ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་རྒྱལ་བའི་སྲས་པོ་ཐོགས་མེད་བཟང་པོ་དཔལ་གྱི་རྣམ་ཐར།
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
གལ་ཏེ་ཁ་ཆེམས་ལ་ཉན་མཁན་ཡོད་ན།    སྔར་ཁམས་བཟང་དུས་རང་གི་ཤེས་ཚོད་དཔེ་འཁྱུད་མེད་པར་བསྟན། རྩོམ་པ་ཡང་ཆེ་ཆུང་ཅི་རིགས་པ་བྱས་ཤིང༌།    ཁྱད་པར་དུ་ཚིགས་བཅད་ཆེ་ཆུང་མང་དག་ཅིག་ཡི་གེར་བཀོད་པ་དེ་རྣམས་ཁ་ཆེམས་ཡིན།   དེ་མ་གཏོགས་དོ་ཞག་འབྲེལ་མེད་ཚིག་གསུམ་སྨྲས་པ་ལ་དགོས་པ་མེད། དེ་ཀ་ལ་བསམས་ནས། འཕྲད་ཀྱང་འདི་ལས་གཞན་པ་སྨྲ་རྒྱུ་མེད། ཤི་ཡང་ཁ་ཆེམས་གཞན་འགའ་མ་མཆིས་སོ། །བྱས་པ་དེ་ཀ་ཡིན། ཉིད་ཅག་རང་རྣམས་ཀྱང་བློ་དཀོན་མཆོག་ལ་གཏོད་ལ། ཚེ་འདི་དང་མ་འདྲེས་པའི་ཆོས་རེ་གྱིས།   སེམས་ཅན་གྱི་དོན་དུ་ཆོས་ཚུལ་བཞིན་དུ་བྱེད་པ་ཐམས་ཅད་རྒྱལ་བ་སྲས་དང་བཅས་པའི་རྒྱུད་འཛིན་ཡིན་པ་ལ།   འོ་སྐོལ་གྱིས་ལྟ་སྨོས་ཀྱང་ཅི་འཚལ། དེས་ན་ཀུན་གྱིས་ཆོས་བརྒྱུད་ཀྱང་ལེགས་པར་ཟུངས། ཁྱད་པར་དུ་སྟོན་པ་ཟླ་བཟང་རང་ཡང་དགེ་སྦྱོར་ལ་འབད་པ་ཐོན། བྱ་བྲལ་གྱི་མིང་བཏགས་ཡིན་པའི་ཕྱིར། ལོངས་སྤྱོད་མེད་ན༌ལེགས་པས། ངའི་རྗེས་ལ་བྲེ་གང་བཏང་རྒྱུ་མ་བྱུང་ཡང་བཟོད།   ནུས་ལ་བྱུང་ཚད་ཀྱིས་སྙོམ་ཆུང་ལ་བྱམས་སུ་བྱེད་པ་དང༌།   ཁྱད་པར་དུ་ད་ལྟ་རང་རེས་སྐྱོང་དགོས་ཀྱིན་ཡོད་པའི་མ་ནུས་པ་འདི་རྣམས་ལ་སྐྱོང་རན་ལེགས་པོ་གྱིས། སྡུག་གེ་རྣམས་སྙིང་རྗེ་བ་ཡིན་ནོ། །ལབ་རྒྱུའི་དངོས་གཞི་དེ་ག་ཡིན་གསུངས།   ཡང་ཞལ་ནས་རྨི་ལམ་འཛིན་པ་འདི་ལ་སྔར་ནས་བྱང་ཆ་ཆེན་པོ་ཞིག་ཡོད། ཞིང་ཁམས་གྲངས་མེད་བལྟ་བ་དང༌། དེ་ན་བཞུགས་པའི་སངས་རྒྱས་དཔག་ཏུ་མེད་པ་ལ་ཆོས་ཉན་པ་ལ་སོགས་པ་འབད་རྩོལ་མི་དགོས་པར་ཡོང་བ་ཅིག་བྱུང༌། བར་སྐབས་ཤིག་ཏུ་འགྲིབས་འདུག་པ་ཡིན་ཏེ། དེང་སང་ན་བ་འདིས་རྨི་ལམ་སོར་ཚུད་འདུག མ་འགགས་པའི་སྣང་བ་འདི་མཚར་ཆེ། བར་སྐབས་སུ་འགྲིབ་པ་དེ་ཡང་བསོད་ནམས་སུ་མིང་བཏགས་པའི་འདུ་ལོངས་འདིས་ལན་ནམ་བསམ། ལར་བློ་ཆོས་སུ་སོང་བ་རེ་བྱུང་ན་འཇིག་རྟེན་གྱི་བསོད་ནམས་ཆེན་པོ་སྐད་ཟེར་བ་འདི་ཀུན་མ་བྱུང་ན་རང་ལེགས་ལ་འདུག་སྟེ།    འབད་རྩོལ་གྱིས་མ་བསྒྲུབས་པར་བྱུང་ན་ལོངས་སྤྱོད་དུ་རུང༌། ཞེས་སོགས་ཀྱི་དགག་སྒྲུབ་མང་པོ་བཤད་འདུག་ནའང༌།འབྱོར་ནའང་འབྱོར་བ་ལམ་དུ་སློང༌།   རྒུད་ནའང་རྒུད་པ་ལམ་དུ་སློང་བ་འདི་ལ་ཅི་འདྲའི་ཅུ་གལ་ཞིག་འདུག་གསུང༌། དེ་ནས་ཟླ་བ་བཅུ་པའི་ཚེས་བརྒྱད་ཀྱི་ཐོ་རངས། སློབ་དཔོན་དཔལ་ཡེ་ལ་ང་ཡར་ཙོང་སློངས་ལ་མདུན་རྒྱབ་ཅིག་སྒྱུར་གསུང་སྟེ། དེ་བཞིན་བྱས་པས། ཕྱག་ཐལ་མོ་སྦྱར་ནས། ཡུན་རིང་པོ་བཤུམས་པའི་བར་སྐབས་ཤིག་ཏུ་གསུང་མར་པོ་འབྱོན་བའི་ཚིག་འབྲུ་གང་ཡིན་མ་གོ་ནས་ནང་བར་རྒྱུ་མཚན་ཞུས་པས། ང་སྙེས་ཉལ་བྱས་པས་དེའི་མདུན་ན་རྗེ་བཙུན་མ་བྱོན་འདུག་པས།   རྗེ་བཙུན་མའི་མདུན་དུ་ང་ཉལ་བསྡད་པས་མི་ཡོང༌། ཙོང་ལངས་ལ་གསོལ་བ་བཏབ་དགོས་བསམས་ནས་དེ་ལྟར་བྱས་པ་ཡིན་གསུང་བ་ལ། རྗེ་བཙུན་མ་རྣལ་འབྱོར་མ་ལགས་སམ་སྒྲོལ་མ་ལགས་ཞུས་པས། སྤྱན་ནམ་མཁའ་ལ་ཆེར་མཛད་ནས་སྒྲོལ་མ་སྒྲོལ་མ་ཞེས་ལམ་གཉིས་གསུང་བས།    རྗེ་བཙུན་མ་གསུང་འབྱོན་གྱི་གདའ་ལགས་སམ་ཞུས་པས། ཧེ་དེ་འདྲ་མི་འདུག་སྟེ།   འོ་སྐོལ་ངོས་ཀྱིས་སེམས་ཅན་གྱི་སྡུག་བསྔལ་མ་བཟོད་ནས་རྗེ་བཙུན་མ་ལ་བྱས་པ་མེད་པའི་ཡུས་མང་པོ་བཙོངས་གསུངས། དེ་དང་དུས་མཉམ་པར་མྱང་སྟོད་དུ་སི་ཏུ་འཕགས་པའི་སར་བུ་མོ་གྲོང་པའི་ཆོས་ཀྱིས་མ་གོས་པ་ཅིག་ལ། ལྷ་ཁ་བབ་ནས་དང་པོ་དམག་གི་གཡུལ་རྒྱལ་ཕམ་འཆད་པའི་འཕྲོ་ལ། དེ་འདྲ་རྣམས་ལྟ་ཆ་མེད་དེ། ཉི་མ་ནུབ་ཕྱོགས་ཡ་གི་ན། བླ་མ་རྒྱལ་སྲས་ཐོགས་མེད་བྱ་བ་ཟླ་བ་བཅུ་པའི་ཚེས་བརྒྱད་ལ་རྗེ་བཙུན་མ་སྒྲོལ་མས་གཡུ་ལོ་བཀོད་པའི་ཞིང་ཁམས་སུ་གདན་དྲངས་ནས་འགྲོ་བར་འདུག་ཟེར་བ་ཞིག་བྱུང་ཞེས་གྲག་གོ། །དེ་དུས་ཉིན་གཅིག་ད་རུང་འཆི་ནི་མི་འཆི་བར་འདུག་ཀྱང་རྩ་ཁོ་ནི་བཏུལ་འདུག    རྩ་ལའང་འཇུ་ས་མི་འདུག་གསུངས་ནས་ཕྱག་བརྐྱང་བྱུང་བ་ལ་བལྟས་པས། རྩ་བཏུལ་འདུག་སྟེ། དེ་ལ་བརྟེན་ནས་སྙུན་གཡོག་ཅིག་གིས། བླ་མ་ལ་མོས་གུས་ཆེ་རབ་ཡོད་ཀྱང་སངས་རྒྱས་དངོས་ཀྱི་འདུ་ཤེས་མེད་པའི་རྟགས་སམ།   འོན་ཀྱང་གསུང་འདི་རྣམས་འབྱོན་པའི་རྐྱེན་དུ།རྩ་བཏུལ་ནས་ཆེན་པོ་མི་སྡོད་པ་ཡིན་ཟེར།   གལ་ཏེ་མི་འདོད་པ་ཐོག་ཏུ་བབ་ནས་སྐུ་གཤེགས་ན། འཕོ་བ་ལ་སོགས་པ་ཐུགས་དམ་གྱི་གསལ་འདེབས་འདི་ལྟར་གྱིས་གསུང་བའི་ཞལ་ཏ་ཐུགས་ལ་འདོགས་མི་འཚལ་ལམ་ཞུས་པས། ཧེ་ཉིད་ན་རེ། མི་འདོད་པ་ཐོག་ཏུ་བབ་ནས་ཤི་ན་ཟེར་གྱིན་འདུག་སྟེ། ཤི་ཡང་མི་འདོད་པ་ཐོག་ཏུ་བབ་པ་མིན། འདི་ཀོ་ཡོང་བའི་གྲབས་ཤིག་སྔར་ནས་ཚར། མི་རྒན་གྱི་ལས་ཐབས་ཟིན། ཕོ་ལོ་ཡང་བདུན་ཅུ་དོན་ལྔ་ལོན་འདུག ཚེ་ཡང་ཐུང་ཐུང་མིན།   མཚམས་གྲོལ་ནས་མི་མང་པོ་འཚོགས་པ་དང༌། ཆོས་སྟོན་པའི་འཕྲོ་ཡང་མེད་པས་ན་བའི་དུས་ཀྱང་སྔ་ཕྱི་རན། འདི་འདྲ་ཞིག་མ་གྲུབ་སྙམ་པའི་བློའི་ལྷག་མ་ཡང་ལུས་པ་མེད། དོ་ཅིག་ནས་སྟོན་དུས་འགྲོ་དོན་དགའ་རབ་ཡོང་གི་འདུག་སྟེ། འགྲོ་དོན་ཆུང་དུ་ཡང་མི་འགྲོ་མཆི།   བྱང་ཆུབ་ཀྱི་སེམས་གཉིས་པོ་འདི་དང་ནམ་ཡང་འབྲལ་མ་མྱོང༌། ན་བའི་རྐྱེན་གྱིས་རྨི་ལམ་སོར་ཚུད་བྱས་པ་དང་འདྲ་བར།   ཅི་ཡིན་ཆ་མེད་ཅིག་ལ་ཁ་སང་སྤྱི་བོ་ན་བ་ནས་བཟུང་སྟེ་དེང་སང་གི་བར་དུ་ལུས་ལ་ཤེད་མེད་ཀྱང༌།   ལྷག་པར་དུ་བྱང་ཆུབ་ཀྱི་སེམས་གཉིས་འཕེལ་བའི་སྐབས་འདི་འདྲ་འཛོམ་པའི་འཆི་བ་རྙེད་དཀའ་ཡང༌། བདག་གིས་འབད་མེད་དུ་རྙེད་པས་དཀོན་མཆོག་གི་དྲིན་ཡིན། དེ་ལྟ་བུའི་ངང་ནས་འཆི་བ་དེ་ཀ་ལ་འཕོ་བ་ཟེར་བ་ཡིན། གཞན་གསལ་འདེབས་བྱ་རྒྱུ་ཅི་ཡང་མེད། བྱས་ཀྱང་དགའ་རུ་ཨེ་གཏོང་མི་ཤེས། དེ་ཡི་སངས་རྒྱས་རྗེས་དྲན་སོགས།   །སུས་ཀྱང་གཡེངས་པར་འགྱུར་བ་མེད།།ཅེས་པ་དེ་དང་ཁྱེད་རང་རྣམ་པ་ཡང་མ་འགལ་བ་མཛོད་གསུང༌། དེ་ནས་ཉེ་གནས་ཀྱིས་ད་ཞལ་མི་བཞུགས་ན་ཞིང་ཁམས་གང་དུ་སྐྱེ་བ་བཞེས་ཞེས་ཞུས་པས། འགྲོ་ལ་ཕན་པར་གྱུར་ན་དམྱལ་བར་འགྲོ་བ་ཡང་ཤིན་ཏུ་སྤྲོ། མི་ཕན་ན་དག་པའི་ཞིང་ཡང་མི་འདོད་ལགས་གསུངས།   དེ་དུས་དགོང་གཅིག་མཎྜལ་དང་མཆོད་པ་རྣམ་ལྔ་ཁྱེར་ཤོག་གསུང་ནས།  བདུད་རྩི་ཕྱག་མཛུབ་ཀྱིས་གཏོར་ཞིང་ཕུད་མཆོད་རྒྱས་པ་རེ་མཛད། ཡང་ཕྱག་ཐལ་མོ་སྦྱར་ཞིང་དབུ་དུད་པ་རེ་མཛད། མཆོད་པ་རྣམ་ལྔ་ཕྱག་རྒྱ་དང་བཅས་པ་ལན་ལྔ་ཙམ་སྐྱར་ཀྱིན་དབུལ། དྲུང་ན་འཁོད་པ་རྣམས་ལ་ཡང་མཆོད་པ་ཕུལ་གསུངས་ནས་སྤྱན་ཆབ་མང་པོ་འབྱིན་གྱིན་འདུག་པའི་ནང་པར་རྒྱུ་མཚན་ཞུས་པས། ཡི་དམ་གྱི་ལྷ་འདྲ་བྱོན་པས་ཁྱེད་རྣམས་ལ་ཡང་མཆོད་པ་ཕུལ་བྱས་པ་ཡིན།  
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2024 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号