| རྗེས་ལ་ངས་ད་ལྟ་ཏིང་ངེ་འཛིན་ལ་མཉམ་པར་བཞག་པས་འོག་གི་ཕྱོགས་ན་སངས་རྒྱས་ཤིག་བྱང་ཆུབ་སེམས་དཔའ་དཔག་ཏུ་མེད་པས་བསྐོར་ནས་ཆོས་གསུངས་པ་དེ་ངའི་ལྷའི་སྤྱན་གྱིས་མཐོང་བ་ཡིན།ལྷའི་སྙན་གྱིས་གསན་པ་ཡིན་གསུང༌། ཡང་དགོན་པ་དབང་ཕྱུག་འོད་བྱ་བ་མཚམསབཅད་མཛད་པ་ཅིག་བརྒྱགས་ཆད་ནས་དྲོ་གཟན་མེད་པས་མཚམས་བཏོན་ལ་དྲོ་གཟན་བཙལ་དགོས་སྙམ་ནས། ཕར་ཙམ་ཚུར་ཙམ་འདུག་ཙ་ན། དགོན་པ་བ་ལ་ཉེ་གནས་ཀྱིས་བཤོས་དྲངས་བྱིན་ལེན་ཞུས་ཙ་ན།བཤོས་དེ་ཕྱག་ཏུ་བསྣམས་ནས་ལ་འུར་འདི་ཁོ་ལ་སྐྱོལ་ཤོག །ཁོ་ལ་དྲོ་གཟན་མེད་གསུང༌། ཉེ་གནས་ཀྱིས་སྐྱེལ་དུ་ཕྱིན་ཙ་ན། མཚམས་བཏོན་ལ་ཁད་གདའ་སྐད་ན་ཇི་ལྟ་བ་བཞིན་གཟིགས་པ་ཅོག་བརྡག་པར་གདའ། ཡང་དགོན་པ་གོང་དུ་དགེ་བཤེས་སྟོན་པས་དབུ་མཛད་རྣལ་འབྱོར་པ་རྣམས་འཚོགས་ནས་བཞད་གད་ཤིག་གེ་འདུག་ཙ་ན། ཉེ་གནས་ཀྱིས་འུ་ཅག་དེ་རིང་ཅི་ཟ་ཞུས་པས། དགོན་པ་བས་ཨ་པོ་ནི་པུས་སྣ་གདོང་ན་ཡར་བྱུང་བ་འདི་ཀུན་ཟ་བ་ཡིན་གསུངས་པས། དེ་ལ་སྟོན་པས་ཀྱང་བཀྱོན་པས། ཕྱིས་དགེ་བཤེས་སྟོན་པས་བཀྱོན་དུ་འོང་གསུངས་ནས་དེ་ཙམ་མི་གསུང་བ་ཡིན། ཡང་སྣེའུ་ཟུར་པ་སྐུ་ཁམས་ལྟེམས་པ་ཅིག་ལ་སྟོན་པ་ཚུལ་སེང་བྱ་བའི་གྲོགས་པོ་ཞིག་ཡོད་པ་ན་རེ། དགོན་པ་བའི་མན་ངག་སྤྱི་བོར་མེ་འབར་བ་འདི་ལྟ་བུ་ཞིག་ཡོད་དེ་སྒོམས་ཟེར་བས། བསྒོམས་པས་ཇི་ལྟ་བ་བཞིན་དུ་བཏུབ་པར་བྱུང༌།དེར་དགོན་པ་བའི་སྤྱན་སྔར་བྱོན་ནས་མདང་ད་ནང་ཁམས་ལྟེམས་པ་ཅིག་གདའ་ཞུས་པས། སྤྱི་བོ་ན་མེ་འབར་བ་དེ་སྒོམས་གསུང༌། དེ་མི་ཤེས་ཞུས་པས་འོ་ན་མདང་ད་ནང་སྤྱི་བོ་ན་མེ་ཞིག་འབར་གྱིན་འདུག་པ་ཁོ་ནར་ཚོར་གསུང་སྟེ། ཇི་ལྟ་བ་བཞིན་ཐིགས་བྱུང་སྟེ་སྟོན་པ་ཚུལ་སེང་དེ་སྐད་ཟེར་བས་བསྒོམས་པ་ལགས་ཞུས་པས། འོ་གྲོགས་ལ་ཐོས་པའི་ཆོས་ཉམས་སུ་བླང་དུ་མི་བཏུབ། འདྲི་བ་ནི་མི་ཏོ། ད་འདི་བཞིན་དུ་གྱིས་གསུངས་ནས། དམིགས་པ་སྐོར་གསུམ་གྱི་གདམས་ངག་རྣམས་གསུངས། ཡང་སྣེའུ་ཟུར་པ་རྩེ་དྲོར་ཡོན་བདག་ཅིག་གིས་བཤོས་དྲངས་ཏེ་བཞུགས་པའི་དུས་སྟེང་ཆུང་ཞིག་ཏུ་ཐུགས་དམ་མཛད་པས་དགེ་སྦྱོར་ཤིན་ཏུ་འཕེལ་བར་བྱུང༌། དགེ་བཤེས་ཀྱི་སྤྱན་སྔར་བྱོན་དུས་ཁྱོད་མདང་ད་ནང་སྟེང་ཆུང་ལྟེབ་ལྟེབ་དེ་ན་དགེ་སྦྱོར་ཤིན་ཏུ་འཕེལ་བར་འདུག་ཨང་གསུང༌། རོག་ཐོམ་དུ་ལྷ་བཟོ་བའི་ལུགས་བྱེད་པ་ལ་ར་སྒྲེང་དུ་སྒོམ་ཆེན་རྣམས་ལ་གཏོར་མ་ཞུས་པས། དགོན་པ་བས། འུ་ཨུ་གསུང༌། ཅི་ལགས་ཞུས་པས། ལུགས་བརྡོལ་གསུང༌། དྲིས་པས་དེ་ཙ་ན་བརྡོལ་འདུག་སྐད། ཡང་སྣེའུ་ཟུར་པས་བསྒོམས་ནས་རྟོགས་པ་ཤོག་པ་རེ་བྱུང་བའི་དུས་སུ། བླ་མའི་ཞབས་ལ་གཏུགས་པའི་ཕྱག་གཅིག་བྱ་དགོས་སྙམ་ནས་སྤྱན་སྔར་བྱོན་དུས། ཞབས་གཡས་པ་དེ་ཤད་ཀྱིས་རྐྱངས་ནས་འོང་བ་ལགས་པར་གདའ། ཆོས་འདི་ལྟ་བུ་ཞིག་ཞུ་སྙམ་པ་དེ་ཞུ་མི་དགོས་པར་བཤད་ཀྱིས་གསུང་འོང་བ་ཡིན། དམ་ཚིག་གསུམ་བཀོད་པའི་རྒྱལ་པོ་ལྷག་པའི་ལྷར་བཟུང་ནས་བཟླས་པ་སྟོང་ཕྲག་བརྒྱད་སོང་ཙ་ན་གཟིགས། དེ་ནས་སྟོང་ཕྲག་བརྒྱད་ནམ་སོང་སོང་ན་ཞལ་མི་གཟིགས་པ་བྱེད་མ་མྱོང༌། གཞན་ཡང་དེ་བཞིན་གཤེགས་པའི་ཕན་ཡོན་གྱི་ལེའུ་ནས་གསུངས་པ་རྣམས་ལ་ངས་ཉམས་སུ་མ་མྱོང་བ་མེད་གསུང༌། ལེའུ་དེ་ནས་གསུངས་པ་ལ་ནི་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །ཚེ་འདི་ཉིད་ལ་སངས་རྒྱས་ཀྱི་མཛད་པ་བྱེད་པར་འགྱུར་རོ། །ཞེས་གསུངས་ཏེ་བསམ་གྱིས་མི་ཁྱབ་བོ། །དགེ་བཤེས་དགོན་པ་བ་དེ་ཏིང་ངེ་འཛིན་ཤིན་ཏུ་བརྟན་པས་ལྷའི་གཟིགས་སྣང་དང་མངོན་པར་ཤེས་པ་རྒྱ་ཆེན་པོ་མངའ་བ་དེ་ལྟར་ཡིན་ཡང་དགོན་པ་བ་རང་གི་ཐུགས་ཀྱི་བཞེད་པའི་གཏིང་ལ་ལྷའི་ཞལ་མཐོང་བ་དང་མངོན་ཤེས་སྐྱེས་པ་དགེ་སྦྱོར་གྱི་འབྲས་བུ་གཙོ་བོར་འཛིན་པར་མི་མཛད་ཀྱི་ལམ་གྱི་རིམ་པའི་དམིགས་སྐོར་སོ་སོ་ལ་མྱོང་བ་བཅོས་མིན་སྐྱེས་པ་ཞིག་དང་ལྷག་པར་ལསའབྲས་ལ་ཡིད་ཆེས་ནས་སྡོམ་པ་གསུམ་གྱི་བཅས་མཚམས་དག་པ་གཙོ་བོར་འཛིན་པར་མཛད་དེ། དགོན་པ་བའི་ཞལ་ནས། སྣེའུ་ཟུར་པ་ལ། ཡེ་འབར་སང་གནངས་ཙ་ན་ཁྱེད་ཀྱི་དགེ་བཤེས་པ་དེ་ཀུན་མན་ངག་གི་མཐིལ་གང་ལ་བྱེད་ཟེར་ནས་འདྲི་ན། མངོན་པར་ཤེས་པའམ་ཡི་དམ་གྱི་ལྷ་ཞལ་མཐོང་བ་ལ་བྱེད་བྱས་པ་འོང་ངོ༌། །ལས་རྒྱུ་འབྲས་ལ་ཇེ་ངེས་ཇེ་ངེས་སོང་ནས་ཇི་ལྟར་ཁས་བླངས་པའི་སྡོམ་པ་དག་པར་སྲུང་བ་ཞིག་ལ་བྱེད་ཟེར་བ་ཡིན་གསུང་ངོ༌། ཇོ་བོའི་མན་ངག་ལམ་གྱི་རིམ་པའི་འགོ་བཤེས་གཉེན་བསྟེན་ཚུལ་ནས་མཐར་ཐུག་འབྲས་བུ་ཟུང་འཇུག་འགྲུབ་པའི་བར་རང་གི་རྒྱུད་ལ་སྦྱར་ནས་སྒོམ་པར་མཛད་པས་སྒོམ་གེགས་ཀྱང་མང་བར་བྱུང་སྟེ་ཇོ་བོས་འཕྲལ་ལ་སེལ་བར་མཛད་པས་ཇོ་བོའི་སློབ་མ་སྒོམ་གྱི་གེགས་སེལ་བ་ལ་རྩལ་ཐོན་པར་གྲགས། ཇོ་བོ་རྗེ་དང་ཉན་ཚོར་མཇལ་བ་ནས་མཐར་སྙེ་ཐང་དུ་ཇོ་བོ་ཞིང་གཤེགས་པའི་བར་འབྲལ་མེད་དུ་བསྟེན་ཅིང༌། ཇོ་བོ་གཤེགས་ནས་ཇོ་བོའི་གསུང་བཞིན་ར་སྒྲེང་དུ་དགེ་བཤེས་སྟོན་པའི་ཕྱགས་ཕྱི་མཛད་དེ། དགེ་བཤེས་སྟོན་པ་དང་རྣལ་འབྱོར་པ་གདན་སར་བཞུགས་རིང་ལའང་དགོན་པ་གོང་དུ་སྒྲུབ་པ་རྩེ་གཅིག་ཏུ་མཛད། རྟ་ལོ་ལ་རྣལ་འབྱོར་པ་གཤེགས་པའི་ལོ་དེ་ཉིད་གཏོགས་པའི་ལོ་ལ་གདན་ས་མཛད་དེ་སྐལ་བ་དང་ལྡན་པ་དག་ལ་ཇོ་བོའི་མན་ངག་རྒྱ་ཆེར་སྤེལ་ལོ། །དེ་ལྟར་དགེ་བའི་བཤེས་གཉེན་དགོན་པ་བ་ཆེན་པོ་དེས་རང་གི་སྲས་ཀྱི་ཐུ་བོ་སྣེའུ་ཟུར་པ་ལ་ཇོ་བོའི་མན་ངག་རྫོགས་པར་གནང་ཞིང་གཞན་ཡང་དངོས་ཀྱི་གདུལ་བྱ་རྣམས་སྨིན་པར་མཛད་ནས། དགུང་ལོ་དྲུག་ཅུ་རྩ་བདུན་པ་ཆུ་ཕོ་ཁྱིའི་ལོ་མངོན་པར་བྱང་ཆུབ་པའི་ཉ་ལ་སྐུ་གཤེགས་ཏེ་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། །དགེ་བཤེས་དགོན་པ་བ་དེ་ལ་སློབ་མ་བསམ་གྱིས་མི་ཁྱབ་པ་བྱུང་བའི་ནང་ནས་ཡོངས་སུ་གྲགས་པ་སྣེའུ་ཟུར་པ། ཞང་ཀ་མ་བ། དགེ་བཤེས་འབན་གུང་རྒྱལ། ཁ་རག་སྒོམ་ཆུང་བ། རྒྱ་ལྕགས་རི་བ་སོགས་བསྟན་པ་ཡོངས་རྫོགས་འཛིན་པའི་བཤེས་གཉེན་མང་དུ་བྱོན་ནོ། །དེ་ལ་ཀ་མ་བ་ནི། ཇོ་བོ་ལན་པ་སྦྱལ་བུར་ཕེབས་དུས། ཡུམ་དེས་ཇོ་བོ་ལ་བྱིན་རླབས་ཞུས་པས། འདི་ལ་བུ་བཟང་པོ་ཞིག་འོང་ཞེས་ལུང་བསྟན་པ་བཞིན། མེ་མོ་བྱ་ལ་ཀླུངས་ཤོད་རུག་པར་སྐུ་འཁྲུངས། ཡབ་ཞང་འབེན་ཕྱུག་གི་སྲས་ཡིན་པས་ཞང་བུ་གཅིག་པར་གྲགས། མཚན་ཤེས་རབ་འོད། ཕྱིས་དགོན་པ་བ་མཇལ་དུ་བྱོན་པས། ཆོས་དང་ཟང་ཟིང་གཉིས་ཀྱིས་བསྐྱངས་ཤིང་པོ་ཏོ་བ་ལ་ཡང་ཆོས་གསན། མངོན་པར་རྟོགས་པའི་ཡོན་ཏན་ཚད་མེད་པ་དང་ལྡན་ཞིང་རྒྱ་བོད་སྐད་གཉིས་སྦྱོར་བའི་ལོ་ཙཱ་ཡང་འབྲིང་ཞིག་མཁྱེན། ཕྱི་རོལ་གྱི་དངོས་པོ་ངན་པ་རྣམས་བཟང་བོར་བསྒྱུར་ནུས་པའི་ཏིང་ངེ་འཛིན་བརྟན་པོ་མངའ། ཕྱིས་ཀ་མ་དགོན་པ་བཏབ་སྟེ་འཕྲིན་ལས་བསྐྱངས་པས། ཚོགས་པ་བདུན་བརྒྱ་ཙམ་འདུས་སོ། །བདུན་ཅུ་རྩ་ལྔ་པ་ལྕགས་མོ་ཕག་གི་ལོའི་རྟའི་ཟླ་བའི་ཉི་ཤུ་གསུམ་ལ་ཀ་མར་སྐུ་གཤེགས་སོ། །དགོན་པ་བའི་སློབ་མ་དགེ་བཤེས་འབན་ནི། ཕན་ཡུལ་གྱི་སའི་ཆར་སྐུ་འཁྲུངས། རབ་ཏུ་བྱུང་བའི་མཚན་ཚུལ་ཁྲིམས་རྒྱལ་བ། ཀོ་དེ་ལུང་དུ་བཞུགས་པས་ཀོ་དེ་ལུང་པར་གྲགས། ཁོང་གིས་གཞོན་དུས་སྤྲང་བོ་འབའ་ཞིག་མཛད་ནས་ཐུགས་ཀྱང་མ་དུལ་བ་ཅིག་ཡོད་པ་ཡིན། ཕྱིས་དགོན་པ་བ་བསྟེན་ནས་ལམ་རིམ་ཐུགས་ཉམས་སུ་བཞེས་པས། ཆོས་རྣལ་མ་ཐུགས་རྒྱུད་ལ་འཁྲུངས་པ་ཅིག་བྱུང་བས། དགེ་བཤེས་པོ་ཏོ་བའི་གསུང་ནས་ཀྱང༌། བོད་ཀྱི་རྒྱལ་ཁམས་ན་འཆི་བ་གཤའ་མར་བློ་ལ་སྐྱེས་པ་འབན་གུང་རྒྱལ་ཡིན་གསུངས་ཏེ། ཁོང་རབ་ཏུ་འབྱུང་བའི་སྔ་རོལ་དུ། ཕྱིས་འདི་འདྲ་བ་ནུས་སམ་མི་ནུས་བལྟ་བའི་ཕྱིར། རྒྱུ་མོའི་གྲོག་པོ་བྱ་བ་གཉན་པོ་ཞིག་ཡོད་པའི་སར་ནུབ་གཅིག་ཉལ་དུ་ཕྱིན་སྐད། དེ་ནས་རབ་ཏུ་བྱུང་ནས་ཐམས་ཅད་སྤངས་ཏེ་བསོན་སྙོམས་མཛད་པས། འཚོ་བ་མེད་པ་ཡང་ལན་མང་དུ་བྱུང༌། རང་ལ་རྔན་བགྲང་འདི་ལྟར་མཛད་དེ། དེ་རིང་སང་གི་དབང་བྱར་མེད་པར་གཏན་དུ་འདུག་རྩིས་མ་བྱེད་ཚུལ་ཁྲིམས་རྒྱལ་བ་གསུངས་ནས་ཆིག་སྨྲས་མཛད། འགྲོ་སྙིང་འདོད་ཙ་ན་སྒོ་གཏན་ལ་ཞོན་ནས་རྐང་པ་ཐག་པས་བཅིངས་ཏེ་བཞུགས་གསུང༌། ཆོས་ནན་ཏར་བྱེད་ན་ཧུར་ཆེན་པོ་ཞིག་འབྱིན་མི་དགོས་སམ། མི་ངོར་མ་སོང་བ་ཅིག་མི་དགོས་སམ། མཐའ་རྒྱ་ཆོད་པ་ཅིག་མི་དགོས་སམ། 2/3 མདུན་ངོས། 上一页 1 2 3 下一页 尾页 |
