ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་མཐའི་རྣམ་བཞག་ཐུབ་བསྟན་ལྷུན་པོའི་མཛེས་རྒྱན་ལས་དག་ཡིག་མཁས་པའི་འབྱུང་གནས་ཞེས་བྱ་བ་ལས་སྔགས་ཀྱི
སྤེལ་དུས།05-18  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
གཉིས་པ་གསང་དབང་ལ།    རིག་མ་དབུལ་ཞིང་གསོལ་བ་གདབ་པ།    འོད་དཔག་མེད་དུ་བསྐྱེད་པ།   གསང་རྫས་གཉིས་ཀྱིས་དབང་བསྐུར་བ།   དབང་གི་དག་པ་སྦྱིན་པ་རྣམས་སོ།།གསུམ་པ་ཤེས་རབ་ཡེ་ཤེས་ཀྱི་དབང་ལ། ཡོན་དབུལ་བ།    གསོལ་བ་གདབ་པ།  རིག་མ་གཏད་པ།   ལྷར་བསྐྱེད་པ།   མཁའ་གསང་བརླབ་པ།    སྙོམས་པར་ཞུགས་ནས་ལྷན་སྐྱེས་བསྐྱེད་པ།   བྱང་སེམས་བཏུང་བ།   དབང་གི་དོན་བཤད་པ་རྣམས་སོ།།
བཞི་པ་དབང་བཞི་པ་ནི།   ཚིག་དབང་ངོ༌།   །མཐའ་བརྟེན་གྱི་ཆོ་ག་ནི། རིག་མའི་བརྟུལ་ཞུགས་སྦྱིན་པ།   རྡོ་རྗེའི་བརྟུལ་ཞུགས་སྦྱིན་པ།    སྤྱོད་པའི་བརྟུལ་ཞུགས་སྦྱིན་པ།   ལུང་བསྟན་པ།   རྗེས་གནང༌།   དབུགས་དབྱུང་རྣམས་སོ།    །འདིའི་སྟ་གོན་དང༌།   དངོས་བཞིའི་སྐོར་རྣམས་རྡུལ་ཚོན་གྱི་དཀྱིལ་འཁོར་གྱི་དབང་དུ་བྱས་ཀྱི།   དཀྱིལ་འཁོར་གཞན་དུ་དབང་བསྐུར་ན་འདོར་ལེན་ཇི་ལྟར་རིགས་པར་སྦྱར་དགོས་ཀྱང་མིང་གི་རྣམ་གྲངས་ནི་སྔ་མར་འདུའོ།    །དུས་ཀྱི་འཁོར་ལོའི་ལུགས་ལ་གཞན་རྣམས་ཕལ་ཆེར་སྔར་དང་འདྲ་ཞིང༌།
བྱིས་པ་ལྟར་འཇུག་པའི་དབང་བདུན་ནི།   ཆུ།   ཅོད་པན།   དར་དཔྱངས།   རྡོ་རྗེ་དྲིལ་བུ།   བརྟུལ་ཞུགས།   མིང༌།   རྗེས་གནང༌།    འདོགས་བཅས་ཏེ་བདུན་ནོ།   །དབང་གོང་མ་ལ་ཀུན་རྫོབ་འཇིག་རྟེན་པའི་དབང་གོང་མ་དང༌། ངེས་དོན་འཇིག་རྟེན་ལས་འདས་པའི་དབང་གོང་མ་གཉིས།   དེ་རེ་རེ་ལའང་བུམ་པའི་དབང་སོགས་བཞི་བཞི་ཡོད་དོ།   །རྡོ་རྗེ་སློབ་དཔོན་བདག་པོའི་དབང་ལ་གསོལ་བ་གདབ་ཅིང་དབང་སྟེགས་ལ་བཞག་པ།   ཆུ་དབང་སོགས་སོ་སོར་བསྐུར་བ།   རྣམ་དག་བསྟན་ཅིང་སྐུ་གསུང་ཐུགས་རྡོ་རྗེའི་དབང་བསྐུར་སྦྱིན་པ་རྣམས་སོ།།
གཞན་ཡང་དབང་བསྐུར་བའི་ཆོ་ག་ལ།   ལྷ་ལ་དབང་བསྐུར་བའི་རབ་ནས་ཀྱི་ཆོ་ག་དང༌།དབང་གི་ཡན་ལག་གི་ཆོ་ག    ལྷ་མཉེས་པར་བྱེད་པའི་ཐབས་སྦྱིན་སྲེག་དང༌།    མཁའ་འགྲོ་མཉེས་པའི་ཐབས་ཚོགས་འཁོར།   དཔའ་བོའི་སྟོན་མོ།   དཔའ་མོའི་སྟོན་མོ།   ལག་པའི་མཆོད་པ། ལག་པ་ལ་མཆོད་པ་སོགས་བྱེད་ཚུལ་དང༌། རིག་པ་འཛིན་པའི་ཆ་ལུགས་མི་ཉམས་ཤིང་བཟུང་བའི་དམ་ཚིག་གི་ཡན་ལག་གཙུག་ཏོར། རིགས་ལྔ། དཔའ་བོའི་དར་དཔྱངས། སྟོད་གཡོགས།སྨད་གཡོགས། ཅང་ཏེའུ། ཊ་མ་རུ། རྡོ་རྗེ། དྲིལ་བུ། དགང་གཟར། བླུག་གཟར།རུས་པའི་རྒྱན་དྲུགཀ་པྰ་ལ།ཁ་ཊྭཾཀ སྟག་ལྤགས་ཀྱི་ཤམ་ཐབས།རོ་གདན།ཚངས་སྐུད་ལ་སོགས་པ་རྣམས་ལུགས་འདིའི་མཁོ་བའི་ཡོ་བྱད་དོ། སྣོད་དུ་གྱུར་ནས་དམ་ཚིག་དང་སྡོམ་པ་བསྲུང་བ་ལ།
རིགས་ལྔའི་དམ་ཚིག་ནི། ཚུལ་ཁྲིམས་གསུམ་གཟུང་བ་དང༌། སྐྱབས་སུ་འགྲོ་བ་ནི་རྣམ་སྣང་གི་དམ་ཚིགརྡོ་རྗེ། དྲིལ་བུ། ཕྱག་རྒྱ།   སློབ་དཔོན་གཟུང་བ་ནི་མི་བསྐྱོད་པའི་དམ་ཚིག་ཟང་ཟིང༌། ཆོས། མི་འཇིགས་པ། བྱམས་པའི་སྦྱིན་པ་བཞིའམ། ཡང་ན་ནོར། ནོར་གྱི་སྙིང་པོ།   ཡན་ལག ཡན་ལག་གི་སྙིང་པོ་སྟེ་སྦྱིན་པ་བཞི་ཉིན་རེ་བཞིན་དུས་དྲུག་ཏུ་སྦྱིན་པ་རིན་འབྱུང་གི་དམ་ཚིག ཕྱི་དང༌། གསང་བ་དང༌།   ཐེག་པ་གསུམ་གྱི་ཆོས་བཟུང་བ་འོད་དཔག་མེད་ཀྱི་དམ་ཚིགམཆོད་པའི་ལས་ལ་བརྩོན་པ་ནི་དོན་གྲུབ་ཀྱི་དམ་ཚིག་གོ། །
རྩ་ལྟུང་བཅུ་བཞི་ནི། རྡོ་རྗེ་སློབ་དཔོན་ལ་བརྙས་པ། བདེ་གཤེགས་བཀའ་ལས་འདས་པ། རྡོ་རྗེ་སྤུན་ལ་ཁྲོས་ནས་ཉེས་པ་བརྗོད་པ། སེམས་ཅན་གང་ཡང་རུང་བ་ལ་བྱམས་པ་སྤོང་བ། སྨོན་སེམས་གཏོང་བ། རང་གཞན་གྱི་གྲུབ་པའི་མཐའ་ལ་སྨོད་པ།   སྣོད་མིན་ལ་གསང་བ་སྟོན་པ། རང་གི་ཕུང་པོ་ལ་བརྙས་པ། སྟོང་ཉིད་ལ་ཡིད་མ་ཆེས་ནས་སྤོང་བ། མངོན་སྤྱོད་བྱ་བར་འོས་པའི་ཡུལ་ལ་བྱམས་པ། ཆོས་བདག་མེད་པའི་ལྟ་བ་ཡོད་བཞིན་དུ་མ་བསྐྱང་བར་ཞག་གཅིག་འདའ་བ།དད་པ་དང་ལྡན་པའི་སེམས་སུན་འབྱིན་པ། དམ་ཚིག་གི་རྫས་དང་རིག་མ་སོགས་བསྟེན་ནུས་བཞིན་དུ་དང་དུ་མི་ལེན་པའམ། རྣལ་འབྱོར་རྒྱུད་ལྟར་ན་རྡོར་དྲིལ་ལག་པའི་ཕྱག་རྒྱ་སོགས་སྨད་ནས་འདོར་བ་གང་རུང༌།བུད་མེད་སྤྱི་ལ་སྨོད་ཚིག་ཏུ་འགྲོ་བའི་སྐྱོན་བརྗོད་བྱེད་པ་སྟེ་བཅུ་བཞིའོ།
སྦོམ་པོ་བརྒྱང་ནི།ཤེས་རབ་སྟོབས་ཀྱིས་ལེན་པ།དེའི་བདུད་རྩི་སྟོབས་ཀྱིས་ལེན་པ།སྣོད་མིན་ལ་གསང་རྫས་དང་ཕྱག་རྒྱ་སྟོན་པ།ཚོགས་ཀྱི་ནང་དུ་རྩོད་པ།དད་ལྡན་ལ་དྲི་བའི་དོན་ལས་གཞན་དུ་ཆོས་སྟོན་པ།ཉན་ཐོས་ཀྱི་ནང་དུ་ཞག་བདུན་གནས་པ།རྫུན་གྱིས་རྣལ་འབྱོར་ང་རྒྱལ་བྱེད་པ།དད་པ་མེད་པ་ལ་ཆོས་སྟོན་པ་སྟེ་བརྒྱད་དོ། །གཞན་ཡང་དེར་མ་འདུས་པའི་སྦོམ་པོ་མཐའ་ཡས་སོ།   །དུས་ཀྱི་འཁོར་ལོ་ལས་བཤད་པ་ནི་འདི་དང་ཅུང་ཞིག་མི་འདྲ་ཡང་མིང་གི་རྣམ་གྲངས་ནི་ཕལ་ཆེར་དེར་འདུའོ། །
རྒྱུད་དག་པར་བྱས་ནས་ཉམས་སུ་ལེན་པའི་རིམ་པ་ལ། བསྐྱེད་པའི་རིམ་པ་དང༌།རྫོགས་པའི་རིམ་པ་གཉིས་ལས།དང་པོ་བསྐྱེད་རིམ་ལ།སྤང་བྱ་ནི།   ཐ་མལ་སྣོད་བཅུད་ཀྱི་སྣང་བ་དང་ཞེན་པའོ།།གཉེན་པོ་ནི་རྟེན་བརྟེན་པའི་གསལ་སྣང་དང་ང་རྒྱལ་ལོ།།བསྒོམ་པའི་གནས་སྐབས་ནི།
ལས་དང་པོ་པ། ཡེ་ཤེས་ཅུང་ཟད་བབས་པ། ཡེ་ཤེས་ལ་ཅུང་ཟད་དབང་པ། ཡེ་ཤེས་ལ་ཡང་དག་པར་དབང་བ་སྟེ་བཞི།བསྒོམ་པའི་རྣལ་འབྱོར་ནི། རགས་པ་དྲན་པ་གཅིག་པའི་རྣལ་འབྱོར་དང༌།ཕྲ་བ་རྟོག་པའི་རྣལ་འབྱོར་གཉིས། བསྐྱེད་རིམ་སྤྱིའི་ཆིངས་ལ་བསྙེན་བསྒྲུབ་ཡན་ལག་བཞི་ནི།བསྙེན་པ། ཉེར་སྒྲུབ། སྒྲུབ་པ། སྒྲུབ་པ་ཆེན་པོའོ།།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2021 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号