ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་མཐའི་རྣམ་བཞག་ཐུབ་བསྟན་ལྷུན་པོའི་མཛེས་རྒྱན་ལས་དག་ཡིག་མཁས་པའི་འབྱུང་གནས་ཞེས་བྱ་བ་ལས་གཏན་ཚིགས
སྤེལ་དུས།05-18  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
རང་བཞིན་གྱི་རྟགས་ལ་དབྱེ་ན།ཁྱད་པར་ལྟོས་པ་བའི་རང་བཞིན་གྱི་རྟགས་དང་། ཁྱད་པར་དག་པ་བའི་རང་བཞིན་གྱི་རྟགས་གཉིས།སྔ་མ་ལ་བྱེད་ཆོས་ཐ་མི་དད་ལ་ལྟོས་པ་དང༌། ཐ་དད་ལ་ལྟོས་པ་གཉིས།ཕྱི་མ་ལ།བྱེད་ཆོས་དངོས་སུ་འཕངས་པ་དང༌། ཤུགས་ལ་འཕངས་པ་གཉིས་རྣམས་སོ། །མ་དམིགས་པའི་རྟགས་ལ་དབྱེ་ན། མི་སྣང་བ་མ་དམིགས་པའི་རྟགས་དང༌།   སྣང་རུང་མ་དམིགས་པའི་རྟགས་གཉིས།དང་པོའི་སྐབས་ཀྱི་བསྐལ་དོན་གསུམ་ནི། ཡུལ་ཕྲ་བ།དུས་ཕྲ་བ།ངོ་བོ་ཕྲ་བས་བསྐལ་བའོ། །སྣང་རུང་མ་དམིགས་པ་ལ་དབྱེ་ན།འབྲེལ་ཟླ་མ་དམིགས་པའི་རྟགས་དང༌།འགལ་ཟླ་དམིགས་པའི་རྟགས་གཉིས།འབྲེལ་ཟླ་མ་དམིགས་པ་ལ།རྒྱུ། ཁྱབ་བྱེད། རང་བཞིན།དངོས་འབྲས་མ་དམིགས་པའི་རྟགས་ཡང་དག་དང་བཞི།འགལ་ཟླ་དམིགས་པ་ལ།རང་བཞིན་འགལ་དམིགས།འགལ་འབྲས་དམིགས་པ།རྒྱུ་འགལ་དམིགས།རྒྱུ་དང་འགལ་བའི་འབྲས་བུ་དམིགས་པ།འབྲས་བུ་འགལ་དམིགས།   ཁྱབ་བྱེད་འགལ་དམིགས་ཏེ་དྲུག   ཡང་ལྷན་ཅིག་མི་གནས་འགལ་ལ་བརྟེན་པ་དང༌།ཕན་ཚུན་སྤངས་འགལ་ལ་བརྟེན་པའི་འགལ་ཟླ་དམིགས་པའི་གཏན་ཚིགས་གཉིས་སོ། །
ཡང་རྟགས་ཡང་དག་ལ་བསྒྲུབ་བྱའི་སྒོ་ནས་དབྱེ་ན། དངོས་པོ་སྟོབས་ཞུགས་ཀྱི་རྟགས་ཡང་དག   གྲགས་པའི་རྟགས་ཡང་དག   ཡིད་ཆེས་པའི་རྟགས་ཡང་དག་སྟེ་གསུམ་མོ།   །བསྒྲུབ་ཚུལ་གྱི་སྒོ་ནས་དབྱེ་ན། དོན་སྒྲུབ་ཀྱི་རྟགས་ཡང་དག ཐ་སྙད་སྒྲུབ་ཀྱི་རྟགས་ཡང་དག་དང༌།ཐ་སྙད་འབའ་ཞིག་སྒྲུབ་ཀྱི་རྟགས་ཡང་དག་སྟེ་གསུམ།སྒྲུབ་བྱའི་ཆོས་ཀྱི་སྒོ་ནས་དབྱེ་ན།   སྒྲུབ་རྟགས་དང༌། འགལ་རྟགས་གཉིས་སོ།   །མཐུན་ཕྱོགས་ལ་འཇུག་ཚུལ་གྱི་སྒོ་ནས་དབྱེ་ན།   མཐུན་ཕྱོགས་ལ་ཁྱབ་བྱེད་དུ་འཇུག་པའི་རྟགས་དང༌། དེ་ལ་ཆ་གཉིས་སུ་འཇུག་པའི་རྟགས་གཉིས་སོ། །རྒོལ་བའི་སྒོ་ནས་དབྱེ་ན།རང་དོན་གྱི་རྟགས་ཡང་དག གཞན་དོན་གྱི་རྟགས་ཡང་དག་གཉིས་སོ།   །རྟགས་ཀྱི་སྐྱོན་ལ་རྟགས་སྐྱོན།དཔེ་སྐྱོན།ཕྱོགས་སྐྱོན་གསུམ།རྟགས་སྐྱོན་ལ།འགལ་བ།   མ་ངེས་པ།   མ་གྲུབ་པ་གསུམ་མོ།།
རྟགས་ལྟར་སྣང་ལ།མ་གྲུབ་པའི་རྟགས།འགལ་བའི་རྟགས།མ་ངེས་པའི་རྟགས་དང་གསུམ།དང་པོ་མ་གྲུབ་པ་ལ། རྟགས་ཀྱི་ངོ་བོ་མེད་ནས་མ་གྲུབ་པ། ཆོས་ཅན་གྱི་ངོ་བོ་མེད་ནས་མ་གྲུབ་པ། གཞི་རྟགས་ཀྱི་འབྲེལ་བ་མེད་ནས་མ་གྲུབ་པ། ཆོས་ཅན་གྱི་ཕྱོགས་གཅིག་ལ་རྟགས་མེད་ནས་མ་གྲུབ་པ།རྟགས་ཀྱི་ཕྱོགས་གཅིག་ལ་ཆོས་ཅན་མེད་ནས་མ་གྲུབ་པ་སྟེ་དོན་ལ་ལྟོས་ནས་མ་གྲུབ་པ་ལྔ། ཆོས་ཅན་ལ་ཐེ་ཚོམ་མ་ཟ་ནས་མ་གྲུབ་པ། རྟགས་ལ་ཐེ་ཚོམ་ཟ་ནས་མ་གྲུབ་པ།གཞི་རྟགས་ཀྱི་འབྲེལ་བ་ལ་ཐེ་ཚོམ་ཟ་ནས་མ་གྲུབ་པ་སྟེ་ཐེ་ཚོམ་ཟ་ནས་མ་གྲུབ་པ་གསུམ་དང༌། གཞི་རྟགས་ཐ་དད་མེད་ནས་མ་གྲུབ།གཞི་ཆོས་ཐ་དད་མེད་ནས་མ་གྲུབ། རྟགས་ཆོས་ཐ་དད་མེད་ནས་མ་གྲུབ་པ་སྟེ་ཤེས་འདོད་ལ་ལྟོས་ནས་མ་གྲུབ་པ་གསུམ་སྟེ་བསྡོམས་པས་བློ་ལ་ལྟོས་ནས་མ་གྲུབ་པ་དྲུག སྔ་རྒོལ་ལ་ལྟོས་ནས་མ་གྲུབ། ཕྱི་རྒོལ་ལ་ལྟོས་ནས་མ་གྲུབ།གཉིས་ཀ་ལ་ལྟོས་ནས་མ་གྲུབ་པ་སྟེ་རྒོལ་བ་ལ་ལྟོས་ནས་མ་གྲུབ་པ་གསུམ།འགལ་བའི་རྟགས་ལ།ཆོས་ཀྱི་ངོ་བོ་འགོག་པ།ཆོས་ཅན་གྱི་ངོ་བོ་འགོག་པ།ཆོས་ཀྱི་ཁྱད་པར་འགོག་པ།ཆོས་ཅན་གྱི་ཁྱད་པར་འགོག་པ་སྟེ་བཞི།མ་ངེས་པའི་རྟགས་ལ།   ཐུན་མོང་མ་ཡིན་པའི་མ་ངེས་པའི་རྟགས་དང༌།ཐུན་མོང་བའི་མ་ངེས་པའི་རྟགས་གཉིས།ཕྱི་མ་ལ་ཕྱོགས་གཉིས་ཀ་ལ་མཐོང་ཙམ་དུ་གྲུབ་པ་དང༌། མཐུན་ཕྱོགས་ལ་མཐོང་མི་མཐུན་ཕྱོགས་ལ་མ་མཐོང་བ་དང༌། མི་མཐུན་ཕྱོགས་ལ་མཐོང་མཐུན་ཕྱོགས་ལ་མ་མཐོང་བའི་མ་ངེས་པའི་རྟགས་ཏེ་གསུམ་མོ།།ཡང་ན་མི་མཐུན་ཕྱོགས་ལ་རྣམ་གཉིས་མི་མཐུན་ཕྱོགས་ལ་ཁྱབ་བྱེད་དུ་འཇུག་པ། མི་མཐུན་ཕྱོགས་ལ་རྣམ་གཉིས་མཐུན་ཕྱོགས་ལ་ཁྱབ་བྱེད་དུ་འཇུག་པ།གཉི་ཀ་ལ་རྣམ་གཉིས་སུ་འཇུག་པ། གཉི་ཀ་ལ་ཁྱབ་བྱེད་དུ་འཇུག་པ་སྟེ་བཞིའོ། །ལྷག་ལྡན་གྱི་གཏན་ཚིགས་ནི་མཁས་པ་འགའ་ཞིག་མ་ངེས་པའི་རྟགས་ཀྱི་བྱེ་བྲག་ཏུ་བཤད་ལ་འགའ་ཞིག་གིས་མ་ངེས་པའི་རྟགས་དང་དོན་གཅིག་ཏུ་བཤད་དོ།།
གཞན་དོན་རྗེས་དཔག་ལ།མིང་གི་རྣམ་གྲངས་ནི། གཞན་དོན་རྗེས་དཔག རྟགས་ཚིག་ཡང་དག   བསྒྲུབ་དག་ཡང་དག་རྣམས་དོན་གཅིག་ལ།རྗེས་དཔག་ཏུ་བཏགས་པ་ཙམ་ཡིན་གྱི་རྗེས་དཔག་དངོས་མིན་ནོ།། དབྱེ་ན་ཆོས་མཐུན་སྦྱོར་གྱི་བསྒྲུབ་དག་ཡང་དག་དང༌།ཆོས་མི་མཐུན་སྦྱོར་གྱི་བསྒྲུབ་དག་ཡང་དག་གཉིས།དང་པོ་ནི།གང་བྱས་ན་མི་རྟག་པས་ཁྱབ།དཔེར་ན་བུམ་པ་བཞིན།སྒྲ་ཡང་བྱས་སོ། །ཞེས་པ་ལྟ་བུའོ། །གཉིས་པ་ནི།གང་རྟག་ན་མ་བྱས་པས་ཁྱབ། དཔེར་ན་འདུས་མ་བྱས་ཀྱི་ནམ་མཁའ་བཞིན།སྒྲ་ནི་བྱས་སོ། །ཞེས་པ་ལྟ་བུའོ། །སྒྲུབ་དག་ཡན་ལག་ལྔ་ལྡན་ནི།
ལུགས་འདི་པས་མི་འདོད་ཀྱང་གྲུབ་མཐའ་གོང་མ་འགའ་ཞིག་གི་འདོད་ལ།དེ་ཡང་སྒྲ་ནི་མི་རྟག་སྟེ། བྱས་པའི་ཕྱིར།དཔེར་ན་བུམ་པ་བཞིན།བུམ་པ་བྱས་པ་དེ་བཞིན་དུ་སྒྲ་ཡང་བྱས། དེའི་ཕྱིར་སྒྲ་མི་རྟག་ཞེས་པ་སྟེ།དམ་བཅའ།དཔེ།ཕྱོགས་ཆོས།ཉེར་གཏོད།འཇུག་སྡུད་ལྔའོ། །འདི་ལ་ལ་ལར་ཁྱབ་པ་འདྲེན་ནོ། །བསྒྲུབ་དག་གི་ལམ་སྦྱོང་སུན་འབྱིན་ལ།   སུན་འབྱིན་དང་ཐལ་འགྱུར་དོན་གཅིགདཔེར་ན་སྒྲ་ཆོས་ཅན།མ་བྱས་པ་ཡིན་པར་ཐལ།   རྟག་པ་ཡིན་པའི་ཕྱིར། ཞེས་པ་ལྟ་བུའོ༑   ༑
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2021 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号