| བསླབ་གསུམ་ལྡན་པའི་དགེ་འདུན་སྟོང་ཕྲག་མང་པོ་དང་ལྷན་ཅིག་ཏུ་ཇི་སྲིད་བྱམས་མགོན་དབུས་འགྱུར་ཚུལ་དུ་མ་བྱོན་བར་དུ་གནས་འདིར་རྒྱལ་བསྟན་མི་ཉམས་ཤིང་གོང་ནས་གོང་དུ་འཕེལ་བའི་བདེན་ཚིག་བརྗོད་ཅིང་རབ་ཏུ་གནས་པ་རྒྱས་པར་མཛད་དོ། །དེ་ལྟར་རྗེ་འདིས་རྒྱལ་བ་སྲས་བཅས་ཐམས་ཅད་ཀྱི་མཛད་པའི་ཁུར་བདག་གིར་བཞེས་ཏེ་ཐོས་བསམ་སྒོམ་གསུམ་འཆད་རྩོད་རྩོམ་གསུམ་གྱི་སྒོ་ནས་བསྟན་པའི་བྱ་བ་རྒྱ་ཆེར་མཛད་ཅིང་ཕྱི་རབས་ཀྱི་གདུལ་བྱ་རྣམས་ལ་མདོ་སྔགས་ཀྱི་ཆོས་ལ་བསླབ་ཚུལ་འདི་ལྟར་བྱ་དགོས་སོ་ཞེས་འདོམས་ཕྱིར་ལེགས་བཤད་ཀྱི་རྩོམ་པའང་མང་དུ་མཛད་དེ། འདི་ལྟར་གསུང་རབ་དགོངས་འགྲེལ་དང་བཅས་པའི་དོན་ཐམས་ཅད་གང་ཟག་གཅིག་གི་ཉམས་ལེན་གྱི་རིམ་པར་བསྒྲིགས་པ་བྱང་ཆུབ་ལམ་གྱི་རིམ་པའི་ཁྲིད་ཡིག་གཞན་ཕན་བདུད་རྩིའི་བུམ་པ། བདེ་ལམ་མྱོང་ཁྲིད། རྗེ་བཙུན་བློ་བཟང་ཡེ་ཤེས་དཔལ་བཟང་པོའི་སྐུ་གསུང་ཐུགས་ཀྱི་མཛད་པ་མ་ལུས་པ་གསལ་བར་བྱེད་པའི་རྣམ་པར་ཐར་པ་འོད་དཀར་ཅན་གྱི་ཕྲེང་བའི་སྨད་ཆ། རྗེ་བཙུན་ངག་དབང་བྱམས་པ་རིན་པོ་ཆེའི་རྣམ་ཐར་དད་པའི་འདབ་བརྒྱ་བཞད་པར་བྱེད་པའི་ཉི་མ། རྗེ་བཙུན་ཐམས་ཅད་མཁྱེན་པ་བློ་བཟང་བསྐལ་བཟང་རྒྱ་མཚོའི་སྐུ་གདུང་ཡིད་བཞིན་གྱི་ནོར་བུ་སྙིང་པོར་བཞུགས་པའི་ལྷར་བཅས་སྐྱེ་དགུའི་མཆོད་སྡོང་ཆེན་པོའི་དཀར་ཆག་འོད་ཟེར་ཕྱོགས་བརྒྱར་འགྱེད་པའི་སྣང་བྱེད། རྗེ་བཙུན་རྡོ་རྗེ་འཆང་ཆེན་བློ་བཟང་བཟོད་པ་དཔལ་བཟང་པོའི་རྣམ་ཐར་ངོ་མཚར་དཔག་མེད། དམིགས་བརྩེ་མའི་ལས་ཚོགས་བཅུ་གཅིག་ནག་འགྲོས་སུ་བཀོད་པ། དེའི་དོན་བཤད་པ། དགའ་ལྡན་ལྷ་བརྒྱ་མའི་སྐབས་སུ་ཉེར་མཁོའི་ཁ་ཚར། རྗེ་བླ་མ་ཙོང་ཁ་པ་ཆེན་པོའི་བླ་མའི་རྣལ་འབྱོར་མཁས་གྲུབ་རྗེར་ཞལ་གཟིགས་དང་མཐུན་པ། འཕགས་པ་གནས་བརྟན་བཅུ་དྲུག་གི་རྣམ་ཐར། རྗེ་བཙུན་བློ་བཟང་བསྟན་པའི་དབང་ཕྱུག་འཇམ་དཔལ་རྒྱ་མཚོའི་བརྟན་བཞུགས་དང་རྗེ་རང་ཉིད་ཀྱི་བརྟན་བཞུགས་སོགས་བརྟན་བཞུགས་དང་འཁྲུངས་རབས་གསོལ་འདེབས་རྗེས་འཛིན་སྨོན་ལམ་གྱི་རིམ་པ་མང་པོ། མདོ་སྔགས་ཀྱི་གནད་རྣམས་ལ་དྲི་བ་ཞུས་པའི་དྲིས་ལན། འདོད་ལྷ་སྣ་ཚོགས་ཀྱི་བསྟོད་ཚོགས་གསོལ་འདེབས་མང་པོ། བསླབ་བྱ་སྤྱི་དང་དགོན་སྡེ་ཁག་གི་བཅའ་ཡིག་མང་པོ། རྟེན་གསར་བཞེངས་ཀྱི་དཀར་ཆག་དང་རྒྱབ་ཡིག་ཞལ་བྱང་སོགས། འདོད་ལྷ་སྣ་ཚོགས་ལ་བརྟེན་པའི་ལྟུང་བ་བཤགས་བསྡམ་བྱ་ཚུལ། ཆབ་ཤོག་གི་སྐོར་མང་པོ། དབེན་ས་ཆོས་ཀྱི་ཕོ་བྲང་གི་གནས་བསྟོད་སོགས་གནས་བསྟོད་མང་པོ།ལྷ་སྣ་ཚོགས་ཀྱི་སྒྲུབ་ཐབས་ཀྱི་མཇུག་ཏུ་བྱ་བའི་སྨོན་ལམ་ཤིས་བརྗོད། གྲུབ་ཆེན་དྲིལ་བུ་ལུགས་ཀྱི་ལུས་དཀྱིལ་གྱི་མངོན་རྟོགས་ངག་འདོན། བཅོམ་ལྡན་འདས་འཇམ་དཔལ་རྡོ་རྗེའི་བདག་མདུན་བུམ་གསུམ་སློབ་མ་སྟ་གོན་དང་བཅས་པ། རྟེན་གསུམ་རྣམས་ལ་སྙན་ཤལ་སྤྱན་གཟིགས་ན་བཟའ་བཅས་ཕུལ་བའི་འདོད་གསོལ་མང་པོ། བདེ་གསང་འཇིགས་གསུམ་སོགས་ལྷ་མང་པོ་ལ་བརྟེན་པའི་བླ་མའི་རྣལ་འབྱོར་མང་པོ། འཁོར་ལོ་སྡོམ་པ་ལྰུ་ཨི་པའི་ལུགས་ཀྱི་བདག་བསྐྱེད་བསྡུས་པ། བདེ་མཆོག འཁོར་ཆེན། དགའ་ལྡན་ལྷ་བརྒྱ་མ། དུས་འཁོར་བཅས་ཀྱི་བསྙེན་ཡིག བླ་མ་སངས་རྒྱས་བྱང་སེམས་ལ་བརྟེན་ལའི་འཕོ་བ་མང་པོ། སྤྱན་རས་གཟིགས་རྒྱལ་བ་རྒྱ་མཚོའི་སྒྲུབ་ཐབས་སོགས་ལྷག་པའི་ལྷ་མང་པོའི་སྒྲུབ་ཐབས་དུ་མ། མ་ཎི་རིལ་སྒྲུབ། བྲིས་འབུར་གྱི་སྐུ་སོགས་རྟེན་གསུམ་བཞེང་ཚུལ། ལྷ་སྣ་ཚོགས་ཀྱི་ལས་བཞིའི་སྦྱིན་སྲེག་གི་ཆོ་ག དཔལ་འཁོར་ལོ་སྡོམ་པའི་ཞི་བའི་སྦྱིན་སྲེག་དང་དྲག་པོའི་སྦྱིན་སྲེག་གི་ཁ་སྐོང༌། དཔལ་རྡོ་རྗེ་འཇིགས་བྱེད་ཀྱི་དབང་གི་སྦྱིན་སྲེག དཔལ་དུས་ཀྱི་འཁོར་ལོའི་ཞི་བའི་སྦྱིན་སྲེག རྡོར་དབྱིངས་ཀྱི་སྦྱིན་སྲེག སྒྲོལ་མའི་སྦྱིན་སྲེག འཇམ་དབྱངས་དཀར་པོའི་སྦྱིན་སྲེག ཡེ་ཤེས་མགོན་པོ་ཕྱག་དྲུག་པའི་ཞི་རྒྱས་ཀྱི་སྦྱིན་སྲེག ཆོས་སྐྱོང་དྲེགས་པ་ལྕམ་སྲིང་གི་སྦྱིན་སྲེག ཚེ་བདག་མགོན་པོ་ལ་བརྟེན་པའི་ཚེ་དབང་བྱ་ཚུལ། བཟང་སྤྱོད་ལ་བརྟེན་པའི་འཆི་བླུ། གསང་བ་འདུས་པ་སོགས་ཀྱི་ཚོགས་མཆོད། སྨྱུང་གནས་བླ་རྒྱུད་རྣམ་ཐར་ཕན་ཡོན་དང་བཅས་པ། བླ་རྒྱུད་གསོལ་འདེབས་ཀྱི་སྐོར། དཔལ་དུས་ཀྱི་འཁོར་ལོའི་སྐུ་གསུང་ཐུགས་ཡོངས་སུ་རྫོགས་པའི་སྒྲུབ་ཐབས་བདུད་རྩིའི་འབྱུང་གནས། དེའི་སྒྲུབ་ཐབས་རིན་པོ་ཆེའི་གཏེར་མཛོད།དཔལ་རྡོ་རྗེ་འཇིགས་བྱེད་ཀྱི་བསྐྱེད་རིམ། དེའི་བསྐྱེད་རིམ་ཚིགས་བཅད་མ། དེའི་རྫོགས་རིམ། ཡང་དེའི་ལམ་རིམ་གཉིས་ཀྱི་ཁྲིད་མདོར་བསྡུས། དེའི་སྒོ་ནས་རབ་གནས་བྱ་ཚུལ་མདོར་བསྡུས། དེ་ལ་བརྟེན་ནས་གཤིན་པོ་རྗེས་འཛིན། དེ་ལ་བརྟེན་ནས་དུག་ཞི་བར་བྱེད་ཐབས། འཇིགས་བྱེད་དམར་པོ་ཞལ་གཅིག་ཕྱག་གཉིས་པ་ལ་བརྟེན་པའི་དུག་དབང་བསྐུར་ཚུལ། དཔལ་འཁོར་ལོ་སྡོམ་པའི་དབང་དོན་ཟབ་གསང་གི་གནད་བསྡུས་པ། འཁོར་ལོ་སྡོམ་པ་དྲིལ་བུ་ལྷ་ལྔའི་སྒྲུབ་ཐབས་བླ་རྒྱུད་དང་བཅས་པ། དེའི་བུམ་བསྐྱེད་དང་མདུན་བསྐྱེད་དབང་ཆོག་དང་བཅས་པ། དགྱེས་རྡོར་ལྷ་དགུའི་སྒྲུབ་ཐབས་བདུད་རྩིའི་ཆུ་རྒྱུན། རྣམ་སྣང་མངོན་བྱང་གི་བདག་བསྐྱེད། དེའི་དཀྱིལ་ཆོག དེའི་དབང་ཆོག་སྨོན་ལམ་ཤིས་བརྗོད་དང་བཅས་པ། རྨ་བྱའི་རྒྱལ་པོ་གསེར་དུ་སྣང་བ་ལ་བརྟེན་ནས་དུག་ཞི་བར་བྱེད་ཚུལ། ལམ་རིམ་གཉིས་ཀྱི་གནད་རྣམས་རྡོ་རྗེའི་མགུར་དུ་བཞེས་པའི་དགོངས་དོན་འགྲེལ་བར་བྱེད་པ་གསང་ཆེན་ལམ་གྱི་སྒོ་འབྱེད། གཏོར་ཆེན་དྲུག་ཅུ་བའི་ཞལ་ཤེས། རྡོ་རྗེ་མཁའ་ལྡིང་ནག་པོ་ལ་བརྟེན་པའི་རང་གཞན་གྱི་སྡིག་སྒྲིབ་སྦྱོང་ཞིང་མི་གཙང་བ་བཀྲུ་ཚུལ། ཤམྦྷ་ལར་སྐྱེ་བའི་སྨོན་ཚིག་དང་དེའི་ཞིང་བཀོད་འདྲི་ཚུལ། ལྷ་མོ་དབྱངས་ཅན་མ་ལ་བསྟོད་པ། མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་སོགས་ཆོས་སྐྱོང་མང་པོ་ལ་མཆོད་གཏོར་འབུལ་ཚུལ་དང་སྒྲུབ་ཐབས་ལས་ཚོགས་ཀྱི་རིམ་པ་དུ་མ། གསང་སྔགས་རྒྱུད་པ་གྲྭ་ཚང་གི་གཏོར་བཟོའི་རིམ་པ། གཞི་བདག་གཏོར་མ་དང་བཀའ་བསྒོའི་རིམ་པ། གསུང་ཐོར་བུ་བ་སོགས་ལེགས་བཤད་མཐའ་ཡས་པ་མཛད་དོ། །དེ་ལྟར་རྗེ་འདིས་དབུས་གཙང་གི་ལྗོངས་སུ་སྐུ་ཚེ་འདིར་དངོས་སུ་འདུལ་བའི་སྣོད་རུང་གི་གདུལ་བྱ་མཐའ་དག་ལ་འཕྲིན་ལས་གང་མཛད་དགོས་པ་རྣམས་མཛད་ཟིན་ནས་སྔོན་སྟོན་པ་ཐུབ་པའི་དབང་པོས་དངོས་ཀྱི་གདུལ་བྱ་ཕལ་མོ་ཆེའི་དོན་མཛད་ཟིན་ནས་སྐུ་ཚེ་དེའི་གདུལ་བྱའི་ཐ་མ་ཀུན་ཏུ་རྒྱུ་རབ་བཟང་དང༌། 8/9 མདུན་ངོས། 上一页 6 7 8 9 下一页 尾页 |
