གཉིས་པ་གཏན་ཚིགས་རིག་པའི་གཞུང་ལས་འབྱུང་བའི་མིང་གི་རྣམ་གྲངས་ལ། གཏན་ཚིགས་རིག་པ་དང༌།རྒྱུ་མཚན་རིག་པ་དོན་གཅིག་ལ། རིག་པའི་གནས་འདི་རྒྱས་པར་སྟོན་པའི་རང་སྡེ་ནང་པ་སངས་རྒྱས་པའི་གཞུང་གི་གཙོ་བོ་ནི། དཔལ་ལྡན་ཕྱོགས་ཀྱི་གླང་པོ་དང༌། རིགས་པའི་དབང་ཕྱུག་ཆོས་ཀྱི་གྲགས་པ་གཉིས་ཀྱིས་མཛད་པའི་སྡེ་བདུན་མདོ་དང་བཅས་པ་ཡིན་ལ།
དེ་ཡང་ཚད་མ་ཀུན་ལས་བཏུས་པའི་དོན་འགྲེལ་པའི་བསྟན་བཅོས་ལ། རྒྱས་པའི་བསྟན་བཅོས་ཚད་མ་རྣམ་འགྲེལ། འབྲིང་དུ་སྟོན་པ་རྣམ་པར་ངེས་པ། བསྡུས་ཏེ་སྟོན་པ་རིགས་པའི་ཐིགས་པ་སྟེ་གཙོ་བོ་ལུས་ལྟ་བུའི་བསྟན་བཅོས་གསུམ། གཏན་ཚིགས་ཐིགས་པ། འབྲེལ་བ་བརྟག་པ། རྒྱུད་གཞན་སྒྲུབ་པ། རྩོད་པའི་རིགས་པ་སྟེ་འཕྲོས་པ་ཡན་ལག་ལྟ་བུའི་བསྟན་བཅོས་བཞི་རྣམས་ལ་ཚད་མ་སྡེ་བདུན་ཞེས་གྲགས་སོ།།
འདི་དག་གི་བརྗོད་བྱའི་གཙོ་བོ་རྟོག་གེའི་ཚིག་དོན་བརྒྱད་ནི། མངོན་སུམ་ཡང་དག་ལྟར་སྣང་གཉིས། རྗེས་དཔག་ཡང་དག་ལྟར་སྣང་གཉིས།སྒྲུབ་དག་ཡང་དག་ལྟར་སྣང་གཉིས།སུན་འབྱིན་ཡང་དག་ལྟར་སྣང་གཉིས་ཏེ་བརྒྱད་དོ། །བརྗོད་བྱའི་ལུས་དངོས་ལ། ཤེས་བྱ་ཡུལ་གྱི་རྣམ་བཞག་ནི། ཡུལ། ཤེས་བྱ། གཞལ་བྱ། ཡོད་པ། གཞི་གྲུབ་རྣམས་དོན་གཅིག
མཚན་ཉིད་ནི་རིམ་པ་བཞིན་དུ། བློས་རིག་པར་བྱ་བ། བློའི་ཡུལ་དུ་བྱར་རུང་བ། ཚད་མས་རྟོགས་པར་བྱ་བ། ཚད་མས་དམིགས་པ། ཚད་མས་གྲུབ་པ་རྣམས་སོ། །དབྱེ་ན། རང་མཚན། སྤྱི་མཚན་གཉིས། དེ་ཡང་ཡུལ་དུས་རང་བཞིན་མ་འདྲེས་པར་གནས་པ་དང༌། ཐུན་མོང་དུ་རྗེས་སུ་འགྲོ་བར་བྱེད་པའི་ཆོས་གཉིས་སོ། ། སྤྱི། རགས་པ། བྱེ་བྲག རྒྱུན་རྣམས་སྤྱི་མཚན་ཡིན་ཀྱང་དེ་དག་ཡིན་ན་སྤྱི་མཚན་ཡིན་མི་དགོས་སོ། །རང་མཚན་ནི། དངོས་པོ་དང༌། །དོན་བྱེད་ནུས་པའི་ཆོས་ཡིན་ལ། སྤྱི་མཚན་ནི། དངོས་པོ་མེད་པ་དང༌། དོན་བྱེད་མི་ནུས་པའི་ཆོས་སོ། །ཡང་ཡུལ་བཞིར་དབྱེ་བ་ནི། སྣང་ཡུལ། གཟུང་ཡུལ། འཇུག་ཡུལ། ཞེན་ཡུལ་བཞིའོ། །དེའི་སྔ་མ་གཉིས་དོན་གཅིག་ལ། འཇུག་ཡུལ་ལ་གནས་སྐབས་དང་མཐར་ཐུག་གི་འཇུག་ཡུལ་གཉིས་སོ། །ཞེན་ཡུལ་ལ། སྐྱེས་བུ་དང་རྟོག་པའི་ཞེན་ཡུལ་གཉིས་སོ། །ཡང་ཡུལ་ལ་དབྱེ་ན། མངོན་གྱུར་དང༌། ལྐོག་གྱུར་གཉིས།མངོན་གྱུར་ལ།རང་རིག་དང་གཞན་རིག་གི་བྱེད་པ་འཇུག་པའི་ཡུལ་གཉིས། ལྐོག་གྱུར་ལ་རྗེས་དཔག་གསུམ་གྱི་བྱེད་པ་འཇུག་པའི་ཡུལ་གསུམ་མོ། །ཡང་ཡུལ་ལ་དབྱེ་ན། འདུས་བྱས་དང༌། འདུས་མ་བྱས་གཉིས། འདུས་བྱས། བྱས་པ། སྐྱེས་པ། འཇིག་པ། དོན་བྱེད་ནུས་པ།དངོས་པོ།།མི་རྟག་པ། སྐད་ཅིག་མ་རྣམས་དོན་གཅིག དབྱེ་ན།བེམ་པོ།རིག་པ།ལྡན་མིན་འདུ་བྱེད་གསུམ། བེམ་པོ་ནི། རྡུལ་དུ་གྲུབ་པ་སྟེ། ཕྱིའི་བེམ་པོ་དང༌། ནང་གི་བེམ་པོ་གཉིས། ཡང་ན་རགས་པ་དང༌། རྡུལ་ཕྲ་རབ་གཉིས། རིགས་པ་དང༌། ལྡན་མིན་གཉིས་མངོན་པའི་སྐབས་སུ་བཤད་ཟིན་ཏོ།།
རྒྱུ་འབྲས་གཉིས་སུ་དབྱེ་ན། རྒྱུ་ལ། དངོས་རྒྱུ། བརྒྱུད་རྒྱུ་གཉིས། ཡང་ན་ཉེར་ལེན་དང༌།ལྷན་ཅིག་བྱེད་རྐྱེན་གཉིས། འབྲས་བུ་ལ། དངོས་འབྲས། བརྒྱུད་འབྲས་གཉིས་སོ། །འདུས་མ་བྱས་ཀྱི་ཆོས། རྟག་པ། མ་སྐྱེས་པའི་ཆོས། མ་བྱས་པའི་ཆོས།སྐད་ཅིག་མ་མ་ཡིན་པའི་ཆོས་རྣམས་དོན་གཅིག དབྱེ་བ་མངོན་པའི་སྐབས་སུ་བལྟའོ། །ཡང་ཡུལ་ལ་དབྱེ་ན། དགག་པ་དང༌། སྒྲུབ་པ་གཉིས། དགག་པ་ལ་མེད་དགག་དང༌། མ་ཡིན་དགག་གཉིས། མ་ཡིན་དགག་ལ་ཆོས་གཞན་དངོས་སུ་འཕེན་པ། ཤུགས་ལ་འཕེན་པ། སྐབས་སྟོབས་ཀྱིས་འཕེན་པ་གསུམ་མོ། །ཡང་ཡུལ་ལ་དབྱེ་ན། འགལ་བ་དང༌། འབྲེལ་བ་གཉིས། འགལ་བ་ལ། ལྷན་ཅིག་མི་གནས་འགལ། ཕན་ཚུན་སྤང་འགལ་གཉིས། དེ་རེ་རེ་ལའང་དངོས་འགལ་དང༌། བརྒྱུད་འགལ་གཉིས་གཉིས་སོ། །འབྲེལ་བ་ལ་བདག་གཅིག་འབྲེལ་དང༌། དེ་བྱུང་འབྲེལ་གཉིས། ཡང་བརྗོད་བྱ་དང། བརྗོད་བྱེད་གཉིས་སུ་དབྱེ་ན། བརྗོད་བྱེད་ལ་ངོ་བོའི་སྒོ་ནས་མིང༌། ཚིག ཡི་གེ་གསུམ། མིང་ལ་དངོས་མིང༌། བཏགས་མིང་གཉིས་སོ། །བརྗོད་བྱའི་སྒོ་ནས་དབྱེ་ན། རིགས་བརྗོད་དང༌། ཚོགས་བརྗོད་གཉིས། བརྗོད་ཚུལ་གྱི་སྒོ་ནས་དབྱེ་ན། ཆོས་བརྗོད་ཀྱི་སྒྲ་དང༌། ཆོས་ཅན་བརྗོད་པའི་སྒྲ་གཉིས། འདི་གཉིས་ལ་ཁྱད་པར་གཞན་སྤོང་བ་དང༌། མི་སྤོང་བའི་སྒྲ་ཞེས་ཀྱང་ཟེར་རོ།།རྣམ་གཅོད་ཀྱི་སྒོ་ནས་དབྱེ་ན། མི་ལྡན་རྣམ་གཅོད་ཀྱི་སྒྲ། མི་སྲིད་རྣམ་གཅོད་ཀྱི་སྒྲ་གསུམ་མོ། །ཡང་ཡུལ་ལ་དབྱེ་ན། སྣང་བ་དང༌། སེལ་བ་གཉིས། སྣང་བ་དང་སྒྲུབ་པ་དོན་གཅིག སེལ་བ། དགག་པ། གཞན་སེལ་བ་རྣམས་དོན་གཅིག སེལ་བ་ལ་དབྱེ་ན།དོན་གྱི་གཞན་སེལ།བློའི་གཞན་སེལ།མེད་དགག་གི་གཞན་སེལ་གསུམ་ལས། དང་པོ་ནི། བུམ་པ་མ་ཡིན་པ་ལས་ལོག་པ་ལྟ་བུའོ།།གཉིས་པ་ནི། བུམ་འཛིན་རྟོག་པ་ལ་བུམ་པ་མ་ཡིན་པ་ལས་ལོག་པར་སྣང་བ་ལྟ་བུའོ། །གསུམ་པ་ནི། བུམ་པའི་སྟེང་གི་བུམ་པ་མ་ཡིན་པ་རྣམ་པར་བཅད་ཙམ་གྱི་ཆ་ལྟ་བུའོ། །འདིའི་སྔ་མ་ལ་བུམ་པ་རང་མཚན་པ་འཇོག་པར་བཤད་པ་ཡང་ཡོད་དོ།།
ཡང་ཡུལ་ལ་དབྱེ་ན། སྤྱི་དང༌།བྱེ་བྲག་གཉིས། སྤྱི་ལ།རིགས་སྤྱི། ཚོགས་སྤྱི།དོན་སྤྱི་གསུམ་མོ། །ཡང་རྫས་ཆོས་དང༌།ལྡོག་ཆོས་གཉིས་སུ་དབྱེ་ན།ལྡོག་ཆོས་ལ། རང་ཡིན་ལྡོག་ཆོས། རང་མ་ཡིན་ལྡོག་ཆོས། ལྡོག་ཆོས་ཕུང་སུམ་ཙམ་པོ་པ་རྣམས་རྗེས་མཐུན་པ་དང་བཅས་པ་ཡོད་དོ། །ཡང་མཚན་ཉིད་དང༌། མཚོན་བྱ་གཉིས་སུ་དབྱེ་ན། མཚོན་བྱ་ནི། རྣམ་པར་བཞག་བྱའི་ཆོས་གསུམ་ཚང་བ་སྟེ། སྤྱིར་མཚོན་བྱ་ཡིན་པ།རང་གི་མཚན་ཉིད་ལས་གཞན་པའི་མཚོན་བྱ་མ་ཡིན་པ། མཚན་གཞི་ལ་སྲིད་པ་གསུམ་མོ། །མཚན་ཉིད་ནི། རྣམ་པར་འཇོག་བྱེད་ཀྱི་ཆོས་གསུམ་ཚང་བ་སྟེ། སྤྱིར་མཚན་ཉིད་ཡིན་པ། རང་གི་མཚོན་བྱ་ལས་གཞན་གྱི་མཚན་ཉིད་མ་ཡིན་པ། མཚན་གཞི་ལ་སྲིད་པ་གསུམ་མོ། །ཡང་བདེན་པ་གཉིས་དང༌། མཚན་ཉིད་གསུམ་དུ་དབྱེ་བ་སོགས་ནི་མངོན་པ་དང་གྲུབ་མཐའི་སྐབས་སུ་བལྟའོ། །ཡུལ་ཅན་བློའི་རྣམ་བཞག་ལ་བློ། ཤེས་པ། རིག་པ། གསལ་བ་རྣམས་དོན་གཅིགདབྱེ་བ་ལྔ་ལས། 1/4 1 2 3 4 下一页 尾页 |