| གྲིབ་ཆོད་པ་སློབ་དཔོན་རིན་ཆེན་རྡོ་རྗེས་མཛད་དེ། བསྟན་པ་རིན་པོ་ཆེའི་སྒོར་ཞུགས་ནས་རབ་ཏུ་བྱུང་དགེ་ཚུལ་དུ་བསྒྲུབས་ཏེ་བཟང་པོ་དཔལ་ཞེས་མཚན་གསོལ་ཏོ། །དེའི་ཉིན་པར་སྔར་མེད་པའི་དྲི་ཞིམ་པོས་ཁྱབ་པ་དང༌། རོལ་མོའི་སྒྲ་སྙན་པ་གྲག་པ་དང༌། མེ་ཏོག་གི་ཆར་འབབ་པ་ལ་སོགས་པ་ཀུན་གྱིས་མཐུན་སྣང་དུ་གྲུབ་པ་བྱུང་ངོ༌། །དེ་ནས་རྒྱལ་སྲས་འདིས་མཁན་སློབ་ཀྱི་སྤྱན་སྔར་ཇི་ལྟར་ཁས་བླངས་པའི་བཅས་པ་རྣམས་སྲོག་ལས་ཀྱང་གཅེས་པར་བསྲུང་བར་མཛད་ཅིང་སྔོན་བྱོན་དམ་པའི་རྣམ་ཐར་བཟང་པོའི་རྗེས་སུ་ཞུགས་ཏེ་ཚེ་འདིའི་བྱ་བ་མཐའ་དག་དོར་ནས་རྒྱལ་བའི་བཀའ་དང་དགོངས་འགྲེལ་རྣམས་ཀྱི་ཚིག་འཛིན་པ་དང་དོན་སེམས་པ་ལ་བརྩོན་འགྲུས་ལྷོད་པ་མེད་པར་མཛད། རང་ཡུལ་གྱི་ནོར་ལོངས་སྤྱོད་སོགས་འཁོར་བའི་ཕུན་ཚོགས་གང་ལའང་མ་ཆགས་པར་རང་གི་ཁུ་བོ་རིན་ཆེན་བཀྲ་ཤིས་ཀྱིས་ཡི་གེ་བྲི་འདོན་བཙུན་པ་བྱེད་པ། བཤད་གསར་ལ་སོགས་པའི་གྲོགས་བྱས་པས་དྲིན་ཆེ་བར་དགོངས་ནས། ཞིང་ཁང་རྣམས་ཀྱང་ཨ་ཁུ་ལ་གནང་སྟེ་འདི་སྐད་དུ་ད་ཁྱེད་རང་དགེ་སྦྱོར་གྱིས།འཇིག་རྟེན་གྱི་བྱ་བ་ལ་སྙིང་པོ་མེད། ངའི་ཞིང་དང་ཉིད་རང་ལ་གང་ཡོད་རྣམས་ཀྱིས་མི་ཕོངས་ཙམ་ཡོངས་མཆི། གལ་ཏེ་མ་ངེས་ན་ངས་བསོད་སྙོམས་བྱས་ནས་སྐྱོང་བ་ཡིན་སེམས་ལས་མི་འཚལ་ཞེས་ཞལ་ཏ་མཛད། སངས་རྒྱས་ཀྱི་བསྟན་པ་བཤད་སྒྲུབ་གཉིས་ཀྱིས་འཛིན་པ་ལ། བཤད་ཉན་གྱིས་ལུང་གི་ཆོས་འཛིན། སྒོམ་སྒྲུབ་ཀྱིས་རྟོགས་པའི་ཆོས་འཛིན་པར་དགོངས་ནས་རྒྱལ་བའི་གསུང་རབ་ཀྱི་དགོངས་པ་ཤིང་རྟ་ཆེན་པོ་རྣམས་ཀྱིས་བཀྲལ་བའི་རིགས་པའི་དཀའ་གནས་རྣམས་ལ་སྦྱོང་བར་བཞེད་དེ་དགུང་ལོ་བཅོ་ལྔ་པའི་དུས་བོ་དོང་ཨེ་བསམ་གླིང་པའི་དགོན་ལག་ཡིན་པའི་སྟོབས་ཀྱིས་ཨེའི་ཆོས་གྲྭ་ཆེན་པོར་བྱོན་ཏེ། བླ་མ་ཀུན་རྒྱལ་བའི་དྲུང་དུ་དང་པོར་མངོན་པ་ཀུན་ལས་བཏུས་ལ་ནན་ཏན་མཛད།དེ་ཡང་དང་པོ་ནས་དུལ་བ་དང༌། ཞི་བ་དང༌། བཟོད་པ་དང༌། བྱམས་པའི་ངང་ཚུལ་དང་ལྡན་པས། གྲོགས་ཀྱི་སློབ་གཉེར་ལ་འགྲན་ཟླ་དང་ཕྲག་དོག་གི་དམིགས་རྐྱེན་དུ་མི་འགྱུར་བར་བྱ་བའི་ཕྱིར་གཞན་ལས་བློ་གྲོས་ཀྱི་ནུས་པ་ཆུང་ཞིང་དམན་པའི་ཚུལ་བཟུང་ཡང་སྐྱེ་བ་དཔག་ཏུ་མེད་པའི་གོང་རོལ་ནས་གོམས་པའི་ཕྱིར་གཞན་གྱིས་ལོ་མང་པོའི་བར་དུ་འབད་པ་བས་ཀྱང་མཁས་པར་གྱུར་ཏོ། །དེ་དུས་འཇམ་དབྱངས་རོང་པ་ཉི་མ་རྒྱལ་མཚན་གྱིས། མང་ཇའི་ཚོགས་གྲལ་དུ།ཉིད་བཙུན་ཆུང་བཟང་པོ་དཔལ་དང་བཅས་པའི་བློ་གསར་བ་རྣམས་ལ་ང་དྲི་བ་བྱ་རྒྱུ་ཡོད་དོ། །མངོན་པ་ནས། ཟང་ཟིང་མེད་པའི་ཚོར་བ་སྡུག་བསྔལ་བྱ་བ་ཅིག་བཤད་འདུག་སྟེ། ཟང་ཟིང་མེད་པའི་ཚོར་བ་ཡིན་ན། སྡུག་བསྔལ་ཡིན་པའི་དམ་བཅའ་བུད་ཟེར་ནས། འདི་ལ་ལན་ཐོབ་ཟེར་བ་ལ། གཞན་གྱིས་ནི་ལན་གང་ཡང་མ་བྱུང༌།དེ་ལྟ་བུ་འབྱུང་བར་གཞུང་རང་ནས་ཉན་ཐོས་དགྲ་བཅོམ་པ་འགའ་ཞིག་ལ་ཟང་ཟིང་ཉོན་མོངས་མེད་ཀྱང་ལས་ཀྱི་ནུས་པ་མཐོང་བ་ཡིན། ཞེས་སྡུག་བསྔལ་འབྱུང་བར་བཤད་ཡོད་དགོངས་ནས། དེ་ལུགས་ཀྱི་འགལ་སྤོང་གསུངས་པས། མཁས་པ་ཐམས་ཅད་ངོ་མཚར་བར་གྱུར་ཏེ། བླ་མ་ནམ་བཀྲ་བ་བྱ་བ་ན་རེ་ཉིད་ཐོགས་མེད་དངོས་སུ་འདུག ཐོགས་མེད་གཉིས་པ་ཡིན་གསུངས་ལ་མཆོད་ཡར་མཛོད་ཟེར་བས།མཆོད་ཡར་མཛད་ནས་ཐོགས་མེད་གཉིས་པ་ཡིན་གསུངས་པས། དུས་དེ་ནས་བོ་དོང་ཐོགས་མེད་ཅེས་མཚན་ཡོངས་སུ་གྲགས་སོ། །གཞན་ཡང་བྱམས་པའི་ཆོས་ལྔ། ས་སྡེ་ལྔ། སྡོམ་རྣམ་པ་གཉིས། པྲ་ཀ་ར་ཎ་སྡེ་བརྒྱད་རྣམས་ཀྱི་ཚིག་དོན་ལ་མཁས་པ་འཕགས་པ་ཐོགས་མེད་ལྟ་བུར་གྱུར། བྱང་ཆུབ་སེམས་དཔའི་སྤྱོད་འཇུག་བསླབ་བཏུས་མདོ་བཏུས་རྣམས་དང༌། དབུ་མ་རིགས་པའི་ཚོགས་ལ་སོགས་པ་དབུ་མའི་བསྟན་བཅོས་རྣམས་ལ་ལེགས་པར་སྦྱངས་ནས་མཁས་པའི་ཕུལ་དུ་ཕྱིན་པར་གྱུར་པ་ན་ཚད་མའི་གཞུང་རྣམས་ལ་སྦྱོང་བར་བཞེད་དེ་དཔལ་ལྡན་ས་སྐྱར་བྱོན་ནས་མཁས་པ་ཆེན་པོ་བླ་མ་གཞོན་རྒྱལ་བའི་དྲུང་དུ་སྡེ་བདུན་མདོ་དང་བཅས་པ་ལ་མཁས་པར་སྦྱངས་ཤིང༌། གཙོ་བོར་ཚད་མ་རྣམ་ངེས་ལ་ཐུགས་སྦྱོང་མཛད་དེ། ཆོས་མཆོགརྒྱན། ལྷ་དབང་བློ། ཤཱཀྱ་བློ། ཛྙྰ་ན་ཤྲྰི་ལ་སོགས་པའི་འགྲེལ་པ་ཆེན་པ་རྣམས་ཀྱི་ཚིག་དོན་ལ་མཁས་པ་དཔལ་ལྡན་ཆོས་ཀྱི་གྲགས་པ་ལྟ་བུར་གྱུར་ཏེ། དེ་དུས་སེམས་དཔའ་ཆེན་པོའི་ཞལ་ནས། ལེ་ལོའི་དབང་གིས་ཤས་ཆེར་མ་འབད་ཀྱང༌། །འོན་ཀྱང་ཁོ་བོའི་བློ་དང་ཕྲད་པ་ན།།ཤེས་བྱའི་ཚིག་དོན་ལྷན་ཅིག་དམིགས་ངེས་ཡིན། །ཞེས་ཉམས་མཚར་གྱི་ཚུལ་དུ་ཞལ་ཕོ་ཡང་མཛད་དོ། །དེ་ལྟར་གཞུང་ལུགས་རྣམས་ལ་སྦྱངས་པས་འཛམ་གླིང་མཛེས་པར་བྱེད་པའི་རྒྱན་དྲུག་དང་མཆོག་གཉིས་ཀྱི་གཞུང་ལུགས་རྣམས་ལ་མཁས་པའི་ཕུལ་དུ་ཕྱིན་པར་གྱུར་པ་ན་དགུང་ལོ་ཉེར་གསུམ་བཞེས་པའི་དུས་སུ་གཙང་ཕྱོགས་ཀྱི་ཆོས་གྲྭ་ཀུན་ཏུ་གྲྭ་སྐོར་མཛད་ནས་ལྟ་བ་ལོག་པར་འཛིན་པའི་རྒོལ་བ་ངན་པ་རྣམས་ལུང་རིགས་ཀྱིས་སུན་ཕྱུང་སྟེ་སྤོབས་པ་མེད་པར་བྱས། ལྟ་བ་ཕྱིན་ཅི་མ་ལོག་པར་འཛིན་པ་རྣམས་མཐུན་ཕྱོགས་སུ་བསྡུས་པས། ཀུན་ཁ་མཐུན་པར་གྲྭ་སྐོར་བྱུང་བ་ལ་བོ་དོང་གི་མཁས་པ་ཆེན་པོ་བཟང་པོ་དཔལ་འདི་ལས་སྟོན་པ་བཟང་བ་དང་ཤེས་རབ་ཆེ་བ་མ་བྱུང་ཞེས་གླེང་བ་བྱུང་ངོ༌། །དེ་ནས་དགུང་ལོ་སུམ་ཅུ་བ་ཤིང་ཕོ་བྱི་བའི་ལོ་ཟླ་བ་བཅུ་པའི་ཚེས་དྲུག་གི་སྔ་དྲོའི་ཆ་ལ། མཁན་པོ་བྱང་སེམས་རིན་ཆེན་མགོན་དང༌། ལས་ཀྱི་སློབ་དཔོན་བླ་མ་ནམ་མཁའ་སངས་རྒྱས། གསང་སྟེ་སྟོན་པ་བླ་མ་ཀུན་དགའ་རྒྱལ་མཚན། གྲིབ་ཚོད་པ་སློབ་དཔོན་ཤཱཀྱ་བྱང་ཆུབ། དད་པའི་དགེ་འདུན་དགེ་སློང་རྒྱལ་མཚན་འབུམ་གྱིས་ཐོག་དྲངས་པ་རྣམས་ཀྱི་དབུས་སུ།ཨེའི་ཆོས་གྲྭ་ཆེན་པོར་བསྙེན་པར་རྫོགས་པར་མཛད་ནས་འདུལ་བ་ལུང་སྡེ་བཞི་ནས་གསུངས་པའི་དགག་སྒྲུབ་གནང་གསུམ་གྱི་བཅས་པ་ཕྲ་རགས་མཐའ་དག་ཚུལ་བཞིན་དུ་བསྲུངས་ཏེ་འཕགས་མཆོག་ཉེ་བར་འཁོར་སླར་ཡང་གངས་རིའི་ཁྲོད་དུ་བྱོན་པ་ལྟར་ངུར་སྨྲིག་འཛིན་པ་ཐམས་ཅད་ཀྱི་ནང་ན་གཙུག་གི་ནོར་བུ་ལྟ་བུར་གྱུར་ཏོ། །དེ་ནས་དགུང་ལོ་སོ་གཉིས་པ་མེ་ཕོ་སྟག་ལ། འཇམ་དཔལ་དབྱངས་དོན་ཡོད་རྒྱལ་མཚན་པ་སྐུ་མཆེད་ཡུམ་དང་བཅས་པ་དང༌། བླ་མ་ཀུན་དགའ་རྒྱལ་མཚན། ཀུན་སྤངས་ནམ་མཁའ་གྲགས།བྱང་སེམས་རིན་ཆེན་དགོན་རྣམས་ཀྱིས་རྟ་རའི་གདན་ས་མཛད་པར་ཞུ་བ་གསོལ་བ་ལ། 2/23 མདུན་ངོས། 上一页 1 2 3 4 5 6 下一页 尾页 |
