ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་རྒྱལ་བའི་སྲས་པོ་ཐོགས་མེད་བཟང་པོ་དཔལ་གྱི་རྣམ་ཐར།
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
གཞན་བཤད་རྒྱུ་ཙམ་མི་གདའི་གསུངས་ནས་ཞིབ་ཆ་གསུང་དུ་མ་གནང༌།   དེ་ནས་སློབ་དཔོན་ཡོན་ཏན་འོད་སྙུན་གཡོག་རེ་མོས་ལ་ཡོད་པའི་སྐབས་སུ།    ནུབ་ཅིག་སྲོད་ཀྱི་ཆ་ལ་མ་དག་པའི་ལས་སྣང་ཐམས་ཅད་འགགས་ནས། ཞིང་ཁམས་རྣམ་པར་དག་པ། མཛེས་ཤིང་ཡིད་དུ་འོང་བ། དྭངས་ཤིང་ཐོགས་པ་མེད་པ། ནམ་མཁའི་དབྱིངས་ལྟར་རྒྱ་ཁྱོན་དང་ཚད་རྩ་བ་ནས་གཞལ་བར་མི་ནུས་པ་འདུག་གསུང་གིན་ཕྱག་ནམ་མཁའ་ལ་ཡུག་ཡུག་མཛད་དེ། མནན་ན་ནེམ་གྱིས་བྱེད་ཅིང་བཏེག་ན་སྤར་གྱིས་བྱེད། རེག་ན་བདེ་བ་བསྐྱེད་པ་ལ་སོགས་པ་མཚར་དུ་ཆེ་བ་ཅིག་གི་དབུས་ན་རང་རེ་འདུག དེའི་ཁོར་ཡུག་ཀུན་འཁོར་གྱི་ཚོགས་གྲངས་མེད་པས་བསྐོར་འདུག དེ་དུས་ཙ་ན་ཡོད་པའི་གནད་ཡིན་ནམ། བླ་མ་རྒྱལ་བ་རྣམ་པ་གསལ་བར་འདུག གཞན་ཡང་འོད་གསལ་གྱི་སྣང་བ་ཟ་ཟི་ལང་ལོང་བརྗོད་ཀྱིས་མི་ལང་བ་ཅིག་འདུག་སྟེ།ད་སྟེ་མགྱོགས་པོར་འགྲོ་བར་འདུག་གསུང༌།དེའི་ནང་པར་སློབ་དཔོན་དཔལ་ཡེས།   གླང་རི་ཐང་པ་བདེ་བར་གཤེགས་པ་བཞིན་དུ།དག་པའི་སྣང་བ་འབའ་ཞིག་ཏུ་གདའ་ལགས་སམ་ཞུས་པས།ད་ལྟ་ཟ་ཟིའི་སྣང་བ་སྣ་ཚོགས་ཤིག་ལ་ཡེངས་ནས་འགྲོ་ཡི་འདུག་སྟེ།   དེ་ཐམས་ཅད་ལ་མངོན་ཞེན་བྱ་རྒྱུ་མེད་རྨི་ལམ་སྒྱུ་མ་དང་འདྲ་གསུང༌།བདེ་བར་གཤེགས་ལ་ཁད་པའི་དུས་དེར་ཡང་སྔར་ནས་ཉལ་བ་དང་སྙེས་པ་ལ་མ་གོམས་པས། ཙོག་ཙོག་པུར་སྡོད་པ་འདི་ཀ་བདེ་བ་འདུག་གསུང་ནས་དང་པོ་བསྙུན་པའི་འགོ་བརྩམས་ནས་ཕྱིས་བདེ་བར་གཤེགས་ཀྱི་བར་དུ་སྐུ་རྣམ་སྣང་གི་ཆོས་བདུན་དང་ནམ་ཡང་མི་འབྲལ་བའི་ངང་ལས།བཅུ་དགུའི་ནུབ་མོ་ནས་གསུང་བཅད་མཛད་དེ། སྤྱན་ལ་ཡང་འགྱར་འགྱུར་མེད་པར་འོད་གསལ་ཆོས་ཀྱི་སྐུ་ལས་མ་གཡོས་བཞིན་དུ།གདུལ་བྱ་རྟག་འཛིན་ཅན་རྣམས་འདུལ་བ་དང༌།ལས་ཚུལ་བསམ་གྱིས་མི་ཁྱབ་པ་བསྟན་པ་དང༌།    ཞིང་ཁམས་གཞན་དུ་གདུལ་བྱ་རྒྱ་ཆེན་པོར་དགོངས་ཏེ་སེམས་དཔའ་ཆེན་པོ་ཉིད་ཀྱིས་དགུང་ལོ་བདུན་ཅུ་དོན་ལྔ་བཞེས་པ།   ས་མོ་བྱའི་ལོ་ཟླ་བ་བཅུ་པ་སྨིན་དྲུག་ཟླ་བའི་ཚེས་ཉི་ཤུ།རེས་གཟའ་སྤེན་པ།   སྐར་མ་ལག་པ་ཡོད་པའི་དགོང་མོའི་ཆ།གཟིམ་ཁང་ཆོས་རྫོང་གི་སྤུ་ཤུ་ལ་ཉི་མ་ནུབ་པ་དང་མཉམ་དུ་སྐུའི་བཀོད་པ་བསྡུས་སོ། །དེའི་ནུབ་མཚན་མོ་ཡང་དངུལ་ཆུའི་སྟེང་གི་བར་སྣང་ཐམས་ཅད་འཇའ་ཚོན་རྣམ་ལྔ་དང༌། འོད་ཟེར་གྱི་རང་བཞིན་གྱིས་ཁེངས་ཤིང༌།སྒྲ་ཆེན་པོ་གྲག་པ་དང༌།དྲི་ཞིམ་པོའི་ངད་པས་ཁྱབ་པ་དང༌། ས་ཆེན་པོ་གཡོས་པས། སྨན་བླའི་ཅོག་ཁྲིའི་སྟེང་ནས་གསེར་སྐུ་ས་ལ་ལྷུང་བ་ཙམ་བྱུང༌། ལྷའི་མེ་ཏོག་གི་ཆར་ཁ་བ་བུ་ཡུག་འཚུབས་པ་ལྟ་བུ་བབས་སོ། །རྒྱལ་སྲས་བདག་ཉིད་ཆེན་པོ་འདིས་བསྟན་འགྲོའི་དོན་རྒྱ་ཆེར་མཛད་པས་བརྒྱུད་འཛིན་གྱི་སློབ་མ་མཐའ་ཡས་པ་བྱོན་ཡང་ཐེག་པ་ཆེན་པོའི་བློ་སྦྱོང་འདི་རྒྱ་ཆེར་སྤེལ་བའི་འཕྲིན་ལས་ཀྱི་བཀའ་བབ་པ་ནི་རྗེ་བཙུན་རེད་མདའ་པ་གཞོན་ནུ་བློ་གྲོས་སོ།   །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་རྒྱལ་སྲས་བདག་ཉིད་ཆེན་པོ་འདི་ལ་གུས་པས་གསོལ་བ་འདེབས་ཤིང༌། སེམས་དཔའ་ཆེན་པོ་འདིའི་རྣམ་ཐར་ལྟར་དང་པོར་མདོ་སྔགས་ཀྱི་ལམ་གྱི་གནད་རྣམས་ལ་འཁྲུལ་མེད་ཀྱི་ངེས་པ་བརྟན་པོ་རྙེད་པར་བྱས། དེ་ནས་ཚེ་འདིའི་ཕུན་ཚོགས་གང་ལའང་མ་ཆགས་པར་དབེན་པའི་རི་སུལ་དུ་ལམ་ཆ་ཚང་ལ་སྒྲུབ་པ་སྙིང་པོར་བྱ་ཞིང་ལྷག་པར་བྱང་ཆུབ་ཀྱི་སེམས་རིན་པོ་ཆེ་ཉམས་ལེན་གྱི་མཐིལ་དུ་བཟུང་ནས་རྒྱལ་བ་དགྱེས་པའི་ལམ་ལ་སློབ་པ་ལ་བརྩོན་པ་ལྷུར་བྱའོ།  །

རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2018 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་ཀྲུང་གོའི་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备14000172号