| དེ་ལྟ་མིན་ན་རང་དོན་དུ་ནི་ཚངས་པ་དང་བརྒྱ་བྱིན་གྱི་དཔལ་ཡང་མི་བཞེད་ཅིང༌། རང་དོན་དུ་ཐར་པའི་བདེ་བའང་སྒྲུབ་པར་མི་བཞེད་ན་ཚེ་འདིའི་ཕུན་ཚོགས་ལ་ཐུགས་ཆགས་པའི་གོ་སྐབས་ག་ལ་ཡོད། ཚུལ་འདི་ནི་བདག་གི་དྲིན་ཅན་རྩ་བའི་བླ་མ་རྗེ་བཙུན་ཐམས་ཅད་མཁྱེན་པ་འདིའི་རྣམ་པར་ཐར་པ་ཐུན་མོང་མིན་པ་ཞིག་སྟེ། དེང་སང་སྙིགས་མ་ལྔ་ཆེས་ཆེར་བདོ་བས་སྐྱེ་བོ་ཕལ་ཆེར་ཚེ་འདིའི་ལྟོ་གོས་ཙམ་ཞིག་དོན་དུ་གཉེར་བ་ལས་ཆོས་ལ་སེམས་པའི་གོ་སྐབས་བྲལ་ཞིང༌། ཆོས་པར་རློམ་པ་ཕལ་མོ་ཆེ་ཡང་ཚེ་འདིའི་རྙེད་བཀུར་ངན་ངོན་རེ་ལ་ཆགས་ནས་སྒོ་གསུམ་གྱི་སྤྱོད་པ་ཅི་བྱེད་རྙེད་བཀུར་སྙན་གྲགས་སྒྲུབ་པའི་ཐབས་ཁོ་ནར་བྱེད་པ་ལས་ཚེ་འདིའི་འཁྲི་བ་བཅད་དེ་རྒྱལ་བ་དགྱེས་པའི་ལམ་ལ་སློབ་པ་ཉིན་མོའི་སྐར་མ་ལྟར་དཀོན་པའི་དུས་མཐའ་འདིར། ཡངས་པའི་ས་ཆེན་པོ་ལ་སྟོབས་ཀྱིས་འཁོར་ལོས་བསྒྱུར་བ་གོང་མ་བདག་པོ་ཆེན་པོས་གུས་པས་མཆོད་པའང་བདག་གིར་མི་མཛད་ཅིང་རི་དྭགས་ལ་ཤ་བྱིན་པ་ལྟར་ཚུལ་འདིས་རྐྱེན་བྱས་ནས་སྲིད་པའི་ཕུན་ཚོགས་མཐའ་དག་ལ་ཆེས་ཆེར་སྐྲག་པར་མཛད་པ་འདི་འདྲ་བའི་རྣམ་པར་ཐར་པ་ནི་བློ་གཟུ་བོར་གནས་པ་རྣམས་ཀྱིས་ལེགས་པར་བསམས་ན་སྙིགས་མ་ལྔ་བདོ་བའི་དུས་མཐའ་འདིར་འདི་འདྲ་བའི་བདག་ཉིད་ཆེན་པོ་བྱོན་པ་ནི་སྙིགས་མའི་འགྲོ་བ་རྣམས་མགོན་དང་བཅས་སོ་སྙམ་དུ་སྙིང་ནས་དད་ཅིང་གུས་པས་གསོལ་བ་གདབ་པར་བྱ་བའི་གནས་སོ། ། ཚུལ་འདི་དག་ལ་ནི་རྗེ་རང་ཉིད་ཀྱི་ཞལ་ནས་འདི་ལྟར་གསུངས་ཏེ། མཁན་སློབ་ཀྱི་སྤྱན་སྔར་ཇི་ལྟར་ཁས་བླངས་བའི་ལྷག་པ་ཚུལ་ཁྲིམས་ཀྱི་བསླབ་པ་རིན་པོ་ཆེར་གཅེས་སྤྲས་སུ་བྱེད་པའི་སྒོ་ནས་ཡི་དམ་གྱི་ལྷ་དུ་མའི་བསྙེན་སྒྲུབ་ལ་བརྩོན་པར་བྱར་ཡོད་པ་དང༌། གོང་མ་ཆེན་པོར་དགོངས་པ་ཞུ་བདེ་པ་སོགས་འབྲུམ་པ་མ་ཐར་བ་ཡང་རྐྱེན་ངན་དགེ་བའི་བཤེས་གཉེན་དུ་ཆེ་བ་བྱུང་ངོ༌། །སྨྲས་པ། དལ་འབྱོར་རྟེན་བཟང་ལན་ཅིག་ཐོབ་དུས་འདིར། །རྩེ་གཅིག་དམ་ཆོས་བསྒྲུབ་པའི་ལོང་མེད་པར། ། རྟག་ཏུ་གཞན་ངོ་བསྲུང་བས་འདའ་དགོས་སྐབས། །འབྲུམ་ནད་མ་ཐར་བ་ཡང་གྲོགས་སུ་བཟང༌། །ས་ཡི་ཚངས་པ་འཇམ་དབྱངས་གོང་མའི་བཀས། །སྦྱངས་སྟོབས་ཡོན་ཏན་ཆུང་བའི་སྙོམ་ལས་པ། །བདག་འདྲར་ཤར་ཕྱོགས་གོང་མའི་རྒྱལ་ཁབ་ཏུ། །བསྟན་འགྲོའི་ཕན་བདེ་སྤེལ་ཕྱིར་ཤོག་ཅེས་གསུངས། བཀའ་ནན་ལྕི་བ་རི་གཟར་རྦབ་ལྟ་བུ།།བཟློག་པར་དཀའ་ཞིང་བསྟན་འགྲོར་ཕན་གྱུར་ན། །འགྲོ་བར་སྨོན་ཡང་རྣམ་གཡེང་མི་འཕེལ་བ། །རྐྱེན་ངན་དགེ་བའི་བཤེས་གཉེན་ཆེན་པོར་བྱུང༌། །མདོ་རྒྱུད་ཟབ་དོན་དཔག་པར་དཀའ་བའི་གནད། །ཚུལ་བཞིན་མ་རྟོགས་རྒྱ་ཆེའི་བཤད་རྩོམ་སོགས། །མཁས་བྱའི་གནས་ལུགས་ཀུན་ལ་མི་མཁས་ཀྱང༌། །སྤྲོས་པའི་མཚན་མ་རྣམས་ལ་བདག་མི་སྤྲོ། །དེ་ཕྱིར་རྟག་ཏུ་ཚུལ་ཁྲིམས་གཙང་ལྡན་ཞིང༌། །རིས་མེད་བསྟན་འགྲོར་གུས་དང་བརྩེ་སེམས་ཀྱིས། །ཐུབ་བསྟན་ཉམས་པ་མེད་པར་འཛིན་པ་ལ། །བློ་བཟང་གྲགས་པའི་དཔལ་དང་མཚུངས་གྱུར་ཅིག ཅེས་གསུངས་སོ། །དེ་ནས་སྡེ་སྲིད་རིན་པོ་ཆེས་ཞུ་སམ་ཞིག་ལ་སྔ་སོར་གོང་ས་ལྔ་པ་ཆེན་པོ་ཆུ་ཁྱི་ཧོར་ཟླ་གཉིས་པའི་ཚེས་ཉེར་ལྔ་ལ་ཞིང་གཤེགས་ཀྱང་རེ་ཤིག་གསང་བ་མི་བྱེད་དཀའ་མེད་བྱུང་ཞིང་ད་ཆ་མཆོག་གི་སྤྲུལ་སྐུ་མཚོ་སྣ་ཕྱོགས་སུ་འཁྲུལ་བྲལ་བབས་ནས་གདན་འདྲེན་རྩིས་ཡིན་པས་པཎ་ཆེན་རིན་པོ་ཆེ་ཉིད་དགེ་ཚུལ་གྱི་མཁན་པོར་སྣ་དཀར་རྩེར་ཕེབས་དགོས་ཚུལ་ཞུས་པར་རྗེ་འདིས་ཀྱང་དགྱེས་བཞིན་དུ་ཞལ་གྱིས་བཞེས་ཏེ་ཆིབས་ཁ་བསྒྱུར་ནས་སྣ་དཀར་རྩེར་ཕེབས་ཏེ་དུས་ཚེས་ཁྱད་པར་ཅན་གྱི་ཉིན་སྣ་དཀར་རྩེའི་གཟིམ་ཆུང་དུ་རྗེ་འདིས་མཁན་སློབ་སྦྲགས་མ་མཛད་དེ། རྒྱལ་བ་ལྔ་པ་ཆེན་པོའི་མཆོག་གི་སྤྲུལ་པའི་སྐུ་ལ། དགེ་བསྙེན། བར་མ་རབ་བྱུང༌། དགེ་ཚུལ་གྱི་སྡོམ་པ་རྣམས་རིམ་གྱིས་ཕུལ་ཏེ་བློ་བཟང་རིན་ཆེན་ཚངས་དབྱངས་རྒྱ་མཚོ་ཞེས་མཚན་གསོལ། དེ་ནས་ཆོས་ཀྱི་ཐོག་མར་འཇམ་དཔལ་མཚན་བརྗོད་དང༌། ཚེ་མདོ། གདུགས་དཀར། སྒྲོལ་བསྟོད་ཕྱག་འཚལ་ཉེར་གཅིག ཤེར་སྙིང༌།འདའ་ཁ་ཡེ་ཤེས། སྨོན་ལམ་རྣམ་གསུམ། བསྟོད་ཆེན་བཞི་སོགས་ཀྱི་ལུང་དང༌། རྗེ་ཙོང་ཁ་པ་ཆེན་པོའི་བཀའ་འབུམ་ཐོར་བུ། རྣམ་ཐར་དད་པའི་འཇུག་ངོགས། ཐམས་ཅད་མཁྱེན་པ་དགེ་འདུན་རྒྱ་མཚོའི་གསུང་འབུམ་ལས་རྗེ་རང་ཉིད་ཀྱི་རྣམ་ཐར་དང༌། ཡབ་རྗེ་ཀུན་དགའ་རྒྱལ་མཚན་གྱི་རྣམ་ཐར་གྱི་ལུང་བཅས་འབུལ་བར་མཛད། དེ་ནས་རིམ་གྱིས་རྒྱལ་བ་དགེ་འདུན་རྒྱ་མཚོའི་གསུང་འབུམ་གྱི་ལུང་རྣམས་ཕུལ། དེ་ནས་ཕོ་བྲང་པོ་ཏ་ལར་ཕེབས་ནས་གོང་ས་མཆོག་གི་སྤྲུལ་པའི་སྐུ་ལ་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་མའི་དབང་བཞི་ཡོངས་སུ་རྫོགས་པ་འབུལ་བར་མཛད་ཅིང་གཞུང་ས་ནས་བསྐུལ་མ་མཛད་པ་ལྟར་རྒྱལ་དབང་ལྔ་བ་ཆེན་པོའི་སྐུ་གདུང་རིལ་པོར་བཞུགས་པའི་གསེར་གྱི་མཆོད་སྡོང་འཛམ་གླིང་རྒྱན་གཅིག་ལ་རབ་ཏུ་གནས་པ་རྒྱས་པར་མཛད། དེ་ནས་རྒྱུད་སྟོད་སྨད་སེ་འབྲས་སོགས་དབུས་ཕྱོགས་ཀྱི་ཆོས་དོན་གཉེར་བ་རྣམས་ལ་རང་རང་གི་དབང་པོ་དང་འཚམ་པའི་ཆོས་ཀྱི་བདུད་རྩི་རྒྱ་ཆེར་སྩལ་ཞིང་རབ་བྱུང་བསྙེན་རྫོགས་ནར་མར་སྒྲུབ་པར་མཛད། དེ་ནས་དགའ་ལྡན་རྣམ་པར་རྒྱལ་བའི་གླིང་དུ་ཕེབས་ཏེ་རྗེ་བདག་ཉིད་ཆེན་པོའི་གསེར་ཁྲིའི་སྟེང་ནས་དགའ་ལྡན་འདུས་ཚོགས་དང་ཕྱོགས་འདུས་ཀྱི་དད་ལྡན་བགྲང་བ་ལས་འདས་པ་ལ་ཆོས་ཀྱི་བདུད་རྩི་སྩལ་ཞིང་ཡར་ངོའི་གསོ་སྦྱོང་དང་དུས་འགྲིག་པས་ཆོས་བསྒྲགས་ཀྱི་མདོ་དང་སོ་ཐར་གྱི་མདོ་འདོན་པ་སོགས་གསོ་སྦྱོང་མཛད་དེ་རྗེ་རྒྱལ་བ་གཉིས་པའི་བསྟན་པ་རིན་པོ་ཆེ་དར་ཞིང་རྒྱས་ལ་ཡུན་རིང་དུ་གནས་པའི་རྟེན་འབྲེལ་བསྒྲིག་པར་མཛད། དེ་སྐབས་དགའ་ལྡན་སྐུ་གདུང་རིན་པོ་ཆེའི་དབུ་ཐོག་ཏུ་གོས་བཟང་བསྒྲིགས་ཀྱི་གནམ་རྒྱན་དང༌། 13/21 མདུན་ངོས། 上一页 11 12 13 14 15 16 下一页 尾页 |
