| དགག་དབྱེ་ཚར་ནས་ར་ཁ་བྲག་དང་ཕུར་བུ་ལྕོག་ཏུ་བདེ་མཆོག་དྲིལ་བུ་ལྷ་ལྔའི་ཆོ་ག་བཙུགས། ཞག་བདུན་གྱི་རིང་ཚོགས་འཁོར་མཆོད་པ་དགེ་འདུན་རྣམས་ལ་བསྙེན་བཀུར་ལེགས་པར་མཛད་དོ། །དེ་ནས་ཕུར་བུ་ལྕོག་ཏུ་ཕེབས་ཐར་པ་དོན་གཉེར་ཅན་མང་པོ་ལ་བསྙེན་རྫོགས་ཀྱི་སྡོམ་པ་གནང༌། སྒྲུབ་སྡེ་སོ་སོར་སྐྱ་སེར་མང་པོས་སེམས་བསྐྱེད་མཆོད་པ་དུ་མ་ཕུལ་བར་བྱང་ཆུབ་སེམས་ཀྱི་གདམས་ངག་དང་སེམས་བསྐྱེད་བསྔོ་སྨོན་ཡང་དག་མཛད། དགེ་སློང་དངོས་གྲུབ་ཀྱིས་ཞུས་ནས་ཉུང་ཤས་ཤིག་ལ་བཀའ་གདམས་ཐིག་ལེ་བཅུ་དྲུག་གི་དབང་གནང༌། མནལ་ལམ་དུ་མི་མངས་པའི་སྐྱོན་བྱུང་གསུང༌། བར་སྐབས་ཤིག་མཁར་རྡོ་མཁན་པོ་བཟོད་པ་རྒྱ་མཚོས་གདན་དྲངས་ནས་སེམས་བསྐྱེད་མཆོད་པ་མཛད།གནས་དེར་དགེ་འདུན་གྱི་སྡེ་ཡུན་རིང་གནས་པའི་ཐུགས་སྨོན་མཛད་དེ་ཉིན་འཁོར་དུ་ཕུར་བུ་ལྕོག་ཏུ་ཕེབས། དེ་ནས་སྒྲུབ་སྡེ་གསུམ་གྱི་དགེ་འདུན་ཐམས་ཅད་ལ། སྤྱིར་ཆོས་ལམ་རིམ་འདི་ལ་ལོང་བས་གླང་མཇུག་ལྟར་བྱེད་དགོས། ཁྱད་པར་དུ་ཚད་མེད་བཞིའི་སྒོ་ནས་བྱང་ཆུབ་ཀྱི་སེམས་ལ་བློ་སྦྱོང་དགོས།སྒྲུབ་སྡེ་སོ་སོས་སྒྲིགས་ལམ་འདུལ་བའི་བསླབ་བྱ་གཞིར་བཞག་བྱས་ཏེ་ཐེག་པ་ཁུར་བླངས་དགོས་ཚུལ་རྒྱས་པར་གསུངས། ཤིན་ཏུ་ཐུགས་སྐྱོ་བའི་རྣམ་པ་མཛད་ཅིང༌། ཡང་སྒོས་ཁྱད་པར་ཅན་དུ་བྱང་ཆུབ་ཀྱི་སེམས་འདི་ལ་ཐམས་ཅད་ཀྱིས་མ་འབད་ན། བྱང་ཆུབ་ཀྱི་སེམས་ཀྱི་སྐད་ཆ་དེ་ཙམ་ཞིག་བྱས་པ་གོ་རྒྱུ་ཅི་ཡང་མེད་པ་འདི་འདྲ་ང་རང་ན་སོ་སོང༌། སོ་བུད་པ་དང་བཅས་གོ་བརྡ་མ་འཕྲོད་པ་ཡིན་པ་འདྲ་བསམ་པ་ཡོང་གི་འདུག་གསུང་བ་སོགས་ཐེག་ཆེན་བསྟན་པ་ཉམས་པ་ཐུགས་ཀྱིས་མ་གཟོད་ནས་གནད་དུ་བསྣུན་པའི་ཞལ་ཏ་མང་དུ་གནང་བས་དེར་ཚོགས་པ་ཐམས་ཅད་ལ་བོགས་ཆེ་བར་བྱུང་ངོ༌། །དེ་ནས་ཆུ་ཕོ་འབྲུག་གི་ལོ་སྒྲུབ་སྡེ་གསུམ་སོ་སོར་སེམས་བསྐྱེད་མཆོད་པ་མང་དུ་བྱུང་ཞིང་བྱང་ཆུབ་ཀྱི་སེམས་རང་སྒོམ་དགོས་གསུང་བ་སོགས་གསུང་ཆོས་གནད་ཅན་མང་དུ་གནང་ཞིང་ཡུན་རིང་མི་བཞུགས་པའི་རྟགས་སུ་ཞལ་ནས། ན་ཚོད་དར་བབ་ཁོ་ལངས་སོང༌། །སྐྲ་དཀར་གཉེར་མ་ཁོ་སླེབས་བྱུང༌། །མི་རྟག་འཆི་བ་ཁོ་སླེབས་རན། །འགྱོད་མེད་དམ་ཆོས་ཁོ་རེམས་པས། ། སླེབས་རུང་འགྱོད་རྒྱུ་ཅང་མི་གདའ། །ཞེས་བྱ་བ་ལ་སོགས་པའི་མི་རྟག་པའི་སྐྱོ་མགུར་དུ་མ་གསུང་ཞིང༌།ཐུགས་ཀྱིས་གཏད་པའི་སློབ་མ་རྣམས་ལ་མངོན་ཆུང་གི་སྒོ་ནས་འཕྲལ་ཕུགས་ཇི་ལྟར་བྱ་བའི་ཞལ་ཏ་གནད་འགག་ཅན་དུ་མ་གནང་ངོ༌། །དེ་ལྟར་དམ་པ་འདིས་སྐུ་ཚེའི་སྟོད་ལ་ཐོས་པ་རྒྱ་ཆེན་པོ་བཙལ། བར་དུ་ལུང་རིགས་པ་གདམས་ངག་ཐམས་ཅད་ཀྱིས་ཚུལ་བཞིན་དུ་བསམས། །ཐ་མར་བསམས་པའི་དོན་དེ་ལ་ཐུན་བཞིར་བཅད་ནས་སྒོམ་པ་འདི་སྐུ་བསྙུན་པ་དང༌། ཐུགས་བྲེལ་ཆེ་བ་སོགས་རྐྱེན་ཅི་བྱུང་ཡང་ཆག་ཏུ་མི་འཇུག་ལ། བསམ་པ་བཟང་པོ་བྱང་ཆུབ་ཀྱི་སེམས་ལ་ཐུགས་དམ་གྱི་མཐིལ་དུ་མཛད་ནས་གཞན་ལ་ཡང་དེ་བཞིན་དུ་འདོམས་པར་མཛད་དེ། ཞལ་ནས་ངས་དང་པོར་བླ་མ་ལས་བྱང་ཆུབ་སེམས་ཀྱི་གདམས་ངག་ཐོས་པས་སྐོམ་པས་ཆུའི་གཏམ་ཐོས་པ་ལྟར་སེམས་དེ་རྒྱུད་ལ་སྐྱེ་བའི་དུས་ཤིག་ནམ་འོང་སྙམ་སྟེ་རིའི་རྩེར་སོང་ཡང་དེ་དྲན། ཀླུངས་དུ་སོང་ཡང་དེ་དྲན། མི་མང་པོའི་ནང་དུ་ཕྱིན་རུང༌།གཅིག་པུར་བསྡད་རུང་མདོར་ན་སྤྱོད་ལམ་ཅི་བྱེད་ཀྱང་དེ་ཁོ་ན་དྲན།ཅི་དྲག་ལ་ཐུག་པ་བྱུང་ནས་བསླབ་བཏུས་ལས་འབྱུང་བའི་རྗེ་བཙུན་འཇམ་དབྱངས་སྔོན་རྒྱལ་པོ་ནམ་མཁར་གྱུར་དུས་སེམས་བསྐྱེད་པའི་ཚིགས་བཅད་ཡི་གེར་བྲིས་ནས་སྐེ་ལ་བཏགས་པ་ཡིན། ད་བསམས་ན་དེ་བྱུང་འདུག་སྲུང་བ་ལ་དེ་ལས་ལྷག་པ་མི་འོང་བ་འདྲ་གསུངས། ཡང་ལན་ཅིག་འགའ་རེས་ཁོ་ལ་དུས་རྒྱུན་དུ་བྱང་ཆུབ་ཀྱི་སེམས་སྒོམས་ཟེར་རྒྱུ་ཞིག་ལས་མེད་བསམ་ཤས་ཆེ་སྟེ། ང་ལ་དེ་ཀ་ལས་ཟེར་རྒྱུ་མེད། ཡགས་པོ་བྱེད་ན་བྱང་ཆུབ་ཀྱི་སེམས་འདི་དབུལ་པོས་གཏེར་རྙེད་པ་ལྟར་རང་གིས་རྒྱུས་ཡོད་བྱས་ནས་འཆད་པ་ལས་འདི་ཡོད་པའི་སྐད་ཆ་གཞན་ལ་གཏོང་མི་ཕོད་པ་ཞིག་ཡིན་ཏེ།ཕན་པ་ཞིག་ཨེ་ཡོང་བསམས་ནས་དུས་རྒྱུན་དུ་འདིའི་སྐད་ཆ་བྱས་པ་ཡིན་གསུང༌། གནས་གང་ནས་གང་དུ་ཕེབས་ཀྱང་ཕེབས་ཁ་དང༌། ཕེབས་མ་ཐག་དང༌། ངལ་གསོ་བ་དང༌། མེ་ཏོག་དང༌། ཆུ་དངས་པ་དང༌། ས་ཕྱོགས་ཉམས་དགའ་བ་སོགས་མཆོད་པར་འོས་པའི་དངོས་པོ་ཅི་འདྲ་བ་ཞིག་གཟིགས་པ་དང༌། མི་མ་ཡིན་གྱི་ལྷ་རྟེན་གྱི་དྲུང་དུ་ཕེབས་པའི་ཚེ་ཡན་ལག་བདུན་པ་སེམས་བསྐྱེད་དང་བཅས་པའམ། མ་ཐ་ཡང་ས་གཞི་སྤོས་བྱུགས་མ་དང་ཐལ་མོ་སྦྱར་ནས་སེམས་བསྐྱེད་རེ་ངེས་པར་མཛད། སྒྲུབ་སྡེ་ཕན་ཚུན་དུ་ཕེབས་པ་ན། སེ་ར་རྩེའི་ཤར་གྱི་རི་གདོང་དང༌། ར་ཁ་བྲག་གི་མཐའི་གོང་ཕུར་བུ་ལྕོག་གི་ནུབ་གྱི་བྲག་འབུར་གོང་རྣམས་སུ་ཕེབས་ཕྱིན་ཡན་ལག་བདུན་པ་སེམས་བསྐྱེད་དང་བཅས་པ་རེ་ངེས་པར་མཛད། ས་མཐོ་ས་ནས་སེམས་བསྐྱེད་ན་སེམས་བསྐྱེད་རྒྱ་ཆེན་པོ་འོང་བར་རྗེ་བླ་མས་གསུངས་པ་ཡིན་གསུང༌། བྲག་འབུར་གོང་དེ་ལ་སེམས་བསྐྱེད་སྒང་ཞེས་མིང་འདོགས་མཛད། དེ་ལྟ་བུའི་ཚུལ་གྱིས་བྱང་ཆུབ་སེམས་ཀྱི་བསྟན་པ་ཉིན་མོ་ལྟར་གསལ་བར་མཛད་པས་རྗེ་བདག་ཉིད་ཆེན་པོའི་བསྟན་པ་ལ་བྱ་བ་མཛད་དོ། །དེ་ལྟར་བྱང་ཆུབ་སེམས་ཀྱིས་འཕངས་པའི་སྐུ་གསུང་ཐུགས་ཀྱི་ཀུན་སྤྱོད་ཡོངས་སུ་དག་པས་སོ་ཐར་གྱི་ཚུལ་ཁྲིམས་ལ་སྡོམས་ཀྱིས་བསྡུས་པའི་ཉེས་བྱས་ཕྲ་མོ་དང༌། བྱང་སེམས་ཀྱི་ཚུལ་ཁྲིམས་ལ་འདོད་པའི་སེམས་ཀྱི་རྗེས་སུ་འཇུག་པའི་ཉེས་བྱས་ཙམ་དང༌། གསང་སྔགས་ཀྱི་ཚུལ་ཁྲིམས་ལ་ལྷའི་མཚན་མ་དང་དམན་མ་ལ་འགོམ་པའི་ཉེས་པ་ཙམ་གྱིས་ཀྱང་མ་གོས་པ་ལ་འབད་ཅིང༌།བརྒྱ་ལ་གོས་ན་ཡང་རང་རང་གི་གཞུང་ནས་འབྱུར་བའི་ཕྱིར་བཅོས་ཚུལ་བཞིན་མཛད་པས་ཚུལ་ཁྲིམས་རྣམ་པར་དག་པའི་དྲིས་གཟིམ་ཁང་གི་ནང་དང་ཉེ་སྐོར་ཐམས་ཅད་བསུང་ཆིང་ངེ་སྤོས་བཟང་པོ་སྦར་བ་ལྟར་ཡོད་ལ་ཐ་ན་གཟིམ་ཁང་དུ་བཞག་པའི་ཆས་ཀ་དང་ཕྱགས་གཡོག་ཚུན་གྱི་གོས་ལའང་ཚུལ་ཁྲིམས་ཀྱི་དྲི་ངད་ལྡང་བ་ཡོད། ཚུལ་ཁྲིམས་རྣམ་པར་དག་པ་ལས་ཏིང་ངེ་འཛིན་བཟང་པོ་འཁྲུངས། དེ་ལས་མངོན་པར་ཤེས་པ་དང་ངོ་མཚར་ཅན་གྱི་དག་པའི་གཟིགས་སྣང་དུ་མ་ཡོད་པར་མཆིས་ཏེ། གཞན་སེམས་མཁྱེན་པའི་མངོན་ཤེས་མངའ་བས་རེས་འགའ་ད་རེས་ཆོས་ཟབ་མོ་ཇི་ལྟ་བུ་ཞིག་གསུང་ན་སྙམ་ཙ་ན་ཅི་ཡང་མི་གསུང༌། 7/8 མདུན་ངོས། 上一页 5 6 7 8 下一页 尾页 |
