| ཅུང་ཟད་སྡང་དང་ཁྲོ་བར་མ་གྱུར་ཅིག །དེ་བཞིན་ཡིད་འཕྲོག་ཕྱི་ནང་དངོས་པོའི་ཚོགས། །དགའ་བསྐྱེད་ཡུལ་བརྒྱ་དག་གིས་ཀུན་བསྐོར་ཀྱང༌། །མི་རྟག་མི་གཙང་སྒྱུ་མ་ལྟར་མཐོང་ནས། །རྨི་ལམ་དུ་ཡང་ཆགས་པར་མ་གྱུར་ཅིག །འཇིག་རྟེན་འཇིག་རྟེན་འདས་པའི་ལམ་བཟང་ལ། །ཀུན་ནས་འཐོམས་པའི་མུན་ནག་མི་བཟད་པ། །ཐོས་བསམ་སྒོམ་པའི་ཤེས་རབ་སྒྲོན་འབར་བས། །ནམ་ཡང་རྨོངས་པས་གོས་པར་མ་གྱུར་ཅིག །ཅེས་སོ། དེ་ནས་རྒྱལ་བ་ཐམས་ཅད་མཁྱེན་པ་ཡོན་ཏན་རྒྱ་མཚོ་གཙང་ཕྱོགས་སུ་ཕེབས་ལ་བཀྲ་ཤིས་ལྷུན་པོར་གདན་འདྲེན་པའི་ཞལ་བཀོད་མཛད་དེ་སྤྲེའུ་ཞེས་པ་མེ་ལུག་ཟླ་བ་དྲུག་པའི་ཡར་ཚེས་ལ་ཆོས་གྲྭ་ཆེན་པོའི་མཁན་སློབ་རྣམས་ཀྱིས་གཙོ་མཛད་གཟབས་འཕྱོར་གྱི་རྟ་པ་བརྒྱ་ཕྲག་བརྒལ་བ་ཕེབས་བསུར་བྱོན། ཆུ་ཤར་དུ་ཡབ་སྲས་ཞལ་མཇལ་སྐབས། ལྷའི་རྔ་བོ་ཆེའི་སྒྲ་ལྟ་བུའི་སྒྲ་བསྒྲགས་ཤིང་ལྷ་རྣམས་ཀྱིས་མེ་ཏོག་གི་ཆར་ཆེན་པོ་ལེགས་པར་ཕབ་པ་ཐམས་ཅད་ཀྱི་མངོན་སུམ་དུ་གྱུར། དགེ་འདུན་སུམ་སྟོང་ལྷག་པའི་སེར་སྦྲེང་དང་བཅས་དགེ་མཚན་ཕུན་སུམ་ཚོགས་པ་དང་ལྡན་པས་ཆོས་གྲྭ་ཆེན་པོར་ཕེབས། ཟླ་བ་ཕྱེད་གཉིས་ལྷག་ཙམ་བཞུགས། རྗེ་འདི་པས་ཟང་ཟིང་གི་དངོས་འབུལ་སྤམ་མཐོ་བ་དང༌། །ཟབ་ཆོས་ཀྱི་རིམ་པ་ཅི་རིགས་པའང་ཕུལ་ནས་ཐུགས་མཉེས་པར་མཛད་དེ་གངས་ཅན་ཆོས་འཕེལ་གྱི་བར་ཕེབས་སྐྱེལ་དུ་བྱོན། སླར་བཀྲ་ཤིས་ལྷུན་པོར་ཕེབས་ནས་དགག་དབྱེ་གྲོལ་འཕྲལ་སྐུ་མཚམས་ལ་བཞུགས། དེའི་ཚེ་ཐུགས་ལ་ཆོས་ལྡན་གྱི་བྱ་བ་ཡིན་ཡང་ཟ་ཟིར་གྱི་རྣམ་པར་གཡེང་བ་ཤིན་ཏུ་ཆེ་བ་འཁྲུལ་པའི་བྱ་བྱེད་དེ་དག་ཐམས་ཅད་ནི་སྙིང་པོ་མེད་པ་སྒྱུ་མ་དང་སྨིག་རྒྱུའི་ཕུང་པོ་ལྟ་བུ་ཀུན་རྫོབ་ཀྱི་གནས་ཚུལ་རྗེན་ཆེར་གྱིས་འཆར་པ་དང༌། དེའི་མཐུས་བདེན་སྟོང་གི་དོན་སྤྱི་ཐུགས་ལ་ལམ་ལམ་ཤར་བ་བཞིན་འདི་ལྟར་གསུངས་ཏེ། །ན་མོ་གུ་རུ་མཉྫུ་གྷོ་ཥྰ་ཡ། སྐུ་མཐོང་བས་དོན་ལྡན་གཟི་འོད་འབར། །གསུང་ཡན་ལག་དྲུག་ཅུའི་དབྱངས་སྙན་སྒྲོག།ཐུགས་སྲིད་ཞི་ལས་འདས་མཁྱེན་བརྩེའི་གཏེར། །རྗེ་རྡོ་རྗེ་འཆང་ཞབས་པདྨོར་འདུད། །གདོན་དངོས་འཛིན་འཁྲུལ་པས་ཡིད་བསྐྱོད་ནས། །སྒྲོ་ཕྱིན་ཅི་ལོག་ཏུ་བཏགས་ཤིང་ཞེན། དེའི་མཐུ་ལས་བདག་གཞན་རིས་སུ་བཅད། །ལས་ཉོན་མོངས་དབང་གིས་འཁོར་བར་འཁྱམས། །དེ་ཡིན་ལུགས་རྟོགས་པའི་མཚོན་རྣོན་གྱིས། །དགྲ་བདག་འཛིན་སྲོག་དང་མ་ཕྲལ་ན། །གནས་འཇིགས་རུང་སྲིད་པའི་རྒྱ་མཚོ་འདིར། །ཡང་སྡུག་བསྔལ་འཁོར་ལོ་རྒྱུན་མི་འཆད། །བློ་མ་རིག་སྒྱུ་མའི་འཁྲུལ་འཁོར་འདིའི། །ཡུལ་གདོད་ནས་སྐྱེ་བ་མེད་མཐོང་བས། །ཕྱི་གཟུང་འཛིན་སྤྲོས་པ་དབྱིངས་སུ་ཐིམ། །དཔེ་ཆབ་རོམ་རྒྱ་མཚོའི་ཀློང་དུ་བཞིན། །ཆོས་ཀུན་གྱི་གནས་ལུགས་གདོད་མའི་གཤིས། །དོན་དབྱེར་མེད་སྤྲོས་པ་ཀུན་དང་བྲལ། །དཔེས་མཚོན་དུ་མེད་པའི་རང་བཞིན་གྱི། །དབྱིངས་འདི་འདྲའི་རང་ཞལ་བལྟས་པའི་ཚེ། །རྗེ་སངས་རྒྱས་ཆོས་དང་དགེ་འདུན་གྱི། །མཚན་ཙམ་ཡང་དམིགས་སུ་མ་མཆིས་ན། །སེམས་མ་རིག་དྲི་མས་སྦགས་མཐོང་བའི། །གནས་འཁོར་བའི་སྡུག་བསྔལ་ག་ལ་ཡོད།།ཡུལ་འོད་གསལ་ངང་དུ་རིག་པ་བཞུགས། །ཆོས་ཀུན་གྱི་ངོ་བོ་རྗེན་པར་མཐོང༌། །སླར་བལྟས་ཀྱང་མཐོང་བའི་ཡུལ་ལས་འདས། །དཔེ་འགག་མེད་ནམ་མཁའི་ཕ་མཐའ་འཚོལ། །ཁྱེད་འཁོར་བས་སྐྲག་པའི་འགྲོ་ཀུན་ཀྱང༌། །གཞི་བདེ་སྟོང་ཡངས་བའི་གཟིགས་མོ་མཛོད། །འདི་མཐོང་ན་སྣང་སྲིད་སྐྱེ་བོ་ཀུན། །དགྲའི་གཙོ་བོར་གྱུར་ཀྱང་འཇིགས་མི་དགོས། །ལས་དགེ་སྡིག་འབྲས་བུ་མ་དམིགས་ཤིང༌། །ལམ་སྤང་གཉེན་དགག་བསྒྲུབ་དང་ཡང་བྲལ། །ཡིད་འབད་པས་བསྒྲུབས་པའི་འབྲས་བུས་དབེན། །དབྱིངས་འདི་འདྲ་རྒྱལ་བའི་དགོངས་པ་སྙམ། །ཡང་འཁོར་འདས་ཆོས་ལ་ཕར་བལྟས་པས། །རྐྱེན་འདི་པ་ཙམ་གྱི་རྒྱུ་དང་འབྲས། །ཆེས་ཕྲ་ཞིང་བསླུ་བ་མེད་པར་མཐོང༌། །དཔེ་འཆི་མེད་ལམ་ནས་འཇའ་ཚོན་བཞིན། །དབྱིངས་སྤྲོས་བྲལ་གདོད་ནས་དག་པ་དང༌། །ལས་རྒྱུ་འབྲས་བསླུ་བ་མེད་པ་ཡི། །ཡུལ་སྣང་སྟོང་རེས་འཇོག་མ་ཡིན་པའི། །དོན་ཟུང་འཇུག་མཐའ་བྲལ་དབུ་མའི་ལམ། །ལམ་འདི་འདྲ་རྙེད་པ་བླ་མའི་དྲིན། །དྲིན་ཆེ་འོ་རྒྱལ་བ་གཉིས་པའི་རྗེ། །མ་དྲིན་ཅན་འགྲོ་བ་རྣམས་ཀྱིས་ཀྱང༌། །དོན་འདི་འདྲ་རྟོགས་པར་བྱིན་གྱིས་རློབས། །ཞེས་པ་དང༌། ཡང༌། ན་མོ་གུ་རུ་མཉྫུ་གྷོ་ཥྰ་ཡ། དབྱིངས་རིག་པ་དབྱེར་མེད་ལྷ་ཡི་ལམ། །ཞིང་ཀུན་ཁྱབ་མིག་འཕྲུལ་ཟློས་གར་མཁན། །ཕ་བདེན་མེད་རྨི་ལམ་ལྟ་བུ་ལ། །བུ་སྒྱུ་མའི་སྐྱེས་བུས་སྙིང་ནས་འདུད། །ཆོས་ཅན་ཀུན་བལྟས་པས་སྒྱུ་མ་ཙམ། །ཆོས་ཉིད་ལ་བལྟས་ཀྱང་ཅང་མ་མཐོང༌། །སྒྱུ་མ་དང་སྟོང་པ་ཟུང་འབྲེལ་ལམ། །ཟུང་འཇུག་འདི་བླ་མའི་དྲིན་གྱིས་རྙེད། །ཨ་ལ་ལ་ཡོད་མེད་ཀྱི་མཐའ་དང་བྲལ། །མཐའ་བྲལ་གྱི་དབྱིངས་སུ་མཉམ་པར་ཞོག །ཆོས་ཉིད་ལ་བལྟས་པས་ཆོས་ཅན་བཀྲ། །ཆོས་ཅན་ལ་དཔྱད་པས་སྟོང་པར་བྲོས། །སྣང་སྟོང་གཉིས་རེས་འཇོག་མི་བྱེད་པའི། །ཟུང་འཇུག་འདི་བླ་མའི་དྲིན་གྱིས་རྙེད། །ཨ་ལ་ལ་ཡོད་མེད་ཀྱི་མཐའ་དང་བྲལ། །མཐའ་བྲལ་གྱི་དབྱིངས་སུ་མཉམ་པར་ཞོག །དོན་དམ་གྱིས་རྒྱུ་འབྲས་བསླུ་མེད་བསྟན། །ཀུན་རྫོབ་ཀྱིས་དོན་དམ་རང་ཞལ་ཕྱེ། །བདེན་གཉིས་ཀྱི་རང་བཞིན་དབྱེར་མེད་པའི། །ཟུང་འཇུག་འདི་བླ་མའི་དྲིན་གྱིས་རྙེད། །ཨ་ལ་ལ་ཡོད་མེད་ཀྱི་མཐའ་དང་བྲལ། །མཐའ་བྲལ་གྱི་དབྱིངས་སུ་མཉམ་པར་ཞོག །དོན་དམ་གྱི་དབྱིངས་ལ་དཔྱད་པའི་ཚེ། །རྟེན་འབྲེལ་གྱི་མིང་ཡང་མེད་པ་དང༌། །སྟོང་པ་དང་རྟེན་འབྲེལ་ཟུང་འཇུག་འདི། །འགལ་མེད་དུ་བླ་མའི་དྲིན་གྱིས་ཤེས། །ཟུང་འཇུག་འདི་བླ་མའི་དྲིན་གྱིས་རྙེད། །ཨ་ལ་ལ་ཡོད་མེད་ཀྱི་མཐའ་དང་བྲལ། །མཐའ་བྲལ་གྱི་དབྱིངས་སུ་མཉམ་པར་ཞོག །འཁོར་འདས་ཀྱི་ཆོས་རྣམས་མ་ལུས་པ། །བདེན་མེད་དུ་ཤེས་པས་བདེན་པ་གོ། །བདེན་རྫུན་གྱི་རང་བཞིན་དབྱེར་མེད་པའི། །ཟུང་འཇུག་འདི་བླ་མའི་དྲིན་གྱིས་རྙེད། །ཨ་ལ་ལ་ཡོད་མེད་ཀྱི་མཐའ་དང་བྲལ། །མཐའ་བྲལ་གྱི་དབྱིངས་སུ་མཉམ་པར་ཞོག །མིང་རྐྱང་གི་ཆོས་རྣམས་བདེན་པས་སྟོང༌། །བདེན་སྟོང་ཀུན་རྒྱུ་འབྲས་རོལ་བར་ཤར། །སྟོང་པ་དང་རྒྱུ་འབྲས་དབྱེར་མེད་ལམ། །ཨེ་མ་ཧོ་བླ་མའི་དྲིན་གྱིས་རྙེད། །ཨ་ལ་ལ་རྟག་ཆད་ཀྱི་གཡངས་ལས་གྲོལ། །ཞེས་སོ། ། ཡང་དེ་དུས་ངེས་དོན་ཟབ་མོའི་ཉམས་བཞེས་ལ་བརྩོན་པར་མཛད་པས་གཞུང་ཆེན་མོ་རྣམས་དང་མཐུན་པའི་མཉམ་གཞག་དང་རྗེས་ཐོབ་ཀྱི་རྣལ་འབྱོར་གཉིས་ཀ་ལ་ཐུགས་བཀོལ་དུ་བཏུབ་པ་བྱུང་ནས་འདི་ཁའི་རྒྱུད་བསྐྱང་རྒྱུ་བྱུང་ན་སྟོང་ཉིད་མངོན་སུམ་དུ་རྟོགས་པ་ལ་དཀའ་བ་མི་ཡོང་བ་འདུག་སྙམ་པ་ཐུགས་ལ་ཤར་ཞིང་སྣང་བས་ཡོད་མཐའ་དང་སྟོང་པས་མེད་མཐའ་སེལ་བའི་ཐལ་འགྱུར་བའི་ཐུན་མོང་མ་ཡིན་པའི་ཁྱད་ཆོས་རྟེན་འབྱུང་ཟབ་མོའི་ཚུལ་ལ་ཐུགས་ངེས་ཁྱད་པར་ཅན་ཐོབ་ནས་ལྟ་བའི་མགུར་དབྱངས་འདི་ལྟར་མཛད་དེ། ན་མོ་གུ་རུ་མཉྫུ་གྷོ་ཥྰ་ཡ། །དབྱིངས་བརྗོད་བྲལ་ལྷན་སྐྱེས་བདེ་བ་ཆེ། །དོན་ཅིར་ཡང་འཆར་བའི་སྒྱུ་འཕྲུལ་མཁན། །ཕ་རྡོ་རྗེ་འཆང་དབང་བླ་མའི་ཞབས། །དགྲ་སྲིད་པའི་འཇིགས་འཕྲོག་དེ་ལ་འདུད། །དུས་དེ་རིང་ཉམས་ཀྱི་སྣང་བ་ལ། །སྤྱིར་འགལ་མེད་འགལ་བ་ལྟར་སྣང་བའི། །ཡིད་ངོ་མཚར་རི་མོ་སྣ་ཚོགས་ཤར། །ཆ་ཙམ་ཞིག་འཕགས་པའི་དབྱངས་སུ་བསྡེབས། །ཡུལ་གང་ཤར་ངོ་ལ་ཕར་བལྟས་པས། །ཁོ་རང་ཚུགས་མ་ཐུབ་བརྫུན་ཁུང་རིག །དེ་རིག་པས་་བདེན་པའི་རང་ཞལ་བསྟན། །སེམས་གཅེར་བུ་སྟོང་ཉིད་གོས་ཀྱིས་ཀླུབས། །ཆོས་ཀུན་བྱང་དབྱེ་བ་ཐ་དད་རྣམས། །དབྱིངས་དོན་དམ་ངང་དུ་དབྱེར་མེད་འདྲེས། །ལམ་དགག་བསྒྲུབ་བྲལ་ཡང་མཛངས་པའི་བློས། །ལས་དགེ་སྡིག་བླང་དོར་བྱ་རུ་བྱུང༌། །ངས་དང་པོར་ངར་འཛིན་དགྲར་བལྟས་ཏེ། །ལུང་རིགས་པའི་མཚོན་རྣོན་སྙིང་ལ་བསྣུན། །ད་དམིགས་མེད་ཡངས་པའི་མེ་ལོང་ལ། །ཡང་ང་ཞིག་བལྟརེ་མེད་ཚུལ་དུ་བལྟ། །ཆོས་ཇི་སྙེད་བལྟས་པས་གཞི་རྩ་བྲལ། །ཡུལ་ཆོས་ཉིད་བལྟས་པས་ཅིར་ཡང་སྣང༌། །དོན་སྣང་སྟོང་ཟུང་འཇུག་ཡངས་པའི་ལམ། །ལམ་འདི་འདྲའི་ཞགས་པས་ཆོས་ཀུན་བཅིངས། །གཅིག་ཐ་དད་སྤངས་ཀྱང་རོ་གཅིག་ལ། །ཡང་གཅིག་ཀྱང་དུ་མའི་རོལ་བར་ཤར། །དཔེས་མཚོན་ཀྱང་མཚོན་པར་མི་ནུས་པའི། །ངག་བརྗོད་བྲལ་དོན་འདི་བརྗོད་སྙིང་འདོད། གཞི་འཁོར་བ་སྤང་བྱར་མ་དམིགས་ཤིང༌། །ལམ་ཐར་པ་ཐོབ་ཏུ་མ་མཆིས་ཀྱང༌། །མ་འགྲོ་བའི་སྡུག་བསྔལ་མ་བཟོད་པས། །མཆོག་སྐུ་གསུམ་མྱུར་དུ་ཐོབ་པར་ཤོག །ཅེས་སོ། དེ་ལྟ་བུའི་ཚུལ་གྱིས་འཁོར་འདས་ཀྱིས་བསྡུས་པའི་ཆོས་ཐམས་ཅད་ཀྱི་སྣང་ཚུལ་དང་གནས་ཚུལ་འཁྲུལ་མེད་དུ་གཟིགས་ཤིང༌། སྣང་ཚུལ་ལ་གཟིགས་པས་སེམས་ཅན་རྣམས་ལ་སྙིང་རྗེ་རྩོལ་མེད་དུ་སྐྱེ་བ་དང༌། ཆོས་རྣམས་ཀྱི་གནས་ལུགས་རྟོགས་པའི་དབང་གིས་སྤྲོ་བ་ཡང་ངང་གིས་འཕེལ་བ་ཞིག་བྱུང་བས་རྐྱེན་བྱས་མགུར་དབྱངས་འདི་ལྟར་མཛད་དེ། །ན་མོ་གུ་རུ་མཉྫུ་གྷོ་ཥྰ་ཡ། འགག་མེད་དུ་སྣང་བ་ཆོས་ཀྱི་དབྱིངས། །བདེན་སྟོང་དུ་འཆར་བ་སེམས་ཀྱི་རྒྱུན། །དབྱེར་མེད་དུ་འདྲེས་པའི་རོ་གཅིག་པ། །སེམས་པ་དེ་སེམས་ཀྱི་རྡོ་རྗེར་སོང༌། །སྲེད་ལྡན་གྱི་མ་རྒན་སེམས་ཅན་རྣམས། །འདོད་ཡོན་ལ་སྲེད་པའི་ཞགས་པས་བཅིངས། །ཐར་མེད་ཀྱི་བཙོན་ཁང་ར་བར་བཅུག ། 10/23 མདུན་ངོས། 上一页 8 9 10 11 12 13 下一页 尾页 |
