| བཅས་མཚམས་ཕྲ་ཞིང་ཕྲ་བ་ལ་ཉིས་པས་མ་གོས་པར་བྱེད་པ་ནི་ཐར་པའི་ས་བོན་ཐེབས་པ་ཡིན་ཡང༌། སྲིད་པའི་རྩ་བ་དྲུང་ནས་འབྱིན་པར་བྱེད་པའི་སྨན་མཆོག་བདུད་རྩིའི་ཐིགས་པ་ལྟ་བུ་ཟབ་མོ་སྟོང་པ་ཉིད་ཀྱི་དོན་ནི། ཡོད་མིན་མེད་མིན་གཉིས་ཀ་མིན། །གཉིས་ཀའི་བདག་ཉིད་མིན་པའང་མིན། །མཐའ་བཞི་རྣམ་པར་གྲོལ་བ་ཡི། །དེ་ཉིད་དབུ་མ་པ་ཡི་རིག །ཅེས་གསུངས་པ་ལྟར། རྟག་ཆད་ཀྱི་མཐའ་བཞི་དང་བྲལ་བའི་ངེས་དོན་མཐར་ཐུག་གི་ལྟ་བ་ཕྱག་རྒྱ་ཆེན་པོ་འཕགས་པ་ཡབ་སྲས་ཀྱི་ཐུགས་ཀྱི་བཅུད་འཁྲུལ་མེད་ཀྱི་ལྟ་བ་འདི་ལྷག་མཐོང་ཆེ་ཆུང་དང༌། སྲས་ཀྱི་ཐུ་བོ་རྣམས་ཀྱིས་གསུངས་པའི་ལྟ་ཁྲིད་དང༌། རྩ་བའི་བླ་མ་ཐམས་ཅད་མཁྱེན་པ་ཉིད་ཀྱིས་གསུངས་པའི་དམར་ཁྲིད་ཀྱི་ལྷག་མཐོང་དང༌། ལྟ་བའི་སྐོར་གྱི་གསུང་མགུར་རྣམས་ལ་བལྟ་ཞིང་དོན་ཉམས་སུ་བླངས་པས་སྟོང་ཉིད་ལ་ཐོག་མར་གོ་བ་ཅུང་ཟད་ཆགས་པ་དང༌། དོན་སྤྱིའི་ཚུལ་གྱིས་སྒོམ་པ་དང༌། དེ་ལས་ལངས་ནས་གང་ཤར་སྒྱུ་མ་ལྟ་བུའི་རྣམ་རོལ་གྱི་ངང་ནས་སྦྱོང་ཕྱོགས་རྣམས་ལ་བསླབས་པས་བདག་གི་སྐྱེ་བ་འདིའི་མི་ལུས་ཆུད་མ་ཟོས་པ་འདི་རང་གི་རྣམ་པར་ཐར་པ་ལགས་སོ་ཞེས་གང་གསུངས་པ་ལྟར་རོ། །དེ་ནས་དམ་པ་འདིས་བྱང་ཆུབ་ལམ་གྱི་རིམ་པ་ལ་མྱོང་བ་ཕུལ་ཕྱིན་ཐོན་ཏེ་རང་ཉིད་མི་ཉམས་པའི་གདེང་ཐོབ་པ་ན་རྟ་ནག་ཕུག་ཏུ་སྒྲུབ་སྡེ་འཛུགས་པར་མཛད། རྟ་ཕུག་རྡོ་རྗེའི་གུར་ཁང་ཞེས་མཚན་བཏགས་ཤིང་དེར་སྤོང་བ་པའི་སྡེ་བསྐྱངས། དེ་ནས་སྟག་གི་ལོ་དྲུང་པ་རྒྱལ་ཚབ་པ་སྐུ་གཤེགས་པ་ན་བླ་བྲང་རྒྱལ་མཚན་མཐོན་པོ་ནས་བསྐུལ་ཏེ་དམ་པ་འདི་པ་རྒོད་ཚང་བླ་མར་འབྱོན་དགོས་བྱུང༌། དེ་ནས་རྟ་ཕུག་དང་རྒོད་ཚང་གཉིས་ཀ་བསྐྱངས་ཏེ་རེས་རྟ་ཕུག་ཏུ་ཕེབས་ནས་དེར་གནས་པའི་རི་ཁྲོད་པ་རྣམས་དང་ཕྱོགས་འདུས་ཀྱི་དད་ལྡན་མང་པོར་ལམ་རིམ་གྱི་ཁྲིད་དང༌། དགའ་ལྡན་ཕྱག་རྒྱ་ཆེན་པོའི་ཁྲིད་དང༌། བློ་སྦྱོང་གི་ཁྲིད་དང༌། གཅོད་ཀྱི་ཁྲིད་དང༌།ནཱ་རོ་ཆོས་དྲུག་གི་ཁྲིད་དང༌། གཞན་ཡང་དབང་ལུང་མན་ངག་རྒྱ་ཆེར་གནང༌། རེས་རྒོད་ཚང་དུ་ཕེབས་ཏེ་དབང་ལུང་མན་ངག་རྒྱ་ཆེར་གནང་སྟེ་རྗེ་སྒྲུབ་ཁང་པས་དམ་པ་འདི་ལ་ལམ་ཁྲིད་སོགས་གསན་པ་ནི་རྒོད་ཚང་ཡིན་ལ་ལྕང་སྐྱ་ཞབས་དྲུང་ངག་དབང་བློ་བཟང་ཆོས་ལྡན་དང༌། བླ་མ་སྨན་ཁང་པ་སོགས་ཀྱིས་དམ་པ་འདི་ལ་ཆོས་གསན་པ་ནི་རྟ་ཕུག་ཡིན་ནོ། །དེ་ནས་པཎ་ཆེན་བློ་བཟང་ཆོས་ཀྱི་རྒྱལ་མཚན་ཞིང་གཤེགས་ནས་པཎ་ཆེན་མཆོག་གི་སྤྲུལ་པའི་སྐུ་རྗེ་བཙུན་བློ་བཟང་ཡེ་ཤེས་བཀྲ་ཤིས་ལྷུན་པོར་ཕེབས་ནས་ཡང་ཡང་མཇལ་བར་བྱིན་ཞིང༌། རྗེ་བཙུན་བློ་བཟང་ཡེ་ཤེས་ཀྱིས་དམ་པ་འདི་ལ་ནམ་མཁའ་སྒོ་འབྱེད་ཀྱི་དབང་དང༌། གཅོད་ཀྱི་ཁྲིད་དང༌། འཇམ་དབྱངས་ཆོས་སྐོར་སོགས་ཆོས་བཀའ་མང་དུ་གསན་ནོ། །དེ་ནས་དམ་པ་འདིའི་འཕྲིན་ལས་ཆེས་ཆེར་རྒྱས་པ་ན་དབུས་གཙང་ཁམས་གསུམ་ནས་ཆོས་དོན་གཉེར་བ་མང་དུ་འདུས་ཤིང་རང་རང་གི་ཁམས་དང་བསམ་པ་དང་མཐུན་པར་ཆོས་སྟོན་པར་མཛད་ཅིང༌། གཙོ་བོར་ནི་བྱང་ཆུབ་ལམ་གྱི་རིམ་པའི་ཁྲིད་རྩལ་དུ་འདོན་པར་མཛད། དེའི་ཡན་ལག་ཏུ་བློ་སྦྱོང་གི་ཁྲིད་དང༌། གཅོད་ཀྱི་ཁྲིད་རྣམས་མཛད་ཅིང༌།གདུལ་བྱ་དབང་པོ་རབ་ཏུ་གྱུར་པ་ལམ་ཐུན་མོང་བ་ལ་མྱོང་བ་ཐོན་པ་འགའ་ལ་སྔགས་ཀྱི་སྐྱེད་རྫོགས་རྣམས་སྟོན་པར་མཛད་ཅིང༌། ལྷག་པར་དམ་པ་འདི་ཉིད་ནཱ་རོ་ཆོས་དྲུག་ལ་མངའ་བརྙེས་པས་སྔོན་འགྲོའི་འཁྲུལ་འཁོར་རྣམས་ཀྱང་ཞིབ་ཏུ་སྟོན་པར་མཛད། དམ་པ་འདི་ཉིད་ནས་བརྒྱུད་པའི་ནཱ་རོ་ཆོས་དྲུག་གི་ཁྲིད་རྒྱུན་ནི་དེང་སང་དར་ཆ་ཆེ་བར་སྣང་ངོ༌། །དམ་པ་འདིས་བསྟན་པའི་དོན་དུ་བྱང་ཆུབ་ལམ་གྱི་རིམ་པའི་སྔོན་འགྲོའི་ཆོས་སྐོར་དང༌། ཉམས་ལེན་གྱི་གནད་ལས་བརྩམས་པའི་གསུང་མགུར་མང་དུ་སྣང་ཞིང༌། ལྷག་པར་རང་རྒྱུད་ལ་བསྐུལ་མ་འདེབས་པའི་མགུར་མ་མཛད་པ་ནི་འདི་ལྟར།ཕ་བླ་མ་རྣམས་དང་ཡི་དམ་ལྷ། །སྐྱབས་བསླུ་བ་མེད་པ་དཀོན་མཆོག་གསུམ།།སྙིང་རུས་པའི་གཏིང་ནས་གསོལ་བ་འདེབས། །བདག་སྐྱེ་རྒ་ན་འཆིའི་འཇིགས་ལས་སྐྱོབས། །ལར་ལས་དང་ཉོན་མོངས་སྟོབས་ཤུགས་ཀྱིས། །དབང་མེད་དུ་སྲིད་པར་ཡང་ཡང་འཁྱམས། །དུས་ད་ལྟ་ཐར་ལམ་མ་བསྒྲུབས་ན། །རྟེན་དལ་འབྱོར་ཐོབ་པའི་དོན་པོ་ཅི། ། ལྷ་ཚངས་དབང་བརྒྱ་བྱིན་བྱ་བ་ཡང༌། །སྔོན་བསགས་པའི་འབྲས་བུ་སྤྱད་སྤྱད་ནས། །ཡང་འཁོར་བར་ཡང་བྲན་ཉིད་དུ་འགྱུར། ། གནས་མཐོ་རིས་ན་ཡང་བདེ་སྐབས་མེད། །སྤྱིར་ཡིད་བརྟན་མི་རུང་འཁོར་བའི་ཆོས། །ཚུལ་འདི་ལ་མ་བརྟགས་མ་བསམ་པས། །དྲི་ངན་པའི་ཁྲོད་ཀྱི་སྦྲང་བུ་བཞིན། །ཆོས་བདུད་རྩི་མྱོང་བ་དཀའ་མོར་གདའ། །སྒོམ་ཕྱི་རུ་མི་གསལ་ནང་དུ་གསལ། །དཔེ་བཀླགས་པས་མི་གོ་བསམས་པས་གོ། །རྗེ་བླ་མའི་བྱིན་རླབས་སེམས་ལ་འཇུག །རྒྱུད་སྨིན་ཅིང་གྲོལ་བར་བྱིན་གྱིས་རློབས། །བློ་བན་བུན་སྤྲིན་པ་མ་དྭངས་ན། །སེམས་གསལ་སྟོང་གི་ཉི་མ་མི་མངོན་པས། །ཡུལ་ཡུལ་ཅན་རྣམ་རྟོག་སྒོ་བཀག་ནས། །སྐབས་གང་ཡིན་གདམས་ངག་མ་བརྗེད་དགོས། །དེར་དྲན་པའི་འཛིན་སྟངས་ཤུགས་བསྐྱེད་ལ། །གྲོགས་ཤེས་བཞིན་ཕྲ་མོས་བྱ་ར་གྱིས། །དགྲ་བྱིང་རྒོད་བྱུང་ན་དེའི་གཉེན་པོར། ། འདུ་བྱེད་པ་སྒོམ་གྱི་འགོ་འདྲེན་ཡིན། །རྟེན་བཅས་པ་དམ་པོའི་ཚུལ་ཁྲིམས་དང༌། ། 6/7 མདུན་ངོས། 上一页 4 5 6 7 下一页 尾页 |
