ཐོག་མར་དགེ་བ་ཀླད་ཀྱི་དོན།
༄༅། །ན་མོ་གུ་རུ་མུ་ནེེནྟྲ་ཡ། གང་ཡང་རྨད་བྱུང་ཡིད་འོང་སྙིང་སྟོབས་ཟད་མི་ཤེས་པའི་སྤྱོད་པའི་རྦ་རླབས་ཆལ་ཆིལ་གཡོ་བས་རྣམ་དཀྲིགས་པ། །ཚོགས་གཉིས་རྒྱ་མཚོ་ཆེ་ལས་ལེགས་འོངས་ཀུན་རྟོག་སྒྲིབ་པའི་སྤྲིན་བྲལ་ཟབ་ཅིང་རྒྱ་ཆེའི་ལེགས་བཤད་གཟི་འོད་འབར། །སྨྲ་བ་ངན་པའི་མུན་པ་མཐའ་དག་མ་ལུས་འཇིག་རྟེན་རྒུད་པ་ཀུན་དང་ལྷན་ཅིག་དྲུངས་ནས་འབྱིན་མཛད་པ། །ཐུབ་དབང་སྨྲ་བའི་ཉི་མ་ཚད་མའི་སྟོན་པ་གང་དེའི་ཞབས་རྡུལ་བདག་གི་གཙུག་ཏུ་ཀུན་ཏུ་མཛེས་གྱུར་ཅིག །
རྒྱལ་བའི་མྱུ་གུ་བྱེ་བའི་དབུས་ན་རྒྱལ་བའི་དམ་ཆོས་འཛིན་པ་ལ། །རྒྱལ་བའི་དབང་པོ་ཀུན་གྱིས་མགྲིན་གཅིག་རྒྱལ་བ་ཉིད་བཞིན་རབ་བསྔགས་པ། །རྒྱལ་བའི་རྒྱལ་ཚབ་མི་ཕམ་མགོན་དང་རྒྱལ་བའི་་ཡབ་གཅིག་འཇམ་པའི་དབྱངས། །རྒྱལ་བའི་ས་ཆེན་མ་མནན་དེ་སྲིད་རྒྱལ་བ་ཇི་བཞིན་བཤེས་སུ་བསྟེན། །
རྟོགས་པར་རབ་དཀའ་ཐུབ་པའི་གསུང་གི་གནད། །རྣམ་པ་གཞན་དུ་འདྲེན་པའི་མཐའ་བཀག་ནས། །བསྒྲུབ་དང་སུན་འབྱིན་རིགས་པས་གསལ་མཛད་པ། །ཀླུ་སྒྲུབ་ཐོགས་མེད་རྗེས་འབྲངས་བཅས་ལ་འདུད། །
བདེ་བར་གཤེགས་པའི་གསུང་རབ་བྱེ་བའི་གནད་ལ་ནམ་ཡང་བློ་གྲོས་འཁྲུལ་བའི་དྲི་བྲལ་ཞིང༌། །འཕགས་བོད་མཁས་གྲུབ་དུ་མའི་བློ་ཡིས་འབད་ཀྱང་མ་ལྩིགས་རིགས་ལམ་སྟོང་གི་སྙིང་པོའི་བཅུད། །གསལ་བར་འདོམས་པས་དྲང་སྲོང་མཆོག་གི་རིང་ལུགས་དུས་ཀྱི་མཐར་ཡང་ཆེས་ཆེར་རྒྱས་མཛད་པ། །སངས་རྒྱས་ལས་ཀྱང་རྣམ་པར་སངས་རྒྱས་བློ་བཟང་གྲགས་པར་བྱང་ཆུབ་བར་དུ་སྙིང་ནས་འདུད། །
མཉམ་མེད་མགོན་པོ་དེ་ཡི་ལེགས་བཤད་ཀྱི། །མ་སྨད་བདུད་རྩི་མཆོག་གི་བགོ་སྐལ་ལ། །ལྷག་པར་སྤྱོད་པས་རྒྱལ་སྲས་དམ་པ་ཡི། །མཆེད་ཟླར་གྱུར་པ་དེ་དག་ཀུན་ལ་འདུད། །
བློ་བཟང་རྒྱལ་བའི་ཐུགས་གསང་དཔལ་གྱི་བེའུར་ཡོངས་གཏམས་ལེགས་བཤད་ནོར་བུའི་ཕུང་པོ་ནི། །འགྲོ་ལ་ལྷག་པར་བརྩེ་བའི་འོད་ཞགས་རིང་པོས་གཅིག་ཏུ་བཟླུམ་པའི་ཡ་མཚན་གཟི་འབར་བ། །བཤད་སྒྲུབ་ཆོས་ཀྱི་རྒྱལ་མཚན་རྩེ་མོར་འགོད་མཛད་སྟོབས་བཅུ་མངའ་བའི་ཡེ་ཤེས་ཉི་མའི་དངོས། །དྲི་མེད་ལུགས་བཟང་པདྨ་དཀར་པོའི་ཚལ་འབྱེད་གང་དེར་བདག་ཡིད་དང་བ་ལན་བརྒྱར་འཛིན། །
མཁྱེན་དང་བརྩེ་བའི་དཔལ་ནི་རྒྱལ་སྲས་དམ་པ་གཞན་ལས་ཆེས་འཕགས་པས། །སྟོབས་བཅུ་མངའ་བ་རྣམས་ཀྱང་བཏང་སྙོམས་བགྱིད་པའི་ཆེར་སྙིགས་འགྲོ་བ་ལ། །མ་སྨད་སྙིང་སྟོབས་གོ་ཆ་བརྟན་པོས་བདག་ཉིད་མགོན་པོ་ཟླ་མེད་པར། །སྟོན་མཛད་འགྲོ་བའི་བླ་མ་བློ་བཟང་སྐལ་བཟང་རྒྱ་མཚོར་སྙིང་ནས་འདུད། །
རྟེན་འབྲེལ་མ་ལུས་ཆུ་ནང་ཟླ་བའི་སྣང་བརྙན་བཞིན་དུ་མངོན་སུམ་གཟིགས། །བདག་པས་གཞན་གཅེས་བྱང་ཆུབ་ཐུགས་འབྱོངས་ཏིང་འཛིན་མཛོད་ལ་མངའ་བརྙེས་པ། །རྒྱལ་སྲས་སྤྱོད་པའི་ཕ་རོལ་ཕྱིན་གྱུར་ལེགས་བཤད་རིན་ཆེན་བྱེ་བའི་གཏེར། །མཉམ་མེད་དྲིན་ཅན་ངག་དབང་མཆོག་ལྡན་ཞབས་ཟུང་མགོ་བོས་ལན་བརྒྱར་མཆོད། །
ཆེ་བའི་བློས་ཀྱང་བརྒལ་དཀའ་བདེ་བར་གཤེགས་གསུང་རྒྱ་མཚོ་ཆེར། །བདེ་བླག་ཉིད་དུ་འཇུག་བྱེད་རྣམ་དཔྱོད་འཕྲུལ་གྱི་གྲུ་བོ་ཆེ། །བརྩེ་བས་སྦྱིན་པའི་ཐབས་མཁས་མཆོག་གི་བཀའ་དྲིན་རྩོལ་མཛད་པ། །བདག་གི་བཤེས་གཉེན་བཅུ་ཕྲག་ཞབས་ཟུང་སྙིང་གི་པདྨོར་བསྟེན། །
|
