| དེ་ནས་སྔར་ལྟར་རི་ཁྲོད་དབེན་པ་དེ་རང་དུ་སྒྲུབ་པ་ལ་བཞུགས་ཏེ་རྩམ་པ་རླུང་འཛིན་ཙམ་རེ་ལས་མེད་ཀྱང་ཐུགས་རིག་ཤིན་ཏུ་དྭངས་ཤིང་དགེ་སྦྱོར་འཕེལ་བ་བྱུང༌། སྐབས་འགར་རྩམ་པ་རླུང་འཛིན་ཙམ་ཡང་མེད་པར་རྡེའུའི་བཅུད་ལེན་ལ་བརྟེན་ཏེ་དཀའ་ཐུབ་དྲག་པོའི་སྒོ་ནས་སྒྲུབ་པ་སྙིང་པོར་མཛད། སྐབས་ཤིག་རྩམ་པ་འབུལ་མི་ཕྲན་བུ་ཞིག་བྱུང་སྟེ་རྩམ་པ་རླུང་འཛིན་ཙམ་རེ་གསོལ་ཞིང་ཡོད་པ་ལ་གཙང་སོག་འཁྲུགས་པའི་དམག་ཟིངས་ཀྱིས་གཞིས་ཀ་རྩེའི་ཆུ་ལྷོ་བྱང་ཐམས་ཅད་དུ་སྐྱེ་འགྲོ་རྣམས་སྡུག་བསྔལ་གྱིས་ཉམ་ཐག་ཅིང་མུ་གེ་ཤིན་ཏུ་ཆེ་བ་ཞིག་བྱུང་བས། ནུབ་གཅིག་ཇག་རྐུན་པ་མི་བཞི་འདི་པའི་སྒྲུབ་ཕུག་ཏུ་སླེབ།ཐོག་མར་འདི་པ་ཟིན་ནས་སྙིང་གར་གྲི་བཙུགས་ཏེ་བསྡིགས་མོ་བྱས། དེ་ལ་འདི་པས་ཁོང་ཁྲོ་གང་ཡང་མ་མཛད་པར་ཁོང་རང་ཚོ་གང་བྱེད་དུ་བཞག་པ་ན་ཇག་རྐུན་པ་དེ་རྣམས་ཀྱི་ནང་ནས་གཅིག་གིས་འདི་པ་མནན། གཞན་རྣམས་ཀྱིས་མེ་སྦར་ཏེ་ཆས་དངོས་གཡེང་པ་ན་འདི་པ་ལ་ཆས་དངོས་གང་ཡང་མེད་པས་ཇག་པ་དེ་རྣམས་ཀྱིས་དགེ་སློང་གི་རྩམ་པ་ག་ན་ཡོད་ཟེར། དེ་ལ་དམ་པ་འདི་པས་རྩམ་པ་ཉུང་ཟད་གཅིག་ཡོད་པ་ཤིང་དེའི་གསེབ་ན་ཡོད་གསུངས། ཁོང་ཚོས་ཡིད་མ་ཆེས་པར་འདི་པ་འཁྱིག་རྩིས་བྱས་པ་ལ་འཁྱིག་པའི་ཐག་པ་མ་རྙེད་པ་ན་འདི་པས་ཕྱིའི་ཡོལ་བ་དེ་ལ་ཐག་པ་ཡོད་གསུངས་པས་རྐུན་མ་ཚོས་ཕྱིའི་ཡོལ་བ་དེ་ཤེད་ཀྱིས་འཐེན་པ་ན་ཐག་པ་གར་སོང་མ་བྱུང་བར་ཡོལ་བ་ས་ལ་བབས། དེ་ནས་དམ་པ་འདི་པས་ཁྱེད་རང་ཚོ་ཅིས་ཀྱང་འཁྱིག་འདོད་ན་སྔས་ཀྱི་འོག་ན་སྐེ་རགས་ཡོད་གསུངས་པས་རྐུན་མ་ཚོས་སྐེ་རགས་བླངས་ཏེ་འཁྱིག་རྩིས་བྱས་པ་ན་དམ་པ་འདིས་ཁྱེད་ཚོ་རང་ཡིད་མི་ཆེས་པ་བྱེད་མི་དགོས། ངས་གང་ཡང་བྱས་མི་ཡོང་གསུངས་པ་ན་རྐུན་མ་ཚོས་ང་ཚོ་ཡིད་མི་ཆེས་པ་འདུག་པས་ཅུང་ཟད་ཅིག་འཁྱིག་དགོས་ཟེར་ནས་དམ་པ་འདི་པ་གཅེར་བུར་བཏོན་ནས་ཕྱག་གཉིས་བཀྱིགས་ཏེ་བཞག སྒྲུབ་ཁང་དེ་ན་ཡོད་པའི་ཤིང་གི་ཚལ་བུ་ཡན་ཆད་ཁྱེར་བའི་གྲབས་བྱས།དེ་ནས་དམ་པ་འདི་པས་ད་ཁྱེད་རང་རྣམས་ཐུག་པ་སྐོལ་ལ་ཐུངས་གསུངས་པས་ཐུག་པ་སྐོལ་ལོང་མི་འདུག་ཟེར། དེ་ནས་དམ་པ་འདི་པས་ངའི་འབྲལ་སྤང་གི་སྐུ་འདྲ་དེ་དང་ཆོས་གོས་དེ་ཞོག ཁྱེད་ཚོ་ལ་ཕན་གང་ཡང་མི་ཐོགས། །གཞན་མ་གང་ཡོད་ཁྱེར་གསུངས་པས་རྐུན་མ་དེ་ཚོས་དགེ་སློང་གིས་ཆོས་གོས་དང་སྐུ་འདྲ་བཞག་ཡོད་དོ། ། གླེགས་བམ་འདིའི་ནང་ན་ངེད་ཚོ་ལ་ངན་སྔགས་བྱེད་རྒྱུ་འདྲ་ཡོད་ཤས་ཆེ་བས་ཁྱེར་རྒྱུ་ཡིན། ངེད་ཚོས་མི་ཟས་མ་མྱོང་བ་ཟླ་བ་གཉིས་སོང༌། སྲོག་བློས་མ་ཐོངས་པར་འདི་འདྲ་བྱེད་དགོས་བྱུང༌། དགེ་སློང་གིས་ངེད་ཚོ་ལ་ངན་སྔགས་མ་བྱེད་ཅིག་ཟེར་ནས་སོང༌། དེ་ནས་དམ་པ་འདི་པས་སྤྱིར་འཁོར་བའི་ཆོས་ཉིད་དང༌། ལྷག་པར་སྐྱེ་བོ་ཉམ་ཐག་དེ་ཚོ་གཟིགས་པས་ཁོང་ཁྲོ་མི་སྐྱེ་བར་མ་ཟད་ཐུགས་སྐྱོ་ལ་ཉམས་དགའ་བ་ཞིག་བྱུང་ནས་ཇག་རྐུན་དེ་ཚོ་ལ་དམིགས་ནས་སྤྱོད་འཇུག་སྨོན་ལམ་ཞིག་འདོན་པར་མཛད། དེ་ནས་མཚན་མོ་དེ་ན་བཟའ་གཞན་གང་ཡང་མེད་པར་ཆོས་གོས་དེ་སྟོད་ལ་བཀབ། སྟན་དེ་སྨད་ངོས་ལ་བཀབ་ནས་གཟིམས་པས་མནལ་ཤིན་ཏུ་སྐྱིད་པ་ཞིག་བྱུང༌། ནམ་ལངས་ནས་གཟིགས་པས་ཡོལ་བའི་ཐག་པ་མིས་འགྲོལ་ཐུབ་པ་མེད་ཀྱང་རི་གཤམ་ན་མར་སླེབ་ནས་བསྡད་འདུག་པ་གཟིགས་པས་ཆོས་སྲུང་ངམ་དཀར་ཕྱོགས་ལ་དགའ་བའི་ལྷ་ཞིག་གིས་འཕངས་བ་ཡིན་སྙམ་པ་ཐུགས་ལ་ཤར། དེ་ནས་དཀའ་ཐུབ་དེ་ཁའི་རྒྱུན་ལ་བཞུགས་པས་རེ་ཤིག་ནས་དྲུང་པ་རྒྱལ་ཚབ་པ་ལ་པཎ་ཆེན་ཐམས་ཅད་མཁྱེན་པས་བཀའ་ཕེབས་ནས་དྲུང་པ་ཁོང་དེང་སང་སོ་སོད་པོ་ཨེ་ཡོད་ན། དེང་སང་རི་ཁྲོད་པས་རི་ཐུབ་ཀྱང༌། རིས་རི་ཁྲོད་པ་མི་ཐུབ་བྱ་བའི་སྐབས་ཡིན་པས་ཁྱེད་རང་གཉིས་ཀ་ལོག་ཤོག བཙན་ས་ཞིག་ལ་འགྲོ་བ་དགའ་གསུང་བའི་བཀའ་ཕེབས། དེ་ནས་དྲུང་པ་རྒྱལ་ཚབ་པས་ད་ངེད་རང་གཉིས་ཀ་བླ་མ་མཇལ་བར་འགྲོ་གསུངས་ནས། གཉིས་ཀས་བཀྲ་ཤིས་ལྷུན་པོར་ཕེབས་ཏེ་པཎ་ཆེན་ཐམས་ཅད་མཁྱེན་པ་མཇལ་བར་ཕེབས་པས་པཎ་ཆེན་ཐམས་ཅད་མཁྱེན་པ་ཆེན་པོས་དམ་པ་འདིའི་དབུ་ཕྱག་གིས་མནན་ནས་ད་ལམ་འཁྱིག་ཐག་རྡོ་འདྲ་བ་ཞིག་ཨེ་བྱུང་གསུང༌། ལན་ཞུ་མ་ནུས་པར་ལ་ལ་ཞུས་པས།དེ་དུས་དྲེད་པོ་ཨེ་བྱུང་གསུང༌། དྲེད་པོ་རང་མ་བྱུང་ཞུས་པས། འོ་ན་ག་འདྲ་བྱུང༌།ཁོང་ཁྲོ་སྐྱེས་བྱུང་ངམ་གསུང༌། མ་བྱུང་ལགས་ཞུས་པས། འོ་ཡགས། དེ་རྣམས་ལ་སྨོན་ལམ་བཟང་པོ་བཏབ་སྙིང་རྗེ་སྒོམ་དགོས་གསུང༌། དེ་ནས་དྲུང་པ་གཉིས་ཀ་པཎ་ཆེན་ཐམས་ཅད་མཁྱེན་པའི་བཀས་རྒོད་ཚང་ལ་ཕེབས། དེ་དུས་རྒོད་ཚང་སྒྲུབ་སྡེ་མ་ཆགས་པའི་དུས་ཡིན་པས་དྲུང་པ་རྣམ་གཉིས་དང་གཞན་ཁ་ཤས་བཅས་སྒྲུབ་པ་ལ་བཞུགས། དེ་ནས་དམ་པ་འདི་པས་དབེན་དགོན་ལ་ཕེབས་ཏེ་གནས་དེར་པཎ་ཆེན་ཐམས་ཅད་མཁྱེན་པས་བཀའ་གནང་བའི་མཐུས་དབེན་དགོན་པ་རྣམས་ཀྱིས་མཐུན་རྐྱེན་ཕུལ་ཏེ་མཐུན་རྐྱེན་ཚང་བའི་སྒོ་ནས་སྒྲུབ་པ་རྩེ་གཅིག་ཏུ་མཛད་པས་བྱང་ཆུབ་ལམ་གྱི་རིམ་པ་ལ་མྱོང་བ་བོགས་ཆེ་པར་ཐོན། དེ་སྐབས་ནས་བཟུང་སྟེ་ཉམས་མགུར་ཡང་མང་དུ་མཛད། དེ་ནས་པཎ་ཆེན་ཐམས་ཅད་མཁྱེན་པ་ཆེན་པོས་རྒོད་ཚང་སྒྲུབ་སྡེ་གསར་འཛུགས་མཛད་དེ་དྲུང་པ་རྒྱལ་ཚབ་པ་བླ་མར་བསྐོ་བར་མཛད། དྲུང་པ་འདི་པས་ནི་གནས་ངེས་མེད་མཛད་དེ་བྱང་ཆུབ་ལམ་རིམ་གྱི་ཉམས་ལེན་ལ་ཆིག་བསྒྲིལ་མཛད། དེ་ནས་པཎ་ཆེན་ཐམས་ཅད་མཁྱེན་པ་ཆེན་པོ་དབེན་དགོན་དུ་ཕེབས་པ་ཞིག་ལ་མཇལ་ཁར་བྱོན་པས་ཞལ་ནས་དབུས་ཕྱོགས་ཀྱི་བླ་མ་བསྟན་པར་ཕན་རེ་ཆེ་བ་ཞིག་ལ་འཇིགས་བྱེད་ཀྱི་དབང་ཞིག་བྱེད་དགོས་ཡོད་པས་དྲུང་པ་རང་འདོད་ན་གནངས་ཉིན་ཤོག་གསུངས་ཐུགས་རྗེ་ཆེ་ཞུས་ནས་ཞུར་ཕེབས་པས་ཁོང་བཅུ་གསུམ་ལ་འཇིགས་བྱེད་ཀྱི་དབང་ཤིན་ཏུ་རྒྱས་པ་ཞིག་གནང༌། 4/7 མདུན་ངོས། 上一页 2 3 4 5 6 7 下一页 尾页 |
