ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་རྗེ་བཙུན་རེད་མདའ་བ་གཞོན་ནུ་བློ་གྲོས་ཀྱི་རྣམ་ཐར།
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
ཡོངས་འདུ་ཚལ་དུ་དགའ་བདེའི་དཔལ་གྱིས་རོལ། །འཆི་མེད་ཉེ་དབང་ཚོགས་ཀྱིས་གུས་བཏུད་པའི། །འཕྲོག་བྱེད་མིག་སྟོང་ལྡན་དེའང་སྲིད་པའི་བྲན། །ལུས་སེམས་ཟུག་རྔུའི་གདུང་བ་རིང་དུ་སྤངས། །ཏིང་འཛིན་བདེ་བས་བསྐལ་མང་འདའ་བྱེད་པའི། །འཇིག་རྟེན་མེས་པོ་གསེར་གྱི་མངལ་ལྡན་ཡང༌།   །འཆི་མེད་གོ་འཕང་ལས་རིང་གྱི་ནར་འཁོར། །གང་གིས་རེག་ན་རབ་བརྟན་ལྷུན་པོ་ཡང༌། །སྐད་ཅིག་ཙམ་གྱིས་ཐལ་བར་རློག་བྱེད་པའི།   །མེ་ལྕེའི་ཕྲེང་བ་ལུས་ལ་རབ་འབར་བ། །དམྱལ་བའི་ཟུག་རྔུ་སུ་ཡིས་བརྣག་པར་ནུས།    །བལྟས་པ་ཙམ་གྱིས་ཀླུང་ཆེན་རྒྱུན་སྐེམས་ཤིང༌། །ལྗོན་ཤིང་འབྲས་བུ་མེད་པར་བྱེད་པ་ཡི།   །ཏ་ལ་ཡ་ཏོག་སྐམ་ལྟའི་ཡི་དྭགས་གཟུགས། །གང་ཞིག་མཐོང་ན་འཇིགས་རུང་སྐྱི་ཡང་གཡའ། །བླང་དོར་རྨོངས་པའི་གཏི་མུག་སྨག་རུམ་འཐིབ། །གཅིག་ལ་གཅིག་ཟ་རྡོ་རྗེའི་མེ་སྟག་དང༌།   །བཀོལ་བཙོག་ཆར་རྒྱུན་ལུས་ལ་རྟག་འབབ་པའི། །རྣམ་མང་དུད་འགྲོའི་གདུང་བ་སུ་ཡིས་བཟོད།    །སྲིད་པའི་ཕུན་ཚོགས་དེ་ལྟར་མནོག་ཆུང་ཞིང༌། །རབ་མང་ཉེས་པའི་ཚོགས་དང་ལྡན་རིག་ནས།   །རང་གཞན་སྲིད་པའི་མཚོ་ལས་བསྒྲལ་བྱའི་ཕྱིར། །མང་ཐོས་བདག་ནི་དབེན་པའི་ནགས་སུ་འགྲོ།   །ཆར་སྡོད་བྱེའུས་འབྲུག་སྒྲ་ཐོས་པ་ལྟར། །དབེན་པའི་གཏམ་འདི་ཁོ་བོའི་སྙིང་ལ་འབབ། །ཐོས་པའི་དོན་རྣམས་དོན་ཡོད་བྱ་བའི་ཕྱིར། །གཞོན་ནུ་བློ་གྲོས་དབེན་པའི་ནགས་སུ་འགྲོ།   །ངང་པའི་ཚོགས་ཀྱིས་པངྨའི་མཚོ་མཐོང་ལྟར། །བས་མཐའི་གནས་ལ་ཁོ་བོ་སེམས་རབ་གཡོ། །དལ་འབྱོར་ལུས་ལ་སྙིང་པོ་བླང་བའི་ཕྱིར།    །གཞོན་ནུ་བློ་གྲོས་དབེན་པའི་ནགས་སུ་འགྲོ། །བུང་བ་གཞོན་ནུས་འདབ་བརྒྱའི་ཚལ་མཐོང་ལྟར།    །ཁོ་བོའི་ཡིད་ནི་དབེན་པའི་རོ་ལ་ཆགས། །ཏིང་འཛིན་བདུད་རྩིའི་རོ་དེ་མྱང་བྱའི་ཕྱིར། །གཞོན་ནུ་བློ་གྲོས་དབེན་པའི་ནགས་སུ་འགྲོ། །དཔྱིད་དུས་བསིལ་བའི་མ་ལ་ཡ་རླུང་ལྟར།  །ནགས་ཀྱི་སྨན་ལྗོངས་ཁོ་བོའི་ཡིད་ལ་འབབ། །ཉོན་མོངས་བདུད་ཀྱི་སྡེ་དེ་གཞོམ་བྱའི་ཕྱིར། །གཞོན་ནུ་བློ་གྲོས་དབེན་པའི་ནགས་སུ་འགྲོ། །ཞེས་དང༌། འཇིག་རྟེན་འདྲེན་པ་ལྷ་མིའི་སྟོན་པ་ཡིས། །འདོད་ལ་ཞེན་པ་ཕུང་ཀྲོལ་རྩ་བར་བསྟན། །འདོད་པའི་ཡོན་ཏན་སྡུག་བསྔལ་བསྐྱེད་པ་སྟེ།   །ནད་དང་འབྲས་དང་ཟུག་རྔུའི་རྩ་བ་ཡིན། །ཇི་ལྟར་མཛེ་ཅན་གཡན་པ་ཕྲུགས་པ་དང༌། །ཚ་བའི་ནད་ཅན་བསིལ་བའི་ཆུ་དང་ནི།    །སྐོམ་པས་ཉེན་པ་ལན་ཚྭའི་ཆུ་འཐུངས་བཞིན། །འདོད་པ་བསྟེན་པས་ནམ་ཡང་ངོམས་མི་འགྱུར།    །དུག་དང་བཅས་པའི་ཁ་ཟས་གཡོས་ལེགས་དང༌། །སྤུ་གྲིའི་སོ་ལ་ཆགས་པའི་སྦྲང་རྩི་དང༌། །ཤིང་རྟ་འདྲེན་པའི་ཕྱུགས་ཀྱིས་རྩྭ་ཟོས་བཞིན། །འདོད་པའི་ཡོན་ཏན་གནོག་ཆུང་ཉེས་པ་མང༌།   །གླང་ཆེན་དྲི་ལ་ཆགས་པའི་སྦྲང་བུ་དང༌། །རྔོན་པའི་གླུ་དབྱངས་ཉན་པའི་རི་དྭགས་དང༌།   །ལྕགས་ཀྱུའི་ཤ་ལ་ཆགས་པའི་ཉ་བཞིན་དུ། །འདོད་ལ་རྐམ་པའི་བྱིས་པ་མྱུར་དུ་བརླག །ཅེས་སོགས་གསུངས་ནས། དབེན་པའི་གནས་སུ་སྒྲུབ་པ་སྙིང་པོར་མཛད་ཕྱིར་བལ་བོད་ཀྱི་སའི་མཚམས་མང་ཡུལ་སྐྱིད་གྲོང་གི་ནགས་ཁྲོད་དུ་ཕེབས་ཏེ། དྲང་སྲོང་མངོན་པར་དགའ་བའི་བསྟི་གནས་མེ་ཏོག་མདངས་ཅན་དུ་རྒྱལ་བའི་སྲས་པོ་ཐོས་པ་དགའི་རྣམ་ཐར་བསྐྱངས་ཏེ་སྒྲུབ་པ་ལ་རྩེ་གཅིག་ཏུ་བཞུགས་སོ།    །དེའི་ཚེ་བདག་ཉིད་ཆེན་པོ་འདིའི་རྗེས་སུ་འབྲངས་ནས་དབེན་པའི་གནས་སུ་སྒྲུབ་པ་རྩེ་གཅིག་ཏུ་བྱ་འདོད་པའི་སྡེ་སྣོད་འཛིན་པ་མང་པོའང་ཕྱོགས་དེར་ལྷགས་ཏེ་དུས་དུས་སུ་རྗེ་བཙུན་རེད་མདའ་པ་ཆེན་པོ་འདི་ལ་ཆོས་སྟོན་པར་གསོལ་བ་བཏབ་ནས་ཆོས་ཀྱི་བདུད་རྩི་ཞུ་ཞིང༌། རྒྱུན་དུ་ནགས་ཁྲོད་དབེན་པ་སོ་སོར་སྒྲུབ་པ་ལ་བཞུགས་ཏེ་འགའ་ཞིག་ནི་གཅིག་པུ་དང༌། ལ་ལ་ནི་བཞི་སྡེ་དང༌། ལ་ལ་ནི་བརྒྱད་དང༌། ལ་ལ་ནི་ཉི་ཤུ་སོགས་སྤོང་བ་པ་སྡེ་སྡེར་གནས་ནས་སྒྲུབ་པ་མཛད་དེ་མེ་ཏོག་མདངས་ཅན་གྱི་གཡས་གཡོན་གྱི་རི་ངོས་རྣམས་དང༌། མ་ཎི་ལ་ཁ། བྲག་ཁ། ཕུག་པོ་ཆེ། ཆོས་སྡིངས། ལྷ་ལྔ་ཕུག ལ་ལྡེབས་ཆོས་རྫོང༌། རྐྱང་ཕན་ནམ་མཁའ་རྫོང༌།ཀློང་རྩེ་བསམ་གཏན་གླིང༌། དགུན་ཕུ་དགོན་གསར།    རྩྭའི་རྐང་ཚུགས་ཕུག་སོགས་སུ་བསླབ་གསུམ་ལྡན་པའི་དགེ་སློང་སྤོང་བ་པ་མང་པོ་གནས་ཏེ་སྔོན་སངས་རྒྱས་ཞལ་བཞུགས་པའི་དུས་དང༌། སྒྲུབ་པའི་དུས་ཀྱི་བསྟན་པ་ལྟར་ལམ་ཆ་ཚང་ལ་སྒྲུབ་པ་མཛད་པས་ཕྱོགས་དེ་གང་སྟེ་དཀར་ཕྱོགས་ཀྱི་ལྷ་རྣམས་དགའ་ཞིང་མགུ་ནས་ཤིས་པ་བརྗོད་པ་ཞིག་བྱུང་ངོ༌། །དེ་དུས་རྗེ་བཙུན་ཙོང་ཁ་པ་ཆེན་པོས་ཀྱང་རྗེ་རེད་མདའ་པ་ཆེན་པོའི་དྲུང་དུ་སྒྲུབ་པ་མཛད་པ་རྣམས་ལ་བསྔགས་པ་ཆེ་བར་མཛད་དོ།    །གྲུབ་ཐོབ་ཐང་སྟོང་རྒྱལ་པོས་ཀྱང་རྗེ་བཙུན་རེད་མདའ་པ་ཆེན་པོའི་སྙན་པ་གསན་ནས་མེ་ཏོག་མདངས་ཅན་དུ་མཇལ་བར་ཕེབས་ཏེ་ཆོས་གསན་པས་ཐོག་མར་ཐུགས་ཆོས་ལ་འགྱུར་བའི་རྐྱེན་བྱས་པར་གྲགས་སོ།   །བདག་ཉིད་ཆེན་པོ་འདིས་རྒྱལ་བའི་དགོངས་པ་ཤིང་རྟ་ཆེན་པོ་རྣམ་གཉིས་ཀྱིས་ཇི་ལྟར་བཀྲལ་བའི་དོན་ལྟར་དང་པོར་དྲི་མ་མེད་པའི་རིགས་པས་གསུང་རབ་ཀྱི་དགོངས་དོན་རྙེད་པར་མཛད་པ་ནི། ཉིད་ཀྱི་ཞལ་ནས།   སྟོན་པ་འདས་ནས་བཞི་བརྒྱའི་ལོ་འདས་ཚེ།  །བེ་ཏའི་ཡུལ་དུ་ལི་ཙ་བྱི་གཞོན་ནུ། །ཀླུ་སྒྲུབ་ཅེས་བྱའི་དགེ་སློང་དུ་གྱུར་ནས། །ཐུབ་བསྟན་རྒྱས་པར་མདོ་སྡེའི་ཚོགས་ལས་གསུངས།    །ཀླུ་ཡི་ཡུལ་སོགས་འཇིག་རྟེན་གཞན་དག་ནས། །ཟབ་ཅིང་རྒྱ་ཆེའི་མདོ་སྡེ་རྣམ་མང་བླངས།   །རྟག་ཆད་མཐར་ལྟའི་མུན་པ་སྟུག་པོ་བཅོམ། །མཐའ་བྲལ་དབུ་མའི་སྒྲོན་མེ་དེ་ཡིས་སྦར།   །དེ་འོག་ཐུབ་པས་ལུང་བསྟན་ཐོགས་མེད་ཀྱིས། །མི་ཕམ་མགོན་ལ་བཀའ་དྲིན་རྗེས་ཐོབ་ནས། །རྣམ་རིག་སྨྲ་བའི་གྲུབ་མཐའ་གསལ་བྱས་ཞེས། །རྒྱ་བོད་ཤིང་རྟ་ཆེན་པོ་རྣམས་ལ་གྲགས། །འདི་དག་ཐེག་ཆེན་ཤིང་རྟའི་སྲོལ་འབྱེད་དེ། །ཐེག་ཆེན་མདོ་དང་རྒྱུད་སྡེའི་དགོངས་པ་རྣམས། །གཉིས་པོ་འདི་ཡི་ལུགས་དང་མི་མཐུན་པ། །གང་གིས་བཀྲལ་དེ་ལོག་པའི་ལམ་དུ་ཤེས། །ཐུབ་པའི་བསྟན་པ་ཉིད་ཀྱི་དགོངས་པ་བཞིན།   །འཁྲུལ་མེད་སྨྲ་བ་འཕགས་པ་ཀླུ་སྒྲུབ་ཡིན། །ཀླུ་སྒྲུབ་དང་ནི་ཐོགས་མེད་གཉིས།  །ཁྱོད་བསྟན་འཛིན་པར་ཁྱོད་ཀྱིས་གསུངས།   །དེ་དག་གཞུང་གི་རྗེས་འབྲངས་ནས།   །བདག་གིས་ཁྱོད་ཀྱི་དགོངས་པ་བཙལ། །ཞེས་གསུངས་སོ།    །ཁྱད་པར་བདག་ཉིད་ཆེན་པོ་འདིས་རྒྱལ་བའི་གསུང་རབ་ཀྱི་དགོངས་པ་དཔལ་མགོན་འཕགས་པ་ཀླུ་སྒྲུབ་ཀྱིས་ལེགས་པར་བཀྲལ་བའི་དཀའ་གནས་མཐར་ཐུག་པ་ཟབ་མོ་རྟེན་ཅིང་འབྲེལ་པར་འབྱུང་བ་རྟག་ཆད་ཀྱི་མཐའ་དང་བྲལ་བའི་དབུ་མའི་ལམ་བཟང་འཕགས་པ་ཀླུ་སྒྲུབ་ཀྱི་དགོངས་པ་དཔལ་ལྡན་ཟླ་བ་གྲགས་པས་བཀྲལ་བ་ཇི་བཞིན་ཐུགས་སུ་ཆུད་དེ་ཟབ་མོ་དབུ་མའི་ལམ་ལ་གཞན་དྲིང་མི་འཇོག་པའི་ངེས་པ་བརྟན་པོ་རྙེད་ཅིང་ཕྱིར་མི་ལྡོག་པའི་གདེང་ཐོབ་ནས་གངས་རིའི་ཁྲོད་འདིར་དབུ་མའི་ལམ་སྲོལ་གསལ་བར་སྟོན་པར་མཛད་པ་ནི། ཉིད་ཀྱི་ཞལ་ནས། རྒྱ་གར་བལ་པོ་བོད་ཀྱི་ཡུལ་རྣམས་སུ། །མདོ་དོན་སྨྲ་བའི་མཁས་པ་མང་བྱོན་ཡང༌།   །ཕལ་ཆེར་རྟོག་པས་སྦྱར་བའི་དོན་ཙམ་ལ། །མཁས་པར་ཟད་ཀྱི་དེ་ཉིད་དོན་ལ་མིན། །ཐུབ་པའི་བསྟན་ལ་ཉིད་ཀྱི་དགོངས་པ་བཞིན། །འཁྲུལ་མེད་སྨྲ་བ་འཕགས་པ་ཀླུ་སྒྲུབ་ཡིན།    །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2024 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号