ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་མཐའི་རྣམ་བཞག་ཐུབ་བསྟན་ལྷུན་པོའི་མཛེས་རྒྱན་ལས་དག་ཡིག་མཁས་པའི་འབྱུང་གནས་ཞེས་བྱ་བ་ལས་སྔགས་ཀྱི
སྤེལ་དུས།05-18  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
བསྙེན་པ་མཐར་ཕྱིན་ནས་དངོས་གྲུབ་བསྒྲུབ་པའི་ཚུལ་ལ། རིགས་གསུམ་རེ་རེ་ལ་ཡང་དངོས་གྲུབ་རབ་འབྲིང་ཐ་མ་གསུམ་གསུམ་དང༌།   ཞི་བ། རྒྱས་པ། དྲག་པོ་གསུམ་གསུམ་མོ།   །ཡང་ངོ་བོའི་སྒོ་ནས་རབ་འབྲིང་ཐ་མ་གསུམ།   རྟགས་ཀྱི་སྒོ་ནས་མེ། དུ་བ། དྲོད་གསུམ། གཞིའི་སྒོ་ནས་ལུས། རྫས། ལོངས་སྤྱོད་ཀྱི་དངོས་གྲུབ་གསུམ། གསུང་བ་པོའི་སྒོ་ནས་འཕགས་པ། ལྷ། ས་བླའི་སྔགས་གསུམ་རྣམས་སོ།།
གཉིས་པ་སྤྱོད་པའི་རྒྱུད་ལ། རྒྱུད་འདིའི་གཙོ་བོ་ནི་རྣམ་སྣང་མངོན་བྱང་གི་རྒྱུད་ཡིན་ལ།གསུང་བ་པོ་ནི།ལོངས་སྐུ་རྣམ་སྣང་གངས་ཆེན་མཚོའོ། །གསུང་བའི་གནས་ནི་གཞི་དང་སྙིང་པོ་མེ་ཏོག་གིས་བརྒྱན་པའི་འཇིག་རྟེན་གྱི་ཁམས་ཀྱི་འོག་མིན་སྡུག་པོ་བཀོད་པ་ཞེས་བྱ་བའོ།  །འདི་ལ་དབང་བསྐུར་བའི་ཚུལ་དང༌།དམ་ཚིག་དང་སྡོམ་པ་དག་པར་བྱ་ཚུལ་ནི་བྱ་རྒྱུད་དང་འདྲའོ། །ལམ་གྱི་རིམ་པ་ལ།མཚན་བཅས་དང༌།མཚན་མེད་གཉིས།སྔ་མ་ལ་ཕྱིའི་ཡན་ལག་བཞིའི་བཟླས་བརྗོད་དང༌། ནང་གི་ཡན་ལག་བཞིའི་བཟླས་བརྗོད་དེ་གཉིས། དེ་རེ་རེ་ལ་ཡང་བདག་གི་གཞི། གཞན་གྱི་གཞི།སེམས་ལ་གཞོལ་བའི་གཞི།   སྒྲ་ལ་གཞོལ་བའི་གཞི་སྟེ་བཞི་རེ་ཡོད་དོ།   །མཚན་མ་མེད་པའི་རྣལ་འབྱོར་ནི། སྟོང་ཉིད་བསྒོམ་པའོ།   །གཞན་རྣམས་ཕལ་ཆེར་སྔ་མ་དང་འདྲ་བར་སྦྱར་རོ།   །
གསུམ་པ་རྣལ་འབྱོར་རྒྱུད་ལ།རྩ་རྒྱུད།བཤད་རྒྱུད།ཆ་མཐུན་གྱི་རྒྱུད་དེ་གསུམ།རྩ་བའི་རྒྱུད་ནི་དེ་ཉིད་བསྡུས་པའོ། །དེ་ལ་དུམ་བུ་བཞི་སྟེ།རྡོར་དབྱིངས་ཀྱི་དུམ་བུ། ཁམས་གསུམ་རྣམ་རྒྱལ་གྱི་དུམ་བུ།   འགྲོ་འདུལ་གྱི་དུམ་བུ།    དོན་གྲུབ་ཀྱི་དུམ་བུ་སྟེ་བཞི།   དེ་ལས་བཤད་པའི་རིགས་ལྔ་ནི། དེ་བཞིན་གཤེགས་པ། རྡོ་རྗེ། རིན་པོ་ཆེ། པདྨ།ལས་ཀྱི་རིགས་སོ།རྩ་རྒྱུད་དུ་ལས་ཀྱི་རིགས་རིན་པོ་ཆེའི་རིགས་སུ་བསྡུས་ཏེ་བཞིར་བཤད་དོ། །རིགས་བཞི་ནི་རིམ་པ་བཞིན་ངོ་བོ་ཉིད། རྣམ་པར་སྨིན་པ།ལོངས་སྤྱོད་རྫོགས་པ།སྤྲུལ་པའི་སྐུ་སྟེ་བཞི།མེ་ལོང་ལྟ་བུ།མཉམ་པ་ཉིད།སོ་སོར་རྟོགས་པ།བྱ་བ་སྒྲུབ་པའི་ཡེ་ཤེས་ཏེ་བཞི། བྱང་ཆུབ་ཀྱི་སེམས།སྦྱིན་པའི་ཕར་ཕྱིན།ཤེས་རབ་ཀྱི་ཕར་ཕྱིན།   བརྩོན་འགྲུས་ཀྱི་ཕར་ཕྱིན་ཏེ་བཞི་རྣམས་སུ་བཤད་དོ། །ཡང་དུམ་བུ་བཞི་པོ་རེ་རེ་ལས་གདུལ་བྱ་གསུམ་གྱི་ངོར་ཏིང་འཛིན་གསུམ་རྒྱས་འབྲིང་བསྡུས་པ་གསུམ་ཚན་བཞི་གསུངས་ལ།དུམ་བུ་སོ་སོ་ནས་དཀྱིལ་འཁོར་ཆེན་པོ། གཟུངས་ཀྱི་དཀྱིལ་འཁོར།   ཆོས་ཀྱི་དཀྱིལ་འཁོར།ལས་ཀྱི་དཀྱིལ་འཁོར་ཏེ་བཞི་རེ་བཤད་ལ། ཕྱག་རྒྱ་བཞི་ནི།ཕྱག་རྒྱ་ཆེན་པོ།དམ་ཚིག་གི་ཕྱག་རྒྱ།ཆོས་ཀྱི་ཕྱག་རྒྱ།ལས་ཀྱི་ཕྱག་རྒྱ་སྟེ་བཞིའོ།   །འདི་བཞིས་སྦྱང་གཞི་ཐ་མལ་པའི་ལུས། ངག ཡིད།  བྱ་བ་རྣམས་སྦྱོང༌། འབྲས་བུ་སངས་རྒྱས་ཀྱི་སྐུ་གསུང་ཐུགས་འཕྲིན་ལས་རྣམས་འགྲུབ་བོ། །དེ་ལྟར་ན་སྦྱང་བྱ་གཞིའི་ཕྱག་རྒྱ། སྦྱོང་བྱེད་ལམ་གྱི་ཕྱག་རྒྱ།སྦྱངས་པ་འབྲས་བུའི་ཕྱག་རྒྱ་སྟེ་གསུམ་མོ། །ཡང་མཚོན་བྱ་དོན་དང༌།མཚོན་བྱེད་ཀྱི་ཕྱག་རྒྱ་གཉིས། ཕྱི་མ་ལ་མཚོན་བྱེད་ཕྱི་དང་།མཚོན་བྱེད་ནང་གི་ཕྱག་རྒྱ་གཉིས་སུ་ཡོད་དོ། །ཏིང་འཛིན་གསུམ་ནི། དང་པོ་སྦྱོར་བ། དཀྱིལ་འཁོར་རྒྱལ་མཆོག ལས་རྒྱལ་མཆོག་གི་ཏིང་འཛིན་གསུམ་མོ།   །རྒྱུད་འདིར་དབང་བསྐུར་བ་ལ༑དཀྱིལ་འཁོར་དུ་འཇུག་པ་ཙམ་བྱེད་པ།སློབ་མའི་དབརྫ་ཙམ་བསྐུར་བ།   རྡོ་རྗེ་སློབ་དཔོན་གྱི་དབང་མན་ཆད་རྫོགས་པར་བསྐུར་བ་སྟེ་གསུམ།ཕྱི་མ་ལྟར་བྱེད་ན་རིགས་ལྔའི་དམ་ཚིག་བསྲུང་བ་དང༌།རྩ་ལྟུང་ལ་འཛེམ་པ་རྣམས་བླ་མེད་སྐབས་དང་འདྲ།ལམ་སྒོམ་པ་ལ།   མཚན་བཅས།མཚན་མེད་གཉིས།དང་པོ་ལ་ཐུན་བཞིའི་རྣལ་འབྱོར་རགས་ཕྲ་གཉིས། རགས་པ་ལ་གཉིས་ལས་སློབ་མའི་དབང་ཙམ་ཞིག་ཐོབ་པས་ནི། བདག་བསྲུང་བ་དང་ཆུས་ཁྲུས་བྱ་བ། ཁྲོ་བོའི་རྣལ་འབྱོར་པ་བསྲུང་འཁོར་བྱ་བ།ཚོགས་རྟེན་གྱི་སྤྱན་སྔར་ཕྱག་དང་སྐྱབས་སུ་འགྲོ་བ་སོགས་བྱ་བ། རྡོ་རྗེ་ཐལ་མོ་ནས་ཡེ་ཤེས་དབབ་པའི་བར་བྱ་བ།རང་ཆོ་ག་ལྔས་ལྷར་བསྐྱེད་ནས་ཡེ་ཤེས་པ་བཅུག་སྟེ་ཕྱག་རྒྱ་བཞིས་རྒྱས་གདབ་བྱ་བ། བཟླས་པ་བྱ་བ་སྟེ་དྲུག་ཏུ་བཤད་ལ་ལུགས་གཞན་ཡང་ཡོད་དོ།  །འདི་ནི་རྣལ་འབྱོར་གཅིག་ལྡན་ཁོ་ནའོ།། སློབ་དཔོན་གྱི་དབང་ཐོབ་པས་ནི་སློབ་མ་ལ་དབང་བསྐུར་ན། བདག་རྫོགས་རྣལ་འབྱོར་ཆེན་པོ་དང་བཅས་པའི་ཏིང་ངེ་འཛིན་གསུམ་ཕྲི་བ་མེད་པར་བསྒོམས་པའི་བསྙེན་པ་རྒྱས་པ། དཀྱིལ་འཁོར་རྒྱལ་མཆོག་གི་སྐྱེད་ཆོག་སོགས་བསྡུས་པའི་བསྙེན་པ་འབྲིང༌། རྣལ་འབྱོར་ཆེན་པོ་ལྷ་རེ་རེའི་བཟླས་བརྗོད་འབུམ་དང་བཅས་པའི་བསྙེན་པ་བསྡུས་པ་གསུམ་གང་རུང་ངོ༌།།རང་གི་ལྷ་བསྒྲུབ་པ་ལ་ཏིང་ངེ་འཛིན་རྣལ་འབྱོར་ཆེན་པོ་དང་བཅས་པ་བསྒོམ་པའོ།།ཕྲ་མོ་ལ་དམིགས་པ་ལ།སེམས་བརྟན་པར་བྱ་བ་དང༌།   བརྟན་པ་ཐོབ་ནས་སྤྲོ་བསྡུ་སོགས་བྱ་བ་གཉིས་སོ། །མཚན་མེད་ནི། དེ་ཁོ་ན་ཉིད་ཀྱི་དོན་སྤྲོས་བྲལ་དམིགས་པའི་ལྷག་མཐོང་བསྒོམ་ཚུལ་ཏེ། རིགས་བཞིས་སྒོམ་ཚུལ་མི་འདྲ་བ་བཞི་ཡོད་དོ།།
དངོས་གྲུབ་བསྒྲུབ་པའི་ཚུལ་ལ།བསམ་གཏན་གྱིས་དངོས་གྲུབ་བསྒྲུབ་པ། བཟླས་བརྗོད་ཀྱིས་དངོས་གྲུབ་བསྒྲུབ་པ།སྦྱིན་སྲེག་གིས་དངོས་གྲུབ་བསྒྲུབ་པ་སྟེ་གསུམ་མོ།།
བཞི་པ་རྣལ་འབྱོར་བླ་ན་མེད་པའི་རྒྱུད་ལ།ཕ་རྒྱུད།མ་རྒྱུད་གཉིས།རྣལ་འབྱོར་གྱི་རྒྱུད།ཐབས་ཀྱི་རྒྱུད།མཁའ་འགྲོ་ཕའི་རྒྱུད་རྣམས་དོན་གཅིག ། རྣལ་འབྱོར་མའི་རྒྱུད། ཤེས་རབ་ཀྱི་རྒྱུད། མཁའ་འགྲོ་མའི་རྒྱུད་རྣམས་དོན་གཅིག དེ་རེ་རེ་ལའང་བརྗོད་བྱེད་ཚིག་གི་རྒྱད། བརྗོད་བྱ་དོན་གྱི་རྒྱུ་གཉིས་གཉིས་ཡོད།སྔ་མ་ལ་རྩ་རྒྱུད།བཤད་རྒྱུད།རྒྱུད་ཕྱི་མ། ཆ་མཐུན་གྱི་རྒྱུད་གསུམ། ཕྱི་མ་ལ་རྒྱུའི་རྒྱུད། ཐབས་ཀྱི་རྒྱུད། འབྲས་བུའི་རྒྱུད་གསུམ།   དེ་གསུམ་ལ་གཞིའི་རྒྱུད་དང༌། ལམ་གྱི་རྒྱུད། མི་འཕྲོགས་པའི་རྒྱུད་ཞེས་ཀྱང་བཤད་དོ། ཐབས་ཀྱི་རྒྱུད་ལའང་མ་སྨིན་པ་སྨིན་པར་བྱེད་པ་དབང་གི་རྒྱུད། སྨིན་པ་མི་ཉམས་པར་བྱེད་པ་དམ་ཚིག་དང་སྡོམ་པའི་རྒྱུད།ཉམས་སུ་བླང་བྱའི་ངོ་བོ་བསྐྱེད་རྫོགས་ཀྱི་རྒྱུད།ཉེ་རྒྱུ་སྤྱོད་པའི་རྒྱུད་དང་བཞི་ཡོད།རྒྱུད་བཤད་ཐབས་ཀྱི་རྒྱན་བདུན་ནི།
དང་པོ་གླེང་བསླང་བའི་རྒྱན་ལ།མཚན་གྱི་ཁྱད་པར།ཆེད་དུ་བྱ་བའི་གདུལ་བྱའི་ཁྱད་པར།མཛད་པ་པོའི་ཁྱད་པར།ཚིག་དོན་གྱི་ཚད་ཀྱི་ཁྱད་པར།དགོས་པའི་ཁྱད་པར་ཏེ་ལྔ།
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2021 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号