| དེ་གཉིས་ད་ཙམ་འདས་སམ། ད་ལྟ་པཎྜི་ཏ་དྰི༌པཾ་ཀ་ར་བྱ་བ་རྒྱལ་རིགས་ལས་རབ་ཏུ་བྱུང་བ་ཅིག་ཡོད་དེ། དེ་རང་ཆེ་བར་འོང་ཟེར་བས་འབྲོམ་རིན་པོ་ཆེའི་ཐུགས་ལ་དེ་དང་མཇལ་ན་དགའ་བ་ལ། དེ་དང་ཅི་མཇལ་བྱ་དགོས་སྙམ་པ་ཕྱུང༌། དེ་ལྟར་འབྲོམ་རིན་པོ་ཆེས་མདོ་ཁམས་སུ་བླ་མ་སེ་བཙུན་གྱི་སྤྱན་སྔར་ལོ་ཉི་ཤུའི་བར་དུ་བཞུགས་ཏེ་མདོ་སྔགས་ཀྱི་ཆོས་མང་དུ་གསན་པས་མཁས་པའི་ཕུལ་དུ་ཕྱིན། དགེ་བསྙེན་ཆོས་འཕེལ་དུའང་གྲགས་པ་བྱུང་སྟེ། དེ་ལྟར་དུ་འབྱུང་བར་རྒྱལ་བ་ཉིད་ཀྱིས་མདོ་ལས་ལུང་བསྟན་པ་ནི། སྙིང་རྗེ་པད་དཀར་དུ། བྱང་ཕྱོགས་སུ་བསྟན་པ་ལ་དད་པ་ལྟར་སྐྱེ་ཞིང༌། རབ་བྱུང་ཆོས་བཞིན་མི་སྤྱོད་པ་ལོག་པར་ལྷུང༌། དེར་དགེ་བསྙེན་ཆོས་འཕེལ་ཞེས་པ་རྫུ་འཕྲུལ་དང་ལྡན་པ་འབྱུང༌། ཞེས་པ་དང༌། སངས་རྒྱས་ཕལ་པོ་ཆེར། བྱང་ཕྱོགས་སུ་དགེ་བསྙེན་ཆོས་འཕེལ་བྱ་བ་འབྱུང་ཞེས་ལུང་བསྟན་པ་དང་མཐུན་ནོ། །དེ་ནས་ཇོ་བོ་མངའ་རིས་སུ་ཕེབས་པ་འགྲུལ་པ་ལས་གསན་པས་སེ་བཙུན་ལ་མངའ་རིས་སུ་འགྲོ་བར་ཞུས། ཁོང་གིས་ཀྱང་མི་དགྱེས་པ་མེད་པར་དཔེ་རྟ་ཁལ་གཅིག་གནང་ནས་བྱོན་ནོ། །བྱང་ལམ་དུ་སླེབ་ཙ་ན་མངའ་རིས་ཀྱི་ལྷ་བླ་མ་ཁུ་དབོན་གྱིས་ཇོ་བོ་རྗེ་ལྷ་ཅིག་བྱ་བའི་པཎྜི་ཏ་ཆེན་པོ་ཞིག་གདན་དྲངས་ནས་ཡོད། དེ་རིང་པོར་མི་ཐོགས་པར་རྒྱ་གར་དུ་བཞུད་པར་འདུག་བྱ་བ་གསན་པས་དེར་ཇོ་བོའི་མཚན་ཐོས་པ་ཙམ་གྱིས་ཐུགས་རང་དབང་མེད་པར་གཡོས་ཏེ་དད་གུས་བསམ་གྱིས་མི་ཁྱབ་པ་འཁྲུངས། མཇལ་དུ་འབྱོན་པའི་འདུན་པ་དྲག་ཏུ་འཁྲུངས་སོ། །དེ་ནས་ཇི་ལྟར་བཞེད་པ་ལྟར་བྱོན་ཏེ་སོག་ཆུ་ཁར་ཕེབས་པ་ན་ཁང་པ་ཅིག་ན་ཀུ་དི་རི་འདུག་པས། འདི་ན་ཅི་ཡོད་དྲིས་པས།འཕྲང་ཁ་བེར་ཆུང་ཡབ་བེར་ཆེན་གྱི་འདེད་དང་སྲིད་པོ་རྣམས་བསྡུ་བའི་ཆང་ཡོད་པ་ཡིན་ཟེར་བས།ཐག་རིང་ནས་བྱོན་པས་དེར་སྐྱེམ་བསྐྲུར་བྱོན་པ་ལ་འཕྲང་ཁ་བེར་ཆུང་གིས་ཁྱོད་ཆོས་གྲྭ་ནས་འོངས་པའི་དགེ་བསྙེན་ཞིག་འདུག་སྟེ་ང་ཡང་ཞང་འཕྲང་ཁ་བེར་ཆུང་བྱ་བའི་མི་ཆེན་ཞིག་ཡིན། ཁྱོད་ཀྱིས་དེ་ན་ཡར་ལ་ཕྱག་ཝ་འཁྱུག་པ་འདྲ་བ་ཅིག་གྱིས་ཟེར་པས་འབྲོམ་རིན་པོ་ཆེས་ཀྱང་དེ་བཞིན་དུ་མཛད། དེར་བེར་ཆུང་ཆོས་གཏམ་ལ་དགའ་བས་ཆོས་གཏམ་མང་པོ་བྱས་པའི་ཚེ་འབྲོམ་གྱིས་ཁོང་གི་ཚིག་སྣ་རེ་ནས་བརྡུངས་པས་ཁོ་ཐེ་ཚོམ་སྐྱེས་ནས། ཁམས་མ་གི་ན་འབྲོམ་སྟོན་པ་ཟེར་བའི་དགེ་བསྙེན་ཆོས་མཁན་ཞིག་ཡོད་ཟེར། དེ་ཁྱོད་ཡིན་ནམ་ཟེར་བར། ཡིན་པའང་སྲིད་གསུངས་པས་ཁོང་ཧ་ལས་ཏེ་ཁོང་རང་གི་འོག་གི་གྲུམ་ཙེ་ཕྱུང་སྟེ་དགེ་བཤེས་སྟོན་པ་ལ་བཏིངས། རྟ་བཟང་པོ་གཅིག་གི་ཐུར་མདའ་དར་ཡུག་གིས་བྱས་ནས་ཕུལ། ད་ཅི་ནས་ཕྱག་བླངས་པའི་བཟོད་གསོལ་བྱས། དེ་ནས་བགྲོ་གླེང་བྱས་པའི་བཟོད་གསོལ་བྱས། ར་སྒྲེང་གི་ས་ཆ་འདིར་དགོན་ས་མཛད་དེ་མཆོད་གནས་མཛད་པར་ཞུས་པ་ན་འབྲོམ་རིན་པོ་ཆེའི་ཞལ་ནས། ང་ད་རེས་སྡོད་མི་ཁོམ། མངའ་རིས་སྟོད་ཡ་གིར་པཎྜི་ཏ་ཆེན་པོ་ཞིག་བྱོན་ཟེར་བས་དེར་འགྲོ་གསུང༌། འོ་ན་ཡས་མར་ཕེབས་ནས་ངའི་མཆོད་གནས་བྱ་དགོས་ཟེར་བས། སྟོན་པའི་ཞལ་ནས།རྩིགས་ཁ་གསུམ་འཛིན་དགོས་ཏེ་སྟེར་ན་བྱ་གསུང༌། གང་བཞེད་ཞུས་པས། ཕོད་མདོའི་མཁར་འདི་བཤིག་ལ་གཙུག་ལག་ཁང་ཞིག་བཞེངས། ཤ་ཟན་དང་རྩམ་ཟན་གྱི་འཁྲུག་པ་ནི་བསྡུམས། ངའིཕྱི་ནས་ཡར་ལ་རྔོག་ལེགས་པའི་ཤེས་རབ་བྱ་བ་འོང་གི་དེ་ལ་ཆོས་ཚུགས། དེ་མ་བྱུང་ན་གཡོན་རུ་ན་ཁུ་སྟོན་བློ་རྣོན་པོ་བྱ་བ་ཡོད། དེ་སྤྱན་དྲོངས་ལ་ཆོས་ཚུགས་གསུངས། ཁོང་ན་རེ་གཉིས་པོ་བྱས་པས་ཆོག ཤ་ཟན་གྱི་འཁྲུག་པ་འདི་ལ་ང་རེ་བ་ཡིན། སྔར་ཡང་འབྲི་དྲུག་ཅུ་ཙམ་ཟོས་ཟིན། འོ་ན་ཡང་ཁམ་ཙམ་མེད།བསྡུམས་བྱས་པས་ཆོག་ཟེར་ནས་རྩིགས་གསུམ་པོ་ཁས་བླངས། དེ་ནས་དགེ་བཤེས་སྟོན་པས་རྒྱལ་གྱི་ཞང་ཆེན་པོ་བསླབ་པའི་སློབ་དཔོན་ཡིན་པས་ཕྱག་འཚལ་དུ་བྱོན། དེའི་ཚེ་དབུས་ཕྱོགས་ན་དགེ་བཤེས་ཀ་བ་མི་ཆེ་བས་རྒྱ་མོའི་ཕུར་བཞུགས་པ་མཇལ། ལྷ་བཙུན་བོ་ངྷི་རཱ་ཛ་ལ་སོགས་པ་བོད་ཀྱི་མི་ཆེན་རྣམས་ལ་ཞེ་ས་མཛད་ནས། ད་ལྟ་མངའ་རིས་ན་ལྷ་བླ་མ་བྱང་ཆུབ་འོད་ཀྱིས་ཇོ་བོ་ལྷ་གཅིག་བྱ་བའི་པཎྜི་ཏ་མཁས་པ་ཅིག་གདན་དྲངས་ནས་ཡོད་ཟེར། ངས་དེ་གདན་འདྲོངས་ན་ཞལ་མཐོང་དང་བཅས་པའི་དབུལ་བ་གྱིས་ཤིག་པའི་ཞུ་བ་ཕུལ། ཀ་བ་ཤཱཀྱ་དབང་ཕྱུག་ལ་ཆབ་ཤོག་ཁྱེད་ཀྱི་ཕྱག་དུ་བརྫངས་ཀྱི། དེ་ཙ་ན་བསྐུལ་མ་གྱིས་ལ་ལ་སྟོད་དུ་བསུ་བས་སླེབ་པར་མཛོད་ཅིག་པའི་ཞུ་བ་ཕུལ་བས། ཀ་བ་ན་རེ། ཁྱོད་ཀྱིས་སྤྱན་ཅི་འདྲོངས་གྱིས། ངས་བསྐུལ་མ་བྱས་ནས་ལ་སྟོད་དུ་སླེབ་པར་བསུ་བ་བྱ་གསུང༌། དེ་ནས་མི་ཆོས་རྣམས་པ་གསེར་སློང་ལ་བྱོན་པས། ད་ལྟ་ཉུང་བ་ལས་མི་འོང༌། ཕྱིས་མང་དུ་དབུལ་ཞུས་པས། ཉུང་ཡང་ད་ལྟ་འདོད། པཎྜི་ཏ་ཅན་དུ་རིངས་གསུང༌། ཉུང་ཡང་བླངས་ཏེ་དེ་ནས་མི་གྲོང་མ་བརྒྱུད་པར་བྱང་ལམ་ལ་ཐེག་པས་ལམ་ངོ་མ་ཤེས་པའི་སྐབས་སུ་བནྡེ་ཧྲལ་བོ་ཞིག་བྱུང་ནས་ལམ་བསྟན། ཡ་ཆེད་སྐྱེལ་ཐུང་བྱས་ནས་བདེ་བར་བཞུད་ཅིག ད་སྣ་ཤུད་ཀྱི་འཁྲུག་པ་ལངས་པས་ང་འགྲོ་མི་ཁོམ་ཟེར་ནས་འཚུབ་མར་རེང་གིས་སོང༌། པེ་ཧར་འདི་ཡང་ཆོས་གཤའ་མར་བྱེད་པ་ལ་གྲོགས་བྱེད་པར་འདུག་གསུང༌།རྙེད་པ་ཅིག་ལ་ཤ་བ་ཅིག་སོང་བའི་རྗེས་ལ་བྱོན་པས་ལམ་ཏིག་གིས་བྱུང༌། དེ་ཇོ་མོ་སྒྲོལ་མའི་སྤྲུལ་བ་ཡིན་གསུང༌། དེ་ཙ་ན་ཇོ་བོ་རྗེ་ལ་རྗེ་བཙུན་སྒྲོལ་མའི་ཞལ་ནས། ད་སྟེ་ཞག་གསུམ་དྲོ་དང་བཞིའི་ཉིན་པར་བོད་ཀྱི་ཨུ་པ་སི་ཀ་ཆེན་པོ་འབྱོན་པས། དེ་ལ་བྱིན་གྱིས་རློབས་ཤིག་ཅེས་ལུང་བསྟན། ཇོ་བོ་ཉིད་ཀྱིས་ཀྱང༌། དེ་ལྟར་དུ་དགོངས་ཏེ་ཇོ་བོའི་ཞལ་ནས། ད་ཞག་གསུམ་དྲོ་དང་བཞི་ན་ཁོ་བོའི་སྐྱེ་བ་སྔ་མའི་སློབ་མ་ཨུ་པ་སི་ཀ་ཆེན་པོ་ཞྭ་སྤྱི་རིང་རྒྱང་ངེ་བ་གསོལ་པ་ཅིག་འོང་བར་འདུག་གསུངས་ནས་དབུ་སྔས་འགོར་བུམ་པ་བཞེངས་སུ་གསོལ་ཏེ། ཞག་གསུམ་གྱི་ནང་པར་ཨུ་པ་སི་ཀ་ལ་བྱ་ར་མཛད། དྲོ་ཁ་ཚུན་ཆད་མ་བྱོན་པས། ཏཱ་རེ་རྫུན་ནི་གསུང་བ་ཅང་སྲིད་དམ་གསུངས་ནས་གྲོང་གསེབ་ཅིག་ཏུ་ཆོས་སྟོན་ལ་བྱོན་པའི་ཤུལ་དུ་དགེ་བཤེས་སྟོན་པ་དཔོན་གཡོག་ཕེབས་པ་ལ། འཁོར་ཀུན་ཀྱིས་ད་ལྟ་རང་འབྱོན་པས་བཞུགས་ཤིག་བྱས་པ་ལ་ང་ཐེག་པ་ཆེན་པོའི་བླ་མ་དང་མཇལ་བ་སྐད་ཅིག་མ་སྔ་མ་དང་ཕྱི་མ་གཉིས་ཀྱང་སྔ་མ་ལ་འདམ་པ་ཡིན་གསུངས་ནས་བཞུད་པས། ཇོ་བོ་དང་སྲང་བར་ཞིག་ཏུ་མཇལ་ཏེ་ཕྱག་མཛད་ནས། ཕྱག་རྟེན་དུ་གསེར་ཕུལ། དེར་ཇོ་བོའི་ཕྱག་སྟོན་པའི་དབུ་ཐོག་ཏུ་བཞག་ནས། སཾ་སྐྲྀ་ཏའི་སྐད་དུ་ཤིས་བརྗོད་མཛད་ཅིང་བྱིན་གྱིས་བརླབས་སོ། །དེ་ནས་འབྲོམ་རིན་པོ་ཆེས་གསོལ་བ་བཞེས་ནས་ཇོ་བོའི་གཟིམ་ཁང་དུ་བྱོན་པ་ན་ཇོ་བོ་རྗེས་བུམ་པ་དབུ་ཐོག་ཏུ་བཞག་སྟེ་དབང་བསྐུར་ཡང་ལེགས་པར་གནང༌། དེའི་ཚེ་དགེ་བཤེས་སྟོན་པས་ཇོ་བོ་ལ་དྲི་བ་གསུམམཛད། རྒྱ་གར་ན་པཎྜི་ཏ་ཇི་ལྟ་བུ་ཡོད་བྱ་བ་དང༌། ངའི་སྔ་མའི་ཆོས་དེ་ལམ་དུ་སོང་ངམ་མ་སོང་བྱ་བ་དང༌། བླ་མ་ཉིད་ཀྱི་སྤྱན་སྔར་བསྡད་ན་ཇི་ལྟར་མཆི་བྱ་བ་དང་གསུམ་ཞུས་པས། ཇོ་བོའི་ཞལ་ནས་རྒྱ་གར་ན་པཎྜི་ཏ་མཁས་པ་མང་པོ་ཡོད། ང་བོད་དུ་འོང་ཙ་ན་ཤར་ཕྱོགས་བྷཾ་ག་ལནའང་ཉིན་རེ་མ་ཆད་པར་གྲུབ་ཐོབ་རེ་འབྱོན་གྱི་ཡོད། ཁྱོད་ཀྱི་སྔ་མའི་ཆོས་དེ་ལམ་དུ་ཡེ་མ་སོང༌། བླ་མའི་ཞབས་ཏོག་ལམ་དུ་སོང༌། ད་ཁྱོད་འདི་རང་དུ་སྡོད། ངའི་ལྷ༌མོ་སྒྲོལ་མས་ཁྱོད་ལུང་བསྟན་པ་ཡིན་གྱི་ངའི་བཀའ་བརྒྱུད་འདི་ལ་བྱིན་རླབས་ཡོད་ཀྱི་གསུང༌། དེའི་ཉིན་པར་གྱི་ཡོན་བདག་དེས་སྟོན་སྐལ་གྱི་མར་ཚལ་གཅིག་བྱིན་པ་དེ་བཞུ་ནས་དེའི་ནུབ་མོ་མར་མེ་མཚན་ཐུབ་ཅིག་དབུ་སྔས་སུ། དེ་ནས་ཇོ་བོ་ཞིང་གཤེགས་ཀྱི་བར་དང༌། གཤེགས་ནས་ཀྱང་ར་སྒྲེང་དུ་སྐུ་གདུང་ལ་དཀར་མེ་མཚན་ཐུབ་རྒྱུན་མ་ཆད་པར་འབུལ་བར་མཛད། 2/9 མདུན་ངོས། 上一页 1 2 3 4 5 6 下一页 尾页 |
