ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། །གྲུབ་པའི་མཐའ་རྣམ་པར་བཞག་པ་ཐུབ་བསྟན་ལྷུན་པོའི་མཇེས་རྒྱན་ལས་ས་བཅད་དང་པོ། ཕྱི་རོལ་པའི་ལུགས་ཀྱི་གྲུ
སྤེལ་དུས།03-28  ཡོང་ཁུངས།http://www.teducn.com  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
གསུམ་པ་དེ་དག་གི་དོན་བསྡུ་བ་ནི།   དེ་ལྟར་མུ་སྟེགས་རྣམས་ཀྱི་ཀུན་ཏུ་བཏགས་པའི་རྟག་པ་དང་ཆད་པའི་མཐའ་ཐམས་ཅད་དངོས་པོ་སྟོབས་ཞུགས་ཀྱི་རིགས་པ་དྲི་མ་མེད་པ་དག་གིས་འགོག་པའི་ཚུལ་རྒྱལ་བའི་གདུང་འཚོབ་ཤིང་རྟ་ཆེན་པོ་དག་གི་གཞུང་ལས་མང་དུ་འབྱུང་བ་ནི་དགོས་པ་ཁྱད་པར་ཅན་དུ་མ་དང་ལྡན་ཏེ།   སྙིང་ནས་གྲོལ་བ་དོན་དུ་གཉེར་བ་རྣམས་ཀྱིས་རང་གི་ལུགས་ཀྱི་བསྟན་པ་དང་སྟོན་པ་སྐྱོན་མེད་པ་ལ་རིགས་པའི་ལམ་ནས་དྲངས་པའི་དད་པ་བཅོས་མ་མ་ཡིན་པ་བསྐྱེད་པར་བྱ་བའི་ཕྱིར་དང༌། འཁོར་བ་ལས་གྲོལ་བར་བྱེད་པའི་ལམ་ཡང་དག་པ་སྐྱེ་བའི་བགེགས་ཀྱི་གཙོ་བོ་སྡུག་བསྔལ་ལ་རྒྱུ་མེད་པར་འཛིན་པ་དང༌།    རྒྱུ་ཡོད་ཀྱང་གཙོ་བོ་དང་དབང་ཕྱུག་ལ་སོགས་པ་མི་མཐུན་པའི་རྒྱུ་ལས་འབྱུང་བར་འཛིན་པ་དང༌། དོན་མ་ཡིན་པའི་དཀའ་ཐུབ་དང་དབང་ཕྱུག་གི་དབང་བསྐུར་བ་ལ་སོགས་པ་ལམ་མ་ཡིན་པ་ལ་ལམ་དུ་འཛིན་པ་དང༌། ཐར་པ་མ་ཡིན་པ་ལ་ཐར་པར་འཛིན་པ་ལ་སོགས་པའི་ལོག་པར་རྟོག་པ་མཐའ་དག་དྲུངས་ནས་འབྱིན་པའི་ཕྱིར་དང༌། གཞན་ཡང་སྐྱེ་བ་གཞན་དག་ཏུ་རྒྱང་འཕེན་སོགས་ཀྱི་གྲུབ་པའི་མཐའ་དང་གཞུང་ལུགས་ཐོས་པའི་སྟོབས་ཀྱིས་བག་ཆགས་བཞག་པ་རྣམས་ཀྱི་ས་བོན་ཉམས་སྨད་པར་བྱ་བའི་ཕྱིར་དང༌། སྐྱེ་བ་ཕྱི་མ་རྣམས་སུ་ཡང་ལོག་པར་ལྟ་བ་མཐའ་དག་ལས་ལྡོག་པའི་ཕྱིར་དང༌།   ཡང་དག་པའི་ལྟ་བ་མྱུར་བ་མྱུར་བར་སྐྱེ་བའི་བག་ཆགས་བརྟན་པོ་གཞག་པར་བྱ་བའི་ཕྱིར་དུ་དགག་སྒྲུབ་ཀྱི་རྣམ་པར་བཞག་པ་དུ་མ་མཛད་པ་ཡིན་པའི་ཕྱིར་རོ།     །དེས་ན་བདག་ལེགས་སུ་འདོད་པ་རྣམ་ས་ཀྱིས་ཡང་དག་པའི་རིགས་པའི་གཞུང་ལུགས་ཆེན་མོ་རྣམས་ལ་བཤད་ཆོས་ཙམ་དང་ཕྱིའི་གོ་རྒྱ་གཅོད་པའི་ཡན་ལག་ཙམ་ཡིན་གྱི་སྒྲུབ་པ་ཉམས་ལེན་བྱེད་པ་ལ་མི་མཁོའོ་སྙམ་པའི་ལྟ་བ་ངན་པ་དང༌། གཞན་དང་གཤགས་འགྱེད་པ་ཙམ་གྱི་ཕྱིར་དང༌།    རྙེད་བཀུར་སོགས་འཐོབ་ཏུ་རེ་བའི་ཀུན་སློང་ངན་པ་མཐའ་དག་རྒྱང་རིང་དུ་བསྲིངས་ཏེ་གུས་སྦྱོར་དང་རྟག་སྦྱོར་གྱི་བརྩོན་པས་ཐོས་པ་དང་བསམ་པ་ལྷུར་ལེན་པ་གནད་ཀྱི་དོན་པོ་ཡིན་ནོ།     །དོན་གྱི་དབང་འདི་གཟིགས་ནས་བདག་ཅག་རྣམས་ཀྱི་འདྲེན་པ་དམ་པ་རྒྱལ་བའི་གདུང་འཚོབ་ཆེན་པོ་རྒྱལ་བ་གཉིས་པས། སྨྲ་བའི་ཁྱུ་མཆོག་འཕགས་པ་ཡབ་སྲས་དང༌། །ལོག་སྨྲ་ཚར་གཅོད་ཕྱོགས་གླང་གྲགས་པ་ལས།    །ལེགས་པར་འོངས་པའི་རིགས་ལམ་་བདུད་རྩིའི་ཆུས། །བློ་མིག་དྲི་མ་ཡང་ཡང་མ་བཀྲུས་ན།   །ཤིན་ཏུ་ཟབ་གནས་མཐོང་བ་སྨོས་ཅི་དགོས། །རགས་པའི་ལུང་དོན་ལ་ཡང་དཔྱད་པ་ན།   །ཕལ་ཆེར་ལོག་པར་རྟོག་པ་འཕེལ་འགྱུར་ཞིང༌། །གལ་ཏེ་ཡང་དག་དམ་བཅའ་ཙམ་ཞིག་གི།   །ངེས་པ་རྙེད་ཀྱང་སྒྲུབ་དང་སུན་འབྱིན་གྱི། །ཚད་མའི་སྟོབས་ཀྱིས་ཐེ་ཚོམ་མ་ཆོད་ཕྱིར། །འདམ་ལ་བཏབ་པའི་ཕུར་བ་བཞིན་འགྱུར་བས།   །ཡང་དག་བག་ཆགས་བརྟན་པོ་འཇོག་མི་ནུས། །ཅེས་དང༌། དེ་ཕྱིར་བློ་གྲོས་ཕྲ་ཞིང་མཛངས་པ་དང༌།  །ཀུ་ཤའི་རྩེ་ལྟར་མ་གྱུར་དེ་སྲིད་དུ། །ངོམས་མི་སླ་བར་རིགས་པའི་གཞུང་ལུགས་ལ། །   མཁས་པའི་བཤེས་ལ་བསྟེན་ཏེ་ལེགས་པར་སྦྱངས། །ཅེས་གསུངས་པ་ཡིན་ནོ།    །
 
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2021 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号