་ཏེ།མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ལས།དེ་ཉིད་ཚུལ་ལ་ལེགས་པར་བརྟགས་པ་ན།།གསང་བའི་མཛོད་འཛིན་ཆོས་ཀྱི་རྒྱལ་མཚན་གྱིས།། ཐུགས་སྲས་མཆོག་ཏུ་ལེགས་གཟིགས་དབེན་ས་པ།།བློ་བཟང་དོན་གྲུབ་ཞབས་ལ་གསོལ་བ་འདེབས།།ཞེས་གསུངས་པ་ལྟར།གདམས་པའི་གཏེར་དུ་གྱུར་པའི་གྲུབ་མཆོག་ཏུ་གཟིགས་ནས་རྗེས་སུ་འཛིན་པར་ཞུས་པས།གྲུབ་ཆེན་ཆོས་རྡོ་རྗེས་ཀྱང་དགྱེས་བཞིན་དུ་ཞལ་གྱིས་བཞེས་ཏེ་བཀྲ་ཤིས་རྫོང་དགའི་ཕུའི་མགར་མོ་ཆོས་རྫོང་དུ་དུས་འདི་ཙམ་ལ་ཤོག་ཅེས་བཀའ་གནང༌།དེ་ནས་རྒྱལ་བ་དབེན་ས་པས་འབྲུམ་བུའི་བསྙུན་ལས་གྲོལ་མ་ཐག་བླ་མ་གྲུབ་ཆེན་གྱིས་ཇི་ལྟར་གསུང་བའི་དུས་ཚོད་དེ་ལས་ཡོལ་བ་མེད་པར་དབེན་གནས་མགར་མོ་ཆོས་རྫོང་དུ་ཕེབས།གྲུབ་ཆེན་ཆོས་རྡོ་རྗེ་མཉེས་པ་གསུམ་གྱིས་མཉེས་པར་བྱས་ནས་རྒྱལ་བ་ཙོང་ཁ་པའི་སྙན་རྒྱུད་ཀྱི་མན་ངག་ཡོངས་སུ་རྫོགས་པ་ཞིག་གནང་བ་ཐུགས་རྗེས་གཟུང་འཚལ་ཞེས་གསོལ་བ་བཏབ་པས་གྲུབ་མཆོག་ཆོས་རྡོ་རྗེས་ཀྱང་དགྱེས་བཞིན་དུ་ཐོག་མར་མདོ་སྔགས་ཀྱི་གསུང་རབ་དགོངས་འགྲེལ་དང་བཅས་པའི་དོན་མཐའ་དག་སྙིང་པོར་བསྡུས་ཏེ་གང་ཟག་གཅིག་གི་ཉམས་ལེན་གྱི་རིམ་པར་དྲིལ་བ།ལས་དང་པོ་པའི་ས་ནས་སངས་རྒྱས་ཀྱི་སའི་བར་གྱི་ས་ལམ་འབྲས་བུ་དང་བཅས་པའི་ལམ་གྱི་གནད་ཐམས་ཅད་ཚང་བ་བྱང་ཆུབ་ལམ་གྱི་རིམ་པའི་ཁྲིད་མན་ངག་ཞལ་ཤེས་དང་བཅས་པ་ཡོངས་སུ་རྫོགས་པ་དང༌།བདེ་གསང་འཇིགས་གསུམ་སོགས་བླ་མེད་ཀྱི་དབང་དང་རིམ་གཉིས་ཀྱི་མན་ངག་རྣམས་ཡོངས་སུ་རྫོགས་པ་གནང་སྟེ་རྒྱལ་བ་དབེན་ས་པ་ཆེན་པོ་འཇམ་མགོན་སྙན་རྒྱུད་བསྟན་པའི་བདག་པོར་མངའ་གསོལ་ལོ།།རྒྱལ་བ་དབེན་ས་པ་ཆེན་པོས་གྲུབ་ཆེན་ཆོས་རྡོ་རྗེ་ལ་འཇམ་མགོན་སྙན་རྒྱུད་ཀྱི་མན་ངག་ཡོངས་རྫོགས་གསན་པའི་ཚུལ་དེ་ལ་མཁས་གྲུབ་སངས་རྒྱས་ཡེ་ཤེས་ཀྱིས་བསྟོད་པ་མཛད་པ་ནི།དེ་ནས་དེ་ཉིད་ཞབས་གཏུགས་གསོལ་བཏབ་པས།། བློ་བཟང་གདམས་པའི་སྙིང་པོ་མ་ལུས་སྩལ།།སྙན་རྒྱུད་གདམས་པའི་གཏེར་གྱུར་དབེན་ས་པ།།བློ་བཟང་དོན་གྲུབ་ཞབས་ལ་གསོལ་བ་འདེབས།།ཞེས་གསུངས་སོ།། 4/10 མདུན་ངོས། 上一页 2 3 4 5 6 7 下一页 尾页 |
