ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་པའི་མཐའ་རྣམ་པར་བཞག་པ་ཐུབ་བསྟན་ལྷུན་པོའི་མཇེས་རྒྱན་ལས་གྲུབ་མཐའི་སྒྲ་དོན་སོགས་བཤད་པ།
སྤེལ་དུས།03-28  ཡོང་ཁུངས།  རྩོམ་པ་པོ།

གྲུབ་མཐའི་སྒྲ་དོན་སོགས་བཤད་པ།

དང་པོ་ནི། སྤྱིར༌གྲུབ་མཐའི་ཐ་སྙད་མདོ་ལས་ཀྱང་གསུངས་ཤིང༌། སིངྔྷྱནྟ་ཞེས་པའི་སྐད་ཀྱི་བྱིངས་ལས་བསྟན་བཅོས་དང་དམ་ཚིག་དང་ཡང་དག་པ་རྟོགས་པ་སོགས་ལ་འཇུག་པར་བཤད་ཀྱང་འདིར་ནི་རང་གི་བློ་ངོར་ཡང་དག་པའི་གནས་ལུགས་སམ་དོན་གྱི་གནས་ཚུལ་ནི་འདི་ཉིད་ལས་གཞན་དུ་མེད་དོ་སྙམ་དུ་རིགས་པས་གྲུབ་པའམ་ཐག་བཅད་པའི་ཆ་ལ་བྱ་སྟེ། སིངྔྷི་གྲུབ་པ་དང༌།   ཨནྟ་མཐའ་ཡིན་ནོ། །གཉིས་པ་ནི། རྣམ་རྟོག་གིས་སྒྲོ་བཏགས་པའི་ཆ་གཞན་བཟློག་ནས་རང་གི་བློ་ངོར་རིགས་པས་དོན་གྱི་གནས་ཚུལ་ཡང་དག་པར་གྲུབ་པ་ཉིད་གྲུབ་མཐའི་ངོ་བོའོ། ། ཚུལ་དེ་རིགས་པའི་ལམ་ནས་སྨྲ་བས་ན་གྲུབ་མཐའ་སྨྲ་བའོ།   །
དེ་ཡང་སེམས་ཅན་གྱི་རིས་ནི་གཉིས་ཏེ། གྲུབ་པའི་མཐའ་ལ་མ་ཞུགས་པ་དང་ཞུགས་པའོ། །དང་པོ་ནི། རིགས་པས་སྦྱར་བའི་གཞུང་ལུགས་ལ་མ་བརྟེན་པར་རང་དགར་ཚེ་འདིའི་བདེ་བ་ཙམ་དོན་དུ་གཉེར་བའོ། །ཕྱི་མ་ནི་དེ་ཙམ་གྱིས་ཆོག་པར་མི་འཛིན་པར་རང་གི་བློ་ངོར་འཐད་པས་སྦྱར་བའི་གཞུང་ལུགས་ལ་བརྟེན་ནས་དངོས་པོའི་གནས་ཚུལ་ལ་དཔྱད་ནས་བླང་དོར་བྱེད་པ་རྣམས་ཡིན་ཏེ། ཕྱི་ནང་གི་གྲུབ་མཐའ་སྨྲ་བ་རྣམས་ཀྱི་ཐ་ཤལ་བ་མུ་སྟེགས་རྒྱང་འཕེན་པས་ཀྱང་ཕྱི་ནང་གི་རྒྱུ་འབྲས་རྣམས་ཡོད་མེད་དཔྱོད་པ་ལ་ཞུགས་ནས་རིགས་པ་ལྟར་སྣང་ལ་ཡང་དག་པའི་རིགས་པར་རློམས་ནས་རང་གི་གཞུང་འཛུགས་པའི་ཕྱིར་རོ། །    གསུམ་པ་ནི།    །ཕྱི་ནང་གི་ཁྱད་པར་ཙམ་ནི་དཀོན་མཆོག་གསུམ་སྐྱབས་གནས་ཡང་དག་ཏུ་ཁས་ལེན་པ་ལ་ཆོས་འདི་པ་དང་དེ་ལྟར་ཁས་མི་ལེན་པ་ལ་ཆོས་འདི་པ་མ་ཡིན་པར་འཇོག་པ་ཡིན་ལ། ཁས་ལེན་ཚུལ་ཡང་བྱང་ཆུབ་ལམ་རིམ་ལས་འབྱུང་བ་ལྟར་དཀོན་མཆོག་གསུམ་གྱི་ཡོན་ཏན་ཤེས་པ། ཁྱད་པར་ཤེས་པ། ཁས་བླངས་པ། གཞན་དུ་མི་སྨྲ་བ་བཞིའི་སྒོ་ནས་སྐྱབས་སུ་འགྲོ་བའོ།   །ཕྱི་ནང་གི་ཁྱད་པར་སྐྱབས་འགྲོས་འབྱེད་པ་འདི་ནི་དཔལ་ཤནྟི་པ་དང་མཉམ་མེད་ཇོ་བོ་ཆེན་པོ་དང་རྗེ་བདག་ཉིད་ཆེན་པོའི་བཞེད་པ་ཡིན་ཏེ་གནད་ཤིན་ཏུ་ཆེའོ། །འོ་ན་སངས་རྒྱས་འཕགས་པའི་ཐུགས་རྒྱུད་ན་སྐྱབས་སུ་འགྲོ་བའི་བློ་ཡོད་དམ་ཞེ་ན།རང་ཉིད་འཇིགས་པ་མཐའ་དག་ལས་གྲོལ་ཟིན་མོད་ཀྱང་སྤྱིར་མི་གནས་པའི་མྱང་འདས་སྲིད་ཞིའི་འཇིགས་པ་ལས་སྐྱོབ་པའི་སྐྱབས་ཡང་དག་པར་གྲུབ་པའི་ཚད་མ་ནི་ཡོད་པས་མི་འགལ་ལོ།  །འོན་ཀྱང་ཕྱི་ནང་གི་གྲུབ་མཐའ་སྨྲ་བའི་ཁྱད་པར་ནི་དཀོན་མཆོག་གསུམ་སྐྱབས་གནས་ཡང་དག་ཏུ་ཁས་ལེན་པར་མ་ཟད་ལྟ་བ་བཀར་བཏགས་ཀྱི་ཕྱག་རྒྱ་བཞི་ཁས་ལེན་པའི་གྲུབ་མཐའ་སྨྲ་བ་ནི་རང་སྡེ་དང༌། དེ་ལྟར་ཁས་མི་ལེན་པའི་གྲུབ་མཐའ་སྨྲ་བ་ནི་གཞན་སྡེར་འཇོག་པ་ཡིན་ཏེ། རང་སྡེ་གནས་མ་བུ་བས་བརྗོད་དུ་མེད་པའི་གང་ཟག་ཁས་ལེན་ཚུལ་དང་དེ་གྲུབ་མཐའ་གང་དུ་གཏོགས་པའི་ཚུལ་དཔྱད་པ་ནི་འོག་ཏུ་འཆད་པར་འགྱུར་རོ། །
གཞན་དག་ན་རེ། གང་སྐྱབས་སུ་འགྲོ་བ་དེས་ནི་ངེས་པར་ཕྱག་རྒྱ་བཞི་ཁས་ལེན་དགོས་ཏེ་མྱ་ངན་ལས་འདས་པའི་ངོ་བོ་དང་དེ་ཐོབ་བྱེད་ཀྱི་ཐབས་རྣམས་ཚད་མས་ངེས་ནས་སྐྱབས་སུ་འགྲོ་དགོས་པའི་ཕྱིར་རོ། །དེས་ན་ཁྱད་པར་ཕྱི་མ་སྦྱར་བས་ཅི་ཞིག་བྱ།  གང་གསུམ་ལ་སྐྱབས་སུ་འགྲོ་བ་དེ་ནི་གྲུབ་མཐའ་སྨྲ་བ་པོར་ཡང་འགྱུར་བར་ངེས་སོ་ཞེ་ན། མ་ཡིན་ཏེ། དད་པ་ཙམ་གྱི་དབང་དུ་བྱས་ནས་སྐྱབས་སུ་འགྲོ་བ་དང་འཁོར་བ་མཐའ་དག་ལ་ཡིད་འབྱུང་བ་མ་ཡིན་པས་ཀྱང་རང་ཉིད་ངན་འགྲོའི་འཇིགས་པ་ལས་སྐྲག་ནས་སྐྱབས་སུ་འགྲོ་བ་ཙམ་འཛིན་པའི་དགེ་བསྙེན་དུ་གྱུར་པ་ཡོད་པའི་ཕྱིར་དང༌། ཇི་སྲིད་ཕྱག་རྒྱ་བཞིའི་ཚུལ་རིགས་པའི་ལམ་ནས་སྨྲ་བ་མ་ཡིན་པ་དེ་སྲིད་དུ་ཆོས་འདི་པའི་གྲུབ་མཐའ་སྨྲ་བར་མི་འཇོག་པའི་ཕྱིར་་རོ། །ཟུར་ཕྱི་མ་ནི་འཇམ་དཔལ་གྲགས་པས། བྱེ་བྲག་སྨྲ་དང་མདོ་སྡེ་པ། །རྣལ་འབྱོར་སྤྱོད་པ་དབུ་མ་པའི། །གྲུབ་མཐའ་གང་ཞིག་ཆོས་སོགས་ཀྱི།    །ཚིགས་བཅད་སངས་རྒྱས་ཕྱག་རྒྱས་བཏབ། །ཞེས་སོ།    །དེ་བཞིན་དུ་མདོ་རྒྱུད་དུ་མ་ཞིག་ལས་ཕྱི་ནང་གི་གྲུབ་མཐའི་ཁྱད་པར་ལྟ་བས་འབྱེད་པར་གསུངས་ཏེ་མ་སྤྲོས་སོ། །
བཞི་པ་ནི། གཞན་སྡེ་དང༌། ཕྱི་རོལ་པ་དང༌། ཆོས་འདི་པ་མ་ཡིན་པ་དང༌། མུ་སྟེགས་བྱེད་རྣམས་ནི་རྣམ་གྲངས་ཏེ། ཆོས་འདི་པ་དང༌། རང་སྡེ་དང༌། ནང་བ་དང༌། སངས་རྒྱས་པ་རྣམས་ནི་རྣམ་གྲངས་སོ། །མུ་སྟེགས་ཀྱི་སྒྲ་དོན་ནི། ཁྱད་པར་འཕགས་བསྟོད་ཀྱི་འགྲེལ་བ་ལས། མུ་སྟེགས་ནི་ཐརཔ་དང་མཐོ་རིས་ཀྱི་ལམ་སྟེ། དེ་སྟོན་པར་བྱེད་པའི་བསྟན་བཅོས་ལ་མུ་སྟེགས་ཞེས་བྱ་ལ། དེ་བྱེད་པས་ན་མུ་སྟེགས་བྱེད་དོ།   །ཞེས་རང་ངོར་ཐར་པ་དང་མཐོ་རིས་ཀྱི་ལམ་མམ་འཇུག་ངོགས་སམ་ཐབས་སུ་འདུ་ཤེས་པའི་ཚུལ་དེ་སྟོན་པའི་བསྟན་བཅོས་འཛིན་པ་དང་སྤེལ་བ་ལ་མུ་སྟེགས་བྱེད་དུ་བཤད་དེ་སྒྲ་བཤད་པ་ཙམ་ཡིན་གྱི་ཁྱབ་པ་ནི་མིན་ནོ། །ལ་ལ་དག གཞི་འགྲེལ་ལས། གང་དག་ལ་ཆུ་ཀླུང་དུ་འཇུག་པའི་ཐར་པའི་ལམ་ཡོད་པ་འདི་དག་ནི་མུ་སྟེགས་ཅན་ནོ། །ཞེས་པའི་དོན་དུ་བསམས་ནས།འཇུག་ངོགས་ཁྲུས་དང་སྟེགས་བུ་བྱས་ཏེ། དེར་ཞུགས་པ་ཐར་པ་སྟེ་བདེ་འགྲོའི་རྒྱུར་སྨྲ་བ་དེ་བྱེད་པས་མུ་སྟེགས་བྱེད་ཅེས་བྱ་གསུངས་ཡང༌། གཞི་འགྲེལ་གྱི་ལུང་དེ་མུ་སྟེགས་ཅན་གྱི་སྒྲ་བཤད་ཡིན་མིན་བརྟགས་ཤིང་གང་དག་ཐར་པ་མུ་དང་དེའི་སྟེགས་ཁད་ཉེ་བའི་ལམ་བྱེད་པས་མུ་སྟེགས་པ་ཞེས་ཟེར་བ་ཡང་འཐད་པར་མ་མཐོང་ཏེ། ཏིརྠ་ཀའི་སྒྲ་འཇུག་ངོགས་སུ་འཇུག་པར་སྒྲ་སྦྱོར་བམ་གཉིས་ལས་བཤད་མོད་ཀྱང་དེ་ཙམ་གྱིས་སྒྲ་བཤད་པ་ལ་གོ་དོན་ཅི་ཡང་མེད་དོ། །
ལྔ་པ་ནི།གཞན་སྡེ་ལ་རིགས་པའི་དབང་ཕྱུག་གིས། ལོག་པའི་ལམ་ལ་མུ་མེད་ཕྱིར། །ཞེས་གསུངས་པ་ལྟར། ལམ་དང་ལམ་མ་ཡིན་པ་རྣམ་པར་འབྱེད་པའིབློ་གྲོས་དང་བྲལ་བ་རྣམས་ཀྱི་ལྟ་བ་ངན་པ་ལ་འདི་འབྱུང་དང་འདི་མི་འབྱུང་ཞེས་པའི་ཁ་ཚོན་གཅོད་དཀའ་བས་མཐའ་ཡས་མོད། མདོ་སྡེ་ལས་ཡ་མཚན་ཅན་གྱི་ལྟ་བ་དགུ་བཅུ་རྩ་དྲུག་དང༌། ལུང་མ་བསྟན་གྱི་ལྟ་བ་བཅུ་བཞི། ལྟ་ངན་དྲུག་ཅུ་རེ་གཉིས་དང༌།དམ་པ་མིན་པའི་ལྟ་བ་ཉེར་བརྒྱད་དང༌། ལྟ་ངན་ཉི་ཤུ་སོགས་བཤད་ལ། སློབ་དཔོན་ལེགས་ལྡན་འབྱེད་ཀྱི་རྟོག་གེ་འབར་བ་ལས།   དེ་ཡང་ལྟ་བའི་དབྱེ་བ་བརྒྱ་རྩ་བཅུར་གྱུར་ལ་དེའི་ཐད་ཀྱི་དབྱེ་བ་ནི་སངས་རྒྱས་པ་དང༌། འཛིན་པ་མེད་པ་དང༌། འཚོ་བ་པ་དང༌། ལོ་མ་ཅན་དང༌། གཙང་སྦྲ་ཅན་དང༌། ཁྱབ་འཇུག་པ་དང༌། ཁྱབ་འཇུག་སེམས་པ་བ་དང་།   དབྱི་གུ་གསུམ་པ་དང༌། ཀོ་ལྤགས་དུམ་བུ་ཅན་དང༌། མཉམ་པར་དཔྱོད་པ་དང༌། ལྷ་མཆོག་པ་དང༌།   ཆོས་ཀྱི་མཆོག་སྦྱིན་ཅན་དང༌། གདུང་བ་ཅན་དང༌། ལག་པ་གདུང་བ་ཅན་དང༌། རྒྱལ་པོར་སྨྲ་བ་དང༌། རྒན་པོར་སྨྲ་བ་དང༌།   མེ་ཡོ་ཨ་ཏི་རི་དང༌། རིགས་དང་རྗེས་སུ་མཐུན་པ་དང༌།   བཅིངས་ནས་འདུག་པ་དང༌། འཁོར་ལོ་སྐྱོང་པ་དང༌། རི་ལ་གནས་པ་དང༌།    རྒྱལ་པོའི་བསོད་སྙོམས་ཅན་དང༌། གླང་པོའི་རྒྱལ་མཚན་ཅན་དང༌། ཀློག་ཅན་དང༌།   ནང་ཅན་དང༌།   རྟ་འདུལ་བ་དང༌།   ཀ་ལན་ཏ་ཀ་པ་དང༌།   སྣོད་གཙང་མ་ཅན་དང༌།   སློང་མོས་རྒྱུ་བ་དང༌། ཡན་ལག་ཐམས་ཅད་རལ་ཀའི་ནང་དུ་གཏུམ་པ་དང༌། སྒྲོན་མ་ལྷག་པ་ཅན་དང༌། གསེར་ཅན་དང༌། གྲུབ་པར་སྨྲ་བ་དང༌། དབང་པོ་ཆེན་པོ་དང༌། ཞ་ཉེ་ཅན་དང༌།   ནམྭ་མཁའ་འབྱུང་བ་དང༌། ཤིང་རྟ་མང་པོ་ཅན་དང༌། དོན་ཐམས་ཅད་པ་དང༌། བསམ་གཏན་ལ་དགའ་བ་དང༌། ཆོས་ཅན་པ་དང༌། ཟས་གྲང་མོ་ཅན་དང༌།ཕྲག་པའི་གོས་ཅན་དང༌། ཕྲུ་བ་གཅིག་པ་དང༌། བྱང་ཕྱོགས་ཀྱི་འགྲམ་ན་གནས་པ་དང༌། ལྷོ་ཕྱོགས་ཀྱི་འགྲམ་ན་གནས་པ་དང༌། དུང་གི་སྒྲ་ཅན་དང༌།   ལྷ་རྟེན་སྦྱིན་མའི་བུ་དང༌། ལུས་ལ་གནོད་པ་མེད་པ་དང༌། ཀུན་ཏུ་གནོད་པ་མེད་པ་དང༌། སྣ་ཚོགས་ལྟ་བ་དང༌། ཀ་ཀན་འདའ་བ་དང༌། གཅོད་པ་དང༌། ལྷའི་གྲོང་པ་དང༌། གོས་མེད་པ་དང༌། ས་ཁུང་ན་གནས་པ་པ་དང༌། ཟླ་བ་ཕྱེད་པ་པ་དང༌།ཆོས་སེམས་པ་དང༌། མ་ལ་གུས་པ་པ་དང༌། ཕ་ལ་གུས་པ་པ་དང༌། ཟླ་བ་ཤར་བ་པ་དང༌། ཉི་མ་ཤར་བ་པ་དང༌། ལག་པར་ཟ་བ་པ་དང༌།   སྙིང་གིས་འཚོ་བ་དང༌། འདས་པར་གྱུར་པ་པ་དང༌།ཕུང་པོ་གསུམ་པ་དང༌། གཉིས་པ་དང༌། གསུམ་གྱིས་འཚོ་བ་དང༌། འཇུག་པ་པ་དང༌། གྲངས་ཅན་གྱི་རྣལ་འབྱོར་ཅན་དང༌། འུག་པ་པ་དང༌། ནགས་ན་གནས་པ་དང༌།   བོའི་ཁ་ནས་པ་དང༌། བ་ལང་ཁྱི་ལུགས་དང༌། ཚངས་པར་སྤྱོད་པ་དང༌། སྤྱོད་པ་པོ་དང༌། ཕྱུགས་བདག་པ་དང༌། གོ་ཏ་མ་པ་དང༌། ཞིབ་མ་ཅན་དང༌། ཤིན་ཏུ་ཁྲུས་བྱས་པ་དང༌། མཚེའུ་ཡི་འགྲམ་ན་གནས་པ་དང༌། འཚོ་བ་པ་དང༌། འཁོར་བ་ལས་གྲོལ་པ་དང༌། ཐོག་མ་པ་དང༌། འཐོར་བྱེད་པ་དང༌། བ་ར་དྭ་ཙ་པ་དང༌། བ་ཤའི་གྲངས་ཅན་པ་དང༌། པ་དན་འཇའ་ལ་པ་དང༌། ལྷ་མཆོད་པ་དང༌། གཞན་ལ་མི་འདུད་པ་དང༌། གོས་ཀྱི་དུམ་བུ་ཅན་དང་༌།   འུག་པའི་གཤོག་པ་ཅན་དང༌། ལག་གསུམ་དུ་ཆུར་འཇུག་པ་དང༌། འགལ་བར་མི་བྱེད་པ་དང༌། མེས་པོ་ཅན་དང༌། མཁའ་ལྡིང་བ་དང༌། ཁྱིམ་གྱི་ར་བ་ན་གནས་པ་པ་དང༌། མཆོག་གིས་མཆོག་པ་དང༌། གཅེར་བུ་གཉེན་གྱི་བུ་པ་པ་དང༌། འགེངས་བྱེད་པ་དང༌། དགེ་སྦྱོང་བ་དང༌། ཀ་ཏ་ཡའི་བུ་དང༌། ལྷག་སྤྱོད་ཀྱི་བུ་དང༌། བ་ལང་གི་བརྟུལ་ཞུགས་ཅན་དང༌། རི་དྭགས་ཀྱི་བརྟུལ་ཞུགས་ཅན་དང༌། རྟའི་བརྟུལ་ཞུགས་ཅན་དང༌། ཁྱིའི་བརྟུལ་ཞུགས་ཅན་དང༌། གསོལ་བ་མི་འདེབས་པའི་བརྟུལ་ཞུགས་ཅན་དང༌། ཞིབ་པོའི་བརྟུལ་ཞུགས་ཅན་དང༌།མེའི་བརྟུལ་ཞུགས་ཅན་དང༌། གཞོན་ནུའི་བརྟུལ་ཞུགས་ཅན་དང༌། མཐོང་བའི་ཆོས་ལ་མྱ་ངན་ལས་འདས་པར་སྨྲ་བ་དང༌། ཆུ་ལས་སྐྱེ་པའི་ཕྲེང་བ་ཅན་དང༌། སོའི་རྟུན་བརྡུངས་ཅན་དང་།རྡོ་འཐག་་པ་པ་དང༌། ཡང་དག་པར་ཁྲུས་བྱེད་པ་དང༌། ཆུས་ཡང་དག་པར་ལྟ་བ་དང༌། སྐྱེད་གནས་དག་པ་པ་དང༌། ལས་ཀྱིས་དག་པ་པ་དང༌། ཆུ་ལ་བྱི་འཛུལ་བྱེད་པ་དང༌། དགོན་པ་པ་དང་། ས་དང་ཆུ་དང༌།མེ་དང་རླུང་དང་། ནམ་མཁའ་སེམས་ཡོད་པར་ལྟ་བ་ལ་སོགས་པ་ལྟ་བ་སུམ་བརྒྱ་དྲུག་ཅུ་རྩ་གསུམ་པོ་ཐམས་ཅད་ཀྱང་རྒྱུད་ནས་འོངས་པ་རྒྱུན་ཆད་པ་མེད་པས་ཐམས་ཅད་ཀྱང་རང་གི་དམ་ཚིག་ལས་གྲགས་པའི་ལུང་གི་བསྔགས་པར་བརྗོད་པ་ལ་ཤིན་ཏུ་དཔའ་པས་རྒོལ་བར་བྱེད་དོ། །ཞེས་འབྱུང༌། ལེགས་ལྡན་ཕྱི་མར་གྲགས་པའི་དབུ་མ་རིན་ཆེན་སྒྲོན་མ་ལས་ཀྱང་ལྟ་བའི་དབྱེ་བ་སུམ་བརྒྱ་སོགས་ཡོད་ཚུལ་བཤད་མོད།   དེ་ཐམས་ཅད་ཀྱང་རྟག་པ་དང་ཆད་པར་སྨྲ་བ་གཉིས་སུ་འདུ་བར་མདོ་རྒྱུད་དུ་མ་ལས་གསུངས་ཤིང་ཤིང་རྟ་ཆེན་པོ་དག་གིས་བཞེད་དོ།།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2019 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号