| འདི་དྲུང་པའི་ཡིན་ཞེས་ཞལ་བའི་སྟེང་དུ་དྲིལ་བ་ན་དྲུང་པ་འདི་པའི་ཤོ་མིག་ཆུང་བ་བྱུང་བས་པཎ་ཆེན་ཐམས་ཅད་མཁྱེན་པ་ཐུགས་མཉེས་ནས་འདིར་སྡོད་པ་དགའ་བ་འདུག དབང་ལུང་རྗེས་གནང་སོགས་ཆོས་གང་འདུག་ཀྱང་ཤོག་གསུངས།འདི་པས་ཀྱང་ཐུགས་རྗེ་ཆེ་ཞེས་ཞུས། དེ་ནས་ཆོས་གྲྭ་འགྲིམས་ཏེ་ཐོག་མར་རྣམ་འགྲེལ་ལ་སློབ་གཉེར་མཛད་ཅིང་པཎ་ཆེན་ཐམས་ཅད་མཁྱེན་པ་ཆེན་པོས་ཆོས་གང་གནང་ཡང་བླ་བྲང་ནས་བརྡ་གཏོང་བར་མཛད་པས་མདོ་སྔགས་ཀྱི་ཆོས་བཀའ་མཐའ་ཡས་པ་རིམ་པས་ཐོབ།བར་སྐབས་ཤིག་ཆུ་མ་འཕྲོད་པས་བད་ཀན་གྱིས་བསྙུན་ཚབས་ཆེ་ཙམ་ཞིག་བྱུང་བ་སྨན་པ་རྣམས་ཀྱིས་ནད་འདི་ལས་མི་ཐར་ཞེས་བློས་བཏང་པ་ན། པཎ་ཆེན་ཐམས་ཅད་མཁྱེན་པ་ཆེན་པོར་སྐྱབས་འཇུག་ཞུར་ཕེབས་པས་པཎ་ཆེན་ཐམས་ཅད་མཁྱེན་པ་ཆེན་པོས་སྒྲོལ་ལྗང་གི་མངོན་རྟོགས་ཤིག་གི་ལྗགས་ལུང་གནང་ནས་སྔོན་གྱི་ལས་འབྲེལ་ཞིག་འདུག་པས་སྒྲོལ་མ་འདི་ལ་བསྙེན་པ་ཞིག་གྱིས་དང་དགའ་མོ་ཡོང་ཞེས་བཀའ་ཕེབས། དེ་འཕྲལ་དུ་མཚམས་བཅད་དེ་བསྙེན་པ་མཛད་པས་རྗེ་བཙུན་མ་སྒྲོལ་མའི་ཞལ་གཟིགས་བསྙུན་གཞི་ཡང་དྭངས། དེ་ནས་བཟུང་སྟེ་སྐུ་ཚེ་ཧྲིལ་པོར་ཉིན་རེར་སྒྲོལ་བསྟོད་གང་འགྲུབ་རེ་དང༌། ལེགས་བྲིས་མ་ཚར་རེ་འཆག་མེད་ཞལ་འདོན་མཛད། དེ་ནས་བར་སྐབས་ཤིག་གནས་བསྐོར་ཞིག་མཛད། དེ་ནས་བཀྲ་ཤིས་ལྷུན་པོར་ཕེབས་ནས་སྔར་རྒྱུན་བཞིན་ཐུགས་གཉེར་ལ་བརྩོན་པར་མཛད་པས་འབྲུམ་བུའི་ནད་ཀྱིས་ཕྱོགས་ཐམས་ཅད་ཁྱབ་ཅིང་ནད་བྱུང་ཚད་ཤི་བ་ཞིག་བྱུང་བ་ན་མངའ་རིས་ཕྱོགས་ཀྱི་སློབ་གཉེར་བ་ཕལ་ཆེར་རང་ཡུལ་ལ་བྲོས། དམ་པ་འདི་པས་པཎ་ཆེན་ཐམས་ཅད་མཁྱེན་པ་ཆེན་པོའི་སྐུ་མདུན་དུ་ཕྱིན་ནས་རང་ཡུལ་ལ་བྲོས་པ་ལེགས་སམ་ཇི་ལྟར་ལེགས་ཞེས་ཞུས་པ་ན་ད་ལམ་དགའ་མོ་ཡོང་འགྲོ་གསུང་ཞིང་སྲན་ནག་བདུན་ལ་ལྗགས་སྔགས་བཏབ་སྟེ་དར་དམར་ཞིག་ལ་དྲིལ་ནས་རྒྱས་བཏབ་སྟེ་འདི་སྐེ་ལ་ཐོགས། ཞག་བདུན་སོང་བ་ན་ཡང་ལེན་དུ་ཤོག་གསར་པ་སྟེར་པ་ཡིན་རྙིང་པའི་སྲན་མ་རྣམས་ཁྱུར་མིད་གྱིས་ཆོས་གྲྭ་མ་ཆག་པར་རྒྱུག་གསུངས། བཀའ་བཞིན་བྱས་པས་འབྲུམ་བུའི་ནད་མ་བྱུང་ཞིང་སློབ་གཉེར་འཕེལ་བ་བྱུང་བས་བླ་མ་ལ་སངས་རྒྱས་དངོས་ཀྱི་འདུ་ཤེས་བཅོས་མ་མིན་པ་འཁྲུངས། དེ་ནས་རེ་ཞིག་དྲུང་པ་རྒྱལ་ཚབ་པ་དང་མཉམ་དུ་དབེན་པའི་གནས་མང་པོར་ཐུགས་དམ་གང་འཕེལ་མཛད། ལྷག་པར་རྟ་ནག་ལ་ཁར་བཞུགས་རིང་རྗེ་ཞལ་སྔ་ནས་སྨན་བླ་བ་ལ་ཁ་ཆོས་སྡེའི་བླ་མར་ཕེབས་པ་དང་ཐུག་པས་མཇལ་བར་ཕེབས། དེའི་ཚེ་བླ་མ་དེའི་ཞལ་ནས་ཁྱེད་རི་ཁྲོད་པ་ཚོས་བཀའ་དྲིན་གསོལ་འདེབས་མ་འཛིན་དགོས་གསུངས། བླ་མ་དགོང་ཇའི་ཚོགས་ལ་ཕེབས་པ་དང་མཉམ་དུ་འདི་པས་བཀའ་དྲིན་གསོལ་འདེབས་མ་བཟུང་བས་བླ་མ་དགོང་ཚོགས་ནས་ཚུར་ཕེབས་དུས་ཟིན་ཐུབ་པ་བྱུང་བླ་མ་ལ་ཞུས་པས་བླ་མ་ཧ་ལས་ཏེ་དེ་འདྲ་མི་བདེན་རིབ་ཙམ་ཞིག་ལ་དེ་ཙམ་ཟིན་མི་ཐུབ་གསུང༌། འདི་པས་ཟིན་ནས་འཁྱོར་ཙམ་ཡོད་ཞུས་ནས་བསྐྱར་བས་བླ་མ་དེས་ངོ་མཚར་ཡ་མཚན་དཔེ་མེད་དུ་འཛིན་པར་མཛད་དེ།པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་མཛད་པའི་བཀའ་དྲིན་གསོལ་འདེབས་མ་འདི་ལ་ཤོག་བུ་བཞི་ཙམ་ཡོད་པ་དགོང་ཚོགས་རེའི་ཡུན་ལ་ལྗགས་འཛིན་ཐུབ་པ་འདི་ནི་མཁྱེན་རབ་རྨད་དུ་བྱུང་བ་ཞིག་གོ། །དེ་ནས་ནུབ་གཅིག་མནལ་ལམ་དུ་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་ཐོག་མའི་བློ་སྦྱོང་གི་ལྗགས་ལུང་ཡོངས་རྫོགས་གནང་བ་གསལ་བར་རྨིས་པ་ཞིག་བྱུང༌།དེ་ནས་བཀྲ་ཤིས་ལྷུན་པོར་ཕེབས་ཏེ་པཎ་ཆེན་ཐམས་ཅད་མཁྱེན་པ་མཇལ་བ་ན་དྲུང་པས་ཐོག་མའི་བློ་སྦྱོང་གི་ལུང་ཐོབ་བམ་གསུང༌། སྔར་མ་ཐོབ་ཞུས་པ་ན་འོ་ན་ད་ལྟ་ལུང་ཞིག་བྱེད་དགོས་ཡོད་པས་ཤོག རི་ཁྲོད་པ་ལ་འདི་གལ་ཆེ་གྲུབ་ཆེན་གནས་བཅུ་པ་འདི་ཡང་ཐོག་མའི་བློ་སྦྱོང་ཐོས་པའི་རྐྱེན་གྱིས་བློ་ཆོས་ལ་འཁུལ་ཏེ་རྟོགས་པ་མཐོན་པོར་སོང་བ་ཡིན་གསུངས་ནས་དགྱེས་བཞིན་དུ་ལུང་གནང༌། དེ་ནས་དགུང་ལོ་སུམ་ཅུ་སོ་གཉིས་སུ་ཕེབས་པ་ན་པཎ་ཆེན་ཐམས་ཅད་མཁྱེན་པ་ཆེན་པོར་བསྙེན་རྫོགས་ཀྱི་སྡོམ་པ་ཞུས་འདུལ་བའི་བསླབ་བྱ་རྣམས་ཀྱང་རྒྱས་པར་སློབ་པར་མཛད། པཎ་ཆེན་ཐམས་ཅད་མཁྱེན་པ་ཆེན་པོ་ལ་ཐོག་མ་མཇལ་བ་ནས་བཟུང་ཆོས་བཀའ་མཐའ་ཡས་པ་གསན་ཞིང་ཚོགས་ཆེན་དུ་གནང་བའི་གྲས་ལ། སྒྲུབ་ཐབས་བརྒྱ་རྩའི་ནང་གི་ལྷ་རྣམས་ཀྱི་རྗེས་གནང་དང་ལྗགས་ལུང༌། ལྷོ་བྲག་གྲུབ་ཆེན་གྱི་བཀའ་འབུམ། འཇམ་དབྱངས་ཆོས་སྐོར། ཇོ་བོའི་ཆོས་ཆུང་བརྒྱ་རྩ།རྗེ་དགེ་འདུན་རྒྱ་མཚོའི་གསུང་འབུམ་གྱི་སྟོད། བསླབ་བཏུས། བྱང་ཆུབ་གཞུང་ལམ།སྦྱིན་སྲེག་དངོས་གྲུབ་རྒྱ་མཚོ། མཁས་གྲུབ་རིན་པོ་ཆེས་མཛད་པའི་འཇིགས་བྱེད་ཀྱི་བསྐྱེད་རིམ།སྟོན་པའི་རྣམ་ཐར་ཆེན་མོ། དགའ་ལྡན་ཆོས་འབྱུང༌། གཙུག་ཏོར་གདུགས་དཀར་གྱི་མདོ་སོགས་ཀྱི་ལུང༌། སྒྲོལ་མ་ཉེར་གཅིག་གི་རྗེས་གནང༌། ཕག་དཀར་ཤེས་རབ་གསལ་བྱེད་ཀྱི་རྗེས་གནང༌། 2/7 མདུན་ངོས། 上一页 1 2 3 4 5 6 下一页 尾页 |
