ལམ་རིམ་དང་ལྟ་ཁྲིད་གསུངས་པ་དགེ་བའི་བཤེས་གཉེན་འདི་བས་མང་བ་མ་བྱུང་བ་འདུག་ཟེར། ཐམས་ཅད་མཁྱེན་པའི་ཞལ་ནས། འུ་ཅག་གིས་མི་ཚེ་རིལ་པོར་འདུལ་བ་བཤད་པ་བས། དྲུང་འདུལ་བ་པས་བསླབ་བྱ་ཚར་རེ་བཤད་པ་དྲག་པར་འོང་གི་སྣང་གསུང༌། འདུལ་འཛིན་རིན་པོ་ཆེའི་ཞལ་ནས། ནུབ་གཅིག་རྨི་ལམ་དུ་ཉི་ཤུ་ལྔ་མཆོད་ཅིག་བྱེད་ཀྱི་འདུག་པས། དེར་ཆོས་རྗེ་རིན་པོ་ཆེ་ཆིབས་མཛོ་ཞིག་ལ་ཆིབས་ནས་ཕེབས་བྱོན་པ་ལ་གསོལ་བ་བཏབ་པས། ང་ཡང་ཇོ་བོ་ཡབ་སྲས་ལ་དད་ཀྱི། ཁྱོད་རང་ཡང་ཇོ་བོ་ཡབ་སྲས་ལ་དད་པ་སྒོམས་ཤིག་ཅེས་་གསུང་བ་ཅིག་རྨིས། སང་དེ་ནས་ངའི་རོ་སྟོད་གཟེར་བ་ཅིག་ཡོང་གི་ཡོད་པ་དེ་གཏན་མ་བྱུང༌། ཡང་ནུབ་གཅིག་མནལ་ལམ་དུ་དགེ་བའི་བཤེས་གཉེན་འབྲོམ་སྟོན་པས་བཀའ་གདམས་གླེགས་བམ་གྱི་འགོ་ནས་མཇུག་གི་བར་ཚང་མར་གནང་བ་ཅིག་རྨིས་ཏེ། ངའི་ལུང་དེ་ཁས་གོ་ཆོད་པ་ཡིན་གསུང༌། ཡང་ཞལ་ནས། ད་རྩ་རླུང་བགྲིབས་ནས་ཆོས་བཤད་རེ་བྱས་པ་ཡིན། མངའ་རིས་སུ་སྡོད་དུས་ཞག་ལྔ་དྲུག་རེའི་བར་དུ་ཟ་བ་བཟའ་དགོས་པ་མ་བྱུང་ཞེས་གསུང་སྟེ། ཏིང་འཛིན་ཕུན་སུམ་ཚོགས་པ་མངའ་བ་ལགས་པར་གདའ། ཡང་ཉིན་གཅིག་ཆོས་གྲྭར། ངས་བལ་པོ། ཁ་ཆེ་ཛ་ལན་ངྷ་ར་རྣམས་སུ་འགྲོ་མྱོང་གསུང་སྟེ། དེ་ལ་སོགས་པའི་འདས་པའི་དུས་ཀྱི་གཏམ་ཤོར་འོང་གི་སྣང༌། བྱང་ཆུབ་ཆོས་ལུང་དུ་བཞུགས་པའི་དུས། ད་སང་ཕོད་འགྲོ་བར་ཡོད་པས། ཆོས་ཉན་འདོད་ཡོད་པ་རྣམས་ད་ལོ་ཉན་པ་ལེགས་ཞེས་གསུངས། དེའི་གཏམ་དེ་ཁ་ཅིག་གིས་ཆོས་རྗེ་ཐམས་ཅད་མཁྱེན་པའི་སྙན་དུ་གསོན་པས་ཞལ་ནས་ཁོང་གི་དེ་ལ་ཏིག་པོ་མི་བདོག ཁོང་སྔར་ང་ཞག་བདུན་ནས་འཆི་བར་ཡོད་པ་ཡིན་ཟེར་ཏེ་བཞུད་པས། ཡང་ལོག་བྱུང་གསུང༌། དེའི་རྗེས་ལ་ཁོང་པ་གྲོངས་རུང་བདེ་བ་ནས་བདེ་བར་འགྲོ་བ་ཡིན་ཏེ་གསུང་ངོ༌། །ཡོས་ལོའི་དགུན་ཐམས་ཅད་མཁྱེན་པའི་བཀའ་ལུང་ཕེབས་པས་བཀྲ་ཤིས་ལྷུན་པོར་བཞུགས་ནས་གསུང་ཆོས་མང་དུ་གསུངས། ཡབ་སྲས་གཉིས་ཀྱིས་བསྙེན་པར་རྫོགས་པའང་བཞི་བཅུས་ལྷག་ཙམ་བསྒྲུབས། དེ་དུས་ཆོས་རྗེ་རིན་པོ་ཆེས་ཀྱང་བཀའ་ལུང་གནང་ཞིང༌། སློབ་དཔོན་རྣམ་པས་ཀྱང་གསོལ་བ་བཏབ་སྟེ། དབྱར་དགུན་བཀྲ་ཤིས་ལྷུན་པོར་ཕེབས་པ་གནང་དགོས། གཟིམ་ཁང་ཞིག་ཀྱང་རྩིག་པ་ཡིན་ཞུས་པས་ལེགས་པར་ཞལ་གྱིས་བཞེས་ཏེ། ཐམས་ཅད་མཁྱེན་པ་མྱ་ངན་ལས་འདའ་ཁའི་བར་དུ་བཞུགས་པར་མཛད་དོ། །ཐམས་ཅད་མཁྱེན་པ་སྐུ་ཁམས་ཆེར་བསྙེལ་དུ་སོང་བ་ན། སློབ་དཔོན་རྣམ་པ་ལ་གདན་འདྲེན་ཐོང་ཞེས་བཀའ་སྩལ་པས། འདུལ་འཛིན་རིན་པོ་ཆེས་གཙོ་མཛད། འཆད་ཉན་པ་རྣམས་ཞབས་དྲུང་དུ་འཁོད་པ་ལ། ངེད་རང་རེ་ཞིག་སྡོད་བསམ་པ་ཡིན་ཏེ་ད་འགྲོ་བར་སྣང༌། འོ་ནའང་འགྱོད་པ་མེད་པར་ཚེའི་དུས་བྱེད་པ་ཡིན། ཁྱེད་སློབ་དཔོན་རྣམ་པས་ཀྱང་བཀྲ་ཤིས་ལྷུན་པོ་ལ་བརྟེན་ནས་སངས་རྒྱས་ཀྱི་བསྟན་པ་ལ་ཅི་ཕན་མཛད་འཚལ། སྨོན་ལམ་དེ་དང་ངའི་དགོངས་རྫོགས་གཉིས་སྦྲགས་པས་འོང༌། རྟེན་གསུམ་བཞེང་དགོས་པ་ནི་མེད། ངའི་རུས་བུ་འདི་སྲེགས་ལ་མི་འཁྲུགས་པའི་སྟོང་སྐུ་ཞིག་ཐོབ། སྒྲོལ་མ་རང་ཡང་འདིར་ཤོག་གསུངས་ནས་བཙུན་ཆུང་འདིས་ལོ་སུམ་ཅུ་ལྷག་ཅིག་བར་དུ་ངའི་གཡོག་བྱས་པ་ཡིན། འདི་ལ་ཁྱེད་རྣམ་པས་བགོས་སྐལ་མི་ཕམ་པ་ཅིག་ཀྱང་བྱིན་གསུངས་ནས་ལྡེ་མིག་རྣམས་སློབ་དཔོན་རྣམ་པའི་དྲུང་དུ་འཕངས་པར་གདའ། དེ་ནས་སློབ་དཔོན་རྣམ་པས་གདན་ས་འདི་ཇི་ལྟར་བགྱི་བ་བཀའ་ལུང་གནང་དགོས་ཞུས་པས། རྗེའི་ཞལ་ནས་དྲུང་འདུལ་བ་པ་དང༌། ཁྱེད་རང་དཔོན་སློབ་ཀྱིས་བརྟག་པ་བྱས་ནས་གང་ལེགས་པ་ཅིག་ལ་གྱིས་ཤིག་གསུངས། མྱ་ངན་ལས་འདའ་ཁར་འདུལ་བ་འཛིན་པས་ཐུགས་དམ་གསལ་འདེབས་འདྲ་དགོས་ལགས་སམ་ཞུས་པས་མི་དགོས་པར་གདའ་ཞེས་གསུང༌། དེ་ནས་རྗེ་དགེ་འདུན་གྲུབ་ཞིང་གཤེགས་ནས་འདུལ་འཛིན་བློ་གྲོས་སྦས་པས་རྗེ་དགེ་འདུན་གྲུབ་ཀྱི་དགོངས་རྫོགས་དང༌། དགོན་གནས་མི་ཉམས་པར་བྱ་བའི་ཕྱིར་གདན་ས་བསྐོ་བ་སོགས་ཐུགས་ཁུར་ཆེ་བཞེས་མཛད་དོ། །དེ་ལྟར་ན་རྒྱལ་སྲས་འདུལ་འཛིན་ཆེན་པོ་འདི་ནི་ཐམས་ཅད་མཁྱེན་པ་དགེ་འདུན་གྲུབ་ཀྱི་གྲྭ་ཚང་གི་དང་པོའི་རྩ་བ་འཛིན་པ། བར་དུ་མི་ཉམས་པར་སྐྱོང་བ། མཐར་འཕྲིན་ལས་སྤེལ་ཞིང་དགོངས་རྫོགས་དང་གདན་སའི་བསྐོ་བཞག་གི་བར་དུ་མཛད་དེ།ཆོས་རྗེ་ཉིད་དང་བཀའ་དྲིན་ཁྱད་པར་མེད་ཅིང༌། བུ་སློབ་སྦྱིན་བདག་རྣམས་ཀྱིས་ཀྱང་ཡབ་སྲས་དབྱེར་མེད་དུ་འཁུར་བར་མཛད་པ་ཡིན་ནོ། །དགུན་ཆོས་གཉིས་པ་ལ་འདུལ་འཛིན་རིན་པོ་ཆེས་རིམ་ལྔའི་དམར་ཁྲིད་ཞལ་ཤེས་ཀྱིས་བརྒྱན་པ་ཅིག་དགེ་བའི་བཤེས་གཉེན་བློ་མཆོག་ཏུ་གྱུར་པ་དྲུག་ཅུ་ལྷག་ཙམ་ལ་གསུང་བ་མཛད། གསུང་ཆོས་དེ་ཐོན་ནས་རྟ་ནག་ཨོ་རྒྱན་རྫོང་དུ་ཐེགས་ཏེ་ཟླ་གཅིག་ཙམ་གྱི་བར་དུ་བཞུགས་ཤིང༌། ཆོས་ཀྱང་མང་དུ་གསུངས། དཔྱིད་གཞུག་ལྷུན་པོ་རྩེར་སྤྱན་དྲངས། དེར་དགེ་འདུན་བརྒྱ་ཕྲག་མང་པོ་ལ་མདོ་སྔགས་ཀྱི་གདམས་པ་ཟབ་དགུ་ཅོག་གིས་ཚིམ་པར་མཛད། དེར་སྐུ་ཁམས་ཅུང་མི་བདེ་བའི་རྣམ་པ་ཅིག་ཀྱང་བྱུང༌། ཅུང་ཟད་སྙུན་པའི་འཕྲོ་ཉིད་ལ་བཀྲ་ཤིས་ལྷུན་པོའི་དབྱར་ཆོས་ལ་ཕེབས་པ་གནང༌། ཕེབས་མ་ཐག་ན་གཟིམ་ཁང་སེར་བོར་སྐུ་མཚམས་ལ་བཞུགས། དེར་ལྷ་རྗེ་ཞིག་ཀྱང་ཞབས་དྲུང་དུ་བོས། ཁྱོད་ཀྱིས་ངའི་ནད་གཞི་འདི་ལ་ཕན་པའི་ཐབས་འདུག་ན་གྱིས། སྡོད་རྩིས་ནི་མི་བྱེད། ལུས་གོག་པོ་འདིས་རང་གཞན་གྱི་དོན་གང་ཡང་མི་འོང་བར་འདུག་པས། ང་འདི་ནས་དགའ་ལྡན་དུ་འགྲོ །རྒྱལ་བ་ཙོང་ཁ་པ་ཆེན་པོའི་ཞབས་དྲུང་ན་མཁས་གྲུབ་ཐམས་ཅད་མཁྱེན་པ་དང་རྗེ་བཙུན་ཤེས་རབ་སེངྒེ་གཉིས་ཀྱང་བཞུགས་འདུག ལྷ་བུ་གཞོན་ནུ་ཞིག་གི་ལུས་བླངས་ནས་ཆོས་ཉན། འགྲོ་བ་མང་པོའི་དོན་བྱེད་པ་ཡིན། དེ་ནས་རྒྱ་གར་ཤར་ཕྱོགས་སུ་སྐྱེ་བ་ལེན། དེར་ཡང་རྗེའི་སྤྲུལ་པ་ཅིག་གིས་རྗེས་སུ་འཛིན། ཕོ་བའི་ལམ་གྱིས་ས་ལམ་བགྲོད་པ་ཅིག་འོང་བར་སྣང་ཞེས་གསུང་བར་གདའ། ལྷ་རྗེ་དེས་གྲྭ་པ་རྣམས་ལ་སྙུན་གཞི་འདི་འཆོས་ཐུབ་པར་འདུག་སྟེ། ཞལ་སྔ་ནས་བཞུགས་པའི་ཐུགས་འདུན་ཡེ་མི་འདུག་པས་གསོལ་བ་ཐེབས་པ་རང་ནི་དཀའ་བར་གདའ། སྐུ་རིམ་ཞིག་བྱས་ན་ཁྱད་ཨེན་རེ་ཨེ་ཡོང་ཟེར་བས། ཉི་ཤུ་གསུམ་གྱི་རིང་གསོལ་དཔོན་སྒྲོལ་མས་མང་ཇའི་སྦྱིན་བདག་མཛད་དེ། ཚོགས་པས་སྨན་བླའི་ཆོ་ག་མཛད། དེ་སྐུ་མདུན་དུ་གསན་པས་ལྷ་རྗེ་ལའང་བཀྱོན་ཏེ་ཁྱོད་ཀྱིས་ང་ལ་གནོད་པོ་ཞིག་བྱས། ང་སང་དང་དེ་རིང་གཉིས་ཀྱང་དེ་རིང་འཆི་བ་ལ་འདམ་པ་ལ་གསུང༌།ཉི་ཤུ་ལྔའི་ཉིན་མཁོ་བའི་ཡོ་བྱད་དུ་བྱིན་གྱིས་བརླབས་པའི་སྣམ་རས་བུབས་གཉིས་ཙམ་དང༌། ཕྱག་དཔེ་པོ་ཏི་བཞི་ཙམ་འདུག་པ་ཚོགས་སུ་འབུལ་བ་མཛད། ཉི་ཤུ་དྲུག་ལ་ཐོས་བསམ་གླིང་དུ་སྲོད་ཇ་གཅིག་གི་སྟེང་དུ་སྐུ་རིམ་བགྱི་བའི་ཞལ་ཏ་ཞུས་པས། ང་ལ་རིམ་གྲོ་གཏན་ནས་བྱེད་མི་དགོས་པ་ཡིན་ཏེ། ད་འོ་ན་དཔལ་ལྡན་ས་གསུམ་མ་ཐོན་ལ་རྗེ་ཉིད་ལ་གསོལ་བ་ཐོབ་ཅིག་གསུང༌། དེ་ནས་དགུང་ལོི་དོན་དྲུག་པ་ཤིང་ལུག་ཟླ་བ་ལྔ་པའི་ཉེར་བརྒྱད་ཀྱི་ནམ་ལངས་སུ་ཉེ་བ་ན་འཕོ་བ་མཛད་དེ། བྱམས་པའི་མདུན་སར་འཇམ་དཔལ་སྙིང་པོའི་ཞབས་དྲུང་དུ་གཤེགས་པར་མཛད། དེའི་ཚེ་འཇའ་དང་འོད་ལ་སོགས་པའི་ངོ་མཚར་བའི་ལྟས་དུ་མ་བྱུང་ངོ༌། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་ཐམས་ཅད་མཁྱེན་པ་དགེ་འདུན་གྲུབ་ཡབ་སྲས་འདི་གཉིས་ལ་གསོལ་བ་འདེབས་ཤིང་བདག་ཉིད་ཆེན་པོ་འདི་གཉིས་ཀྱི་རྣམ་ཐར་ལྟར་ཚུལ་ཁྲིམས་དག་ཅིང་ལྟ་གྲུབ་གཙང་བའི་སྒོ་ནས་གཞུང་ལུགས་གདམས་པར་ཤར་བའི་ཉམས་ལེན་ལ་བརྩོན་པ་ལྷུར་བླང་བར་བྱའོ། །
11/11 མདུན་ངོས། 上一页 9 10 11 |