| གཞི་ཚུལ་ཁྲིམས་རྣམ་པར་དག་པའི་དགེ་འདུན་བརྒྱ་ཕྲག་མང་པོ་དང་ལྷན་ཅིག་ཏུ་ཆོ་འཕྲུལ་ཆེན་པོའི་དུས་བཟང་པོར་དཀོན་མཆོག་གསུམ་ལ་སྐྱབས་སུ་སོང་ཞིང་བྱང་ཆུབ་ཏུ་ཐུགས་བསྐྱེད། བསག་སྦྱང་གི་གནད་བསྡུས་པའི་ཡན་ལག་བདུན་པ་སྔོན་དུ་བཏང་ནས། ཀུན་ཏུ་བཟང་པོའི་སྨོན་ལམ་ཚུལ་བཞིན་དུ་བསྒྲུབས་པ་ནི་དུས་སྐབས་ཀྱིས་བསྟན་པ་དང་སེམས་ཅན་གྱི་དོན་བླ་ན་མེད་པ་དང༌། རང་གཞན་གཏན་གྱི་མདུན་མ་འགྲུབ་པའི་རྩ་བ་ཡིན་ནོ་སྙམ་དུ་དགོངས་ནས། ཐོག་མར་མཛེས་བྱེད་ཀྱི་ལོ་རྟ་ཟླ་བའི་དཀར་ཚེས་གསུམ་ནས་བཅུ་དྲུག་གི་བར་དུ་སྨོན་ལམ་ཆེན་མོ་ལེགས་པར་འཛུགས་པར་མཛད། དང་པོ་མང་ཇ་རེ་རེ་ཙམ་ཡང་འགྲིག་པ་ཇི་ལྟར་སྙམ་དུ་ཐུགས་ཡིད་འཕྱང་མོ་ཉུག་ཏུ་གྱུར་ཀྱང༌། ཕྱིས་ནི་ཉིན་རེ་མང་ཇ་ལྔ་དྲུག་ཙམ་ཡང་གཏོང་དགོས་པ་བྱུང༌། དེ་ནས་བཟུང་སྟེ་ལོ་ཉི་ཤུ་རྩ་ལྔའི་བར་ལ་བཀྲ་ཤིས་ལྷུན་པོར་དད་པ་ཅན་གྱི་རྫས་རྣམས་ཆུད་མི་ཟ་བའི་ཕྱིར་དང༌། གདན་ས་འདི་ཉིད་ལྷ་དང་བཅས་པའི་འགྲོ་བ་ཡོངས་ཀྱི་བསོད་ནམས་ཀྱི་ཞིང་མཆོག་དམ་པར་བསྒྲུབ་ཕྱིར་སྐུ་གསུང་ཐུགས་རྟེན་གསར་བཞེངས། མཆོད་རྫས་གསར་བཞེངས་དགེ་འདུན་ལ་བསྙེན་བཀུར་གྱི་རྒྱུན་སོགས་གོང་ནས་གོང་འཕེལ་དུ་མཛད། ལྷག་པར་ཆོ་འཕྲུལ་སྨོན་ལམ་འཛུགས་པར་མཛད་པ་འདི་ཉིད་རྒྱལ་བ་ཙོང་ཁ་པའི་ཡང་མཛད་ཆེན་གཅིག་ཡིན་པ་བཅས་རྗེ་འདི་རང་གི་ཡང་མཛད་ཆེན་ངོ་མཚར་བ་གཅིག་ཏུ་མཛད་དེ། ཚུལ་འདི་ལ་རྗེ་རང་ཉིད་ཀྱི་ཞལ་ནས། འདི་ནི་ཁོ་བོའི་ཚེ་འདི་ལ་ལྟོས་པའི་རྣམ་ཐར་བཟང་བ་ཞིག་ཡིན་སྙམ་པ་ཡོད་དེ། དགེ་བའི་གཤེས་གཉེན་པོ་ཏོ་བའི་རྣམ་ཐར་དུ། བོད་ན་དགེ་འདུན་སྟོང་ཕྲག་དུ་མ་རྣམ་ཐར་གཅིག་ལ་འགོད་ནུས་པའི་དགེ་སློང་ཡོད་ཅེས། དམ་པ་འདི་ཉིད་རྒྱ་གར་དུ་ཡང་གྲགས་ཞེས་འབྱུང་བ་ལྟར། དགེ་འདུན་སྟོང་རྭ་ཅན་བརྒལ་བ་ལོ་གྲངས་དེ་སྙེད་དུ་ཐམས་ཅད་མཁྱེན་པ་བསྒྲུབ་པ་ལ་རྩེ་གཅིག་ཏུ་ཐུགས་བསྟུན་ནས་འདུན་པ་རྨད་དུ་བྱུང་བའི་རྣམ་ཐར་ལ་འགོད་པར་བྱས་པའི་ཕྱིར་དང༌། ཇི་སྐད་དུ། གང་གིས་ཕྱོགས་བཅུའི་ཞིང་རྣམས་ཇི་སྙེད་པ། །རིན་ཆེན་བརྒྱན་ཏེ་རྒྱལ་བ་རྣམས་ལ་ཕུལ། །ལྷ་དང་མི་ཡི་བདེ་བའི་མཆོག་རྣམས་ནི། །ཞིང་གི་རྡུལ་སྙེད་བསྐལ་པར་ཕུལ་བ་བས། །གང་གིས་བསྔོ་བའི་རྒྱལ་པོ་འདི་ཐོས་ནས། །བྱང་ཆུབ་མཆོག་གི་རྗེས་སུ་རབ་མོས་ཤིང༌། །ལན་ཅིག་ཙམ་ཡང་དད་པ་བསྐྱེད་པ་ནི། །བསོད་ནམས་དམ་པའི་མཆོག་ཏུ་འདི་འགྱུར་རོ། །ཞེས་སོགས་རྒྱལ་བའི་བཀའ་ཚད་མར་གྱུར་པས་ཞལ་གྱིས་བཞེས་པའི་བསོད་ནམས་གཞལ་དུ་མེད་པ་རང་གཞན་གྱི་རྒྱུད་ལ་བསྐྲུན་པར་བྱས་པའི་ཕྱིར་རོ། །ཞེས་གསུངས། དེ་ནས་དད་ལྡན་མང་པོས་བསྐུལ་ནས་རྟ་ནག་ལ་ཕེབས། སྐྱེ་བོ་མཐའ་ཡས་པ་འདུན་པར་མཛད་ཅིང༌། རྗེ་འགོས་ཀྱི་སྒྲུབ་གནས་ཞལ་གཟིགས་ཕུག་པ་མཇལ་བར་མཛད་པས། ལྷས་མེ་ཏོག་གི་ཆར་ཕབ་ཅིང་ཚེ་ཆུའི་རྒྱུན་བབས། དེའི་འོག་མཁའ་སྤྱོད་ན་དཔལ་ལྡན་ལྷ་མོའི་ལོགས་བྲིས་བྱིན་རླབས་ཅན་ཞིག་འདུག་པ་ལ་མེ་ཏོག་འཐོར་བར་མཛད་པས་འོད་ཟེར་ཁ་དོག་སྣ་ལྔ་འཕྲོ་ཞིང༌། རྣམ་འགྱུར་སྣ་ཚོགས་སྟོན་པ་ཞིག་གཟིགས། དེ་ནས་བཀྲ་ཤིས་ལྷུན་པོར་ཕེབས། འདི་སྐབས་རྒྱལ་བ་ཐམས་ཅད་མཁྱེན་པ་ཡོན་ཏན་རྒྱ་མཚོ་ཡང་བྱང་ཕྱོགས་ཀྱི་རྒྱུད་ནས་ཕེབས། ཕྱི་ནང་གི་རྐྱེན་དུ་མས་བསྐུལ་ཏེ་བཀྲ་ཤིས་ལྷུན་པོའི་མཁན་སློབ་ཐམས་ཅད་ཀྱིས་མཇལ་བར་བྱོན། ཕེབས་ལམ་དུ་ཡང་རྩོལ་བ་ཆེན་པོས་བྱོན་པས་ཡ་མཚན་དུ་བྱེད་པ་བྱུང༌། དེ་དུས་རྗེ་རང་ཉིད་ནས་བདོག་པའི་དངོས་པོའི་ཕྱག་རྟེན་གཟབས་ཤིང༌། འབྲས་སྤུངས་སུ་མང་ཇ་འགྱེད་དང་བཅས་པ་གནང༌། བཀྲ་ཤིས་ལྷུན་པོའི་སློབ་དཔོན་པ་རྣམས་ཕྱིར་ཐེགས། རྗེ་རང་ཉིད་རེ་ཤིག་བཞུགས་རྒྱལ་བ་ཐམས་ཅད་མཁྱེན་པ་ཆེན་པོས་ཆོས་བཀའ་མཐའ་ཡས་པ་གནང་དགོས་ཚུལ་གསོལ་བ་བཏབ་པ་ལྟར། དགུན་འབྲས་སྤུངས་རང་དུ་བཞུགས་ནས་དབང་ལུང་རྗེས་གནང་སོགས་ལམ་པ་ཀའི་ཀུ་ཤའི་གྲངས་དང་མཚུངས་བ་འགྲོ་གང་ཆེ་གཙོར་བཏོན་མཛད་ཅིང་ཞར་ལ་འབྲས་སྤུངས་ཀྱི་དཀའ་བཅུ་རབ་འབྱམས་ཕལ་ཆེར་འདུས་པ་ལ་དཀའ་ཆེན་བཞིའི་རྩ་བའི་ལུང་ཡོངས་རྫོགས་དང༌། རྒྱལ་བ་ཡོན་ཏན་རྒྱ་མཚོ་དང༌། དེའི་ཞབས་འབྲིང་བ་སློབ་དཔོན་པ་རྣམས་གདན་འཛོམ་པ་ལ་དམར་ནག་གཉིས། ཞེ་དགུ་མ། རོ་ལངས་བརྒྱད་བསྐོར། དཔའ་བོ་གཅིག་པ་རྣམས་ཀྱི་དབང་གནང༌། གཞན་ཡང་སྔ་ཕྱིར་དབང་དང༌། རྗེས་གནང་དང༌། ཟབ་ཁྲིད་མན་ངག་ཞལ་ཤེས་སོགས་ཕལ་ཆེར་བུམ་པ་གང་བྱོའི་ཚུལ་དུ་འབུལ་བར་མཛད་དོ། །རྒྱལ་བ་ཐམས་ཅད་མཁྱེན་པ་ཆེན་པོས་ཀྱང་སྐུ་ཚེ་མང་པོའི་སྔ་རོལ་ནས་རྗེ་འདི་པ་ལ་མངོན་པར་དགྱེས་པའི་ཐུགས་ཀྱི་བག་ཆགས་སད་པ་ལྟར་མཛད་ནས། ཆོས་གསན་པའི་བླ་མ་མང་པོའི་ནང་ནས། རྗེ་འདི་པ་རིགས་ཀྱི་བདག་པོར་ལེགས་པར་བཞེས་ཏེ་ཐོག་མཐའ་བར་གསུམ་དུ་སོ་སྐྱེའི་བློ་ཡུལ་ལས་འདས་པའི་རྙེད་པ་དང་བཀུར་སྟིས་མཆོད་པ་ནི་དགེ་བཤེས་སྟོན་པའི་རྣམ་ཐར་དྲི་མ་མེད་པའི་རྒྱུན་འཁྲུལ་མེད་དུ་སྐྱོང་བར་མཛད་པ་ཡིན་ནོ། །དེ་ནས་ལྷ་སའི་སྨོན་ལམ་གྲོལ་ནས་བྱང་ར་སྒྲེང་མཇལ་དུ་ཕེབས། ར་སྒྲེང་བ་རྣམས་ལ་དམ་པའི་ཆོས་རྒྱ་ཆེར་སྩལ། ར་སྒྲེང་དུ་བཞུགས་རིང་ངོ་མཚར་བའི་ལྟས་བསམ་གྱིས་མི་ཁྱབ་པ་བྱུང༌། ར་སྒྲེང་ཚོགས་པ་ལ་བཀའ་གདམས་གླེགས་བམ་གཟབས་བཤད་དང་བཅས་པ་གནང༌། དེ་ནས་སླར་ཡང་རྒྱལ་བ་ཡོན་ཏན་རྒྱ་མཚོ་དང་ལྷན་དུ་རྒྱལ་མེ་ཏོག་ཐང་ལ་ཕེབས་ཏེ་གཙོ་ཆེར་རྒྱལ་བ་ཡོན་ཏན་རྒྱ་མཚོ་ལ་དབང་ལུང་མན་ངག་རྣམས་ནར་མར་གནང་ཞིང་སེང་དབར་རྣམས་སུ་ལམ་བར་གྱི་གནས་རྣམས་ལ་མཆོད་འབུལ་དང་ཁྱད་པར་དགའ་ལྡན་སྒྲུབ་རྒྱུད་ཀྱི་ཆུ་འགོ་གྲུབ་ཆེན་འཇམ་དཔལ་རྒྱ་མཚོའི་སྒྲུབ་གནས་མལ་གྲོ་སྤང་སའི་ཡང་དགོན་དང༌། རྗེ་རིན་པོ་ཆེ་འཁོར་དག་པ་རྣམ་བརྒྱད་དང་བཅས་པས་གང་དུ་སྒྲུབ་པ་མཛད་པའི་གནས་འོལ་ཁ་ཆོས་ལུང་སོགས་འོལ་ཁ་དང་དྭགས་པོའི་གནས་རྣམས་མཇལ་ཏེ་ཐུགས་སྨོན་མཛད། རྒྱལ་མེ་ཏོག་ཐང་དུ་དཔལ་ལྡན་ལྷ་མོ་དགྱེས་པའི་ཆོ་འཕྲུལ་ངོ་མཚར་བ་བྱུང་ཞིང༌། གནས་གང་དང་གང་དུ་ཕེབས་པ་དེ་དང་དེར་དད་ལྡན་རྣམས་ལ་རང་རང་གི་སྐལ་བ་དང་འཚམ་པའི་ཆོས་ཀྱི་བདུད་རྩི་སྩལ་ཏེ་ཐར་པའི་ས་བོན་ཐེབས་པར་མཛད། དེ་ནས་གཙང་དུ་ཕེབས་ཏེ་བཀྲ་ཤིས་ལྷུན་པོའི་འདུས་ཆོགས་ལ་དགུན་ཆོས་སྔ་ཕྱིའི་སྐབས་ཚོགས་ཆེན་ལ་སྒྲུབ་ཐབས་རྒྱ་མཚོའི་རྗེས་གནང་ལུང་དང་བཅས་པ་སྩལ། ཆོ་འཕྲུལ་སྨོན་ལམ་གྲོལ་རྗེས་འབྲས་སྤུངས་ནས་གདན་འདྲེན་ཞུ་མི་དོས་དྲག་བྱུང་བ་ལྟར། དབུས་སུ་ཕེབས་ནས་དགའ་ལྡན་ཕོ་བྲང་གི་གཟིམ་ཆུང་ཉི་འོད་དུ་ནག་ཉ་དང་བསྟུན་དཔལ་དུས་ཀྱི་འཁོར་ལོའི་རྡུལ་ཚོན་གྱི་དཀྱིལ་འཁོར་བཞེངས་ཏེ་རྒྱལ་བ་ཐམས་ཅད་མཁྱེན་པ་ཡོན་ཏན་རྒྱ་མཚོ་ལ་དུས་ཀྱི་འཁོར་ལོའི་དབང་ཡོངས་སུ་རྫོགས་པ་མཐའ་རྟེན་དང་བཅས་པ་དང༌། གཞན་ཡང་ཆོས་བཀའ་ཅི་རིགས་པ་འབུལ་བར་མཛད། དེའི་ཚེ་ལྷོ་རྒྱུད་ཕྱོགས་ནས་སྡེ་དཔོན་དུ་མས་ཕེབས་དགོས་ཚུལ་གསོལ་བ་བཏབ་པ་ལ་བརྟེན་ནས་ལྷོ་ཁར་ཕེབས། དེ་དུས་མཁར་ཏོག འཕྱོང་རྒྱས་རི་བོ་བདེ་ཆེན། སྤྱན་གཡས། སྣེའུ་གདོང༌། རྩེས་དང༌། རོང་ཆ་དཀར་སོགས་སུ་ཇོ་སྟན་ཚོགས་ཆེན་པའི་མཁན་ཆེན་གྱིས་མཚོན་པའི་བླ་མ་སློབ་དཔོན་དང༌། དགེ་འདུན་མང་པོ་ལ་དབང་ཁྲིད་ལུང་སོགས་རྒྱ་ཆེར་སྩལ། གང་དང་གང་དུ་ཕེབས་པ་དེ་དང་དེར་སྐྱེ་བོའི་ཚོགས་བརྒྱ་སྟོང་དུ་མ་འདུས་པ་ལ་ཡིག་དྲུག་གི་ལུང་དང༌། བླ་མའི་རྣལ་འབྱོར་སོགས་དམ་པའི་ཆོའི་རྒྱ་ཆེར་སྩལ། སྔོན་གྱི་དམ་པ་མང་པོའི་བསྟི་གནས་ཇོ་བོ་ཆེན་པོ་ལྷ་ཅིག་གི་གདུང་ཁང་བཞུགས་པ་ཐང་པོ་ཆེ་དང༌། སྤྱན་གཡས། ཡམ་བུ་བླ་སྒང༌། ཁྲ་འབྲུག རྩེས་དང༌། བྱམས་པ་གླིང༌། བསམ་ཡས་སོགས་ཀྱི་གནས་དང་རྟེན་མཇལ་ཞིབ་ཏུ་མཛད། མཆོད་འབུལ། བསག་སྦྱང༌། སྨོན་ལམ་རྣམ་དག་མཛད་པ་ནི་སྔོན་དམ་པའི་རྣམ་ཐར་ལྟར་རྨད་དུ་བྱུང་བའི་མཛད་པ་ཡིན་ལ། གང་དང་གང་དུ་ཕེབས་པ་དེ་དང་དེར་ཟང་ཟིང་གི་བསྙེན་བཀུར་རྒྱ་ཆེ་བ་དང་མི་མང་གི་འ་འུར་འདུ་འགོད་མང་པ་རྣམས་ལ་ནི་དེ་དང་དེ་གཟིགས་པ་ཙམ་གྱིས་སྐྱོ་ཤས་ངེས་འབྱུང་ཤུགས་དྲག་སྐྱེ་བ་ལས་ཟང་ཟིང་ལ་ཐུགས་དགྱེས་པ་ནི་ནམ་ཡང་མི་མཛད་དོ། །དེ་ནས་བཀྲ་ཤིས་ལྷུན་པོར་ཕེབས་ནས་དབྱར་གནས་ཀྱི་ཁོངས་སུ་ཉི་ཤུ་རྩ་ལྔ་རྩ་ལྔ་གྲངས་སུ་བཅད་དེ་ཚོགས་ཆེན་ལ་གདུགས་དཀར་གྱི་དབང་རྒྱས་པར་སྩལ།དགག་དབྱེ་ཐོན་ནས་ཞག་ཉེར་གཅིག་གི་རིང་སྐུ་མཚམས་བཅད་ནས་དཀོན་མཆོག་རྗེས་སུ་དྲན་པ་གཙོ་བོར་བསྒོམ་པར་མཛད་ནས་བསག་སྦྱང་ལ་བརྩོན་པར་མཛད་པས་སྟོན་པ་ཐུགས་རྗེ་ཅན་དེའི་བཀའ་དྲིན་དྲན་པའི་དད་པ་ཤུགས་དྲག་འཁྲུངས་ཤིང་གསོལ་འདེབས་གདུང་དབྱངས་སུ་མཛད་པ་ནི་འདི་ལྟར། ན་མོ་གུ་རུ་མུ་ནི་ཨིནྡྰ་ཡ། འཇིག་རྟེན་སྟོབས་ཀྱིས་མངོན་རློམ་མཐའ་དག་གི། ། 7/23 མདུན་ངོས། 上一页 5 6 7 8 9 10 下一页 尾页 |
