༈   རིག་གྲོལ་ཕུན་ཚོགས་དགེ་འདུན་འདུས་པའི་གཙོ།   །གྲུབ་པའི་དབང་ཕྱུག་མཁས་པ་ཀུན་གྱི་དཔལ།   །འཕྲིན་ལས་བཟང་པོས་བསྟན་པ་རྒྱས་མཛད་པ། །དཔལ་ལྡན་བླ་མའི་ཞབས་ལ་གསོལ་བ་འདེབས། །ཞེས་བསྔགས་པ་ཐམས་ཅད་མཁྱེན་པ་དགེ་འདུན་གྲུབ་པ་དཔལ་བཟང་པོ་ནི།   གུར་མ་ཞེས་བྱ་བའི་ཡུལ་གྱི་ལྷས་ར་ཞིག་ཏུ།  ཡབ་མགོན་པོ་རྡོ་རྗེ་དང༌།  ཡུམ་ཇོ་མོ་ནམ་སྐྱིད་ཅེས་བྱ་བ་གཉིས་ཀྱི་སྲས་སུ་ལྕགས་མོ་ལུག་གི་ལོ་ངོ་མཚར་བའི་ལྟས་དང་བཅས་ཏེ་འཁྲུངས། རྗེ་འདི་སྤྲུལ་པའི་སྐྱེས་བུར་སྟོན་ཕྱིར་འཁྲུངས་པའི་ནུབ་མོ་དེ་ཕྱོགས་ཀྱི་འབྲོག་པ་ལ་དགྲ་ཇག་བྱུང་སྟེ་ཡུམ་གྱིས་ཁྱེའུ་འཁྲུངས་མ་ཐག་པ་དེ་ཁྱེར་མ་ཐུབ་པར་རྡོའི་གསེབ་ཅིག་ཏུ་སྦས་ཏེ་ནང་མི་ཐམས་ཅད་བྲོས།   སང་ཉིན་ནམ་ལངས་ནས་ལྟར་འོངས་པས།   དེའི་མཐའ་སྐོར་ལ་བྱ་དང་གཅན་གཟན་མང་པོ་འཁོར་ནས་ཡོད་པ་ལ། བྱ་རོག་ཆེན་པོ་གཅིག་གིས་ཁྱེའུ་འཁྲུངས་མ་ཐག་པ་དེ་གཅན་གཟན་སོགས་ཀྱི་གནོད་པ་ལས་བསྲུངས་ཏེ་མ་ནོངས་པར་བཞུགས་པ་མཐོང་སྟེ་དགའ་ཞིང་ངོ་མཚར་ཡ་མཚན་དུ་བཟུང་ནས་ཁྱེའུ་དེ་ཁྱེར་ཏེ་བྲོས་ནས་ཕྱིན།   དེ་དུས་ཀྱི་བྱ་རོག་ཆེན་པོ་དེ་ནི་དཔལ་མགོན་ཞལ་གྱི་རྣམ་འཕྲུལ་དུ་འདུག   མགོན་པོ་འདིས་ཕྱིས་ཀྱང་དེ་དུས་ཀྱི་དྲིན་ངོ་དང༌།    ཁྱོད་ལྟ་བུའི་བསྟན་འཛིན་ལ་ང་ལྟ་བུའི་ཆོས་སྐྱོང་བསྟེན་དགོས་པ་ཡིན་ནོ་ཞེས་ཡང་ཡང་གསུང་གིན་ཡོད་གསུང་སྟེ་བསམ་གྱིས་མི་ཁྱབ་པའི་རྣམ་ཐར་རོ།   །དེ་ལྟ་བུའི་གཞོན་ནུ་དེ་ཉིད་ནི།   བྱིས་པའི་གནས་སྐབས་ཉིད་ནས་ཀྱང་བྱིས་པའི་རྒུད་པ་ཐམས་ཅད་ལས་ཡང་དག་པར་འདས་ཤིང༌། བག་མེད་པར་རྩེ་བ་མཐའ་དག་ལས་ངང་གིས་ལོག ཉེས་སྤྱོད་རྣམས་ནི་རང་བཞིན་གྱིས་བསྡམས།   བློ་གྲོས་དཔག་པར་དཀའ་ཞིང་དམ་པའི་ཆོས་འཚོལ་བ་ལ་ངང་གིས་ཞུགས་པ་སོགས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་རྣམས་ལས་ནམ་ཡང་ཉམས་པ་མེད་ཅིང༌། ཁྱད་པར་རང་དང་ན་ཚོད་མཉམ་པའི་བྱིས་པ་མང་པོ་བསགས་ནས་དེ་དག་ལ་རང་ཉིད་ཀྱིས་ཆོས་འཆད་པའི་རྣམ་པ་མཛད་ཅིང༌། གཞན་ཡང་རྟེན་བཞེང་དང༌།   གཙུག་ལག་ཁང་དང༌། ཆོས་ཁྲི་དང༌།ཆོས་ར་རྩིག་པ་ཡིན་གསུངས་ནས།   ཉིན་མཚན་ཀུན་ཏུ་ཕྱག་དལ་བར་བཞུགས་པའི་སྐབས་མེད་པ་ལྟ་བུ་ཞིག་ཡོད་ཅེས་གྲག་གོ །དེ་ནས་རྗེ་འདིའི་ཡབ་ཡུམ་རྣམས་ཀྱང་ནོར་དགྲ་ལ་ཤོར་ཏེ་སྦྲ་མ་ཚུགས་པར་རེ་ཞིག་ལ་ཁ་སྟོད་ཀྱི་གྲོང་ཡུལ་རྣམས་སུ་བཞུགས་ཏེ་རྗེ་འདིས་ཀྱང་གྲོང་པ་དག་གི་རྫི་བོ་སོགས་མཛད་དེ་སེམས་ཅན་ལ་ཕན་པ་མཛད།   ཁྱད་པར་རྩེན་དཀར་བྱ་བའི་ཡུལ་དུ་བཞུགས།   དགུང་ལོ་ལྔ་བའི་དུས་ཉིན་རེ་བཞིན་ཕྱོགས་གཞན་ཞིག་ཏུ་འབྱོན་པ་ཞིག་བྱུང་བ་ལྕམ་མོ་ཞིག་ཡོད་པ་དེས་ལྟར་ཕྱིན་པས་རྡོ་མང་པོ་ལ་མ་ཎི་ཕྱག་བྲིས་མཛད་དེ་བརྐོ་ཡིན་འདུག ཅི་མཛད་ཞུས་པས། འདི་ལ་ངའི་ཕ་མའི་སྒྲིབ་སྦྱོང་བྱེད་པ་ཡིན་གསུང༌།   ཕ་མ་ད་ལྟ་མ་ཤི་ལགས་ཞུས་པས། ཕ་མ་ཤི་བ་དང་མ་ཤི་བ་མང་པོ་ཡོད་པས་དེ་ཐམས་ཅད་ཀྱི་སྒྲིབ་སྦྱོང་ཡིན་གསུང༌། དེ་འདྲའི་མ་ཎི་དེ་ཡུལ་དེ་ན་ད་ལྟ་ཡང་ཡོད་པར་གྲགས།དེ་ནས་ཁ་སྟོད་མཐོང་སྨོན་བྱ་བར་ཡུམ་སྲས་རྣམས་ཀྱིས་བྱོན། ཡུལ་དེའི་ཕྱུག་པོ་ཞིག་གི་ར་རྫི་མཛད་དེ་རི་གདོང་ཞིག་གི་བྲག་ལྡེབས་ལ་འབྲུ་དྲུག་དང༌། འབྲུ་གསུམ་དང༌། ཧྰུཾ་དང་ཧྲི་ཿལ་སོགས་པའི་གསུང་ཡིག་འབྲུ་མང་པོ་དང༌། གདུགས་དང༌། རྒྱལ་མཚན་དང༌།   བ་དན་སོགས་མཆོད་པའི་ཡོ་བྱད་མང་པོ་ཕྱག་བྲིས་སུ་བརྐོ་བར་མཛད་པ་ད་ལྟ་ཡང་ཡུལ་དེ་ན་བཞུགས། དེ་ནས་ཞུ་རོང་བྱ་བར་ཕེབས་ཏེ་འགྲོ་དོན་མཛད།   དེ་ནས་སྣར་ཐང་གི་ཕུ་དགེ་སྟེང་བྱ་བར་བཞུགས། དགུང་ལོ་བདུན་པའི་ཚེ་ཡབ་དེ་སྐུ་གཤེགས། དེའི་ཚེ་རྗེ་འདིས་སྟོན་པ་སྨན་པའི་རྒྱལ་པོའི་མདོ་ཞིག་ཕྱག་བྲིས་མཛད་དེ་བཞེངས། འདི་ལ་བདག་གི་ཕའི་སྒྲིབ་སྦྱོང་བྱེད་པ་ཡིན་ནོ་གསུང༌། དེ་ནས་ཡབ་ཡུམ་དག་འབྱོར་པ་ཆུང་བས་རྒྱལ་སྲས་འདིས་སྣར་ཐང་དུ་དགེ་འདུན་གྱི་ཚོགས་ལ་བསྐྲུ་བ་ལ་བྱོན། དེ་ལ་ཡང་ན་བཟའ་སེར་པོ་རེ་བཞེས།དབུ་སྐྲ་བྲེགས་ཏེ་བྱོན།   དེ་ལ་མི་རྣམས་ཀྱིས་བཙུན་ཆུང་རག་སྐྱ་ཞེས་འབོད་པ་བྱུང༌། དེ་ནས་རྒྱལ་བའི་བསྟན་པ་ལ་འཇུག་པར་བཞེད་དེ་སྣར་ཐང་མཁན་ཆེན་གྲུབ་པ་ཤེས་རབ་ལས་ཡོངས་རྫོགས་དགེ་བསྙེན་གྱི་སྡོམ་པ་བཞེས་ཏེ་བསླབ་ཁྲིམས་རྣམས་ཚུལ་བཞིན་དུ་བསྲུང་བར་མཛད་ཅིང༌། ཆོས་སྤྱོད་མང་པོ་ཞལ་ཏོན་དུ་མཛད་པ་ན་བཙུན་ཆུང་པད་རྡོར་ཞེས་འབོད་པ་བྱུང༌།    དེ་ནས་སྣར་ཐང་མཁན་པོའི་གསུང་ནས།    ད་རེ་ཞིག་ལ་ཡོན་ཏན་ཐམས་ཅད་ཀྱི་རྩ་བ་ཡིན་པས་ཀློག་ཡིག་ལ་སྦྱོངས་ཤིག་གསུངས་ནས། དེ་དུས་ཀྱི་ཀློག་དཔོན་རྒྱ་སྟོན་ཙནྡྲ་པ་ཞེས་པ་སློབ་མ་བརྒྱ་ཕྲག་མང་པོ་བསྟེན་པ་གཅིག་ལ་གཏད་ དེ་ཀློག་ཡིག་སྦྱོང་བའི་ཚུལ་བསྟན་པ་ཙམ་གྱིས་ཐོགས་མེད་དུ་མཁྱེན་པ་བྱུང༌། དེ་ནས་རྒྱ་སྟོན་པའི་ཞལ་ནས།    ད་ནི་ང་བས་ཁྱོད་མཁས་པར་འདུག་པས་ངའི་སློབ་མ་རྣམས་ཁྱོད་ཀྱིས་སྐྱོངས་ཤིག་གསུངས་ནས། དེ་དུས་ཀྱང་ཀློག་གིས་བུ་སློབ་སྐྱོང་བ་སོགས་མཛད། དེ་ནས་ཡང༌། དེ་དུས་ཀྱི་ཡིག་དཔོན་ཤཱཀྱ་དཔལ་ཞེས་པ་ལ་ཡི་གེ་སྦྱོང་བའི་ཚུལ་བསྟན་པ་ཙམ་གྱིས་ཡི་གེའི་རིགས།   རྒྱ་ཡིག བོད་ཡིག། ཧོར་གྱི་ཡི་གེ །རྒྱ་གར་གྱི་ཡི་གེའང༌། ལཉྪ། ཝརྔྷུ། བོད་ཡིག་ལའང༌། ཆེ་ཡིག ཆུང་ཡིག དེ་ལའང༌། འབྲུ་མ། ཚག་བྲིས། ཟླུམ་བྲིས་སོགས་ཐམས་ཅད་ཐོགས་པ་མེད་པར་མཁྱེན། དེ་ལྟར་མཁྱེན་ཅིང་རབ་ཏུ་བྱུང་བའི་རྗེས་སུ་འང་སྣར་ཐང་དུ་ཀློག་ཡིག་གིས་བུ་སློབ་མང་པོ་བསྐྱབས་པས་མི་རྣམས་ཀྱིས་དཔོན་ཡིག་དགེ་འདུན་གྲུབ་ཅེས་འབོད་པའང་བྱུང་ཞིང༌། དེ་ལྟར་ཡིག་རིགས་ཐམས་ཅད་མཁྱེན་པས་གསན་སྦྱོང་མཛད་དུས་ཀྱི་ཕྱག་དཔེ་ཕལ་ཆེ་བ་ཕྱག་བྲིས་མཛད་དེ་བཞེངས། ཆོས་བར་སོགས་ལ་བྱོན་དུས་གཙུག་ལག་ཁང་གང་དུ་བྱོན་སར་འཕན་གདུགས་རྒྱལ་མཚན་སོགས་ཕུལ་བ་རྣམས་ལ་དཀར་ཆག་རེ་ཕྱག་བྲིས་སུ་མཛད།   ཕྱིས་བཀྲ་ཤིས་ལྷུན་པོའི་ཕྱི་ནང་ཀུན་ཏུ་བླ་མ་སངས་རྒྱས་བྱང་སེམས་ཀྱི་མཚན་དང༌།   མ་ཎི་ཇི་སྙེད་ཡོད་པ་ཕལ་ཆེ་བ་དང༌། ཁྱད་པར་གཙུག་ལག་ཁང་གི་ནང་ན་ཡོད་པ་ལཉྪ་སོགས་ཡིག་རིགས་ཕལ་ཆེ་བ་རྣམས་རྗེ་འདིའི་ཕྱག་བྲིས་ཡིན་ཞིང༌། རྗེ་འདིས་མཛད་པའི་ཕྱག་བྲིས་ཆད་ལྷག་ནོར་གསུམ་གྱི་སྐྱོན་དང་བྲལ་བར་རྗེ་རང་ཉིད་ཀྱིས་ཞལ་གྱིས་བཞེས་སོ།  །དེ་ནས་འདི་སྙམ་དུ་དགོངས་ཏེ། རྒྱལ་བའི་བསྟན་པ་ལ་ཞུགས་ཏེ་ཁྱིམ་ནས་ཁྱིམ་མེད་པར་རབ་ཏུ་བྱུང་ནས་ཐོས་བསམ་སྒོམ་གསུམ་འཆད་རྩོད་རྩོམ་གསུམ་གྱི་སྒོ་ནས་རྒྱལ་བའི་བསྟན་པ་རིན་པོ་ཆེ་ཆེས་ཆེར་སྤེལ་ཐུབ་པ་ཞིག་བྱའོ་སྙམ་དུ་དགོངས་ནས་དགུང་ལོ་བཅོ་ལྔ་པ་ཤིང་མོ་བྱའི་ལོ་ཟླ་བ་གསུམ་པའི་ཉེར་གཅིག་གི་ཉིན་དཔལ་སྣར་ཐང་གི་གཙུག་ལག་ཁང་དུ་མཁན་ཆེན་གྲུབ་པ་ཤེས་རབ་པས་མཁན་པོ་དང༌། བཤེས་གཉེན་ཆེན་པོ་བློ་ལྡན་པ་ཞེས་བས་སློབ་དཔོན་མཛད་དེ།  རབ་ཏུ་བྱུང་ཞིང་ཚིགས་སྔ་མ་དགེ་ཚུལ་གྱི་སྡོམ་པ་ཡང་དག་པར་མནོས་ཏེ། དགེ་འདུན་གྲུབ་པ་དཔལ་བཟང་པོ་ཞེས་མཚན་གསོལ།   དེ་ལྟར་རབ་ཏུ་བྱུང་ནས་འདི་སྙམ་དུ་དགོངས་ཏེ།    སངས་རྒྱས་བཅོམ་ལྡན་འདས་ཀྱི་རྗེས་སུ་རབ་ཏུ་བྱུང་བ་དག་གི་ལས་སུ་བྱ་བ་ནི་གཉིས་ཏེ།   འདི་ལྟར་ཀློག་པ་ཐོས་བསམ་དང༌། 

 1/11    1 2 3 4 5 6 下一页 尾页