| ཇོ་བོ་བོད་ལ་དང་པོ་ནས་མཉེས་པ་ང་རང་ལ་རྒྱུས་ཡོད།ད་སྐུ་ན་སོ་བྱོན་པས་བཤུལ་ཐག་རིང་པོ་ལ་ཚུར་སྤྱན་མ་དྲང་བར་བསྟན་བཅོས་འདི་ལ་འགྲེལ་པ་ཅིག་མཛད་ནས་བསྐུར་བ་ཞུ་གསུངས་ནས་གཉིས་པོ་ཚུར་བཏང༌། ཁོང་གཉིས་པོས་ཀྱང་ཚུར་འཁོར་ནས་ཇོ་བོ་དཔོན་གཡོག་ལ་ཞུ་འཕྲིན་སྙན་དུ་གསོལ་བས་ནན་ཏར་མཉེས་ཤིང༌། ཁྱད་པར་ལོ་ཙཱ་བའི་ཞལ་ནས་སློབ་དཔོན་གནས་བརྟན་གྱིས་རི་བས་ཀྱང་ལྩི་བའི་ཁུར་གཅིག་བསྐུར་བ་དེ་ད་སངས་ཀྱི་སོང་གསུང༌། ཇོ་བོས་ཀྱང་དེ་འཕྲལ་དུ་འགྲེལ་པའི་དབུ་བཙུག་ནས་དཀའ་འགྲེལ་ཞིག་མཛད་དེ་སླར་ཁོང་གཉིས་པོ་ལ་བསྐུར་བས་པཎྜི་ཏ་རྣམས་ཀྱིས་ཉིན་ལམ་མང་པོ་ནས་བསུ་བ་བྱས། རྒྱལ་མཚན་གྱི་རྩེར་བཏགས་ནས་མཆོད་པ་ཆེན་པོ་མཛད་དོ། །དེ་ཡང༌། དེང་སང་བསྟན་འགྱུར་ནང་ན་ལམ་སྒྲོན་རང་འགྲེལ་ཞེས་གྲགས་པ་འདི་ལ་ཇོ་བོས་མཛད་ངེས་པ་དང༌། ཇོ་བོས་མ་མཛད་པར་གཞན་གྱི་གསར་དུ་བསྣན་པའི་ཆ་གཉིས་ཡོད་དེ་རྒྱ་གར་གྱི་པཎྜི་ཏ་རྣམས་ཀྱིས་བསྐུལ་བ་ལྟར་ཇོ་བོས་ལམ་སྒྲོན་ལ་རང་འགྲེལ་མདོར་བསྡུས་ཤིག་མཛད་ནས་རྒྱ་གར་དུ་བརྫངས། དེ་ལ་ཇོ་བོའི་སློབ་མ་བོད་སྟོན་མཁས་པ་འགའ་ཞིག་གིས་ཇོ་བོའི་གསུང་སྒྲོས་ལ་གཞི་བླངས་པའི་བཤད་པ་རེ་མང་ཞིག་བསྣན་པར་སྣང་སྟེ། དེ་ལ་ལེགས་པར་བཤད་པའང་མང་དུ་བྱུང་མོད་ཀྱི་ནོར་བར་མངོན་པ་འགའ་ཞིག་ཀྱང་བྱུང་ངོ་ཞེས་རྗེ་བདག་ཉིད་ཆེན་པོས་གསུངས་སོ། །དེ་ལྟར་བླ་མ་རྗེ་བཙུན་ཆེན་པོ་འདིས་རྒྱ་གར་དུ་བཞུད་པ་བཞིན་དུ་མཛད། ལོ་ཙཱ་བས་སྐྱེལ་བ་བཞིན་མཛད་ཀྱང་བོད་རང་དུ་བཞུགས་པའི་རྒྱུ་མཚན་ནི་དང་པོ་ནས་ངེས་པ་ཡིན་ཏེ། ཁྱོད་སྔོན་སོ་མ་པུ་རི་ན། །རྟོག་གེ་འབར་བ་གསུང་བའི་ཚེ། །ད་ནི་ལོ་ནི་ཉི་ཤུ་ན། །ཚེ་ཡི་འདུ་བྱེད་གཏོང་ཞེས་གསུངས། །དེ་ནས་ལོ་གཉིས་ལོན་པ་ན། །བོད་དུ་འབྱོན་ཁའི་དུས་སུ་ནི། །བི་ཀ་མ་ལ་ཤྰི་ལར་ནི། །ད་ནི་ལོ་ནི་བཅོ་བརྒྱད་ན། །ཚེ་ཡི་འདུ་བྱེད་བཏང་ནས་སུ། །ལུས་འདི་བོད་དུ་འཇོག་གོ་གསུངས། །ཇི་སྐད་གསུང་བཞིན་མ་འཁྲུལ་བར། །བྱུང་བ་དེ་ནི་ངོ་མཚར་ཆེ། །ཞེས་གསུངས་པ་ལྟར་རོ། །དགེ་བའི་བཤེས་གཉེན་ཤ་ར་བའི་ཞལ་ནས། ཇོ་བོ་བོད་དུ་བཞུགས་པར་རྒྱ་གར་རང་ནས་ངེས་པ་དཔེ་ཆ་དང་ཐུགས་དམ་གྱི་ལྷ་མ་ལུས་པ་སྤྱན་འདྲེན་ལུགས་དེས་ཀྱང་ཤེས་གསུང་ངོ༌། །འབྲོམ་རིན་པོ་ཆེ་ཐུགས་དགོངས་བཟང་བ་དང༌། དེ་དུས་ཀྱི་མི་རྣམས་ཀྱང་བསམ་པ་བཟང་བས་བོད་ཀྱི་མི་ཆེན་རྣམས་ཀྱིས་ཀྱང་སོ་སོ་ནས་གསེར་དང་རྟ་ལ་སོགས་པའི་ཁྲལ་བཀྲལ་ནས་བོད་དབུས་གཙང་གི་མི་ཆེན་ཐམས་ཅད་ཀྱིས་ཇོ་བོ་རྗེ་བསུ་བ་ལ་བྱོན། དེའི་ཚེ་བོད་སྟོན་རྣམས་འབྱོན་པ་ལ་ཇོ་བོས་ཉིན་རེ་བཞིན་བྱ་ར་མཛད་ཙ་ན་བོད་སྟོན་རྣམས་ཀྱིས་ཚག་ཞུ་དང་བེར་གྱོན། རྟ་ལ་ཆིབས་བྱོན་པས་ཇོ་བོས་གཟིགས་མ་ཐག ཨུ་པ་སི་ཀ མི་མ་ཡིན་མང་པོ་བྱུང་ངོ་གསུང་ནས་དབུ་རིལ་གྱི་གཏུམས། དེ་ནས་བོད་ཀྱི་མི་ཆེན་རྣམས་ཀྱིས་ཆོས་གོས་གྱོན་སེར་སྦྲེང་མཛད་ནས་ཕྱག་རྟེན་ཕུལ་བས་ཇོ་བོ་ཡང་དགྱེས་ནས་ཕྱག་ལན་མང་པོ་མཛད། དེ་ནས་ཇོ་བོ་རྗེ་དཔོན་གཡོག་ལ་བོད་སྟོན་རྣམས་ཀྱིས་སྣ་ལེན་དུ་བསྙེན་བཀུར་བཟང་པོ་ཞིག་མཛད་པས་རྒྱ་གར་གྱི་རབ་ཏུ་བྱུང་བ་བས་བོད་ཀྱི་རབ་བྱུང་འཚོ་བ་བཟང་བར་འདུག་གསུང༌། དེ་ནས་གཙང་ལ་བསྟོད་ལྡོག་གི་ཚ་སྣ་བྱ་བར་དོ་ཧ་རྡོ་རྗེའི་མགུར་གསུངས་པས་འབྲོམ་རིན་པོ་ཆེས་བོད་དུ་འདི་མི་ལེགས། བསྐལ་པ་སྙིགས་པས་སྡོམ་པ་བསྲུང་བ་དང་ཚོགས་གསོག་པ་མི་མཆི། ལས་རྒྱུ་འབྲས་ལ་སོགས་པ་བསྟན་པ་སྤྱི་ལ་ཕན་པའི་ཆོས་གསུང་བར་ཞུས་པས། ཨ་ཏི་ཤ་ཡང་ཤིན་ཏུ་མཉེས་ཏེ། སེམས་ཅན་ཆེན་པོ་ཁྱེད་ལྟ་བུ་བོད་ན་བཞུགས་པ་བོད་བསོད་ནམས་ཆེ་ཡི། ཁོ་བོས་ཁྱོད་རྒྱ་གར་དུ་ཐོས་ན་བོད་དུ་འོང་མི་དགོས་པ་འདུག་པ་ལ་གསུང༌། སྣེའུ་ཟུར་པའི་ཞལ་ནས། འུ་ཅག་ཡིན་ན་གཞན་སུ་ལའང་མེད་པའི་ཆོས་ཤིག་ཁོ་ན་ཞུ། དགེ་བཤེས་སྟོན་པ་དེ་ཐུགས་དགོངས་ཤིན་ཏུ་བཟང་པས་བོད་སྤྱི་ལ་ཕན་ཆེ་བའི་ཆོས་ཤིག་ཁོ་ན་ཞུ་བར་ལགས་པར་གདའ་གསུང༌། དེ་ནས་གཙང་རོང་ན་མར་བྱོན་ཙ་ན་ཁང་པ་དོག་པས་གནས་ཁང་འདོད་རིགས་མ་རྙེད་པ་ལ་འབྲོམ་རིན་པོ་ཆེས་ཇོ་བོ་ཕྱིར་བཞུགས་སུ་བཅུག་ནས་དེའི་བར་དུ་ཁང་པའི་གད་བདར་བྱས། ཇོ་བོའི་དབུ་སྔས་སུ་མཎྜལ་ཞིག་ཀྱང་ཚང་པར་བྱས་འདུག་པས་ཇོ་བོའི་ཞལ་ནས། ང་ལ་སློབ་མ་ཁྱོད་འདྲ་བ་གཅིག་རྒྱ་གར་ནའང་ཡོད་གསུང༌། པོ་ཏོ་བའི་ཞལ་ནས་དོན་ལ་མེད། ཡོད་ན་ཁ་སྐད་འདྲ་བ་འོང་ཐང་བ་ལ་གསུང་ངོ༌། །ཡང་ལན་ཅིག་གི་ཚེ་ཇོ་བོས་བྱིས་པ་ལྟར་མཛད་ནས་ནང་གི་གནས་རྣམས་ཕྱི་ས་ཆུང་ངུ་རེས་བཀང་བས་དེ་རྣམས་འབྲོམ་རིན་པོ་ཆེས་ལེགས་པར་ཕྱགས། སྐུའི་སྤྱོད་པ་ལ་མ་དད་པ་མ་སྐྱེས་པས་བྱ་རྒོད་ཀྱི་ཉིན་ལམ་བཅོ་བརྒྱད་ཀྱི་བར་གྱི་གཞན་གྱི་སེམས་ཤེས་པའི་མངོན་པར་ཤེས་པ་སྐྱེས་གསུངས། དེ་ནས་ཇོ་བོ་རྗེ་ཁུ་སྟོན་གྱིས་ཡར་ཀླུངས་སུ་སྤྱན་དྲངས་ཏེ་ཐང་པོ་ཆེར་ཕེབས། འབྲོམ་རིན་པོ་ཆེས་ཐང་པོ་ཆེར་མ་ཕེབས་པར་སྙེ་ཐང་དུ་ཕེབས་ནས་བང་སྟོན་སར་བྱོན་ཏེ་ད་ལྟ་ནི་ཇོ་བོ་ཁུས་སྤྱན་དྲངས་ནས་ཕེབས་ཁུས་ཞབས་ཏོག་འོ་མི་བརྒྱལ་བ་མི་འོང༌། དེ་ཙ་ན་ཇོ་བོའི་བཞུགས་ས་ཅིག་དགོས་པས་ཁྱེད་ཀྱིས་སྙེ་ཐང་འདིར་བཞུགས་ས་བྱེད། ངས་ཐབས་མཁས་ཀྱིས་ཇོ་བོ་བསམ་ཡས་སུ་གདན་དྲངས་ཀྱིས། དེ་ཙ་ན་ཁྱེད་ཀྱིས་རྟ་པ་ཉིས་བརྒྱའི་ཞལ་མཐོང་དང་བཅས་པའི་བསུ་བ་གྱིས་ཤིག་གསུངས་པས་ཁོང་གིས་ཀྱང་ཞལ་གྱིས་བཞེས་སོ། །དེ་ནས་འབྲོམ་རིན་པོ་ཆེས་ཇོ་བོའི་སྤྱན་སྔར་འགྲོ་དགོངས་ནས་ཡར་ཀླུངས་ནས་ཡར་བྱོན་པ་དང་ཐང་པོ་ཆེ་བའི་མི་ཅིག་ན་རེ། ཁྱོད་གར་འགྲོ་ཟེར། ཐང་པོ་ཆེར་འགྲོ་གསུངས་པས། སྨ་ཕབ་པར་འོང་ཟེར། ཇོ་བོ་དང་མཇལ་ན་སྨ་ཕབ་ནའང་ཕབ་སྙམ་པ་ཅིག་བྱུང་གསུང༌། དེ་ནས་བནྡེ་ཞིག་ལ་ཇོ་བོའི་གཟིམ་ཁང་ག་ན་ཡོད་དྲིས་པས།སྟོན་དུ་མ་བཏུབ་པ་ལ་ཇོ་བོའི་སློབ་མ་ཨ་ཙ་ར་ཅིག་བྱུང་བས་ངོ་ཤེས་ནས་འབྲོམ་རིན་པོ་ཆེའི་རྩར་རྒྱུགས་བྱུང༌། དེས་ནང་དུ་ཁྲིད་ནས་ཇོ་བོ་དང་མཇལ་བས་ཡུན་ཟླ་བ་གཅིག་ལས་མ་ལོན་པ་ལ་འོ་ཤིན་ཏུ་བརྒྱལ་བར་བྱས་ནས་གདའ། དེར་ཇོ་བོའི་ཞལ་ནས། ཨུ་པ་སི་ཀ་ཆེན་པོ། ང་རང་དང་པོ་གང་ནས་འོངས་པའི་སར་སྐྱོལ། བཀའ་འཁོར་འདི་ཀུན་ཡང་འོ་བརྒྱལ། རྟ་ཁལ་འདི་ཀུན་ཀྱང་མ་རྒན་ཡིན། ཁུ་སྟོན་ནི་འཁོར་ལོས་བསྒྱུར་བའི་རྒྱལ་པོ་ལྟ་བུ། ཁོ་བོ་ནི་དམངས་ཕལ་པ་ལྟ་བུ། ཁུ་སྟོན་ནི་སུམ་ཅུ་རྩ་གསུམ་གྱི་ལོངས་སྤྱོད་དང་ལྡན་པ་ལྟ་བུ། ཁོ་བོ་ནི་པྲེ་ཏ་པུ་རིའི་གྲོང་ཁྱེར་ན་གནས་པ་ལྟ་བུ་བྱུང་གསུངས་པ་ལ།འབྲོམ་རིན་པོ་ཆེས་བདག་གིས་ཇོ་བོའི་བཞུགས་གནས་སྙེ་ཐང་ཟེར་བ། དབྱར་བསིལ་བ་དགུན་དྲོ་བ།ནགས་ཚལ་དང་ནེའུ་གསིང་ཡོད་པ། དགུན་ཡང་མེ་ཏོག་སྐྱེ་བ་ཞིག་བཙལ་བདོག་ཞུས་པས། ཨུ་པ་སི་ཀ་ད་ལྟ་རང་གཤེགས་གསུང་བ་ལ། ཁུ་ཡང་དབང་ཆེ་བས་ཁད་ལ་ཐབས་མཁས་བྱེད་དགོས་ཞུས་པས།ཁུ་སྟོན་གྱིས་མི་ཚོར་བའི་ཐབས་ང་རང་གིས་བྱེད་གསུང་ནས། དེའི་ནུབ་མོ་གྲུ་བསྡོགས་བྱས་ཏེ་ནམ་ལངས་པ་དང་ལམ་དུ་ཆུད་པར་བྱས་ནས་གཤེགས་པ་བནྡེ་མོ་ཞིག་གིས་མཐོང་ནས་ཁུ་སྟོན་ལ་བྱ་གཏོང་དུ་ཕྱིན། དེ་ནས་ཇོ་བོ་དཔོན་གཡོག་གིས་མྱང་པོའི་གྲུ་ལ་བྱོན། འབྲོམ་རིན་པོ་ཆེའི་ཞལ་ནས་མཉན་པ་ལ་སྔོན་ལ་ང་སྒྲོལ་ཅིག་ད་ལྟ་རང་རྡུང་གཏག་ཐམས་ཅད་ང་ལ་འོང་གསུངས་པས་མཉན་པས་སྔོན་ལ་བསྒྲལ།།དེའི་ནུབ་མོ་འབྲོམ་རིན་པོ་ཆེ་དཔོན་གཡོག་གིས་འོན་དུ་མ་བཞུགས་པར་ཀ་ཆུར་ཕེབས། ཇོ་བོ་དཔོན་གཡོག་སྒྲོལ་ཀྱིན་ཡོད་ཙ་ན་དགེ་བཤེས་ཁུ་ཨ་ཏི་ཤ་ཟེར་ཅིང་རྒྱུགས་བྱུང་བ་གཟིགས་པས་ཇོ་བོའི་ཞལ་ནས་མཁས་པ་ཆེན་པོ་བྱོན། གྲུ་ཕྱིར་ཐེན་ཅིག་གསུངས་ནས་བཞུགས་པ་དང་ཁུ་ཡུས་ཆེ་བས་ཆིབས་པ་ཐལ་ནས་ཆུ་ནང་དུ་དེའུ་གྲོངས་བྱུང༌། དེར་ཁུ་སྟོན་གྱིས་ཇོ་བོ་ལ་ལྡོག་པར་ཞུ་བ་ཕུལ་ཡང་མ་གནང་བར་དབུ་ཞྭ་ཕྱིར་འཕངས་ཏེ་བྱིན་རླབས་ཀྱི་རྟེན་དུ་གནང༌། དེ་ནས་ཇོ་བོ་དཔོན་གཡོག་གིས་འོན་དུ་ཟླ་བ་གཅིག་བཞུགས་ནས་བསམ་ཡས་སུ་ཕེབས། དེའི་དུས་སུ་ཞང་འཕྲང་ཁ་བེར་ཆུང་གིས་འབྲོམ་རིན་པོ་ཆེ་སྤྱན་འདྲེན་པའི་མི་གཉིས་བཏང་ནས་ཡང་ཡང་བསྐུལ་བ་ལ་འབྲོམ་རིན་པོ་ཆེའི་ཞལ་ནས། ང་ད་ལྟ་འོང་མི་ཁོམ། ཇོ་བོ་སྐུ་ན་མཐོ་ལ་སྐུ་གཅོང་མང་བས་ཞབས་ཏོག་གལ་ཆེ། དེའི་བར་དུ་ཐུགས་མི་ཆད་པར་ཆོས་འདི་ཚོལ་དགོངས་པར་ཞུ་གསུངས་ནས་འཕྲིན་ཡིག་བསྐུར་བ། ཡབ་མེས་ཆོ་རིགས་བཟང་པོའི་རྗེས་འབྲངས་ཤིང༌། །དགེ་བའི་བློ་མངའ་དལ་འབྱོར་ལྡན་རྣམས་ལ། །ཕན་པར་དགོངས་པའི་སེམས་ཀྱིས་ཀུན་བསླངས་ན། །བདུད་རྩི་འདྲ་བའི་གྲོས་ཤིག་ཡོངས་ལ་འདེབས། །སྙོམས་པར་འཆར་བའི་ཉི་མའི་འོད་ཟེར་བཞིན། །སངས་རྒྱས་བསྟན་པས་ཀུན་ལ་ཡོངས་ཁྱབ་ཀྱང༌། །བྱང་དུ་བལྟས་པའི་བྲག་ཕུག་ཇི་བཞིན་དུ། །དམ་པའི་ལྷ་ཆོས་མི་མཛད་བློ་རེ་རྨོངས། །འོ་སྐོལ་དལ་འབྱོར་མི་ལུས་ཐོབ་པ་ཡང༌། 4/9 མདུན་ངོས། 上一页 2 3 4 5 6 7 下一页 尾页 |
