|
བོད་ཀྱི་མཁས་པ་སྔ་མ་ཕལ་ཆེ་བའི་གཞུང་ལས་གྲངས་ཅན་པ། ཕུར་བུ་པ། བྱེ་བྲག་པ། རིག་པ་ཅན་པ། གཅེར་བུ་པ་སྟེ་རྟག་པར་སྨྲ་བའི་རྟོག་གེའི་སྡེ་ལྔ་དང༌། ཆད་པར་སྨྲ་བ་རྒྱང་འཕེན་པ་སྟེ་སྡེ་དྲུག་ཏུ་བཤད་ལ། ཁ་ཅིག་ནི་རྒྱང་འཕེན་པ། གྲངས་ཅན་པ། ཁྱབ་འཇུག་པ། དབང་ཕྱུག་པ།གཅེར་བུ་པ་སྟེ་ལྔར་མུ་སྟེགས་པ་ཀུན་འདུས་སོ་ཞེས་ཟེར་རོ། །ཕྱིས་ཀྱི་རང་རེའི་མཁས་པ་དག་དེ་རྣམས་བཀག་ནས་སྤྱིར་གཞན་སྡེ་ཉེར་ལྔ་ཡོད་པ་དང་བོད་དུ་འགྱུར་པའི་གཞུང་རྣམས་སུ་གསལ་བར་བཤད་པ་བཅུ་གཉིས་སུ་བཞེད་ཅིང༌། སློབ་དཔོན་ཞི་བ་འཚོའི་ཚད་མའི་དེ་ཁོ་ན་ཉིད་བསྡུས་པ་དང་ཀུན་བཏུས་རྩ་འགྲེལ་སོགས་ལ་བརྟེན་ནས་ཆད་སྨྲ་གཅིག་དང་རྟག་སྨྲ་བཅུ་གཅིག་གི་རྣམ་བཞག་གསུངས་སོ། །སྔོན་དང་ཕྱིས་ཀྱི་མཁས་པ་དེ་དག་ཕལ་མོ་ཆེས་མུ་སྟེགས་པའི་ལུགས་དེ་དག་ཐམས་ཅད་ཀྱི་རྩ་བ་ནི་གྲངས་་ཅན་པ་དང་གཞན་རྣམས་དེ་ལས་གྱེས་པར་འདོད་ཅིང་།དེ་ཡང་འཇུག་པ་ལས། ཟ་པོ་རྟག་དངོས་བྱེད་པོ་མིན་པའི་བདག །ཡོན་ཏན་བྱ་མེད་མུ་སྟེགས་རྣམས་ཀྱིས་བརྟགས། །དེ་དབྱེ་ཅུང་ཟད་ཅུང་ཟད་ལ་བརྟེན་ནས། །མུ་སྟེགས་ཅན་རྣམས་ལུགས་ནི་ཐ་དད་འགྱུར། །ཞེས་པ་རྩ་འགྲེལ་གྱི་དགོངས་པར་འདོད་དོ།།
འོན་ཀྱང་འཇུག་པ་རྩ་འགྲེལ་གྱི་དོན་ནི་གྲངས་ཅན་པས་བཏགས་པའི་བདག་དེའི་ཁྱད་པར་ཅུང་ཟད་བསྣོན་བྲིའི་ཚུལ་མི་འདྲ་བ་ཐ་དད་པ་ལ་བརྟེན་ནས་མུ་སྟེགས་པ་གཞན་རྣམས་ཀྱི་བདག་གི་སྒྲོ་འདོགས་ལུགས་མི་འདྲ་བ་སྣ་ཚོགས་ཡོད་པར་གསུངས་པ་ཡིན་གྱི་གྲངས་ཅན་ལས་མུ་སྟེགས་ཀྱི་ལུགས་གཞན་མཐའ་དག་གྱེས་པར་འཆད་པ་མིན་ལ། དེ་ཡང་གྲངས་ཅན་གྱིས་བཏགས་པའི་བདག་རིགས་པས་འགོག་ཚུལ་ཤེས་ན་མུ་སྟེགས་གཞན་རྣམས་ཀྱིས་བདག་གི་ཁྱད་པར་བཏགས་པ་རྣམས་འགོག་ཚུལ་ཤེས་སླ་བར་དགོངས་ནས་དེ་ལྟར་གསུངས་པ་ཡིན་ནོ། །དེ་ཡང་འཇུག་པ་རང་འགྲེལ་ལས་བདག་གི་ཁྱད་པར་ཅུང་ཟད་ཅུང་ཟད་ལ་བརྟེན་ནས་མུ་སྟེགས་ཅན་རྣམས་ཀྱི་ལུགས་ཕན་ཚུན་ཐ་དད་པར་འགྱུར་རོ། །ཞེས་གསུངས་པ་དང༌། རྗེ་བདག་ཉིད་ཆེན་པོས་འཇུག་པའི་རྣམ་བཤད་དུ་རང་འགྲེལ་གྱི་ལུང་དེ་དྲངས་ནས་དེའི་མཇུག་ཐོག་ཏུ་ཞེས་གསུངས་པས་གཞུང་དེའི་ལུགས་ཀྱིས་གྲངས་ཅན་དེའི་དབྱེ་བ་ལ་བརྟེན་ནས་མུ་སྟེགས་ཀྱི་ལུགས་སོ་སོར་གྱེས་པར་འཆད་པ་ནི་དོན་མ་གོ་བའོ། །ཞེས་གསུངས་སོ། །དེས་ན་གྲངས་ཅན་གྱི་ལུགས་ལས་མུ་སྟེགས་གཞན་རྣམས་གྱེས་པར་འདོད་པ་འཇུག་པ་རྩ་འགྲེལ་དང། རྗེ་བདག་ཉིད་ཆེན་པོ་ཡབ་སྲས་ཀྱི་དགོངས་པར་འཆད་པ་ནི་ཞིབ་ཏུ་མ་བརྟགས་པའོ། །འཇུག་པ་རྩ་འགྲེལ་དང་རྗེ་ཡབ་སྲས་ཀྱིས་གྲངས་ཅན་པས་ཤེས་བྱ་ཉེར་ལྔ་འདོད་ཚུལ་བཤད་ཀྱི་མུ་སྟེགས་པའི་ལུགས་ཉེར་ལྔ་ཡོད་པར་མ་བཤད་ལ། ལང་ཀར་གཤེགས་པའི་མདོ་ལས་གཞན་སྡེ་ཉེར་ལྔར་བཤད་ཅེས་གསུངས་པ་ཡང་མདོ་དེར་མུ་སྟེགས་པའི་འདོད་པ་བརྗོད་པའི་སྐབས་སུ་ཁ་ཅིག་ཅེས་པ་ཉེར་གཉིས་ལས་མ་བྱུང་ཞིང་དེའི་དང་་་པོ་ལ་གསུམ་དུ་ཕྱེ་ཡང་ཉེར་ལྔ་མ་ཚང་བར་འདུག་པས་འགྲིགས་དཀའོ། །རྩ་ཤེས་ཊིཀ་ཆེན་དང་སྟོང་ ཐུན་ཆེན་མོར་གྲངས་ཅན་ལས་གྱེས་པ་ཉེར་ལྔ་ཡོད་པའི་ཚིག་གཅིག་བྱུང་མོད་ཀྱང་མུ་སྟེགས་པའི་ལུགས་ཐམས་ཅད་གྲངས་ཅན་ལས་གྱེས་པ་དང་སྤྱིར་མུ་སྟེགས་པའི་ལུགས་ཉེར་ལྔར་གྲངས་ངེས་པར་མ་གསུངས་སོ། །
དེས་ན་སྤྱིར་མུ་སྟེགས་པའི་ལུགས་མང་དུ་ཡོད་པ་རྣམས་ཀྱི་གཞུང་མང་པོ་བོད་དུ་མ་འགྱུར་པ་དང་གོང་དུ་བཤད་པ་ལྟར་ལྟ་བ་ངན་པ་གྲངས་ཀྱིས་མི་ལངས་པ་ཡོད་པས་ན་གཞན་སྡེ་ལ་མཐའ་གཅིག་ཏུ་གྲངས་ངེས་ཚུལ་རྗེ་བདག་ཉིད་ཆེན་པོ་ཡབ་སྲས་ཀྱི་གསུང་རབ་རྣམས་སུ་མ་བྱུང་བས་གྲངས་ངེས་གཟུང་དུ་འཆད་པར་མི་འདོད་ལ། མུ་སྟེགས་ཀྱི་ལུགས་བྱུང་བའི་རིམ་པ་ནི་ཁྱད་པར་འཕགས་བསྟོད་ཀྱི་འགྲེལ་པ་ལས་བསྐལ་བ་དང་པོའི་དུས་ཀྱི་ཚེ་ལོ་ཚད་མེད་པ་ན་བྲམ་ཟེ་སེར་སྐྱ་ཞེས་བྱ་བ་ཞིག་གིས་གྲུབ་པའི་མཐའ་རྣམ་པར་བཞག་པའི་བསྟན་བཅོས་བརྩམས་པར་བཤད་པ་དང༌།
སློབ་དཔོན་ལེགས་ལྡན་འབྱེད་ཀྱི་རྟོག་གེ་འབར་བ་ལས། དེ་ཡང་འདི་སྐད་གྲག་གོ །མཆོད་འོས་ཀྱིས་རང་གི་འཁོར་འདུས་ཤིང་ཚོགས་པ་གྲངས་ཅན་ལ་སོགས་པ་མུ་སྟེགས་བྱེད་རྣམས་ལ་རང་གི་བློས་བརྟགས་པའི་གྲུབ་པའི་མཐའ་ཐམས་ཅད་བྱིན་ཟིན་པ་དང་། དེ་ནས་ཕྱིས་ཚངས་པ་ཡང་ཕྱིན་པར་གྱུར་པ་ན། དེས་དེ་ལ་སྨྲས་པ། ཚངས་པ་ཆེན་པོ་བདེ་བར་བྱོན། །ཤིན་ཏུ་འཕྱི་བར་འདིར་འོངས་སོ། །བསྟན་བཅོས་ཐམས་ཅད་བྱིན་ཟིན་པས། །ཁྱོད་ཀྱིས་རིག་བྱེད་འདི་ལོངས་ཤིག །ཞེས་བྱ་བ་དང་ཞེས་གསུངས་པས་སེར་སྐྱ་དང་མཆོད་འོས་ཀྱི་གཞུང་སྔ་བར་མངོན་ཞིང་འོན་ཀྱང་མུ་སྟེགས་གཞན་རྣམས་དེ་དག་ལས་གྱེས་པའི་ཁྱབ་པ་ནི་མེད་དེ། དྲང་སྲོང་རྣམས་ཀྱིས་རང་རང་གི་བློས་སྙོམས་འཇུག་དང་རྟོག་གེ་ལ་བརྟེན་པའི་གྲུབ་པའི་མཐའ་སོ་སོར་བཤད་པར་ཤིང་རྟ་ཆེན་པོ་རྣམས་ཀྱི་གཞུང་ལས་འབྱུང་བས་སོ། །
བདག་ཅག་གི་སྟོན་པའི་དུས་སུ་ནི། རིངས་བྱེད་ཀྱི་བུ་ལྷག་སྤྱོད་ལ་སོགས་པ་སྙོམས་འཇུག་པ་དྲུག བྲམ་ཟེ་རྒྱུས་རྒྱལ་ལ་སོགས་པ་རྗེས་སྒྲོགས་པ་དྲུག འོད་སྲུངས་རྫོགས་བྱེད་ལ་སོགས་པ་རྟོག་གེ་པ་དྲུག་སྟེ། མུ་སྟེགས་ཀྱི་སྟོན་པ་བཅོ་བརྒྱད་ཡོད་པར་བཤད་དོ། །དེས་ན་འདིར་ནི་དེ་དག་ལས་གྲགས་ཆེ་བ་རྣམས་ཀྱི་ལུགས་འཕགས་ཡུལ་པཎ་ཆེན་རྣམས་ཀྱིས་འགོག་ཚུལ་མདོ་ཙམ་འཆད་པར་འདོད་པས། ཆད་པར་སྨྲ་བ་ནི་རྒྱང་འཕེན་པ་དང་། རྟག་པར་སྨྲ་བ་ནི་གྲངས་ཅན་པ། ཚངས་པ་པ། ཁྱབ་འཇུག་པ།དཔྱོད་པ་པ། དབང་ཕྱུག་པ། བྱེ་བྲག་པ། རིག་པ་ཅན་པ། གཅེར་བུ་པ་སྟེ་བརྒྱད་དུ་བསྡུ་བར་བྱ་སྟེ། གཞུང་ལ་ལར་སེར་སྐྱ་པ་དང་གྲངས་ཅན་པ་སོ་སོར་བཤད་ཀྱང་ནང་གསེས་ཀྱི་དབྱེ་བ་ཡིན་པས་མི་འགལ་ཞིང་མཁས་པའི་དབང་པོ་ཀ་མ་ལ་ཤི་ལ་སོགས་ཀྱིས་དེ་གཉིས་དོན་གཅིག་ཏུ་བཤད་པའི་ཕྱིར་དང༌།བརྡ་སྤྲོད་པ། རིག་བྱེད་མཐའ་བ། གསང་བ་པ་རྣམས་ནི་ཚངས་པ་པའི་འདོད་པ་དང་ཕྱོགས་མཐུན་པ་དང་ཚངས་པ་སྟོན་པར་བྱེད་པ་དང་ཚངས་པའི་ལུང་ལ་བརྟེན་པར་མཚུངས་པའི་ཕྱིར་ལོགས་སུ་མ་བགྲང་ངོ༌།།
རང་གི་སྡེ་བ་ནི། བྱེ་བྲག་སྨྲ་བ་དང༌། མདོ་སྡེ་པ་དང༌། སེམས་ཙམ་པ་དང༌། དབུ་མ་པ་སྟེ་བཞིར་གྲངས་ངེས་པར་མདོ་རྒྱུད་དུ་མ་ནས་བཤད་ཅིང་ཁྱད་པར་རྡོ་རྗེ་སྙིང་འགྲེལ་ལས། སངས་རྒྱས་པ་ཡི་བཞི་བ་དང་༌། །ལྔ་པ་ཐུབ་པའི་དགོངས་པ་མིན། །ཞེས་གྲངས་ངེས་པར་བཤད་ཅིང་སློབ་དཔོན་འཕགས་པ་ལྷས། སངས་རྒྱས་ཆོས་ནི་རྣམ་པ་བཞིར། །ཡིད་འདོད་རྣམས་ཀྱིས་མངོན་མཐོང་སྟེ། །བྱེ་བྲག་སྨྲ་ལ་སོགས་པའི་ལམ། །བཤད་པའི་དེ་ཉིད་སྒྲུབ་པ་པོ། །ཞེས་གསུངས་སོ། །བྱུང་བའི་རིམ་པ་ནི་ལ་ལ་དག་བཀའ་བསྡུ་བ་གསུམ་པའི་རྗེས་སུ་བྱེ་བྲག་སྨྲ་བ་དང་མདོ་སྡེ་བ། སློབ་དཔོན་ཀླུ་སྒྲུབ་ཀྱི་དུས་སུ་དབུ་མ་པ། འཕགས་པ་ཐོགས་མེད་ཀྱི་དུས་སུ་སེམས་ཙམ་པ་བྱུང་བ་ཡིན་ལ་དེའི་སྔོན་དུ་གྲུབ་མཐའ་བཞིའི་ཐ་སྙད་མེད་པར་འདོད་པ་ནི་མི་འཐད་དེ། མཁའ་འགྲོ་རྒྱ་མཚོ། དགྱེས་རྡོར་གྱི་རྒྱུད་བརྟག་གཉིས། དུས་འཁོར་གྱི་རྒྱུད། རྡོ་རྗེ་ཨར་ལླའི་རྒྱུད་སོགས་ལས་གྲུབ་མཐའ་བཞིའི་ཐ་སྙད་གསུངས་པའི་ཕྱིར་རོ། །འོན་ཀྱང་གྲུབ་མཐའ་བཞི་ཀའི་བདག་མེད་ཕྲ་རགས་འདོད་ཚུལ་གྱི་རིམ་པ་དང་མདོ་སྡེའི་དགོངས་པ་ལེན་ཚུལ་སོགས་སངས་རྒྱས་ཞལ་བཞུགས་དུས་ནས་ཡོད་ནའང་གྲུབ་མཐའི་ནང་གསེས་ཀྱི་འདོད་ཚུལ་ཕྲ་མོ་མང་པོ་ཞིག་ནི་རང་རང་གི་སློབ་དཔོན་རྣམས་ཀྱིས་གཞུང་བརྩམས་པའི་རྗེས་ནས་བྱུང་་་་་བར་བྱས་ན་ལེགས་པར་མངོན་ཏེ་ཞིབ་པར་མ་སྤྲོས་སོ།།
དེ་ལྟར་གྲུབ་མཐའ་བཞི་ལས་བྱེ་མདོ་གཉིས་ཐེག་དམན་གྲུབ་མཐའ་སྨྲ་བ་དང་དབུ་སེམས་གཉིས་ནི་ཐེག་ཆེན་གྲུབ་མཐའ་སྨྲ་བ་ཡིན་ལ། བོད་སྔ་མ་ཁ་ཅིག་ཐེག་དམན་གྲུབ་མཐའ་སྨྲ་བ་དང་ཐེག་དམན་གང་ཟག་གཉིས་དོན་གཅིག་པ་དང། ཐེག་ཆེན་གྲུབ་མཐའ་སྨྲ་བ་དང་ཐེག་ཆེན་གང་ཟག་གཉིས་དོན་གཅིག་པར་འདོད་པ་ནི་མི་འཐད་དེ། ནང་བའི་གྲུབ་མཐའ་སྨྲ་བ་ཡིན་ན་ལམ་ཞུགས་ཀྱི་གང་ཟག་ཡིན་པས་ཁྱབ་པར་ཐལ་བ་དང༌། ཉན་ཐོས་འཕགས་པ་རྣམས་ཀྱིས་ཀྱང་ཐེག་པ་ཆེན་པོའི་ལམ་དང་འབྲས་བུའི་ཆོས་མང་པོ་ཞིག་ལ་སྐུར་བ་འདེབས་པར་ཐལ་བ་སོགས་ཉེས་པ་དུ་མ་ཡོད་པའི་ཕྱིར། དེ་ལྟར་གྲུབ་མཐའ་སྨྲ་བ་བཞིར་ངེས་པ་ཡང༌། སློབ་དཔོན་དང༌། བསྟན་བཅོས་དང༌། བདག་མེད་ཕྲ་རགས་ཀྱི་ལྟ་བ་ཁས་ལེན་ཚུལ་གྱིས་རབ་ཏུ་ཕྱེ་བ་ཡིན་པས་གྲུབ་མཐའ་བཞིར་ངེས་པ་ཡིན་གྱི་ནང་བའི་གྲུབ་མཐའ་སྨྲ་བའི་གང་ཟག་ཡིན་ན་གྲུབ་མཐའ་སྨྲ་བ་བཞི་པོ་དེ་གང་རུང་ཡིན་པས་མ་ཁྱབ་ཏེ་གྲུབ་མཐའ་སྨྲ་བ་འོག་མ་ཁ་ཅིག་གིས་གྲུབ་མཐའ་གོང་མའི་རིགས་པའི་ཚུལ་ལ་བློ་སྦྱངས་ནས་རང་གི་ཐུན་མོང་མ་ཡིན་པའི་གྲུབ་པའི་མཐའ་ལ་རིགས་པའི་གནོད་པ་བབས་པར་ཤེས་ནས་སྔར་གྱི་ངེས་ཤེས་ལོག་ནའང་གྲུབ་མཐའ་གོང་མའི་ལྟ་བ་ལ་ངེས་ཤེས་མ་སྐྱེས་པའི་གནས་སྐབས་ཡོད་པའི་ཕྱིར་རོ། །དེ་ནི་ནང་བའི་གྲུབ་མཐའ་སྨྲ་བའི་གང་ཟག་ནི་ཡིན་ཏེ། དཀོན་མཆོག་གསུམ་ལ་སྐྱབས་སུ་སོང་ཞིང་ལྟ་བ་བཀར་བཏགས་ཀྱི་ཕྱག་རྒྱ་བཞི་ཁས་ལེན་པའི་ཕྱིར་རོ། །དེ་ལྟ་ན་ཡང་གྲུབ་མཐའ་བཞིར་མ་ངེས་པར་མི་འགྱུར་ཏེ། བློ་ཕུང་པོ་གསུམ་པ་ལ་གནས་པའི་གང་ཟག་དེས་གྲུབ་མཐའ་བཞི་པོ་གང་ཡང་མ་ཡིན་པའི་གྲུབ་པའི་མཐའ་གཞན་ཞིག་རང་དབང་དུ་བྱས་ཏེ་དམ་མི་འཆའ་བའི་ཕྱིར་རོ། ། 2/2 མདུན་ངོས། 上一页 1 2 |
