| འཇིགས་རུང་གི་འཁོར་བའི་བཙོན་ཁང་འདིར། །ལས་ཉོན་གྱི་ལྕགས་སྒྲོག་དམ་པོས་བཅིང༌། །སྡུག་བསྔལ་གྱི་གཤེད་མས་ཡང་ཡང་གཙེས། །ངན་སོང་གི་གནས་སུ་གཏན་ཡུལ་བྱས། །ཚ་གྲང་གི་སྡུག་བསྔལ་དྲག་པོས་མནར། །རང་ཤ་དང་རྣག་ཁྲག་གྲངས་མེད་ཟོས། །བརྡེག་འཚོག་གིས་མནར་ཞིང་ངལ་ཐག་བཅད། །ལན་འགའ་མཐོ་རིས་ཀྱི་རྟེན་ཐོབ་ཀྱང༌། །སྐྱིད་འདོད་ཀྱིས་སྡིག་པའི་ལས་བྱས་པས། །ངན་སོང་གི་ཡུལ་དུ་ཡང་ཡང་ལོག། །བདེ་མེད་ཀྱི་སྡུག་བསྔལ་བརྒྱ་ཕྲག་མྱོང༌། །ད་དུང་ཡང་ཉོན་མོངས་ཆུ་ཀླུང་འདི། །བཟློག་ངེས་ཀྱི་ཆུ་ལོན་མ་བསྒྲུབས་ན། །མཐའ་མེད་ཀྱི་སྲིད་པའི་རྒྱ་མཚོ་འདིར། །ཉམ་ཐག་གི་ཀློང་དུ་བྱིང་ཉེན་གདའ། །བར་སྣང་གི་གློག་འདྲའི་ཚེ་ཐུང་འདི། །སྐྱིད་པས་ཀྱང་མི་འཚེངས་སྡུག་མི་ཕུང༌། །མནར་མེད་ཀྱི་ཁྲོ་ཆུ་ཁོལ་མའི་ནང༌། །ཡུན་རིང་དུ་བསྲེགས་ན་ཨེ་བཟོད་སོམས། །དལ་འབྱོར་དང་ལྡན་པའི་མི་ལུས་འདི། །དོན་མེད་ཀྱི་བྱ་པས་དུས་འདའ་པ། །རིན་ཆེན་གྱི་གླིང་ནས་ལག་སྟོང་དུ། །གཅེར་བུ་རུ་རང་ཁྱིམ་ལྡོག་པ་བཞིན། །ཚེ་ཐུང་འདི་ཅི་ལྟར་བྱས་ཀྱང་ཕྱིད། །བྱང་ཆུབ་འདི་ཕྱིས་ནས་རྙེད་པར་དཀའ། །སྐྱིད་སྡུག་གི་འདམ་ཀ་ད་རེས་བྱུང༌། །བསམ་བློ་དེ་སྙིང་གི་དཀྱིལ་ནས་ཐོངས། །དབྱར་དགུན་སོགས་ནམ་ཟླའི་འགྱུར་ལྡོག་དང༌། །སྐྱ་སེར་གྱི་སྐྱེ་བོའི་འཆི་ལུགས་སོགས། མངོན་སུམ་དུ་མིག་གིས་མཐོང་བཞིན་དུ། །ཇི་སྙམ་ཡང་མི་སེམས་རྟག་འཛིན་ཅན། །གཉེན་བཤེས་དང་ལོངས་སྤྱོད་ཀུན་བོར་ནས། །མཆི་བདག་གི་གཤིན་རྗེས་དབང་མེད་ཁྲིད། །རྒྱུས་མེད་དུ་གཅིག་པུར་འགྲོ་བའི་ཚེ། །ཕན་ངེས་དེ་དམ་ཆོས་ཁོ་ན་རང༌། །ཞེས་སོ། །སྔ་ཕྱིར་དད་འབུལ་བྱུང་བ་རྣམས་ལ་སྐུ་གསུང་ཐུགས་རྟེན་བཞེང་བ་དང༌། དགེ་འདུན་ལ་བསྙེན་བཀུར་མཛད་པ་མཐའ་ཡས་ཏེ་འདིར་མ་བྲིས་སོ། །དེ་ནས་བཀྲ་ཤིས་ལྷུན་པོའི་སློབ་དཔོན་པ་རྣམས་ཀྱིས་གསོལ་བ་ནན་གྱིས་བཏབ་པ་ལ་བརྟེན་ནས་ཚོགས་ཆེན་ལ་རྡུལ་ཚོན་གྱི་དཀྱིལ་འཁོར་དུ་དཔལ་རྡོ་རྗེ་འཇིགས་བྱེད་ཀྱི་དབང་བཞི་ཡོངས་སུ་རྫོགས་པ་སྩལ། དབྱར་གནས་གྲོལ་འཕྲལ་བདུན་ཕྲག་གསུམ་བཅད་རྒྱར་བཞུགས་ཏེ་ལམ་གྱི་རིམ་པའི་ཉམས་བཞེས་ལ་བརྩོན་པར་མཛད། དེ་སྐོས་ཐུགས་ལ་འདི་ལྟར་འཁྲུངས་ཏེ་སྔོན་ཆད་བླ་མའི་མིང་བཏགས་ཆོས་བརྒྱད་དང་འདྲེས་མའི་རྣམ་གཡེང་གི་གཞན་དབང་དུ་སོང༌། སྦྱིན་པ་པོ་རྣམས་ཀྱི་སེན་མོ་དཀར་དམར་གྱི་སྟེང་ནས་བཅད་པའི་དད་རྫས་དང་གཤིན་རྫས་ཆུད་མི་འཛའ་ཙམ་ཨེ་ཡོང་བསམ་ལྷ་ཁང་དང་རྟེན་བཞེངས་སོགས་བློས་ཅི་ལྕོགས་བགྱིས་ཤིང་བསྟན་པ་དང་གཞན་དོན་ཡིན་རྒྱུའི་ཁུལ་གྱི་དབང་བསྐུར་ལུང་ཁྲིད་སོགས་ཆོས་བཤད་མང་དུ་བྱས་མོད་ཀྱང་ངེས་འབྱུང་དང་ལྟ་བ་རྣམ་དག་གིས་རྩིས་ཟིན་པ་ནི་ཤས་ཆེར་དཀའ། དེ་གཉིས་ཅི་རིགས་པས་མ་ཟིན་པའི་ཟག་བཅས་ཀྱི་དགེ་བ་རྒྱ་ཆེར་བྱས་ཀྱང་འཁོར་བའི་འཁོར་ལོ་བསྐོར་བ་ཁོ་ནར་འདུག སྲིད་པའི་ཕུན་ཚོགས་ཇི་ཙམ་ཐོབ་ཀྱང་སྐྱེ་རྒ་ན་འཆིའི་རྒུད་པ་ནི་སྡུག་བསྔལ་གྱི་མེ་རབ་ཏུ་འབར་བས་སྐད་ཅིག་ཙམ་ཡང་བཟོད་གླགས་མི་འདུག མི་བཟོད་བཞིན་དུ་འཇིགས་པ་ཆེན་པོ་ལྔ་པོ་འདི་ལས་ཐར་པའི་ཐབས་ལ་བརྩོན་པར་མི་བྱེད་པ་ནི་ཀྱེ་མ་ཀྱི་ཧུད་བདག་ལ་སྙིང་མེད་པའམ་སྨྱོན་པ་དངོས་སོ་སྙམ་དུ་དགོངས། འཁོར་བའི་ཕུན་ཚོགས་ཐམས་ཅད་ཀྱང་སྡུག་བསྔལ་གྱི་རང་བཞིན་དུ་གཟིགས་ཏེ་དོན་དེ་དག་འཕགས་པའི་དབྱངས་སུ་མཛད་པ་ནི། ན་མོ་གུ་རུ་མཉྫུ་གྷོ་ཥྰ་ཡ། སྐྱོན་བྲལ་ཡོན་ཏན་ཀུན་གྱི་མཆོག་མངའ་བའི། །ཟླ་མེད་སྟོན་པ་ཤཱཀྱའི་རྒྱལ་པོ་དང༌། །དབྱེར་མེད་རྗེ་བཙུན་བླ་མའི་ཞབས་པད་ལ། །བྱང་ཆུབ་སྙིང་པོའི་བར་དུ་སྐྱབས་སུ་མཆི། །ཉོན་མོངས་ཆུ་བོ་ལས་ངན་རྦ་རླབས་ཅན། །ཤུགས་དྲག་དབང་གིས་སྐྱེ་བའི་རྒྱ་མཚོ་ཆེར། །ཀྱེ་མ་ཡང་ཡང་ཉིང་མཚམས་སྦྱར་བའི་ཚུལ། །རྒྱུན་དུ་ལེགས་པར་སོམས་དང་ཤེས་ལྡན་དག །མདོག་སྟོབས་གཟི་ཉམས་མི་སྡུག་རྙིངས་པའི་ལུས། །ཡིད་འོང་ཡུལ་བརྒྱ་འཚོགས་ཀྱང་སྤྱོད་མི་ནུས། །དྲན་དབང་བློ་ཉམས་འགུམ་པར་མངོན་ཕྱོགས་པ། །འཇིགས་རུང་རྒས་པའི་ཚུལ་འདི་གྲོགས་དག་ལྟོས། །འབྱུང་བ་འཁྲུགས་པའི་ཟུག་རྔུ་བརྒྱས་གཙེས་པས། །ཉིན་མཚན་མི་འཁྱོལ་འདོད་རྣམས་བསྟེན་དབང་མེད། །བཅོས་ཀྱིས་མི་ཕན་འཆི་བར་ཤེས་ཤིང་འགྱོད། །ཐར་མེད་ནད་ཀྱིས་གདུངས་འདི་ཀྱི་ཧུད་འཇིགས། །ཕུན་ཚོགས་བདེ་སྐྱིད་འབྱོར་པའི་པད་ཚལ་ཡང༌། །བསོད་ནམས་མིན་པའི་གླང་པོས་བཅོམས་པ་ན། །མྱ་ངན་མེ་འབར་ཤིན་ཏུ་ཡ་ང་བ། །ཀྱེ་མ་འཇིག་རྟེན་རྒུད་པའི་ཚུལ་འདི་ལྟོས། །ཡིད་འཕྲོག་གཉེན་འཁོར་ལུས་དང་ལོངས་སྤྱོད་སོགས། །འབྱོར་བས་དྲེགས་ཀྱང་སྒྲེན་མོ་ལག་སྟོང་དུ། །གྲོགས་མེད་མྱུར་དུ་འཇིག་རྟེན་ཕ་རོལ་ཏུ། །གློ་བུར་འཆི་བ་འདི་ཀོ་མཁས་པས་སོམས། །སྟོབས་དང་དཔུང་གིས་བཟློག་པའི་སྐབས་མེད་ཅིང༌། །རྫས་སྔགས་ནོར་དང་མཛེས་མས་བསླུར་མེད་པའི། །འཇིགས་རུང་དུས་ཀྱི་ཆད་པ་རྣམ་པ་ལྔ། །ཐོག་ལྟར་འབབ་བོ་མཁས་པས་བག་ཡོད་སྟེན། །སྲིད་པའི་རྩེ་མོ་ནས་བཟུང་དམྱལ་བའི་བར། །ཀུན་ལ་འདོད་དགུར་དབང་བྱེད་རྒྱལ་པོ་ལྔའི། །སྣང་ཚུལ་དྲན་ཚེ་ཅུང་ཟད་ཡིད་སྐྱོ་བས། །བློ་བཟང་ཆོས་ཀྱི་རྒྱལ་མཚན་ཞེས་བྱས་སྨྲས། །ཞེས་གསུངས། ཡང་དུས་དེའི་ཚེ། སྐྱིད་ཀྱང་མི་འཚེངས་སྡུག་ཀྱང་མི་ཕུང་པའི་དགུན་ཉི་དང་འདྲ་བའི་ཚེ་ཐུང་འདིའི་ལུས་སྲོག་ལོངས་སྤྱོད་ལ་གནོད་པ་བྱེད་པའི་སྐྱེ་བོ་ལའང་དགྲའི་གཙོ་བོར་འཛིན་པར་བྱེད་ན་འཁོར་བ་ཐོག་མ་མེད་པ་ནས་འགལ་མེའི་འཁོར་ལོ་ལྟར་རྒྱུན་མི་འཆད་པར་སྐྱེ་རྒ་ན་འཆིའི་རྒུད་པའི་སྡུག་བསྔལ་འབར་པའི་རལ་གྲི་རྣོན་པོས་འདེབས་པའི་བྱེད་པ་པོ་ནི། རང་རྒྱུད་ཀྱི་ཉོན་མོངས་པ་དུག་གསུམ་པོ་འདི་ཡིན་པས་འདི་ཉིད་ཕྱི་རོལ་གྱི་དགྲ་བོ་ཐམས་ཅད་ཀྱིས་དཔེར་མི་ཕོད་པ། འཇིགས་པ་དང་ཡ་ང་བ་དང༌། སྡུག་བསྔལ་ཐམས་ཅད་ཀྱི་འབྱུང་གནས་གཤེད་མ་བུར་རྫུས་ལྟ་བུའི་དགྲ་བོར་བཟུང་སྟེ་འཇོམ་བྱའི་གཙོ་བོར་གཟིགས་ནས་འབུར་འཇོམས་མཛད་ཅིང༌། དེ་དང་མཐུན་པར་འཕགས་པའི་དབྱངས་སུ་མཛད་པའང་འདི་ལྟར། ན་མོ་གུ་རུ་མཉྫུ་གྷོ་ཥྰ་ཡ། རྒྱལ་དཀའ་དུག་གསུམ་གཡུལ་ལས་རྣམ་རྒྱལ་བའི། །དྲང་སྲོང་ཆེན་པོ་དེ་ལ་གུས་འདུད་ཀྱི། །ཉོན་མོངས་འབྲས་དང་ཟུག་རྔུ་འཆི་བདག་ལྟར། །ཀུན་གྱིས་མཐོང་ཞིང་རྟོགས་པར་བྱིན་གྱིས་རློབས། །ཐོག་མེད་གོམས་པའི་རྒྱུན་གྱིས་སྟོབས་ལྡན་ཞིང༌། །ཚུལ་མིན་ཡིད་བྱེད་བསིར་བུས་ཆེར་བསྐྱོད་པས། །སྡིག་སྡུག་གཏམ་ངན་རྦ་ཀློང་རབ་འཁྲུགས་པའི། །ཉོན་མོངས་ཆུ་བོའི་རྒྱུན་འདི་བཅད་པར་དཀའ།།ཐུབ་པས་སྨད་ཅིང་འཕགས་ཆོགས་ཀུན་གྱིས་སྤངས། །བསྟེན་པ་ཙམ་གྱིས་འབད་རྩོལ་མི་དགོས་པར། །རང་གི་ངང་གིས་འཐུར་ནས་འཐུར་འགྲོ་བའི། །ཀྱེ་མ་བཟློག་དཀའི་ཟག་རྒྱུན་ཤུགས་རེ་དྲག །དགའ་མགུའི་ཟོལ་གྱིས་བདག་ཡིད་ཁྲིད་ཁྲིད་ནས། །རིང་པོར་མི་ཐོགས་ཐར་མེད་བཙོན་ཁང་དུ། །བརྒྱ་ཕྲག་སྡུག་བསྔལ་ངུད་མོའི་དཀའ་ཐུབ་དག །སྟེར་བྱེད་ཉོན་མོངས་ལས་གཞན་ཡོད་རེ་སྐན། །གང་ཞིག་རེག་ན་རྡོ་རྗེའི་རི་རབ་ཀྱང༌། །ཡུད་ཙམ་ཞིག་གིས་ཐལ་བར་བརླག་འགྱུར་བ། རབ་ཚ་མནར་མེད་འབར་བའི་མེ་ནང་དུ། །བསྲེག་པའི་རྒྱུ་གང་འདི་ལས་གཞན་པ་ཅི། །མཐའ་དང་དབུས་མེད་འཇིགས་རུང་སྐྱི་གཡའ་བའི། །མི་བཟད་འཁོར་བའི་འབྲོག་དགོན་ཉམ་ང་བར། །སྐྱབས་མེད་མགོན་མེད་ལན་ཅིག་མ་ཡིན་པར། །ཡང་ཡང་ཉིང་འཚམས་སྦྱོར་བའང་ཉོན་མོངས་དབང༌། །བསྟེན་ཅིང་གོམས་ན་དམ་པས་ཁྲེལ་འགྱུར་ཞིང༌། །ཐར་པ་དམ་པའི་དཔལ་དང་གཏན་བྲལ་བྱེད། །བདུད་རྣམས་དགའ་བའི་གཉེན་གྱུར་ཉོན་མོངས་ཚོགས། །འདི་ལ་ཤེས་ལྡན་སུ་ཞིག་དགྲར་མི་ལྟ། །དེ་བཞིན་སྡིག་ཚོགས་མཐའ་དག་འབོད་པའི་གྲོགས། །མཐའ་བྲལ་སྲིད་པའི་རྒྱ་མཚོར་འཇུག་པའི་རྒྱུན། །ངན་སོང་གསུམ་དུ་འགྲོ་བའི་སྒོ་མོ་ཆེ། །འདི་ཀོ་ཐབས་ཚུལ་སྟོང་གིས་འགེགས་པའི་རིགས། །ཚེ་འདིའི་ལུས་སྲོག་ལན་ཅིག་མ་ཡིན་པར། །ལན་བརྒྱ་སྟོང་དུ་འཇོམས་བྱེད་གང་གིས་ཀྱང༌། །དཔེར་འོས་མིན་པའི་ཉོན་མོངས་དགྲ་བོ་ལ། །ཡིད་རབ་རྟོན་པ་དེ་དག་ཕྱུགས་ལས་ཕྱུགས། །དེ་ཕྱིར་ཁམས་གསུམ་རྒུད་པའི་འཆིང་བ་ལས། །རྣམ་གྲོལ་འཆི་མེད་བདུད་རྩིའི་དཔལ་ཐོབ་སྟེ། །བདེ་དགའ་རྒྱ་མཚོར་འཇུག་འདོད་མཁས་པ་དག །དུག་གསུམ་གཡུལ་ལས་རྒྱལ་བའི་དགྲ་ཐབས་སྟེན། །རིགས་ཚུལ་འབུམ་ཕྲག་རྣོ་བའི་ངར་ལྡན་པ། །སྟོབས་ལྡན་གཉེན་པོའི་རལ་གྲི་རབ་འབར་བས། །བཟློག་དཀའི་ཉོན་མོངས་དགྲ་ཚོགས་སྲོག་འཕྲོག་པ། །ཨེ་མ་འདི་དག་མཁས་པ་རྣམས་ཀྱིས་བསྔགས། །བདག་ཀྱང་དེང་ནས་སྐྱེ་བ་ཐམས་ཅད་དུ། །ལྷ་སོགས་འགྲོ་བ་མ་ལུས་དགྲར་ལངས་ཏེ། །སྲོག་དང་འཚོ་བ་ཡང་ཡང་ཕྲལ་གྱུར་ཀྱང༌། ། 9/23 མདུན་ངོས། 上一页 7 8 9 10 11 12 下一页 尾页 |
