| མནར་མེད་བསྲེགས་པའི་སྡུག་བསྔལ་ཡང༌། །ཐར་མེད་ཅི་བྱ་གཏོལ་མེད་གྱུར།། ཤི་ནས་མེད་དེ་མི་འགྲོ་བར།།ཁམས་གསུམ་འཁོར་བ་འདིར་འཁྱམས་ཚེ། ། བདེ་འགྲོ་ཐོབ་ཀྱང་སྡུག་བསྔལ་གྱི། །རང་བཞིན་དག་ལས་མ་འདས་ཤིང༌། །བསྟན་བཅོས་བཞི་བརྒྱ་པ་ཉིད་ལས། །མཁས་པ་རྣམས་ལ་མཐོ་རིས་ཀྱང༌། །དམྱལ་བ་དང་མཚུངས་འཇིགས་བསྐྱེད་འགྱུར། །བདེ་བ་ནམ་ཡང་མེད་པར་གསུངས། །གཟོད་ནས་སྲིད་པའི་གཅོང་རོང་འདིར།། ལས་ངན་སྐྱེ་རྒ་ན་འཆི་ཡིས།།མགལ་མེའི་འཁོར་ལོ་ལྟར་འཁོར་བས།།སྡུག་བསྔལ་ཤུགས་དྲག་བཟོད་ལགས་སམ། །འདུས་བྱས་མི་རྟག་སྟོན་ཀའི་སྤྲིན། །རྩོད་དུས་མི་ཚེ་བར་སྣང་གློག །གཉེན་འཁོར་དགའ་འདུས་ཚོང་དུས་འགྲོན། །ནོར་རྫས་ལོངས་སྤྱོད་སྦྲང་རྩིར་མཚུངས།།སྐྱེ་བོ་ལོག་ལྟས་རྒྱུད་དཀྲུགས་ནས།།ཆགས་སྡང་ངན་སེམས་གཡོ་སྒྱུ་ཅན། །ཆོས་མིན་མི་དགེའི་ལས་ལ་སྤྱོད། །དམྱལ་བར་ལྷུང་བར་ཐེ་ཚོམ་མེད། ། སྙིགས་དུས་རབ་བྱུང་བདུད་ཀྱིས་བརླམས། །བློ་ལོག་འདོད་པས་ཆོས་བསྐྱུངས་ནས། །རྒྱལ་པོ་སྟོབས་འབྱོར་དྲེགས་སོགས་ཀྱི། །ཕོ་ཉ་དག་ལ་མགུ་ཞིང་འཇུག །ཧོར་གྱི་ཆ་ལུགས་མདའ་མཚོན་ཐོགས། །སྡིག་རྔམས་གཏུམ་པོས་ཕྱོགས་ཀུན་མྱུལ། །ཤ་ཁྲག་ཆང་ལ་དགའ་མགུར་སྤྱོད།། སེམས་ཅན་སྡུག་བསྔལ་དག་ལ་བཀོད། །རིགས་དྲུག་བཟོད་དཀའི་སྡུག་བསྔལ་ཀུན། །མི་ལུས་རྟེན་ལ་རྫོགས་པར་གནས། །བདེ་སྐྱིད་འཛོམ་པའི་སེམས་ཅན་དང༌། །ཆོས་བྱེད་ཉིན་སྐར་ཙམ་དུ་དཀོན། །ད་ནི་འཁོར་བའི་ཆོས་ཉིད་ལ། །སྙིང་པོ་མེད་པར་རྟོགས་གྱུར་ནས། ། གཏན་གྱི་མདུན་མ་བསྒྲུབ་རེ་རན།།རན་པར་མ་ཟད་ཤིན་ཏུ་འགྱངས།། འཁོར་བ་བཟོད་དཀའི་བཙོན་ར་འདྲར། །སྲིད་འབྱོར་འདོད་པའི་བློ་སྤངས་ནས། །ངོ་ཚ་ཁྲེལ་ཡོད་འཕགས་པའི་ནོར། །བསྟེན་ནས་ཐར་བར་བགྲོད་ཐབས་མཛོད། །ཉམ་ཐག་འགྲོ་ཀུན་བདག་གི་མས།། གྲངས་མེད་བརྩེ་བས་དྲིན་གྱིས་བསྐྱངས། །སྡུག་བསྔལ་ཟུག་རྔུས་རྟག་མནར་བ། །བདག་འདྲས་ཕན་པ་བསྒྲུབ་དཀའ་བས། །བླ་མ་རྒྱལ་བ་སྲས་བཅས་རྣམས། །ཐུགས་བསྐྱེད་དམ་བཅའ་རྗེས་དགོངས་ལ། །ཆེར་སྙིགས་སྐྱབས་མེད་འགྲོ་རྣམས་ཀྱི། །མགོན་སྐྱབས་མཛོད་ཅིག་བླ་མ་ལྷ། །ཞེས་གདུང་དབྱངས་ཀྱི་ཉམས་མགུར་མཛད་དོ། །དེ་ནས་གོང་ས་རིན་པོ་ཆེར་ལམ་རིམ་ཆེན་མོའི་ལུང་གི་འཕྲོ། རྗེ་རིན་པོ་ཆེའི་བཀའ་འབུམ་ཐོར་བུ། བ་རི་བརྒྱ་རྩའི་རྗེས་གནང་ཡོངས་རྫོགས་སོ་སོའི་རྒྱ་གཞུང་གི་ལུང་སོགས་དབང་ལུང་མན་ངག་རྒྱ་ཆེར་འབུལ་བར་མཛད། དེ་ནས་སྐུ་ཁམས་བསྙེལ་གཞི་ཆེི་བས་ཕྱོགས་འདུས་ཀྱི་ཆོས་དོན་གཉེར་ཅན་རྣམས་ལ་ཆོས་འབྲེལ་ཕྲན་བུ་རེ་ལས་རྒྱ་ཆེར་གནང་མ་ཐུབ།དེ་ནས་གཙང་དུ་ཆིབས་བསྐྱོད་གནང་བར་བཞེད་དེ་གོང་ས་རིན་པོ་ཆེར་ལྕམ་སྲིང་གི་རྗེས་གནང་ཞིག་གནང༌། རྒྱལ་བ་ཙོང་ཁ་པའི་བསྟན་པ་འཛིན་ཅིང་སྤེལ་བའི་ཐུགས་བསྐྱེད་མཛད་པ་དང༌། གཙོ་བོར་བསླབ་ཁྲིམས་དག་པ་གཞིར་བཟུང་ནས་རེ་ཤིག་གསན་སྦྱོང་ལ་ཐུགས་བརྩོན་ཆེ་བ་སོགས་རྒྱལ་བ་ཙོང་ཁ་པ་ཆེན་པོའི་རྣམ་ཐར་འཁྱོངས་པ་ཞིག་མཛད་དགོས་སོ་ཞེས་ཞལ་ཏ་ཞིབ་རྒྱས་སུ་གནང་སྟེ་གཙང་དུ་ཆིབས་ཁ་བསྐྱོད། དེ་ནས་བཀྲ་ཤིས་ལྷུན་པོར་ཕེབས་ནས་ཚོགས་ཆེན་དང་སྤོང་བ་པའི་སྡེ་དང་བཅས་པ་ལ་ཕྱག་དབང་གནང་ཞིང་ཆོས་ཀྱི་བདུད་རྩི་རིམ་པར་སྩལ། དེ་ནས་རྗེ་ཉིད་དགུང་ལོ་དྲུག་ཅུ་རེ་གཅིག་ཏུ་ཕེབས་པ་ཆུ་ཡོས་ཟླ་བ་དྲུག་པའི་ཚེས་བཅུ་ལ་ཚོགས་ཆེན་དགེ་བསྐོས་ཆེན་མོ་དཀའ་ཆེན་དོན་གྲུབ་རྒྱ་མཚོས་འདུས་པ་རྒྱ་མཚོའི་ཚོགས་ལ་དབང་ཆེན་ཞིག་དང༌། གཞན་ཡང་ཆོས་བཀའ་གང་ཟབ་དགོངས་དཔྱད་ཀྱིས་ཐུགས་རྗེས་གཟིགས་དགོས་ཚུལ་ཞུས་པར་སྔ་སོར་ཚོགས་ཆེན་ལ་གསང་བདེ་འཇིགས་གསུམ་གྱི་དབང་ཆེན་ལེགས་པར་ཕུལ་བ་ཡིན་ཡང༌། གཤིན་རྗེ་གཤེད་དམར་ནག་གཉིས་ཀྱི་དབང་ཆེན་དེང་སང་རྒྱུན་དཀོན་ཞིང༌། ལྷག་པར་ཡོངས་འཛིན་བསོད་ནམས་གྲགས་པའི་ཞལ་ཆེམས་སུ་ཡང་སླར་ཚོགས་ཆེན་ལ་གཤིན་རྗེ་གཤེད་དམར་ནག་གཉིས་ཀྱི་དབང་ཆེན་ཞིག་གནང་ཐུབ་པ་མཛད་དགོས་ཞེས་གསུངས་བྱུང་བ་བཅས་བླ་མའི་དགོངས་པ་རྫོགས་པ་དང༌། འཇམ་མགོན་བླ་མའི་བསྟན་རྒྱུན་ལ་ཕན་རེས་ད་ལམ་གཤིན་རྗེ་གཤེད་དམར་ནག་གཉིས་ཀྱི་དབང་ཆེན་ཞིག་བྱེད་ཅེས་དགྱེས་བཞིན་དུ་ཞལ་གྱིས་བཞེས་ཏེ་ཚེས་བཅུའི་ཉིན་གཤེད་དམར་གྱི་དབང་གི་སྟ་གོན་དང༌། ཚེས་བཅུ་གཅིག་ལ་དབང་དངོས་གཞི། ཚེས་བཅུ་བདུན་ལ་གཤིན་རྗེ་གཤེད་དགྲ་ནག་གི་དབང་གི་སྟ་གོན་དང༌། ཚེས་བཅོ་བརྒྱད་ལ་དབང་དངོས་གཞི་དགེ་འདུན་སུམ་སྟོང་བརྒལ་བ་ལ་དགྱེས་བཞིན་དུ་སྩལ། དེ་ནས་རིམ་གྱིས་ས་ཆེན་པོའི་ཁྱོན་མཐའ་དག་ན་གནས་པའི་དད་པ་ཅན་རྗེ་འདིའི་ཞལ་གྱི་དཀྱིལ་འཁོར་བལྟ་བ་དང༌། གསུང་གི་བདུད་རྩི་ཐོབ་པར་འདོད་པ་དང༌། ལྷག་པར་རབ་བྱུང་བསྙེན་རྫོགས་འདོད་པ་རྣམས་ལ་བརྒྱུད་མར་སྩལ་ཞིང༌། བར་སྐབས་ཤིག་རྒྱལ་བ་འཕགས་པ་ལྷར་དགེ་ཚུལ་གྱི་སྡོམ་པ་དང༌། འཇིགས་བྱེད་ཀྱི་དབང་ཆེན་སོགས་ཆོས་བཀའ་མང་དུ་སྩལ། དེ་ནས་ཟིལ་གནོན་ཞེས་པ་མེ་ཕོ་རྟའི་ལོ་གོང་ས་རིན་པོ་ཆེ་ཐུགས་རྫོགས་བཞེས་པ་དང༌། དབང་ལུང་མན་ངག་མང་པོ་གསན་ཕྱིར་དབུས་ཕྱོགས་སུ་འབྱོན་དགོས་ཚུལ་ཞུས་པར་སྐུ་ན་མཐོ་ཞིང་སྐུ་གཟུགས་གཅོང་ཚུལ་ཆེ་ཡང་འཇམ་མགོན་བླ་མའི་བསྟན་རྒྱུན་ལ་དགོངས་ངལ་བ་ཁྱད་དུ་བསད་དེ་དབུས་ཕྱོགས་སུ་ཆིབས་ཁ་བསྐྱོད། ལོ་དེའི་ས་ག་ཟླ་བའི་ཚེས་བཅོ་ལྔའི་ཉིན་ལྷ་ལྡན་སྤྲུལ་པའི་གཙུག་ལག་ཁང་དུ་ཇོ་བོ་ཤཱཀྱ་མུ་ནེའི་སྐུ་མདུན་དུ་རྒྱལ་བ་ཐམས་ཅད་མཁྱེན་པ་རྗེ་བཙུན་བློ་བཟང་བསྐལ་བཟང་རྒྱ་མཚོ་ལ་བསྙེན་པར་རྫོགས་པའི་སྡོམ་པ་ཕུལ་ཏེ་ཐུབ་བསྟན་ཡོངས་སུ་རྫོགས་པའི་བདག་པོར་མངའ་གསོལ་མཛད། དེ་ནས་པོ་ཏ་ལའི་གཟིམ་ཆུང་བདེ་བ་ཅན་དུ་བཞུགས་ཏེ། རྒྱལ་བ་ཐམས་ཅད་མཁྱེན་པ་ཆེན་པོར་དཔལ་གསང་བ་འདུས་པ་མི་སྐྱོད་པ་ལྷ་སོ་གཉིས་ཀྱི་དབང་ཆེན་སྟ་གོན་དང་བཅས་བ་གསང་ཆེན་རྒྱུད་སྡེ་རྒྱ་མཚོའི་སྙིང་པོའི་བཅུད་ཕྱུང་བ་ཟབ་བཤད་དང་བཅས་པ་དང༌། དཔལ་འཁོར་ལོ་བདེ་མཆོག་ལྰུ་ཨི་པ་ལྷ་དྲུག་ཅུ་རེ་གཉིས་པའི་དབང་ཆེན་སྟ་གོན་དང་བཅས་པ་རྒྱས་པར་གནང༌། དེ་ནས་རྒྱལ་བ་ཐམས་ཅད་མཁྱེན་པ་བློ་བཟང་བསྐལ་བཟང་རྒྱ་མཚོས་རྗེ་འདི་པ་ལ་དད་གུས་ཆེན་པོས་རབས་སུ་ལོ་ཁ་ཤས་བཞུགས་ནས་དབང་ལུང་མན་ངག་ཡོངས་སུ་རྫོགས་པ་ཞིག་གནང་བ་དང༌། མ་ཐ་ཟླ་བ་བཅུ་སྐོར་ཙམ་ཞིག་བཞུགས་ནས་དབང་ལུང་མན་ངག་དགོངས་དཔྱད་ཀྱིས་གང་དྲག་ཐུགས་རྗེས་གཟིགས་དགོས་ཚུལ་ནན་བསྐྱེད་ཞུ་བར་མཛད་པ་ན། 18/21 མདུན་ངོས། 上一页 16 17 18 19 20 21 下一页 尾页 |
