ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། ། གྲུབ་པའི་མཐའ་རྣམ་པར་བཞག་པ་ཐུབ་བསྟན་ལྷུན་པོའི་མཇེས་རྒྱན་ལས་ས་བཅད་གཉིས་པ། རང་གི་སྡེ་བའི་ལུགས་ཀྱི
སྤེལ་དུས།03-28  ཡོང་ཁུངས།http://www.teducn.com  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
གཉིས་པ་ཞར་བྱུང་ལ། ཁ་ཅིག་ན་རེ། ཅི་མང་པོས་བཀུར་བའི་སྡེ་པ་གནས་མ་བུ་པ་སོགས་ཀྱིས་བརྗོད་དུ་མེད་པའི་གང་ཟག་གི་བདག་ཁས་ལེན་ནམ་མི་ལེན། ཁས་ལེན་ན་ནི་ལྟ་བ་བཀར་བཏགས་ཀྱི་ཕྱག་རྒྱ་བཞི་ཁས་མི་ལེན་པར་གྱུར་པས། དེ་དག་ནང་བའི་གྲུབ་མཐའ་སྨྲ་བ་མ་ཡིན་པར་འགྱུར་བའམ། ཡང་ན་རང་སྡེ་ལ་གྲུབ་མཐའ་བཞིར་གྲངས་མ་ངེས་པར་འགྱུར་རོ།   །ཅི་སྟེ་ཁས་མི་ལེན་ན་ནི་གཞུང་དུ་མར་འདི་དག་གང་ཟག་ཏུ་སྨྲ་བ་ཡིན་པར་བཤད་པ་དང་འགལ་ལོ་ཞེ་ན། འདིའི་ལན་ལ།   རང་རེའི་མཁས་པ་རྣམས་འཆད་ཚུལ་མི་མཐུན་ཏེ། དེ་ལ་མཁས་པ་ཁ་ཅིག་ནི། མང་བཀུར་གྱི་སྡེ་པ་གནས་མ་བུ་པ་དང༌། བཟང་པོའི་ལམ་པ་དང༌། ཀུ་རུ་ཀུལླེ་པ་དང༌། ཆོས་སྦས་པ་དང༌།   བླ་མ་པ་ལྔ་ནི་གང་ཟག་བརྗོད་དུ་མེད་པ་ཙམ་འདོད་ཀྱི་གང་ཟག་གི་བདག་མི་འདོད་དེ། ཆོས་ཐམས་ཅད་བདག་མེད་པར་འདོད་པའི་ཕྱིར་དང༌། གང་ཟག་ཀྱང་རྫས་བཏགས་གང་དུའང་ཁས་མ་བླངས་པའི་ཕྱིར། རྟགས་ཟུར་དང་པོ་ནི། དེ་དག་གི་གང་ཟག་ཕུང་པོ་ལས་ངོ་བོ་ཐ་དད་དུ་བརྗོད་ན།   བཅོམ་ལྡན་འདས་ཀྱིས་ཆོས་ཐམས་ཅད་བདག་མེད་པར་གསུངས་པ་དང་འགལ་ལ།   ཕུང་བོ་དང་གཅིག་ཏུ་བརྗོད་ན་བདག་དུ་མར་འགྱུར་བས་གནོད་པས་ན།    བདག་བརྗོད་དུ་མེད་པ་བརྟེན་པ་མཛེས་ཞེས་སྨྲ་བར་ཚད་མའི་དེ་ཉིད་རྩ་འགྲེལ་ལས་བཤད་པས་གྲུབ་ལ། རྟགས་ཟུར་ཕྱི་མ་ནི་མཛོད་འགྲེལ་ལས།   གང་གནས་མའི་བུ་རྣམས་གང་ཟག་ཡོད་པར་འདོད་པ་ཇི་ལྟ་བུ། འདི་ནི་རེ་ཞིག་དཔྱད་པར་བྱ་བ་ཡིན་ཏེ།    ཅི་དེ་དག་རྫས་སུ་འདོད་དམ། འོན་ཏེ་བཏགས་པར་འདོད། ཅེས་པ་ནས། དེ་ནི་རྫས་སུ་ཡོད་པ་ཁོ་ནའང་མིན་ལ།བཏགས་པར་ཡོད་པ་ཡང་མ་ཡིན་ནོ། །ཞེས་གསུངས་པས་གྲུབ་བོ།   །དེས་ན་མང་བཀུར་སྡེ་ལྔས་ལས་འབྲས་ཀྱི་རྟེན་གང་ཟག་ནི་བརྗོད་དུ་མེད་པར་ཁས་ལེན་གྱི་གང་ཟག་གི་བདག་ཁས་མི་ལེན་ལ། རྟོག་གེ་འབར་བ་སོགས་ལས་ཀྱང་གང་ཟག་ཏུ་སྨྲ་བ་ཞེས་གསུངས་ཀྱི། གང་ཟག་གི་བདག་ཏུ་སྨྲ་བ་ཞེས་མ་གསུངས་པའི་ཕྱིར་རོ། །དེའི་ཕྱིར་འཇུག་པ་ལས། ཁ་ཅིག་དེ་ཉིད་གཞན་ཉིད་རྟག་མི་རྟག    །ཞེས་གསུངས་པ་ནི། ཐལ་འགྱུར་པ་ལྟར་ན་རྫས་ཡོད་ཁས་བླངས་པར་སོང་བའི་དོན་ཡིན་ཞེས་གསུང་ངོ༌།   ཡང་མཁས་པ་གཞན་དག་ནི་འདི་ལྟར་འཆད་དེ།     མང་བཀུར་སྡེ་ལྔས་གང་ཟག་གི་བདག་ཡོད་པར་འདོད་དེ། དེ་དག་གང་ཟག་ཏུ་སྨྲ་བར་གསུངས་པའི་ཕྱིར་དང༌། གང་ཟག་གི་བདག་ཡོད་པར་གསུངས་དགོས་ཀྱི་རང་སྡེ་ཡོད་པར་མདོ་ལས་ཀྱང་བཤད་པའི་ཕྱིར་དང༌། འདི་དག་གིས་མདོ་དེ་སྒྲ་ཇི་བཞིན་པར་གང་ཟག་གི་བདག་ཁས་བླངས་པས་ལྟ་བའི་མཆེ་བས་རྨས་པར་ཀུན་མཁྱེན་དབྱིག་གཉེན་གྱིས་བཤད་པའི་ཕྱིར་དང༌། རྟོག་གེ་འབར་བ་ལས་ཀྱང༌།   སྡེ་པ་བཅོ་བརྒྱད་པོ་གཞན་རྣམས་བདག་མེད་པར་སྨྲ་བ་དང༌། མང་བཀུར་སྡེ་ལྔ་ནི་གང་ཟག་ཏུ་སྨྲ་བར་དམིགས་ཀྱིས་བཀར་བའི་ཕྱིར་དང༌།  འཇུག་པ་རྩ་འགྲེལ་ལས་ཀྱང་གང་ཟག་རྫས་ཡོད་དུ་འདོད་པར་གསལ་བར་བཤད་པའི་ཕྱིར།   དེས་ན་འདི་དག་གིས་གང་ཟག་གི་བདག་ཁས་ལེན་པ་ཡིན་ཅིང༌། རང་སྡེ་ལ་བདག་མེད་ཁས་ལེན་དགོས་པས་མ་ཁྱབ་བོ། །ཞེས་ཟེར་བ་དང༌། ཡང་མཁས་པ་འགའ་ཞིག་རྒྱུ་མཚན་དེའི་ཕྱིར། མང་བཀུར་སྡེ་ལྔ་ལྟ་བའི་སྒོ་ནས་གཞན་སྡེར་འཇོག་གོ །ཞེས་གསུང་ངོ༌།  །
འོ་ན་ཁྱོད་རང་གིས་ལུགས་སྔ་ཕྱི་གཉིས་ལས་གང་ཞིག་ཁས་ལེན་པ་ཡིན་ཞེ་ན་བརྗོད་པར་བྱ་སྟེ།སྤྱིར་མང་བཀུར་སྡེ་ལྔས་བརྗོད་དུ་མེད་པའི་གང་ཟག་ཁས་ལེན་པར་ནི་ལུགས་སྔ་ཕྱི་གཉིས་ཀས་བཞེད་པར་སྣང་ཞིང༌། བཞེད་དགོས་པ་ཡང་ཡིན་ཏེ།   ཤིང་རྟ་ཆེན་པོ་རྣམས་ཀྱིས་དེ་ལྟར་ལན་ཅིག་མ་ཡིན་པར་་བཤད་པར་མཐུན་སྣང་དུ་གྲུབ་པའི་ཕྱིར་རོ། །སྡེ་ལྔས། ཆོས་ཐམས་ཅད་བདག་མེད་པར་གསུངས་པའི་ལུང་གིས་ཕུང་པོ་ལས་ངོ་བོ་ཐ་དད་པའི་གང་ཟག་ཁས་མི་ལེན་པར་བསྒྲུབས་པས་ནི་གང་ཟག་གི་བདག་་་མེད་པར་འདོད་པར་བསྒྲུབ་མི་ནུས་ཏེ། དེས་ཆོས་ཐམས་ཅད་བདག་མེད་པར་གསུངས་པའི་དོན་མུ་སྟེགས་པས་བཏགས་པ་ལྟར་གྱི་ཕུང་པོ་ལས་དོན་གཞན་དུ་གྱུར་པའི་བདག་མེད་པའི་དོན་དུ་བཀྲལ་བའི་ཤུགས་ཀྱིས་ལུང་དེས་སྤྱིར་གང་ཟག་གི་བདག་ཡོད་པ་ཙམ་དུ་འདོད་པ་ལ་མི་གནོད་པར་འདོད་པར་སྣང་བས།ཅི་ནས་གང་ཟག་གི་བདག་ཡོད་པར་འདོད་པའི་སྒྲུབ་བྱེད་དུ་སྣང་བའི་ཕྱིར་རོ།  །དབུ་མ་རྒྱན་ལས་ཀྱང༌། ཆོས་ཐམས་ཅད་བདག་མེད་པར་གསུངས་པའི་དོན་གྲངས་ཅན་ལ་སོགས་པའི་ལུགས་ཀྱི་དངོས་པོ་དགག་པའི་དོན་དུ་གནས་མ་བུ་པས་འདོད་པར་བཤད་དོ། །མཛོད་འགྲེལ་ལས། དེ་ནི་རྫས་སུ་ཡོད་པ་ཁོ་ནའང་མིན་ལ། བཏགས་པར་ཡོད་པ་ཡང་མ་ཡིན་ནོ།  །ཞེས་གནས་མ་བུ་པའི་འདོད་པ་བརྗོད་སྐབས་གསུངས་པས་ཀྱང་ལུགས་དེས་གང་ཟག་རྫས་བཏགས་གང་དུའང་ཁས་མ་བླངས་པར་བསྒྲུབ་མི་ནུས་ཏེ།དེ་ནི་དེའི་གོང་དུ་ཁྱོད་ཀྱིས་རྫས་སུ་ཡོད་པར་འདོད་དམ། བཏགས་པར་ཡོད་པར་འདོད། ཅེས་་དྲིས་ནས་ཕྱོགས་གཉིས་ཀ་ལ་སྐྱོན་བརྗོད་པ་ན་དེས་རྫས་བཏགས་གང་ཡང་མ་ཡིན་པར་སྨྲས་ན་ཡང་འགོག་ཚུལ་འདི་ལྟར་བྱེད་ཅེས་གསུངས་པ་ཡིན་གྱི།  གནས་མ་བུ་པའི་རྩ་བའི་ཁས་ལེན་ལ་གང་ཟག་རྫས་བཏགས་གང་དུའང་ཁས་མི་ལེན་པར་བསྟན་པ་མ་ཡིན་པའི་ཕྱིར་དང༌།   ཚིག་དེ་ཀའི་རྫས་སུ་ཡོད་པ་ལ་ཁོ་ནའི་སྒྲ་སྦྱར་ལ།   བཏགས་པར་ཡོད་པ་ལ་ཁོ་ནའི་སྒྲ་མ་སྦྱར་བ་ལའང་ནུས་པ་འདོན་ལུགས་ཤིག་ཡོད་པའི་ཕྱིར་རོ། །གཞན་དུ་ན། མཛོད་འགྲེལ་ལས་ལུང་དེ་ཀའི་འོག་ཏུ།  གང་ཟག་རྫས་སུ་ཡོད་པ་འགོག་པའི་ལུང་དང་རིགས་པ་དུ་མ་ཞིག་གསུངས་པ་རྣམས་ཕྱོགས་སྔ་མ་ལ་གནོད་པ་མ་ཡིན་པར་འགྱུར་་རོ། །དེར་མ་ཟད། མཛོད་འགྲེལ་དུ་གང་ཟག་བཏགས་ཡོད་དུ་སྟོན་པའི་གཟུགས་ཅན་སྙིང་པོའི་མདོ་ལ་སོགས་པའི་ལུང་མང་དུ་དྲངས་པའི་རྗེས་སུ། དེ་དག་ནི་གཞུང་འདི་ཚད་མར་མི་བྱེད་པ་ཉིད་དོ། །ཅིའི་ཕྱིར་ཞེ་ན་འདི་ཁོ་བོ་ཅག་གི་སྡེ་པ་མི་འདོན་ཏོ།   །ཞེས་ཟེར་རོ་ཞེས་གསུངས་པས་ཀྱང་དེ་དག་གིས་་གང་ཟག་རྫས་ཡོད་དུ་འདོད་པར་འགྲུབ་ལ། འཇུག་པ་རྩ་འགྲེལ་གྱི་ལུང་དོན། ཐལ་འགྱུར་བའི་རིགས་པས་འཕུལ་ནས་གང་ཟག་རྫས་ཡོད་ཁས་བླངས་པར་སོང་བའི་དོན་དུ་བྱེད་པའང་འཐད་པར་མི་སེམས་ཏེ།ཚུལ་དེ་ནི་མང་བཀུར་སྡེ་ལྔར་མ་ཟད་བྱེ་སྨྲ་ཀུན་ལའང་མཚུངས་པའི་ཕྱིར་ཏེ། བྱེ་བྲག་སྨྲ་བ་ཐམས་ཅད་་ཀྱིས་གང་ཟག་བདེན་པར་འདོད་པས། བདེན་པའི་དོན་ཚུགས་ཐུབ་དང༌།   དེ་ཡང་གཞན་ལ་རག་མ་ལས་པའི་རྫས་ཡོད་དུ་དབུ་མ་ཐལ་འགྱུར་བའི་རིགས་པས་འཕུལ་ནུས་པས།   མང་བཀུར་སྡེ་ལྔ་ཁོ་ན་དམིགས་ཀྱིས་བཀར་བ་དོན་མེད་པར་འགྱུར་བའི་ཕྱིར། དེས་མ་ཟད། འདིས་གང་་ཟག་རྫས་ཡོད་འདོད་པར་རྗེ་ཐམས་ཅད་མཁྱེན་པས་གསལ་བར་བཤད་དེ།འཇུག་པའི་རྣམ་བཤད་ཆེན་མོ་ལས། འདི་དག་གི་འདོད་པ་བརྗོད་པའི་སྐབས་སུ་གང་ཟག་དེ་རྫས་སུ་ཡོད་པར་ཡང་འདོད་དེ།ལས་གཉིས་ཀྱི་བྱེད་པ་པོ་དང། དེ་གཉིས་ཀྱི་འབྲས་བུ་བདེ་སྡུག་གི་ཟ་བ་པོ་ཉིད་དུ་བརྗོད་པའི་ཕྱིར་དང་། འཁོར་བར་བཅིངས་པ་དང་མྱང་འདས་ཀྱི་སྐབས་སུ་ཐར་པ་པོའམ་གྲོལ་བ་པོ་ཡིན་པའི་ཕྱིར་རོ། །ཞེས་གསུངས་པའི་ཕྱིར། དབུ་མ་འཇུག་པ་ལས་ཀྱང༌། གང་ཟག་རྫས་ཡོད་འདོད།ཅེས་དང༌། རང་འགྲེལ་ལས་ཀྱང༌། རྫས་སུ་ཡོད་པར་སྨྲ་བ་བསལ་བའི་ཕྱིར་བཤད་པ་ཞེས་གསུངས་ཀྱི་རྫས་ཡོད་དུ་ཐལ་ལོ་ཞེས་དང༌། རྫས་ཡོད་དུ་འགྱུར་རོ་ཞེས་མ་གསུངས་པའི་ཕྱིར་དང།དེ་ཡང་ཕྱོགས་སྔ་མར་བརྗོད་པའི་གཞུང་ཉིད་དུ་འབྱུང་བའི་ཕྱིར་དང་།ཕྱོགས་གཞན་འགོག་པའི་རིགས་པའི་སྐབས་སུ་ཁོང་ན་གནས་པའི་དོགས་པ་སློང་བ་དང༌། མཐའ་གཞན་འགོག་པ་སོགས་བྱེད་ཀྱི་ཕྱོགས་སྔའི་གཞུང་འགོད་པའི་ཚེ་ཁོ་རང་གི་འདོད་ཚུལ་ཁོ་ན་དྲང་པོར་སྨྲ་བ་ནི་རྒྱ་གར་མཁས་པའི་ལུགས་སྲོལ་ཡིན་པའི་ཕྱིར། ཐལ་འགྱུར་པའི་རིགས་པས་འཕུལ་འཚམས་ཙམ་མིན་པར་ཤིན་ཏུ་གསལ་ལོ།   །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2024 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号