|
ཡང་རྒྱ་ནག་ཏ་མིང་རྒྱལ་པོས་ཁམས་གསུམ་རྣམ་འདྲེན་ཆོས་ཀྱི་རྒྱལ་པོ་ཙོང་ཁ་པ་ཆེན་པོ་ཉི་མ་ཤར་ཕྱོགས་ཀྱི་རྒྱལ་ཁམས་སུ་སྤྱན་འདྲེན་ཞུས་པའི་གསེར་ཡིག་གི་ལན་དུ་གནང་བའི་རྗེ་རིན་པོ་ཆེ་ཉིད་ཀྱི་བཀའ་དྲི་མ་མེད་པ་ནི།
༈ ཨོཾ་བདེ་ལེགས་སུ་གྱུར་ཅིག རླབས་པོ་ཆེའི་བསོད་ནམས་ཀྱི་མཐུ་ལ་བརྟེན་ནས་ས་ཆེན་པོ་རྒྱ་མཚོའི་མཐར་ཐུག་པར་ཚུལ་བཞིན་སྐྱོང་པའི་མིའི་དབང་པོ་ཆེན་པོའི་སྤྱན་སྔར། ནུབ་ཕྱོགས་གངས་ཅན་གྱི་ཁྲོད་ཡུལ་དབུས་ཀྱི་ཆ་ན་གནས་པའི་ཤཱཀྱའི་དགེ་སློང་བློ་བཟང་གྲགས་པའི་དཔལ་གྱིས་ཞུ་བ། ༧ ཆོས་ཀྱི་རྒྱལ་པོ་ཆེན་པོའི་བསོད་ནམས་རི་རབ་ལྷུན་པོ་ལྟར་འཕང་མཐོ་ཞིང་བཀའ་འབངས་རྣམས་ཀྱི་བདེ་སྐྱིད་ལྷ་ཡུལ་ལྟར་ཕུན་སུམ་ཚོགས་པར། ༧བཀའ་ལུང་གཉན་པོ་རྒྱལ་ཕྲན་དུ་མས་སྤྱི་བོས་ལེན་པར་བཞུགས་པའི་སྐབས་ནས། དཀོན་མཆོག་གསུམ་གྱི་མཐུ་སྟོབས་བསྐྱེད་པའི་ཕྱིར་དུ་ལུང་གིས་འདི་ཕྱོགས་སུ་མངགས་པའི་གསེར་ཡིག་པ་རྣམས་ཀྱིས་འཇའ་ས། མེ་ཏོག་ཞིབ་མོ་སྤྲིན་རིས་སུ་ཡོད་པའི་གོས་ཡུག་དམར་པོ་གཅིག་དང༌། ལྗང་གུ་ཡུག་གཅིག མེ་ཏོག་མེད་པའི་གོས་ཡུག་དམར་པོ་སྔོན་པོ་ལྗང་གུ་ཡུག་གསུམ་དང༌། དར་མདོག་ཅན་ཡུག་བདུན། གོས་ཆེན་གྱི་ཆོས་གོས། ཕྱག་ཚེ། གོང་ཐུང༌། རིང་འགག ཐང་ཐེབས། ཆུ་ཤེལ་གྱི་ཕྲེང་བ། རྡོ་རྗེ་དྲིལ་བུ་བུབས་གཉིས། དཀར་ཡོལ་གཉིས། རྟེན་ཁེབས་གཉིས། ལག་ཕྱིས་གསུམ། པང་ཁེབས་མཎྜལ་གྱི་རྒྱན་གསུམ།སྐ་རགས། ཏིང་ཤག་བུབས་གཉིས། ལྷམ་འབོབས་དང་བཅས་པ།
ཇ་རྒྱ་མ་ལྔ་བཅུ། ཙནྡ་དུམ་གཅིག་གི་གནང་བྱིན་དང་བཅས་པ་འདིར་འཕྲོད་པས་ཐུགས་ལ་པཏགས། ༧གོང་མ་ཆེན་པོའི་ཐུགས་ཀྱི་དགོངས་པ་ལ། ངེད་དེ་ཕྱོགས་སུ་ལན་གཅིག་འོང་བ་ཀྱིས་གསུངས་པ་ཡིན་ཟེར་བའི་ལུང་བུད་པའི་རྒྱུ་མཚན་གསེར་ཡིག་པ་རྣམས་དང་ཝང་གིས་ནན་གྱིས་གསུང་འབྱོན་ཡིན་འདུག་པའི་དོན་ཁོང་དུ་ཆུད། ༧སའི་བདག་པོ་ཆེན་པོས། སངས་རྒྱས་ཀྱི་བསྟན་པ་ལ་དགོངས་པའི་ལུང་ཡིན་པར་འདུག་པ་མ་གོ་ཞིང༌། ལུང་བུད་ལ་མ་གུས་པ་རང༌། བརྙས་པ་བྱས་པ་མ་ལགས་ནའང་མི་མང་པོ་དང་ནམ་ཕྲད་པའི་དུས་སུ་ནད་དྲག་པོ་འབའ་ཞིག་འོང་བ་བྱུང་བའི་དོན་གྱིས། ༧ བཀའ་ལུང་བཞིན་དུ་བསྒྲུབ་པར་མ་ནུས་པ་ལ་ནམ་མཁའ་དང་འདྲ་བར་ཟབ་ལ་ཤིན་ཏུ་རྒྱ་ཆེ་བའི་ཐུགས་ཀྱིས་མི་དགྱེས་པ་མི་མཛད་པ་ཐུགས་ལ་འདོགས་པར་ཞུ།སྔོན་གྱི་དུས་སུ་བྱོན་པའི་ཆོས་རྒྱལ་ཆེན་པོ་རྣམས་ཀྱིས་འཇིག་རྟེན་འདིའི་ཁྲིམས་ལུགས་དང༌། འཇིག་རྟེན་ཕྱི་མའི་ཆོས་ལུགས་ཕྱོགས་ཐམས་ཅད་དུ་ལེགས་པར་དར་བའི་ཐུགས་ཀྱི་ཁུར་ཆེན་པོ་བསྣམས་འདུག་པའི་ལུང་བཞིན་དུ། ད་ལྟའི་དུས་སུ། ༧གོང་མ་ཆེན་པོའི་ཐུགས་དགོངས་རྣམ་པར་དག་པ་དང་མཛད་པ་འཕྲིན་ལས་ངོ་མཚར་པས། ལྷ་དང་བཅས་པའི་འཇིག་རྟེན་ཡིད་མགུ་བར་བྱེད་པའི་གཏམ་སྙན་པོ་ཡང་དང་ཡང་དུ་ཐོས་པས། བདག་ཅག་འདི་ཕྱོགས་ན་ཡོད་པའི་རབ་བྱུང་དྲག་པ་ཕལ་མོ་ཆེ། ༧གོང་མ་ཆེན་པོའི་སྐུ་ཚེ་དང་རྒྱལ་སྲིད་ཡུན་རིང་དུ་བརྟན་པའི་སྨོན་ལམ་རྣམ་པར་དག་པ་ཡང་དང་ཡང་དུ་འདེབས་ཀྱིན་ཡོད་པའི་ཚུལ་འདི་དགོངས་པར་ཞུ་ཞིང༌། དེ་ལྟར་ཡིན་ལགས་ན་དེ་ལ། ༧ས་སྐྱོང་ཆེན་པོའི་འཕྲིན་ལས་ཀྱིས་ཇི་ལྟར་སྐྱོང་ཆོས་ཀྱི་རྒྱལ་པོ་ཉིད་ཀྱིས་མཁྱེན་པས་བདག་ཅག་འདྲ་པས་ཞིབ་ཏུ་མི་སྤོབས་ལགས། གུས་པས་ཕུལ་པའི་ཞུ་ཡིག་སྤྱན་ལམ་དུ་བབ་པའི་ཐབས་ཀྱི་རྟེན་མཚོན་པར་ལིའི་ཡུལ་ནས་སྤྱན་དྲངས་པའི་སྤྱན་རས་གཟིགས་ཀྱི་སྐུ་གཅིག བཅོམ་ལྡན་འདས་ཤཱཀྱ་ཐུབ་པའི་གསེར་སྐུ་གཅིག དེ་བཞིན་གཤེགས་པ་འཇམ་དཔལ་གྱི་སྐུ་གཅིག །དེ་བཞིན་གཤེསས་པའི་རིང་བསྲེལ་འཕེལ་བཞིན་པ་གསུམ་སྦྲེལ་གཅིག ཡང་དེ་བཞིན་གཤེགས་པའི་རིང་བསྲེལ་གཅིག རྒྱ་གར་གྱི་གྲུབ་ཆེན་རྒྱ་དང་བོད་གཉིས་ཀར་སངས་རྒྱས་ཀྱི་བསྟན་པ་དར་རྒྱས་སུ་མཛད་པའི་སྐུ་དྲིན་ཅན་ཇོ་བོ་ཆེན་པོ་ལྷ་གཅིག་གི་གདུང་རུས་ལས་བྱོན་པའི་རིང་བསྲེལ་གཅིག་རྣམས་ཕུལ། བྱི་བ་ལོ་ཟླ་བ་དྲུག་པའི་ཚེས་བཅུ་དགུ་ལ་ཡུལ་དབུས་ནས་ཕུལ་བའི་ཞུ་ཡིག་ཅེས་སོ།།
འདི་དག་བཀོད་པའི་དགོས་པ་ནི། །དོན་ལྡན་ཚིག་ནི་རེ་རེས་ཀྱང༌། །ཤེས་རབ་ཅན་ལ་དོན་ཀུན་སྟེར། ཞེས་པ་ལྟར། སྐབས་དོན་འགངས་ཁོག་འཆུན་པའི་གོ་བ་སྐྱེད་པའི་ཕྱིར་དང་ཆོས་སྲིད་ལ་སློབ་པར་འདོད་པས། སྔོན་གྱི་བདག་ཉིད་ཆེན་པོ་དག་གི་མཛད་སྲོལ་མཐོང་ནས་དེའི་རྗེས་སུ་འཇུག་དགོས་པ་ཤེས་པར་བྱ་བའི་ཆེད་དོ། སྨྲས་པ།
སྔོན་རབས་མཁས་པའི་མཛད་པ་ནི། །
ཕྱི་དུས་སྙན་པ་ལྷག་པར་ཆེ། །
གངས་དཀར་རི་ལ་རྒྱང་བཀྱེད་ནས། །
བལྟས་པས་ཇེ་བརྗིད་མ་ལགས་སམ། །
3/3 མདུན་ངོས། 上一页 1 2 3 |
