༈   རྗེ་ཐམས་ཅད་མཁྱེན་པས་སྐལ་བ་དང་ལྡན་པ་བགྲང་བ་ལས་འདས་པ་ལ་བྱང་ཆུབ་ལམ་གྱི་རིམ་པའི་ཁྲིད་སྩལ་ཅིང༌།   རྗེའི་ཐུགས་སྲས་མཁས་གྲུབ་དམ་པས་ནུབ་ཛཱ་ལནྔྷ་ར་ནས་ཤར་ཕྱོགས་རྒྱ་མཚོའི་མཐའ་ལ་ཐུག་གི་བར་ཁྱབ་པས་རྗེ་བདག་ཉིད་ཆེན་པོ་ནས་བྱང་ཆུབ་ལམ་གྱི་རིམ་པའི་ཁྲིད་ཀྱི་བརྒྱུད་ཚུལ་ཡང་དེ་སྙེད་བྱུང་མོད། དེང་སང་ཡོངས་སུ་གྲགས་པ་ནི་བདེ་ལམ་དང་འཇམ་དཔལ་ཞལ་ལུང་གི་ཁྲིད་རྒྱུན་གཉིས་སུ་བཞུགས་པ་ལས། བདེ་ལམ་གྱི་ཁྲིད་རྒྱུན་ལྟར་དཔལ་དབེན་ས་སྙན་རྒྱུད་ཀྱི་བླ་མ་གོང་མ་གཅིག་ནས་གཅིག་ཏུ་བརྒྱུད་པའི་བརྒྱུད་རིམ་ལྟར་གྱི་བླ་མ་རྣམས་ཀྱི་རྣམ་པར་ཐར་པ་མདོར་བསྡུས་བརྗོད་ཟིན་ནས། འཇམ་དཔལ་ཞལ་ལུང་གི་རྒྱུད་འདེབས་ལས་འབྱུང་བ་ལྟར་རྗེ་རིན་པོ་ཆེ་ནས་མཁས་གྲུབ་ཤེས་རབ་སེངྒེ་དང༌། དེ་ནས་རྗེ་དགེ་འདུན་གྲུབ་སོགས་ལ་རིམ་གྱིས་བརྒྱུད་པའི་བླ་མ་རྣམས་ཀྱི་རྣམ་པར་ཐར་པ་བརྗོད་པ་ནི།   མཁས་གྲུབ་ཆེན་པོ་ཤེས་རབ་སེངྒེའི་ཞབས། །ཞེས་བསྔགས་པ། མཁས་གྲུབ་ཆེན་པོ་ཤེས་རབ་སེངྒེ་ནི་གཙང་གི་སའི་ཆ་སྲད་ཀྱི་གུར་མ་ཞེས་བྱ་བར་ཡབ་དམ་པ་དམར་པོ་ཞེས་བྱ་བ་དང༌། ཡུམ་ཆོས་སྐུ་བཀྲ་ཤིས་གཉིས་ཀྱི་སྲས་སུ་སྐུ་འཁྲུངས། གཞོན་ནུའི་དུས་ནས་སྔོན་གྱི་བག་ཆགས་བཟང་པོ་སད་པའི་མཐུས་ཁྱིམ་གྱི་འདུ་འཛི་ལ་མི་དགའ་ཞིང་དམ་པའི་ཆོས་འཚོལ་པ་ལ་ངང་གིས་གཞོལ་བ་ཞིག་བྱུང་ངོ༌།   །དེ་ནས་དགུང་ལོ་བཅུ་གསུམ་བཞེས་པའི་ཚེ་ན་ནི་དལ་འབྱོར་གྱི་ལུས་ཐོབ་པའི་དུས་འདིར་འཁོར་བ་ལས་ཐར་པའི་ཐབས་ཤིག་བྱ་དགོས་པར་འདུག   དེ་ཡང་དེང་བྱ་སང་བྱའི་ངང་དུ་ལུས་ན་ཚེ་འདིའི་སྣང་ཤས་ཀྱིས་བསླུས་ནས་དལ་བ་སྟོང་ལོག་ཏུ་སོང་སྟེ་འཆི་བའི་ཉེན་ཡོད་པས་འཕྲལ་རང་དུ་རྒྱལ་བའི་བསྟན་པ་ལ་རབ་ཏུ་བྱུང་ནས་མདོ་སྔགས་གསུང་རབ་རྣམས་ལ་ཐོས་བསམ་སྒོམ་གསུམ་ཚུལ་དང་མཐུན་པ་ཅིག་བྱེད་དགོངས་པ་དང༌། མནལ་ལམ་དུ་རྗེ་བཙུན་སྒྲོལ་མས་ད་མྱུར་དུ་རབ་ཏུ་བྱུང་ན་ལེགས་སོ་ཞེས་བསྐུལ་བ་ལ་བརྟེན་ནས་དགུང་ལོ་བཅུ་བཞི་བཞེས་པའི་ཚེ་སངས་རྒྱས་སྨན་པའི་རྒྱལ་པོའི་རྣམ་འཕྲུལ་མཁན་ཆེན་གྲུབ་པ་ཤེས་རབ་གྱིས་མཁན་པོ་མཛད།   ལས་སློབ་དུས་གོ་བ་དགེ་འདུན་དང་བཅས་པའི་དབུས་སུ་དགེ་བསྙེན་གྱི་སྡོམ་པ་དང༌།   བར་མ་རབ་བྱུང་གི་ཚུལ་ཁྲིམས་དང༌། དགེ་ཚུལ་གྱི་སྡོམ་པ་བཞེས་ཤིང་མཚན་ཤེས་རབ་སེངྒེ་ཞེས་འདོགས་པར་གནང༌།སྔར་ནས་ངོ་ཚ་དང་བག་ཡོད་ལ་གནས་པའི་སྟེང་དུ།  འདི་ནས་བཟུང་སྟེ་དགེ་ཚུལ་གྱི་བསླབ་བྱ་རྣམས་ལ་ལེགས་པར་སློབ་པར་མཛད་པས་གཞོན་ནུ་ནས་བཙུན་པའི་མཆོག་ཏུ་གྱུར་པ་ཅིག་བྱུང༌།     དེ་ནས་སློབ་དཔོན་མཁས་པ་ཞིག་ལ་བརྟེན་ནས་ཕྱག་བྲིས་སློབ་པ་དང་འབྲི་བ་ལ་སྦྱངས་བདར་གནང་བས་ཚེགས་མེད་པར་མཁྱེན་པར་གྱུར། དེ་འཕྲལ་བསྟན་བཅོས་མངོན་རྟོགས་རྒྱན་འགྲེལ་པ་དང་བཅས་པ་ཐུགས་ལ་བཟུང་སྟེ་ཞལ་འདོན་ལན་མང་དུ་གནང་བའི་ཚེ།   ལན་ཅིག་གཟིགས་སྣང་ལ་ནུབ་ཕྱོགས་ནས་བླ་གོས་ངུར་སྨྲིག་བཞེས་པ།  དབུ་གཙུག་ཏོར་དང་བཅས་པ།   ཕྱག་ན་གསིལ་བྱེད་དང་ལྷུང་བཟེད་བསྣམས་པ་ཞི་ཞིང་འཛུམ་པ་ཞིག་བྱོན་ནས་བྱིན་གྱིས་བརླབས་པའི་དག་པའི་མཚན་མ་བཟང་པོ་བྱུང་སྟེ།   དེ་ནི་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་དང་མཇལ་བའི་ལྟས་སུ་མངོན་ཞེས་རྗེ་ཉིད་གསུང༌། དེ་ནས་མཁས་པ་ཆེན་པོ་གཡག་ཕྲུག་པ་སངས་རྒྱས་དཔལ་དེ་ཉིད་མཁན་ཆེན་གྲུབ་པ་ཤེས་རབ་མཇལ་བར་ཕེབས་པ་ལ་མཁན་ཆེན་པས་རྗེ་འདི་ཉིད་ཀྱིས་གཙོ་མཛད་པའི་བློ་གསལ་འགའ་ཞིག་སྦྱོར་གཏད་གནང་སྟེ་ཁྱེད་ཀྱིས་བློ་གསལ་དོན་གཉེར་ཅན་འདི་རྣམས་རེ་ཞིག་ཆོས་དང་ཟང་ཟིང་གཉིས་ཀས་ལེགས་པར་སྐྱོངས་ཤིག་ཅེས་བཀའ་སྩལ་བ་བཞིན་ཞལ་གྱིས་བཞེས་ནས་དེ་བཞིན་མཛད་པས་དམ་པ་འདི་ཉིད་ཀྱིས་མཁས་པ་ཆེན་པོ་སངས་རྒྱས་དཔལ་ལ་བརྟེན་ནས་བྱམས་ཆོས་ལྔ་དང༌། དབུ་མ་རིགས་ཚོགས་དྲུག འཇུག་པ་རྩ་འགྲེལ། སྤྱོད་འཇུག   ཚད་མ་མདོ་དང་སྡེ་བདུན་སོགས་ལ་སྦྱངས་པ་མཛད་པས་དེ་དག་གི་ཚིག་དོན་ལ་མཁས་པར་གྱུར་ཅིང་མཁས་པ་ཆེན་པོ་སངས་རྒྱས་དཔལ་བས་ཀྱང་རྗེ་འདི་ལ་མཁས་གྲུབ་ཆེན་པོར་མཚན་གསོལ། དེ་ནས་དགུང་ལོ་ཉི་ཤུ་བཞེས་པའི་ཚེ་སྣར་ཐང་དུ་ཚིགས་སྔ་མའི་མཁན་པོ་མཁན་ཆེན་གྲུབ་པ་ཤེས་རབ་ཀྱིས་མཁན་པོ་མཛད་ཅིང༌། གཞན་ཡང་ལས་ཀྱི་སློབ་དཔོན། གསང་སྟེ་སྟོན་པ།   གྲིབ་ཚོད་པ། ཁ་སྐོང་གི་དགེ་འདུན་རྣམས་ཚང་བའི་དབུས་སུ་དགེ་སློང་གི་སྡོམ་པ་ལེགས་པར་བཞེས་ཏེ་བསྟན་པ་རིན་པོ་ཆེ་ལ་ཞུགས་ལ་ཡོངས་སུ་རྫོགས་པའི་དཔལ་ཐོབ།   དེ་ནས་བཟུང་སྟེ་དགེ་སློང་གི་བསླབ་བྱ་རྣམས་ལ་ཚུལ་བཞིན་དུ་སློབ་པར་མཛད་པས་འཇིག་རྟེན་གྱི་ཡོན་གནས་དམ་པར་གྱུར། གཞན་ཡང་སྣར་ཐང་དུ་བཞུགས་སྐབས་སུ་གཙོ་བོར་སྔར་སྨོས་པའི་མཚན་ཉིད་ཀྱི་གཞུང་རྣམས་ལ་སྦྱོང་བར་མཛད་ཅིང༌།   ཞར་ལ་དེའི་མཁན་སློབ་སོགས་ལ་དབང་དང་རྗེས་གནང་དང༌། ལུང་དང་བཤད་པ་སོགས་ཆོས་བཀའ་རྣམ་གྲངས་མང་པོ་གསན་པར་མཛད་པས།   གནས་དེའི་མཁན་སློབ་དགེ་འདུན་གྱི་སྡེ་དང་བཅས་པ་རྣམས་ཀྱིས་བསྔགས་པའི་གནས་སུ་གྱུར།   དེ་ནས་སྔོན་གྱི་སྨོན་ལམ་དང་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་མཁས་བཙུན་བཟང་གསུམ་གྱི་སྙན་གྲགས་གསན་པས་རྐྱེན་བྱས་ནས་དབུས་སུ་ཕེབས།   རིམ་གྱིས་ར་ས་འཕྲུལ་སྣང་དང་ར་མོ་ཆེ་སོགས་ཀྱི་རྟེན་རྣམས་མཇལ་ཏེ་ཕྱག་དང་བསྐོར་བ་སྨོན་ལམ་འདེབས་པ་རྣམས་ལ་ནན་ཏན་ཆེན་པོ་གནང༌།   དེ་དུས་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་དགེ་ལྡན་རྣམ་པར་རྒྱལ་བའི་གླིང་ན་དབུས་གཙང་ཁམས་གསུམ་ནས་ཕེབས་པའི་དགེ་བའི་བཤེས་གཉེན་ཆོས་དོན་དུ་གཉེར་བ་རྣམས་ལ་ཆོས་ཀྱི་འཁོར་ལོ་བསྐོར་བའི་སྐབས་སུ་ཕེབས། དེ་ནས་གཟིམ་ཁང་དཀར་མོར་རྗེ་རིན་པོ་ཆེ་མཇལ་བར་ཕེབས་པས་རྗེ་ཐམས་ཅད་མཁྱེན་པའི་སྐུ་གཟིགས་པ་ཙམ་གྱིས་སངས་རྒྱས་ཀྱི་འདུ་ཤེས་འཁྲུངས་ཏེ་དད་གུས་བཅོས་མ་མིན་པ་འཁྲུངས། དུས་དེ་ནས་བཟུང་སྟེ་རྗེ་ཐམས་ཅད་མཁྱེན་པ་བསམ་སྦྱོར་གཉིས་ཀྱི་སྒོ་ནས་ཚུལ་བཞིན་དུ་བསྟེན་ནས་དུས་གསུམ་གྱི་རྒྱལ་བ་ཐམས་ཅད་ཀྱི་བགྲོད་པ་གཅིག་པའི་ལམ་པོ་ཆེ་བྱང་ཆུབ་ལམ་གྱི་རིམ་པ་སོགས་མདོ་སྔགས་ཀྱི་དམ་པའི་ཆོས་མང་པོ་གསན། དེ་ནས་རྒྱལ་བ་ཙོང་ཁ་པ་ཆེན་པོས་མཐུན་རྐྱེན་དང་བཅས་ནས་སྐྱོར་མོ་ལུང་དུ་མཁན་པོ་བསམ་གཏན་དོན་གྲུབ་པའི་དྲུང་དུ་འདུལ་བ་དང་མངོན་པ་གསན་པ་ལ་རྫོང་བ་གནང༌། རྗེ་འདི་ཉིད་ཀྱིས་དེར་ཕེབས་ཏེ་འདུལ་མངོན་གཉིས་ལ་གསན་སྦྱོང་མཐར་ཕྱིན་པར་མཛད། དེ་ནས་རྒྱལ་བ་ཙོང་ཁ་པ་ཆེན་པོ་མིའི་དབང་པོ་གྲགས་པ་རྒྱལ་མཚན་གྱིས་འོན་མདའ་བཀྲ་ཤིས་དོ་ཁར་གདན་དྲངས་པའི་ཕྱགས་ཕྱིར་རྗེ་འདི་ཉིད་ཀྱིས་ཕེབས་ནས་དེར་དབུ་མ་རྩ་ཤེའི་རྣམ་བཤད་དྲང་ངེས་རྣམ་འབྱེད། ཚད་མ་རྣམ་ངེས་ཀྱི་དཀའ་གནས། རྩ་ལྟུང་རྣམ་བཤད་རྣམས་གསན།དེ་རྗེས་ཆོས་རྗེ་གུང་ཐང་པ་མཛེས་པ་དཔལ་ལ་ཆོས་གསན་པར་ཕེབས་པའི་དྲུང་དུ་འཁོར་ལོ་སྡོམ་པ་ལུས་དཀྱིལ་གྱི་དབང་གསན་ཞིང༌། ཐམས་ཅད་མཁྱེན་པ་དགེ་འདུན་གྲུབ་པ་ཡང་དེར་བྱོན་ནས་རྗེ་རིན་པོ་ཆེ་དང་མཇལ། དེ་ནས་རྒྱལ་བ་ཙོང་ཁ་པ་ཆེན་པོ་ཕྱིར་དགེ་ལྡན་དུ་ཕེབས། རྗེ་འདི་པས་རྒྱལ་བ་ཙོང་ཁ་པའི་བཀའ་བཞིན་དུ་གསང་ཕུར་ཕེབས་ནས་རྗེ་དགེ་འདུན་གྲུབ་པ་སོགས་བཤེས་གཉེར་མང་པོ་ལ་ལེགས་བཤད་ཀྱི་དགའ་སྟོན་ཐོག་མར་སྩལ་ཅིང༌། དཔལ་འཁོར་ལོ་སྡོམ་པ་ལུས་དཀྱིལ་གྱི་བདག་འཇུག་གི་ཆོ་ག་མང་དུ་མཛད། དེ་ནས་སྣོན་གྱི་འཆད་དགོན་ཞེས་པར་ཕེབས་ཏེ་ཆོས་འཆད་ཉན་ལ་བརྩོན་པར་མཛད་པའི་ཚེ་མནལ་ལམ་དུ་དཔལ་ལྡན་ཆོས་གྲགས་ཀྱིས་བྱིན་གྱིས་བརླབས་ནས། རིགས་ཀྱི་བུ། དེ་རིང་ནས་ཁྱོད་ཀྱི་ཚེའི་ཕྱེད་རྫོགས་སོ་ཞེས་གསུངས་ཏེ་མི་སྣང་བར་གྱུར།མནལ་ལམ་དེའི་ལྟས་དཔལ་ལྡན་ཆོས་གྲགས་ཀྱི་གཞུང་ལ་བརྟེན་ནས་གཞན་ལ་ཕན་པ་རྒྱ་ཆེན་པོ་འབྱུང་བ་དང་དགུང་ལོ་རེ་གསུམ་ཐུབ་པའི་ལྟས་སུ་མངོན་ཞེས་རྗེ་ཉིད་གསུང་ངོ༌།  །

 1/3    1 2 3 下一页 尾页