ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་མཐའི་རྣམ་བཞག་ཐུབ་བསྟན་ལྷུན་པོའི་མཛེས་རྒྱན་ལས་དག་ཡིག་མཁས་པའི་འབྱུང་གནས་ཞེས་བྱ་བ་ལས་སྔགས་ཀྱི
སྤེལ་དུས།05-18  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ལྕང་སྐྱ་རོལ་བའི་རྡོ་རྗེ།

       གཉིས་པ་གསང༌སྔགས་ཀྱི་ཐེག་པའི་གཞུང་ནས་འབྱུང་བའི་མིང་གི་རྣམ་གྲངས་ལ། སྤྱིར་བཅོམ་ལྡན་འདས་ཀྱིས་གདུལ་བྱ་དམན་པ་ལ་མོས་པ་རྣམས་ལ་ཆགས་བྲལ་གྱི་སྤྱོད་པ། རྒྱ་ཆེན་པོ་ལ་མོས་པ་རྣམས་ལ་ས་དང་ཕ་རོལ་ཏུ་ཕྱིན་པའི་སྤྱོད་པ།ཟབ་མོ་ལ་ལྷག་པར་མོས་པ་རྣམས་ལ་འདོད་ཆགས་ཀྱི་སྤྱོད་པ་བསྟན་ནས་འདུལ་བར་མཛད་པ་ལས།དང་པོ་ནི་ཐེག་པ་དམན་པ་དང༌། གཉིས་པ་ནི་ཕ་རོལ་ཕྱིན་པའི་ཐེག་པ་དང༌།གསུམ་པ་ནི་གསང་སྔགས་ཀྱི་ཐེག་པའི་ཚུལ་ལོ། །

དེས་ན་ཐེག་པ་ཐམས་ཅད་ཀྱི་མཆོག་ནི་གསང་སྔགས་ཀྱི་ཐེག་པ་སྟེ། འདིའི་མིང་གི་རྣམ་གྲངས་ནི།གསང་སྔགས་ཀྱི་ཐེག་པ།འབྲས་བུའི་ཐེག་པ།རྡོ་རྗེའི་ཐེག་པ། ཐབས་ཀྱི་ཐེག་པ།རིག་པ་འཛིན་པའི་ཐེག་པ་རྣམས་སོ།།
མཚན་ཉིད་ཀྱི་ཐེག་པ་ལས་ཁྱད་ཆོས་བཞིས་ཁྱད་པར་དུ་འཕགས་པ་སྟེ།མ་རྨོངས་པའི་ཁྱད་པར།ཐབས་མང་བའི་ཁྱད་པར།དཀའ་བ་མེད་པའི་ཁྱད་པར།གདུལ་བྱ་དབང་པོ་ཤིན་ཏུ་རྣོ་བའི་དབང་དུ་བྱས་པའི་ཁྱད་པར་ཏེ་བཞིའོ།།
དབྱེ་བ་ནི་བྱ་བའི་རྒྱུད།སྤྱོད་པའི་རྒྱུད།རྣལ་འབྱོར་རྒྱུད། རྣལ་འབྱོར་བླ་ན་མེད་པའི་རྒྱུད་དེ་བཞི།དེ་ཡང་ལམ་གྱི་གདུལ་བྱ་ལ།རྒོད་པ།ལྟ་བ།ལག་བཅངས། གཉིས་གཉིས་འཁྱུད་པ་སྟེ་འདོད་ཡོན་ལ་ཆགས་པ་ལམ་དུ་བྱེད་ཚུལ་མི་འདྲ་བ་བཞི་དང༌། ལམ་སྒོམ་པའི་ནུས་པ་དམན་ཆོག་མི་འདྲ་བ་བཞི་ཡོད་པའི་སྒོ་ནས་ཕྱེ་བའོ། །ཕྱི་མ་བཞི་ནི།སྟོང་པ་དང་ལྷའི་རྣལ་འབྱོར་མངོན་དུ་བྱེད་པ་ལ་ཕྱིའི་བྱ་བ་ཤིན་ཏུ་མང་པོ་ལ་ལྟོས་པ་དང༌།བྱ་བ་ཧ་ཅང་མི་མང་བར་ཕྱིའི་བྱ་བ་དང་ནང་གི་ཏིང་འཛིན་གཉིས་ཆ་མཉམ་པ་ལ་ལྟོས་པ་དང༌།ཕྱིའི་བྱ་བ་དང་ནང་གི་ཏིང་འཛིན་གཉིས་ལས་ཏིང་འཛིན་གཙོ་བོར་གྱུར་པ་ལ་ལྟོས་དགོས་དང༌།   ཕྱིའི་བྱ་བ་ལ་མི་ལྟོས་པར་གོང་ན་མེད་པའི་རྣལ་འབྱོར་སྐྱེད་ནུས་པ་སྟེ་བཞིའོ། །དེ་ལ་བཞི་ལས།                              
དང་པོ་བྱ་བའི་རྒྱུད་ལ།དེ་བཞིན་གཤེགས་པའི་རིགས།པདྨའི་རིགས།རྡོ་རྗེའི་རིགས་ཏེ།འཇིག་རྟེན་ལས་འདས་པའི་རིགས་གསུམ།ནོར་ཅན་གྱི་རིགས།ལྔས་རྩེན་གྱི་རིགས།འཇིག་རྟེན་པའི་རིགས་ཏེ་མ་འདས་པའི་རིགས་གསུམ་རྣམས་བསྡོམས་པས་དྲུག་གོ།།དེ་བཞིན་གཤེགས་པའི་རིགས་ལ་སྡེ་ཚན་བརྒྱད་དེ།རིགས་ཀྱི་གཙོ་བོ།རིགས་ཀྱི་བདག་པོ།རིགས་ཀྱི་ཡུམ།རིགས་ཀྱི་གཙུག་ཏོར།རིགས་ཀྱི་ཁྲོ་བོ་ཁྲོ་མོ།རིགས་ཀྱི་ཕོ་ཉ་ཕོ་མོ།རང་རིགས་སུ་གཏོགས་པའི་བྱང་སེམས།རང་རིགས་སུ་གཏོགས་པའི་ལྷ་དང་ཀླུ་དང་གནོད་སྦྱིན་སོགས་ཀྱི་སྡེ་ཚན་ནོ། །དེ་བཞིན་དུ་པདྨ་དང་རྡོ་རྗེའི་རིགས་ལ་ཡང་སྡེ་ཚན་བརྒྱད་རེ་ཡོད་དོ།།བྱ་བ་སྤྱིའི་རྒྱུད་བཞི་ནི།གསང་བ་སྤྱི་རྒྱུད།ལེགས་པར་གྲུབ་པ།དཔུང་བཟང་གིས་ཞུས་པ།བསམ་གཏན་ཕྱི་མ་རྣམས་སོ།   ། བསམ་གཏན་ཕྱི་མས་བྱ་རྒྱུད་ཀྱི་དོན་ཐམས་ཅད་རྣམ་གྲངས་བཅུར་བསྡུས་པ་ནི།གང་དུ་བསྒྲུབ་པ་གནས་ཀྱི་མཚན་ཉིད།བདག་གི་དེ་ཁོ་ན་ཉིད།རིག་སྔགས་ཀྱི་དེ་ཁོ་ན་ཉིད།ལྷའི་དེ་ཁོ་ན་ཉིད། མེ་ལ་གནས་པའི་བསམ་གཏན།སྒྲ་ལ་གནས་པའི་བསམ་གཏན།སྒྲ་མཐར་ཐར་པ་སྟེར་བའི་བསམ་གཏན། རིག་སྔགས་བསྒྲུབ་པ་ལ་འཇུག་པའི་ཆོ་ག སྦྱིན་སྲེག་གི་ཆོ་གདབང་བསྐུར་གྱི་ཆོ་ག་སྟེ་བཅུའོ། །འདིའི་དབང་ལ་མེ་ཏོག་ཕྲེང་བ། ཆུ། ཅོད་པཎ། རྡོ་རྗེ། དྲིལ་བུ། མིང་གི་དབང་སྟེ་དྲུག་གོ། །མཐའ་བརྟོན་དུ་ལུང་བསྟན།དབུགས་དབྱུང༌། རྗེས་གནང་གསུམ་བཏགས་ཀྱང་རུང་བར་བཤད་དོ། །སྡོམ་པ་ནི་ཐུན་མོང་བ་བྱང་སེམས་ཀྱི་སྡོམ་པ་ཙམ་མོ། །དམ་ཚིག་ནི་ལེགས་གྲུབ་ཀྱི་རྒྱུད་ལས་མང་དུ་བཤད་དོ།།ལམ་གྱི་རིམ་པ་ལ་བཟླས་བརྗོད་ལ་ལྟོས་པའི་བསམ་གཏན་ནི། སྦྱོར་བ་ལ། རིགས་སྤྱིའི་སྔགས་རྒྱ་བཅང་བ།རྒྱལ་བ་སྲས་བཅས་ལ་ཕྱག་འཚལ་ཞིང་བདག་ཉིད་དབུལ་བ། སྐྱབས་སུ་འགྲོ་ཞིང་སེམས་སྐྱེད་པ།སྔགས་དང་ཕྱག་རྒྱས་བསྲུང་བ། གནས་ཁང་གི་ཕྱི་རོལ་དུ་ཕྱིན་ཏེ་ཁྲུས་བྱ་བ།ནང་དུ་འོང་ནས་ཆས་སུ་ཞུགས་ཏེ་སྟན་ལ་འཁོད་པ།མཆོད་པ་བྱིན་གྱིས་རླབས་པ།བདག་དང་གནས་བསྲུང་བ་སྟེ་བདུན་ནོ།།དངོས་གཞི་ལ་བདག་བསྐྱེད་བསྒོམ་པ་ནི།ལྷ་དྲུག་གི་སྐྱེད་ཆོག་བྱ་བ་སྟེ། དེ་ཁོ་ན་ཉིད་ཀྱི་ལྷ།སྒྲའི་ལྷ།ཡི་གེའི་ལྷ།གཟུགས་ཀྱི་ལྷ།ཕྱག་རྒྱའི་ལྷ།མཚན་མའི་ལྷ་སྟེ་དྲུག་གི་སྒོ་ནས་རྣལ་འབྱོར་བསྒོམ་པའོ།།ཡེ་ཤེས་པ་བསྟིམ་པ། དབང་བསྐུར་བ། རིགས་བདག་གིས་རྒྱས་འདེབས་རྣམས་ཀྱང་བྱར་རུང་ངོ༌།།མདུན་བསྐྱེད་བསྒྲུབས་ནས་མཆོད་པ་སོགས་བྱ་བ་ལ།རྟེན་བསྐྱེད་པ། བརྟེན་པ་ལྷ་སྤྱན་དྲངས་ཏེ་བཞུགས་སུ་གསོལ་བ།ཕྱག་རྒྱ་བསྟན་པ། མཆོད་བསྟོད་བྱ་བ།བཤགས་སོགས་བྱ་བ།ཚད་མེད་བཞི་བསྒོམ་པ་སོགས་བྱ་བ་སྟེ་དྲུག་གོ།།
བཟླས་བརྗོད་དངོས་ལ་ཡན་ལག་བཞི་ནི། བདག་གི་གཞི།   གཞན་གྱི་གཞི། སེམས་ལ་གཞོལ་བའི་ཡན་ལག   སྒྲ་ལ་གཞོལ་བའི་ཡན་ལག་གོ།   །བཟླས་པ་བྱ་ཚུལ་ལ་ཡི་གེའི་གཟུགས་ལ་དམིགས་པའི་བཟླས་བརྗོད་དང༌།སྒྲ་ལ་དམིགས་པའི་བཟླས་བརྗོད་གཉིས་སོ།  །དེའི་སྔ་མ་ལའང་མདུན་གྱི་ཐུགས་ཁའི་ཡི་གེའི་གཟུགས་ལ་དམིགས་པ་དང༌།རང་གི་སྙིང་ཁའི་ཡི་གེའི་གཟུགས་ལ་དམིགས་པ་གཉིས་ཡོད་དོ། །བསྙེན་པ་ལ་མཚན་མ། དུས། གྲངས་ཀྱི་བསྙེན་པ་གསུམ་མོ། །བཟླས་བརྗོད་ལ་མི་ལྟོས་པའི་བསམ་གཏན་ལ་གསུམ།མེ་ལ་གནས་པའི་བསམ་གཏན།སྒྲ་ལ་གནས་པའི་བསམ་གཏན། སྒྲ་མཐར་ཐར་པ་སྟེར་བའི་བསམ་གཏན་ནོ། ། སྤྱིར་བྱ་སྤྱོད་ཀྱི་ལམ་ནོམས། སྐུ་ཕྱག་རྒྱ་ཆེན་པོ་བསྒོམ་པ། གསུང་སྔགས་བསྒོམ་པ། ཐུགས་དེ་ཁོ་ན་ཉིད་བསྒོམ་པ་གསུམ་དུ་འདུའོ།།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2019 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号