ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། ། གྲུབ་པའི་མཐའ་རྣམ་པར་བཞག་པ་ཐུབ་བསྟན་ལྷུན་པོའི་མཇེས་རྒྱན་ལས་ས་བཅད་གཉིས་པ། རང་གི་སྡེ་བའི་ལུགས་ཀྱི
སྤེལ་དུས།03-28  ཡོང་ཁུངས།http://www.teducn.com  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
གལ་ཏེ་གཏན་ཚིགས་འདི་ནི་གཏན་ཚིགས་ཡང་དག་ཏུ་མི་རིགས་ཏེ།   རྟགས་ཀྱིས་གཞི་ཆོས་ཅན་བཀག་པའི་ཕྱིར།    དེས་ན་རྟགས་དང་ཆོས་ཚོགས་པའང་ཁེགས་པས་དམ་བཅའ་ཚད་མས་བསལ་བ་དང༌། རྟགས་ཕྱོགས་ཆོས་མ་གྲུབ་པར་འགྱུར་པའི་ཕྱིར་རོ།   །ཞེ་ན། སྐྱོན་མེད་དེ།   རྟགས་ཆོས་གཉིས་རྣམ་པར་བཅད་ཙམ་ཡིན་པ་ལ་གཞི་མ་གྲུབ་པ་དེ་ལྟ་བུ་ཆོས་ཅན་དུ་རུང་བའི་ཕྱིར་རོ། །དེའི་རྒྱུ་མཚན་ཡང་། སློབ་དཔོན་ཕྱོགས་ཀྱི་གླང་པོས། མངོན་སུམ་དོན་དང་རྗེས་དཔག་དང༌། ། ཡིད་ཆེས་གྲགས་པས་རང་རྟེན་ལའོ།   །ཞེས་གསུངས་པའི་དོན། དཔལ་ལྡན་ཆོས་ཀྱི་གྲགས་པས་འཆད་པའི་ཚེ། བསྒྲུབ་བྱའི་ཆོས་རང་གི་རྟེན་གྱི་ཆོས་ཅན་དང་།   དེ་གཉིས་ཚོགས་པ་བསལ་ན་གཏན་ཚིགས་ཀྱི་སྐྱོན་ཡིན་པར་བསྟན་པའི་དོན་དུ་རང་རྟེན་ཞེས་གསུངས་པ་ཡིན་གྱི་ཆོས་ཅན་འབའ་ཞིག་པ་དང༌།བསྒྲུབ་བྱའི་ཆོས་གཉིས་ཚོགས་པའི་ཚོགས་དོན་བསལ་ཡང་སྐྱོན་མ་ཡིན་པར་བཤད་དོ། །ཆོས་ཅན་འབའ་ཞིག་པ་ཞེས་པ་ནི་ཆོས་ཅན་དུ་སྨྲས་ཀྱང་སྐབས་དེའི་བསྒྲུབ་བྱའི་ཆོས་ཀྱི་རྟེན་མིན་པས་ཆོས་ཅན་ཡན་གར་བར་སོང་བའི་དོན་ནོ།   །
གཏན་ཚིགས་འགོད་པའི་སྐབས་སུ་རྩོད་གཞིར་གང་བྱུང་དེ་ཉིད་ལ་ཕྱོགས་ཆོས་འགྲུབ་དགོས་ན་ཆོས་ཅན་འབའ་ཞིག་པ་དང༌།   རང་རྟེན་གྱི་ཆོས་ཅན་གཉིས་སུ་འབྱེད་པའི་དོན་མེད་དོ། །དེའི་ཕྱིར་བདག་དང་གཙོ་བོ་སོགས་འགོག་པའི་ཚེ་རང་ལྡོག་ནས་དགག་དགོས་པས་རང་རྒྱུད་ཀྱི་སྦྱོར་བའི་རྩོད་གཞིར་གཟུང་དགོས་པ་དང༌། དེའི་ཚེ་དེ་དག་དངོས་མེད་་དུ་སྒྲུབ་པའི་རྟགས་ཀྱིས་ཆོས་ཅན་བཀག་ཀྱང་སྐྱོན་དུ་མི་འགྱུར་ཏེ། བསྒྲུབ་བྱ་བདག་དང་གཙོ་བོ་སོགས་མེད་པར་རྟོགས་པའི་རྗེས་དཔག་སྐྱེ་བ་ལ་དེ་ཉིད་ཐབས་ཡང་དག་པར་འགྱུར་བའི་ཕྱིར་རོ།  །
དེས་ན་མཁས་གྲུབ་ཐམས་ཅད་མཁྱེན་པ་ནི།   དེ་ལྟ་བུའི་རྟགས་ལ་ནི། ཆོས་ཅན་དང་མེད་ངེས་ཀྱི་ཚོགས་དོན་བསྒྲུབ་བྱ་ཡིན་པས་ཆོས་ཅན་གཞི་མ་གྲུབ་པ་ཉིད། དམ་བཅའ་ཚད་མས་གྲུབ་པའི་སྒྲུབ་བྱེད་ཡིན་པས་སྐྱོན་མེད་ལ།    གཞི་མ་གྲུབ་ཀྱང་རྟགས་ངེས་པའི་ཤེས་འདོད་ཆོས་ཅན་ཡིན་པ་མི་འགལ་ཏེ། གཞི་མ་གྲུབ་ཀྱང་ཁྱབ་པ་ངེས་པའི་མཐུན་དཔེ་ཡིན་པ་མི་འགལ་བ་བཞིན་ནོ།   །དེས་ན་རང་རྟེན་ལའོ་ཞེས་པ་ཡང་རང་གི་རྟེན་དུ་གཞི་གྲུབ་པའི་ཆོས་ཅན་དགག་ན་རྟགས་ཀྱི་སྐྱོན་དུ་སྟོན་པ་ཡིན་གྱི་ཆོས་ཅན་ཡོད་པ་བཀག་ཙམ་རྟགས་ཀྱི་སྐྱོན་དུ་སྟོན་པ་མིན་ནོ། །དེའི་ཕྱིར་བདག་དང་གཙོ་བོ་སོགས་ཁོ་ན་ཆོས་ཅན་དུ་འཛིན་གྱི་དེ་དག་གི་སྒྲ་དོན་ཆོས་ཅན་དུ་མི་འཛིན་པར་གསུངས་སོ།  །
རྒྱལ་ཚབ་ཐམས་ཅད་མཁྱེན་པས་ནི་ཕྱི་རྒོལ་གྱིས་གང་ཟག་རང་རྐྱ་བ་དང༌།   དེར་སྣང་བ་གཉིས་གཅིག་ཏུ་འཁྲུལ་ནས་ཤེས་འདོད་ཞུགས་ཤིང་སྣང་བའི་སྒྲ་དོན་གྱི་སྟེང་དུ་རྟགས་ཚད་མས་གྲུབ་ལ། གང་ཟག་རང་རྐྱ་བ་ཆོས་ཅན་དུ་མ་བཟུང་ན་གང་ཟག་གི་བདག་རང་ལྡོག་ནས་མི་ཁེགས་ཤིང་ཕྱིར་རྒོལ་གྱིས་དེར་སྣང་གི་སྒྲ་དོན་དང་གཅིག་ཏུ་ཞེན་ནས་འཇུག་པས་སྒྲ་དོན་ཆོས་ཅན་དུ་མི་རུང་བའི་སྐྱོན་ཡང་མེད་དོ། །དེས་ན་རྟགས་ཡང་དག་ཡིན་ན་ཤེས་འདོད་ཆོས་ཅན་གཞི་གྲུབ་པས་ཁྱབ་ཀྱང༌།  ཏགས་ཡང་དག་གི་ཤེས་འདོད་ཆོས་ཅན་ཡིན་ན་གཞི་གྲུབ་པས་མ་ཁྱབ་བོ། །ཞེས་གསུངས་སོ།   །
དེ་ལ་རྗེ་ཐམས་ཅད་མཁྱེན་པའི་སྲས་ཀྱི་་ཐུ་བོ་གཉིས་ཀྱི་བཞེད་པ་ནི་ཤིན་ཏུ་ཟབ་པས་བདག་ལྟ་བུས་འདི་འཐད་དང་འདི་མི་འཐད་ཅེས་པའི་རྣམ་བཞག་བྱེད་ག་ལ་ནུས།    འོན་ཀྱང་རྗེ་ཐམས་ཅད་མཁྱེན་པ་རང་ཉིད་ཀྱིས་དབུ་མ་རྒྱན་གྱི་ཟིན་བྲིས་སུ་དོན་འདི་གསལ་བར་བཀའ་སྩལ་བ་རྣམས་ནི་ཕྱོགས་ཕྱི་མ་དང་མཐུན་ཤས་ཆེ་ཞིང་གོ་བ་སྟེར་ཕུལ་ཤིན་ཏུ་ཆེ་བར་འདུག་པས་གསུང་ཇི་ལྟ་བ་བཞིན་དུ་ཡི་གེ་མ་ཉམས་པར་དགོད་པར་བྱ་སྟེ།     
དེ་ཉིད་ལས།   ཕྱོགས་གླང་གིས་གསུངས་པའི་དོན་རྣམ་འགྲེལ་ལས།    དཔག་བྱ་དཔོག་པར་བྱེད་པ་ཡི།   །དོན་གྱི་ཐ་སྙད་གནས་པ་འདི།  །ཤེས་པ་ལ་གྲུབ་ཐ་དད་ལ།   །བརྟེན་ནས་རྣམ་པར་བརྟགས་པ་ཡིན། །ཞེས་གསུངས་པ་ལྟར་གཞི་དངོས་པོ་དགོས་པ་བྱས་པས་སྒྲ་མི་རྟག་པ་དང༌།དུ་བ་ལ་མེ་ཡོད་དུ་བསྒྲུབ་པ་ལ་ཡང་རྟོག་པ་ལ་སྒྲ་དང་ལ་གཉིས།   དེ་གཉིས་མ་ཡིན་ལས་ལོག་པར་སྣང་བའི་དོན་ཉིད་དགག་སྒྲུབ་ཀྱི་དངོས་རྟེན་ཡིན་གྱི་སྒྲ་དང་ལ་ཉིད་དངོས་ཀྱི་རྟེན་མིན་ཏེ། དགག་སྒྲུབ་བྱེད་པའི་རྟོག་པ་ལ་དངོས་སུ་མི་སྣང་བའི་ཕྱིར་དང༌།    ཆོས་གཅིག་ཅིག་བསྒྲུབས་ན་དེའི་ཆོས་ཐམས་ཅད་གཅིག་ཅར་དུ་བསྒྲུབ་པར་འགྱུར་བའི་ཕྱིར་རོ།  །
འོན་ཀྱང་དེ་ལྟར་སྣང་བའི་སྣང་གཞི་ནི་སྒྲ་དང་ལ་ཡིན་པས་གཞི་དངོས་པོར་གྱུར་པ་དགོས། གཞི་ཆོས་ཅན་དངོས་པོ་ཡིན་པ་མི་དགོས་པ་གཙོ་བོ་དང་དབང་ཕྱུག་ལ་སོགས་པ་རྩོད་གཞིར་བཟུང་བ་ལ་ཡང་རྟོག་པ་ལ་གཙོ་བོ་དང་དབང་ཕྱུག་མ་ཡིན་པ་ལས་ལོག་པར་སྣང་བ་ནི་ཡོད་ལ། དེ་ཉིད་ལ་དམིགས་ནས་དངོས་པོར་མེད་ཅེས་བསྒྲུབ་པས་གཞི་དེ་ལ་ཕྱིར་རྒོལ་ལ་ཤེས་འདོད་དང༌།    སྔར་རྒོལ་ལ་དཔག་འདོད་མེད་པའི་སྐྱོན་མེད་ལ། སྣང་གཞི་དངོས་པོར་མེད་པ་དོན་བྱེད་ནུས་སྟོང་དང༌།    སྣང་གཞི་བདེན་པར་ཡོད་པ་བདེན་པའི་གཅིག་དུ་བྲལ་གྱིས་བཀག་པ་ན།    རྟགས་དེ་གཉིས་གཙོ་བོ་དང་དབང་ཕྱུག་མ་་ཡིན་པ་ལས་ལོག་པར་སྣང་བ་དེ་ཉིད་ལ་འགྲུབ་ལ།   དེ་ཉིད་བསྒྲུབ་བྱའི་ཆོས་གང་གི་ཆོས་སུ་འཇོག་པའི་ཆོས་ཅན་དང༌། ཕྱོགས་ཀྱི་ཆོས་གང་གི་ཆོས་སུ་བཞག་པའི་ཕྱོགས་སུ་བཏགས་པ་ཉིད་ཡིན་པས་ཆོས་ཅན་འབའ་ཞིག་པ་བཀག་པས་ཀྱང་ཕྱོགས་ཆོས་མི་འགྲུབ་པའི་སྐྱོན་མེད་དོ།   །
བྱས་པས་སྒྲ་མི་རྟག་པར་བསྒྲུབ་པ་ན། རྟོག་པ་ལ་སྒྲ་མ་ཡིན་ལས་ལོག་པར་སྣང་བའི་སྣང་བའི་རང་ལྡོག་དངོས་པོར་མེད་པས།   བྱས་པ་རྟགས་དེ་ལ་འགྲུབ་པ་མིན་གྱི། །སྣང་གཞི་སྒྲ་ལ་གྲུབ་དགོས་ཏེ།དངོས་པོ་རྟགས་དང་བསྒྲུབ་བྱའི་ཆོས་སུ་བྱེད་པའི་གནད་ཀྱིས་སོ།   །དོན་བྱེད་པས་སྟོང་པ་དང་དུ་བྲལ་རྟགས་སུ་བྱེད་པའི་ཚེ་ན།   སྣང་གཞི་དང་སྣང་ལྡོག་གཉིས་ཀ་རྟགས་དེ་ཡིན་པར་གྲུབ་ཅིང༌། སྣང་གཞི་རྟགས་དེ་ཡིན་པར་གྲུབ་ན། དེ་བཀག་ཀྱང་སྣང་ལྡོག་སྒྲུབ་ཆོས་དང་ཕྱོགས་ཆོས་ཀྱི་ཆོས་གཉིས་བརྟེན་པའི་ཆོས་ཅན་དུ་འགྲུབ་བོ།    །འདི་ནི་སྙིང་པོ་བསྡུས་པ་སྟེ།   རྒྱས་པར་དབུ་མ་སྣང་བ་ལས་ཤེས་དགོས་སོ།   །ཞེས་གསུངས་སོ།   །གསུངས་འདི་དག་ཤིན་ཏུ་བརླིང་ཞིང་དོན་ཆེ་བར་ཡོད་པས་འབྲུ་ནོན་ཞིབ་ཏུ་བྱ་དགོས་མོད་ཀྱང་འདིར་ནི་སྐབས་དོན་སྒྲིབ་པར་འགྱུར་བས་མ་བྲིས་ལ།   དོན་དུ་འགྱུར་ན་གཞན་དུ་འཆད་པར་འདོད་དོ། །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2024 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号