| རས་ཟམ་སྟོང་ཕྲག་གཅིག རྟ་དཀར་པོ་རིན་པོ་ཆེའི་སྒ་སྲབ་ཀྱིས་སྤྲས་པ་གསུམ་གྱིས་གཙོས་པའི་རྟ་བརྒྱ་སོགས་འབུལ་བ་གྲངས་ཀྱིས་མི་ལང་བ་ཕུལ། ཕྱོགས་དེའི་དད་ལྡན་སེར་སྐྱ་ཐམས་ཅད་ལ་རང་རང་གི་དབང་པོ་དང་འཚམ་པའི་ཆོས་ཀྱི་བདུད་རྩི་སྩལ་ཞིང་ཐམས་ཅད་ཀྱང་མགོན་པོ་སྤྱན་རས་གཟིགས་དང་རྗེ་བཙུན་ཙོང་ཁ་པ་ཆེན་པོ་ལ་དད་པ་རྩེ་གཅིག་པའི་གནས་ལ་བཀོད་དེ་ཧོར་གྱི་ཡུལ་གྲུ་ཆེན་པོར་གནས་པའི་མི་དེ་དག་སྔོན་ཆད་ཟས་སུ་ཤ་དང་ཁྲག་ལ་དགའ་ཞིང༌། ལས་སུ་སྲོག་ཆགས་གསོད་པ་སོགས་སྡིག་པའི་ལས་འབའ་ཞིག་སྤྱོད་པ། བོན་སྣང་ཞེན་གྱིས་བསླུས་ཏེ་མི་ཤི་བའི་རྗེས་སུའང་སྲོག་ཆགས་མང་པོ་བསད་དེ་ལྷ་མཆོད་པ་སོགས་སྡིག་པའི་ལས་ཁོ་ན་སྤྱོད་པ་ལ་རྗེ་འདིས་སྡིག་པའི་ལྟ་བ་ཅན་དེ་དག་ཐམས་ཅད་བཏུལ་ཏེ་ཕྱོགས་དེ་དག་ཏུ་དཀོན་མཆོག་གསུམ་གྱི་རྟེན་བཞེང་བ་དང༌། ཡི་གེ་དྲུག་པ་དང་དམིགས་བརྩེ་མ་ཁོ་ན་འདོན་པ་དང༌། གཤིན་པོའི་དགེ་རྩར་ཡང་དཀོན་མཆོག་གསུམ་ཁོ་ན་མཆོད་པའི་སྲོལ་བཙུགས། འཇམ་མགོན་བླ་མའི་བསྟན་པ་ཡུན་རིང་དུ་གནས་པའི་ཕྱིར་ལི་ཐང་ཐུབ་ཆེན་བྱམས་པ་གླིང་དང༌། འཇམ་མགོན་བླ་མ་གང་དུ་འཁྲུངས་པའི་ས་སྐུ་འབུམ་སོགས་སུ་དགེ་འདུན་གྱི་སྡེ་མང་དུ་བཙུགས། ཁྱད་པར་སྐུ་འབུམ་དུ་རྗེ་རིན་པོ་ཆེ་འཁྲུངས་པའི་ལྟེ་བའི་མཚལ་ཁྲག་ལས་བྱུང་བའི་ཙན་དན་གྱི་སྡོང་པོ་འཇིག་རྟེན་ཀུན་གྱི་བསོད་ནམས་ཀྱི་ཞིང་མཆོག་དམ་པ་དེ་ཉིད་དངུལ་གྱིས་བཏུམས་ཏེ་མཆོད་རྟེན་དུ་བྱས། མདོ་སྔགས་གཉིས་ཀྱི་བཤད་གྲྭ་རྣམ་པར་དག་པ་བཙུགས་པ་སོགས་ཕྱོགས་དེ་དག་ཐམས་ཅད་འཇམ་མགོན་བླ་མའི་བསྟན་པའི་གདུགས་གཅིག་གིས་ཁྱབ་པར་མཛད་དོ། །དོན་གྱི་དབང་འདི་གཟིགས་ནས་རྗེ་བཙུན་བློ་བཟང་ཆོས་ཀྱི་རྒྱལ་མཚན་གྱིས་རྗེ་འདི་ལ་བསྟོད་པ་མཛད་པ་ན། བདག་ཉིད་ཆེན་པོ་གཞན་གྱིས་གདུལ་དཀའ་བ། །མ་རུངས་མཐའ་འཁོབ་སྐྱེ་བོ་མཐའ་དག་ལ། །བསོད་ནམས་ཡེ་ཤེས་རྒྱ་མཚོའི་མཐར་ཕྱིན་པའི། །རྒྱལ་བའི་མཛད་པ་སྒྲུབ་ལ་གསོལ་བ་འདེབས། །ཞེས་དང༌། རྗེ་བློ་བཟང་ཡེ་ཤེས་ཀྱིས། གདུལ་དཀའ་མཐའ་འཁོབ་སྐྱེ་འགྲོར་ཐར་པའི་ལམ། །སྟོན་མཁས་བསོད་ནམས་རྒྱ་མཚོར་གསོལ་བ་འདེབས། །ཞེས་བསྔགས་སོ། །རྗེ་འདིས་ཕྱི་རབས་ཀྱི་གདུལ་བྱ་རྣམས་ཀྱི་དོན་དུ་བྱང་ཆུབ་ལམ་གྱི་རིམ་པའི་ཁྲིད་ཡིག་གསེར་གྱི་ཡང་ཞུན་མཛད་ཅིང༌། གཞན་ཡང་གསོལ་འདེབས་བསྟོད་ཚོགས་དང་ཉམས་མགུར་སོགས་མང་དུ་ཡོད་དོ། །དེ་ནས་སེ་འབྲས་དགེ་གསུམ་སོགས་དབུས་གཙང་གི་ལྗོངས་ཀྱི་སེར་སྐྱ་དད་ཅན་ཚང་མས་དབུས་གཙང་དུ་འབྱོན་དགོས་པར་གསོལ་བ་ཤུགས་དྲག་བཏབ། རྗེ་འདི་ཉིད་ཀྱང་ཡར་འབྱོན་པར་ཕྱོགས་ཀྱང་ཁར་ཆིན་གྱི་རྒྱལ་པོས་ཕོ་ཉ་མངགས་ཏེ། མཐའ་འཁོབ་ཀྱི་ས་ཕལ་ཆེར་ན་འཁོད་པའི་གདུལ་བྱའི་རེ་བ་སྐོང་བར་མཛད་ཟིན་པས། ངེད་ཀྱི་ཡུལ་དུ་ཕེབས་དགོས་པའི་རྒྱུ་མཚན་ནན་དུ་ཕུལ་བས། ཀུན་མཁྱེན་ཟས་གཙང་སྲས་པོ་གྱད་ཀྱི་ཡུལ་རྩྭ་ཅན་དུ་གཤེགས་པ་ལྟར། ཁར་ཆེན་གསེར་ཡིག་པར་ཕེབས་པའི་བཀའ་ལན་གནང་སྟེ། བཞུགས་སྒར་རིམ་གྱིས་བཏེག་ནས། ཧོར་རྒྱལ་པོའི་དུས་ཀྱི་ཕོ་བྲང་ཤང་ཏོ་ཞེས་པའི་ཤུལ་གྱི་སར་ཕྱགས་ཕེབས། རྒྱལ་བློན་འགའ་ཞིག་ལ་བཅོམ་ལྡན་འདས་ཀྱེེ་རྡོ་རྗེའི་དབང་དང༌། སྐྱེ་བོ་ཕལ་ཆེར་ཡན་ལག་བརྒྱད་པའི་ཁྲིམས་སོགས་དགེ་བ་ལ་བཀོད། རྒྱལ་པོའི་འབུལ་ཆེན་གྱི་དུས། དངུལ་ལས་གྲུབ་པའི་ཁང་པ་ཀ་གཉིས་མ་ཙམ་ཞིག་ཏུ་བཞུགས་གདན་བཀོད་པས། རེ་ཞིག་སྔས་པ་ཙམ་ཡིན་ཡང་འདོད་པ་དང་བསྟུན་པས་ཆོག་གསུངས་ཏེ། དངུལ་གདུང་གི་རྟེན་འབྲེལ་དུ་དགོངས། གསེར་དངུལ་གོས་དར་རྟ་ཁྲབ་སོགས་འབུལ་བ་ཁྲི་ཕྲག་བརྒལ་བ་ཕུལ། དེར་དགེ་འདུན་གྱི་སྡེ་བཙུགས་འདུག་པ་ལ་རབ་ཏུ་གནས་པ་རྒྱས་པར་མཛད། ཀུན་འཛིན་ཞེས་པ་ས་བྱིའི་ལོ་གསར་དང༌། སྨོན་ལམ་རླབས་པོ་ཆེ་གནང༌། ཟླ་བ་དང་པོའི་མཇུག་ནས་ཅུང་ཟད་བྲོ་འཚལ་བའི་རྣམ་པ་བསྟན། རྒྱ་ནག་གོང་མ་རྒྱལ་པོས་ཕོ་བྲང་དུ་ཕེབས་དགོས་པའི་གདན་འདྲེན་པར་མི་བརྒྱད་ཀྱིས་གཉའ་བས་བཏེག་པའི་གསེར་ཡིག་པ་མངགས་ཀྭ་དིང་ཏའི་གཽ་ཤྲྰིའི་མཚན་དང༌། ལས་ཀ་ཆེ་བ་འདི་རིས་བྱུང༌། རྟེན་འབྲེལ་དུ་དགོངས་ནས་ཕོ་བྲང་དུ་ཕེབས་པའི་ཞལ་བཞེས་མཛད། ནག་པ་ཟླ་བ་ནས་སྙུན་བབ་ལྕི་བའི་ཚུལ་བསྟན་ཏེ། གསུང་གི་ཐ་མ་དད་ལྡན་ཡོངས་ལ་ཞལ་གདམས་ཕྱག་བྲིས་སུ་མཛད་ནས་སྐུ་ཚེ་འདིའི་དངོས་ཀྱི་གདུལ་བྱ་རྫོགས་པ་ན་དགུང་ལོ་ཞེ་དྲུག་ཏུ་ཕེབས་པ་ཀུན་འཛིན་ཞེས་པ་ས་ཕོ་བྱི་བའི་ལོ་ནག་པ་ཟླ་བའི་ཉེར་དྲུག་གི་ཐོ་རངས་ཞི་བར་གཤེགས་ཏེ་དགའ་ལྡན་ཆོས་ཀྱི་ཕོ་བྲང་དུ་མི་ཕམ་འཇམ་དཔལ་སྙིང་པོའི་ཞབས་དྲུང་དུ་གཤེགས་སོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་རྒྱལ་བ་བསོད་ནམས་རྒྱ་མཚོ་ལ་གསོལ་བ་འདེབས་ཤིང༌། རྗེ་འདིས་ལམ་ཁྲིད་གསེར་ཞུན་དུ་ཇི་ལྟར་གདམས་པ་ལྟར་གསུང་རབ་ཐམས་ཅད་ཀྱི་སྙིང་པོའི་གནད་བསྡུས་པ་བྱང་ཆུབ་ལམ་གྱི་རིམ་པའི་ཉམས་ལེན་ལ་བརྩོན་པར་བྱའོ། ། 4/4 མདུན་ངོས། 上一页 2 3 4 |
|
|
|
|
|
 |
ཉེ་ལམ་གསར་བརྗེས། |
|
|
|
|
|
|
|
|
ཀློག་མཁན་མང་ཤོས། |
|
|
|
|
|
|
| |
|
