ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་རྒྱལ་བའི་སྲས་པོ་ཐོགས་མེད་བཟང་པོ་དཔལ་གྱི་རྣམ་ཐར།
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
ལར་ཡང་རང་ཉིད་མི་བསྒྲུབ་པ་དེ་གཞན་ལ་བསྟན་པར་མི་རིགས།   འོ་སྐོལ་གྱིས་དང་པོ་ས་སྐྱར་ཕྱིན་དུས་རྩིབས་རི་བ་ཡིན་པའི་རྟོགས་ལྡན་གཅིག་ས་སྐྱའི་ཡང་དགོན་ན་ནད་དྲག་པོས་བཏབ་འདུག་པ་གཅིག་གིས། ན་ཚ་ལ་སོགས་པ་ལམ་དུ་འཁྱེར་ན་ཇི་ལྟར་བྱེད་ཟེར་བ་ལ།   བདག་གཞན་སྒྱུ་ལུས་ཀྱི་ཕུང་པོ་འདི། །ན་ན་ན་སྟེ་ན་བས་དགའ།   །སྔར་བསགས་ཀྱི་ལས་ངན་འཛད་པ་ཡིན།   །ཆོས་སྤྱོད་ཀྱི་བྱ་བ་སྣ་ཚོགས་ཀྱང༌།   །སྒྲིབ་གཉིས་སྦྱོང་བའི་ཆེད་དུ་ཡིན། ། ན་བ་མེད་ན་མེད་དེ་དགའ། །ལུས་སེམས་བདེ་ན་དགེ་སྦྱོར་འཕེལ། ། མི་ལུས་དོན་ཅན་བྱེད་པ་ཡང༌།  །སྒོ་གསུམ་དགེ་ལ་སྦྱོར་བ་ཡིན།། འབྱོར་པ་མེད་ན་མེད་དེ་དགའ། །བསྲུང་གསོག་གི་བྱ་བྲེལ་དེ་ལ་མེད།།འཐབ་རྩོད་ཀྱི་ཁྲོ་འཁྲུག་ཇི་སྙེད་པ།  །འཛིན་ཆགས་ཀྱི་ནོར་ལས་བྱུང་བར་ངེས།   །འབྱོར་པ་ཡོད་ན་ཡོད་དེ་དགའ།  །བསོད་ནམས་ཀྱི་དགེ་ཚོགས་སྤེལ་བས་ཆོག   །འཕྲལ་ཕུགས་ཀྱི་ཕན་བདེ་ཇི་སྙེད་པ།   །བསོད་ནམས་ཀྱི་འབྲས་བུ་ཡིན་པར་ངེས།   །མྱུར་དུ་ཤི་ན་ཤི་བས་དགའ།   །རྐྱེན་ངན་གྱིས་བར་དུ་མ་ཆོད་ཅིང༌། །འཚམས་སྦྱོར་གྱི་བག་ཆགས་བཟང་འགྲོགས་པས།   །མ་ནོར་ཀྱི་ལམ་དུ་ཚུད་པར་ངེས། །ཡུན་དུ་གསོན་ན་གསོན་པས་དགའ། །ཉམས་མྱོང་གི་ལོ་ཏོག་སྐྱེས་པ་ལ།    །གདམས་ངག་གི་རླན་དྲོད་མ་ཡལ་བར།  །ཡུན་དུ་བསྟེན་པས་སྨིན་པར་འགྱུར།  །ཞེས་བསྟན་པ་བཞིན་དུ།  འོ་སྐོལ་རང་ཡང་གང་བྱུང་ལ་དགའ་བ་སྒོམ་པའི་མན་ངག་འདི་ཉམས་སུ་ལེན་པའི་ཕྱིར་ཕན་པའི་ཐབས་མི་འཚོལ།  ན་བར་སྣང་བ་འདི་རྒྱུ་འབྲས་བསླུ་བ་མེད་པར་སྟོན་པའམ། སྒྲིབ་གཉིས་སྦྱོང་བའི་ཐབས་མཆོག་ཀྱང་ཡིན། དགེ་སྦྱོར་གྱི་བསྐུལ་མ་ལྟ་བུར་ཡང་འདུག་པས། འདི་མི་ཡོང་བའི་ཐབས་མི་འཚོལ།    ཕྱོགས་ཀྱི་རིམ་གྲོ་བ་འདི་རྣམས་ཀྱིས་ཀྱང་ད་བར་ལ་འཆིར་མ་བཅུག་གསུང་བ་ལ། དྲུང་གི་ཞལ་མཐོང་བ་དང༌།གསུང་ཐོས་སུ་རེ་བའི་གདུལ་བྱ་དཔག་མེད་མཆིས་པས། ད་དུང་སྐུ་ཚེ་བྱིན་གྱིས་རློབས་པར་ཞུ་ཞུས་པས། ཕྲུ་བའི་ནང་ན་མེད་པར་གཟར་བུར་འབྱུང་བ་ནི་རིགས་པ་མིན་ནའང་ཕན་ཐོགས་པ་ཡང་མང་རབ་བྱུང༌།གཞན་དོན་གྱི་ལས་ལ་ཆེས་བྱ་བ་མ་མཆིས་ཀྱང༌།   འོ་སྐོལ་གྱི་ཚོད་རྩིས་པའི་ཟང་ཟིང་ཡང་ཅུང་མངས་པ་ཙམ་ཡང་ཡིན། ཤི་ན་ཡང་གཞན་དོན་ཆུང་དུ་ཡང་མི་འགྲོ་མཆི་གསུང་བ་ལ། དྲུང་ནས་གཞན་དོན་གཞན་དུ་རྒྱ་ཆེ་ཡང༌། བདག་ཅག་གདུལ་བྱ་རྣམས་མགོན་མེད་པར་འགྱུར་བས། ཅི་ནས་ཀྱང་བཞུགས་པར་ཞུ་ཞུས་པས། ནུས་པ་མེད་ན་ལྷན་ཅིག་འགྲོགས་ཀྱང་དགོས་པ་ཆུང༌།ནུས་པ་བྱུང་ན་མྱུར་དུ་འགྲོ་བ་ཐམས་ཅད་སྒྲོལ་བར་འདོད་ན།   བློ་གཏད་པའི་ལྟོས་ས་དང་བཅས་པ་ཁྱེད་རྣམས་ཡལ་བར་ག་ལ་འདོར། ང་དང་བྲལ་བ་ལ་མྱ་ངན་བྱ་མི་དགོས། རྒྱུན་དུ་གསོལ་བ་ཐོབ་དང་ཁོ་བོ་ཡོད་པ་དང་མཚུངས་ཀྱིས་གསུང༌།དེའི་དུས་མཁན་ཆེན་བྱང་ཆུབ་རྩེ་མོ་བྱོན་ནས་གདན་བཞུགས་ཞུས་པས་མ་བཞེས་པར་ཚུར་ལ་གདན་བཞུགས་མཛད་དེ། སེམས་དཔའ་ཆེན་པོ་རང་གི་སྔར་གྱི་བཞུགས་གདན་གྱི་སྟེང་དུ་ཡང་གདན་བརྩེགས་གསུང་ནས་མཁན་ཆེན་པ་བཞུགས་སུ་བཅུག རྟེན་འབྲེལ་མཛད་པས།   དངོས་སུ་གསུང་མ་བྱོན་ཡང་བཞུགས་གདན་གྱི་སྟེང་དུ་བཞུགས་སུ་འཇུག་པ་དེ།   ཆོས་བརྒྱུད་ཟུངས་ཟེར་བའི་ཞལ་ཏ་རུ་གོ་ཞེས་ཉེ་གནས་སྟོན་པ་གསུང་ངོ༌། དེ་དུས་ཐམས་ཅད་ལ་མཇལ་ཁ་ཅིག་གཏོང་བར་ཞུས་པས།   ད་ལྟའི་སྐབས་འདི་འདྲར་འཕྲད་ཀྱང་རང་གཞན་གཉིས་ཀ་ལ་གནོད་པ་ལས་མི་ཡོང་གསུང༌།  དེའི་དུས་ཀྱང་མཚན་བཅས་ཀྱི་ཐུགས་དམ་རྣམས་ཡེ་མ་ཆག་པར་མཛད་པ་དང༌།  མནལ་བསྲུང་བའི་ཕྱིར་དཀོན་བརྩེགས་སྒྲགས་པའི་དུས་དང༌། མགུར་མ་བླངས་པའི་དུས་ཤུགས་ཆེན་པོ་བཤུམས་པས། དོ་ཞག་མཚན་བཅས་ཀྱི་ཐུགས་དམ་རྣམས་ཀྱང་གློད་པ་དང༌། ཁྱད་པར་དུ་སྙིང་རྗེའི་དམིགས་པ་མི་མཛད་པར་ཞུ། གློ་བུར་དུ་སེར་མ་བྱུང་དོགས་གདའ་ཞུས་པས།    འོ་སྐོལ་གྱི་མཚན་མེད་ལ་མཚན་བཅས་ཀྱི་དགེ་སྦྱོར་གྱིས་མི་གནོད་པར་གདའ་ཞིང༌། ཐབས་ཤེས་རབ་ཟུང་དུ་འབྲེལ་བའི་ཕྱིར་རྩོལ་བ་ཅུང་ཟད་ཡོད་ཀྱང་བྱེད་པར་སྤྲོ་བར་འདུག    སྙིང་རྗེའི་དམིགས་པ་ཆེད་ཀྱིས་མ་བྱས་ཀྱང་འགྲོ་བའི་སྡུག་བསྔལ་དྲན་ཙ་ན་ངམ་ངམ་ཤུགས་ཀྱིས་སྐྱེ་བར་འདུག བྱུང་རྒྱལ་དུ་བཏང་ན་ཉིད་ཅག་རྣམས་ཡ་ང་བར་དོགས་ནས་དྲན་འཛིན་ཆེན་པོ་བྱས་པ་ཡིན། འཆི་ཁར་འཕོ་བ་ཡང་སྒོམ་པ་ལས་འདི་འདྲའི་འཕྲོ་ལ་ཤི་ན་ལེགས་པ་ཡིན་མོད་གསུང༌།དེའི་དུས་སྤྱིར་བསྐྱེད་རྫོགས་གཉིས་ལ་བརྟན་པ་ཐོབ་པ།   ཁྱད་པར་དུ་སྒྱུ་ལུས་རྨི་ལམ་ལ་དབང་འབྱོར་བའི་མཁས་གྲུབ་ཆེན་པོ་སེམས་དཔའ་ཆེན་པོའི་ཐུགས་སྲས་བླ་མ་རྡོར་ཞོན་པ་བྱ་བ་དངུལ་ཆུ་ན་སྐུ་མཚམས་དམ་པོ་ལ་བཞུགས་པའི་ཆུ་སྐྱེལ་ལ་ཞུ་བ་བསྐུར་ནས།དྲུང་ནས་བསྙུང་བ་འདི་ལ་གསོལ་བ་ཐེབས་མི་ཐེབས་ཀྱི་རྨི་ལམ་ཞིག་བཟུང་ནས་ལན་ཅིག་ཡི་གེར་བཏབ་ནས་བསྐུར་བ་ཞུ་ཞུས་པས།   ད་རེས་རང་གསོལ་བ་ཐེབས་སྙམ་པ་མི་འདུག ལྷག་པའི་ཡི་དམ་གྱི་ལྷ་དཔག་ཏུ་མེད་པ་འདུ་བ་དང༌།   དཔའ་བོ་དང་མཁའ་འགྲོ་མའི་ཚོགས་བསམ་གྱིས་མི་ཁྱབ་པ་དང༌།ལྷ་དང་ལྷ་མོ་དུ་མས་མཆོད་པའི་ཚོགས་མཐའ་ཡས་པ་རྣམས་ཀྱིས་བསུ་བ་དང༌།  ཆོས་རྗེ་ཉིད་ཀྱང་ཞིང་གཞན་དུ་གཤེགས་པ་ལ་ཐུགས་སྤྲོ་བའི་རྣམ་འགྱུར་ལ་སོགས་པའི་གཏན་ཚིག་དུ་མ་ཞིག་འདུག་སྟེ། ཞིབ་ཏུ་བཤད་ན་ནི་ཅི་རིགས་ཀྱི་བློར་མི་ཤོང་བའི་རྒྱུ་མཚན་ཞིག་འདུག་པས་མི་འཆད་དེ་ཙམ་གྱིས་གོ་མོད་གསུང༌།   དེ་ནས་ཉེ་གནས་ཀྱིས་འོ་ན་འདི་ལྟར་གྱིས་གསུང་བའི་ཞལ་ཏ་གསུང་བར་ཞུ་ཞུས་པས།   རྒྱལ་སྲས་འདིའི་ཞལ་ནས་ཁ་ཆེམས་འཇོག་པ་སྐབས་སུ་བབ་འདུག་ནའང༌། ནད་ཀྱིས་གདུངས། ལུས་ཀྱི་ཤེད་ཟད་པའི་སྐབས་འདིར།    ཚིག་བཞི་པ་རེ་རྩོམ་པ་དང༌། སྨྲས་པ་ལ་ཡང་ཅུ་གལ་ཡོང་གིན་འདུག་ལར་གྱིས་འོ་སྐོལ་ལ་ཁམས་བཟང་དུས།   ཆོས་དང་འཇིག་རྟེན་གྱི་བྱ་བ་གང་ལའང༌།  ཁྲིགས་ཁ་འདི་ལྟར་ཡིན་གྱི་ཏིག་ཏིག་མེད་པར་གང་བྱུང་ལ་གཏོང་གིན་ཡོད་པ་དེ་ཡིན་མོད། ད་འཆི་ཁ་དང༌། ཤི་བའི་རྗེས་ལ་འདི་ལྟར་བྱེད་ཀྱི་ཁྲིགས་ཁ་དེ་བས་ཀྱང་ག་ན་ཡོང༌། 
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2021 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号