| སང་ཟངས་རི་ཁང་དམར་དུ་ཕེབས་རྟེན་མཇལ་མཛད་པས་སྲས་ཐོད་སྨྱོན་བསམ་འགྲུབ་ཀྱི་སྐུ་དེ་རྨི་ལམ་དུ་བྱུང་བ་ཇི་ལྟ་བར་འདུག་གསུང༌། དེ་ནས་སེ་ར་རྩེར་ཕེབས་ཉིན་དགེ་འདུན་རྣམས་ཀྱིས་བསུ་བ་མཛད། འདུ་ཁང་དུ་མཆོད་པ་བརྒྱ་ཚར་ཕུལ། དགེ་འདུན་ཐམས་ཅད་ཀྱིས་ཞབས་སྤྱི་བོར་བླངས། ད་ཕྱིན་ཆད་གདན་ས་འདི་རང་དུ་བཞུགས་ནས་ཆོས་གསུང་བར་གསོལ་བ་མགྲིན་གཅིག་ཏུ་བཏབ་པས་ཐུགས་དགྱེས་པ་ཆེན་པོས་ཞལ་གྱིས་བཞེས་ཏེ། ད་ངས་ཀྱང་ལམ་རིམ་རང་འཆད་ཁྱེད་རང་རྣམས་ཀྱང་ལམ་རིམ་རང་སྒོམས་ཤིག་གསུང༌། དེ་ནས་བཟུང་སྟོན་དཔྱིད་གཉིས་ལ་ལམ་རིམ་གྱི་ཁྲིད་ཚར་རེ་ཕལ་ཆེར་གནང༌། དཔོན་སློབ་ཐམས་ཅད་བཤད་སྒྲུབ་ཤིན་ཏུ་འཕེལ། སེམས་བསྐྱེད་མཆོད་པ་དང་མཎྜལ་རྣམས་ལ་བསྔགས་བརྗོད་ཆེན་པོ་མཛད་པས་དར་རྒྱས་ཆེ་རུ་སོང༌། དེ་ནས་སྔར་མནལ་ལམ་དུ་བྱུང་བའི་དོག་བདེའི་ནང་གི་མཆོད་རྟེན་ཡོད་པ་རྩད་དཔྱད་པས། ཕུར་བུ་ལྕོག་ཏུ་མཆོད་རྟེན་འགའ་ཞིག་འདུག་པས་དེར་རྗེ་འདི་ཉིད་ཀྱིས་ས་འདུལ་དང་བཀོད་པ་མཛད་ནས། སྦྱིན་བདག་ཁྲ་འབུར་སོགས་ཀྱིས་དེར་གཟིམ་ཁང་ཞིག་བརྩིགས། དམ་པ་འདི་དགུང་ལོ་དྲུག་ཅུ་ཐམ་པ་བཞེས་པ་ལྕགས་ཕོ་འབྲུག་གི་ལོ་ཕུར་བུ་ལྕོག་ཏུ་བྱོན། ཉིན་མང་པོའི་བར་མདོ་སྡེ་བསྐལ་བཟང་བཀླགས་ཤིང་མཆོད་པ་གཟབས་པ་ཕུལ བྱང་ཆུབ་མཆོག་ཏུ་སེམས་བསྐྱེད་དགོས་ཚུལ་གྱི་གསུང་བཤད་རྣོ་ལ་རྒྱས་པར་གནང་ནས་མདོ་སྡེ་བསྐལ་བཟང་དཔང་དུ་བཞག་ནས་སྦྱོར་དངོས་རྗེས་གསུམ་ཚང་བའི་སེམས་བསྐྱེད་རེ་དཔོན་སློབ་ཐམས་ཅད་ཀྱིས་མགྲིན་གཅིག་ཏུ་མཛད་དོ། །བསྐལ་བཟང་ལས་དེ་བཞིན་གཤེགས་པ་གྲགས་པ་སྔོན་ཐ་ག་པར་གྱུར་པའི་ཚེ་རས་ཀྱི་ཁ་ཚར་ཕུལ་ནས་སེམས་བསྐྱེད་པ་དང༌། དེ་བཞིན་གཤེགས་པ་འོད་འཕྲོ་རྩྭའི་སྒྲོན་མེ་ཕུལ་ནས་སེམས་བསྐྱེད་པར་གསུངས་པ་ཡི་གེར་བྲིས་ནས་མགུལ་དུ་བཞེས། ངེད་རང་ཚོ་སེམས་བསྐྱེད་པའི་རྫས་ལ་མ་ཐོགས་དད་པ་ལ་ཐོགས་གསུངས་པ་སོགས་གསུང་ཆོས་རུས་པ་ཅན་མང་དུ་གནང༌། དེ་ནས་རྒྱལ་དགའ་ཚལ་དབུ་མཛད་ཀྱིས་རྗེ་བཙུན་ཐམས་ཅད་མཁྱེན་པ་བློ་བཟང་ཡེ་ཤེས་ལ་གསོལ་བ་བཏབ་ནས་ལམ་རིམ་གྱི་མན་ངག་ཆེས་གསལ་བ་མྱུར་ལམ་ཞེས་བྱ་བ་གནང་བ་གསན་ནས་རྒྱལ་དུ་ཕེབས་ཏེ་བྲག་རྩ་བླ་མ་བློ་བཟང་རྒྱལ་མཚན་ལ་སྔགས་རིམ་ཆེན་མོ། འདུལ་བའི་གླེང་འབུམ་ཆེན་མོ།པཎ་ཆེན་ཐམས་ཅད་མཁྱེན་པས་མཛད་པའི་མྱུར་ལམ་རྣམས་ཀྱི་ལུང་གསན་ཅིང་བྱམས་ཆེན་གྱི་མདུན་དུ་སེམས་བསྐྱེད་དང༌། བསྟན་པ་རྒྱས་པའི་བསྔོ་སྨོན་མཛད་ནས་འོལ་ཁར་ཕེབས་དྲུང་རམ་པ་བློ་བཟང་ཆོས་རྒྱལ་ལ་སྨོན་ལམ་མཐའ་ཡས་པའི་གཅོད་སོགས་བཀའ་ཆོས་ཅི་རིགས་གསན་ནས་སེ་ར་རྩེར་ཕེབས་སྔར་བཞིན་བཤད་སྒྲུབ་ཀྱིས་འདུས་སྡེ་རྣམས་ལེགས་པར་བསྐྱངས་སོ། །དེ་ནས་ཕུར་བུ་ལྕོག་ཏུ་དགེ་སློང་བརྒྱད་སྡེ་ཞིག་འཛུགས་པའི་ཐུགས་འདུན་ཡོད་པ་བཞིན་མེ་ཁྱི་ལོ་ཧོར་ཟླ་གསུམ་པའི་མཇུག་གཟའ་སྐར་འཕྲོད་སྦྱོར་ལེགས་པ་ཞིག་ནས་བཟུང་འབད་རྩོལ་ཆེར་མེད་པར་ཐར་འདོད་དུ་མ་རྗེ་བླ་མ་ཉིད་ཀྱི་ཐུགས་རྗེས་འུར་གྱིས་འདུས་ནས་ཐོག་མར་བརྒྱད་སྡེ་དང༌། དེ་ནས་རིམ་གྱིས་འདུས་ནས་དགེ་འདུན་ཉི་ཤུ་ལོངས་པའི་སྒྲུབ་སྡེ་ཕུན་སུམ་ཚོགས་པ་ཆགས་པས་དད་ལྡན་བསོད་ནམས་གསོག་པའི་ཞིང་ས་མཆོག་ཏུ་གྱུར་པ་འདི་བྱུང་ངོ༌། །འདི་སྐབས་ནས་བཟུང་སྒྲུབ་སྡེ་རྣམས་སུ་ཚོགས་ནམ་འཚོག་རེས་ཀྱིས་ཐོག་མར་ཕྱག་འཚལ་པ་དང་སྦྲགས་པའི་ཡན་ལག་བདུན་པ་མཎྜལ་དངབཅས་པ་ཕུལ་ནས་སེམས་བསྐྱེད་པ་དང༌། ཚོགས་འདུ་སོགས་གང་དུ་ཕེབས་ཀྱང་མཎྜལ་བསྣམས་པའི་སྲོལ་བཙུགས། ཕུར་བུ་ལྕོག་གི་སྒྲུབ་སྡེ་ཆགས་ནས་འདུ་ཁང་ལོགས་བྲིས་གྲུབ་རྗེས་རྗེ་བཙུན་བླ་མ་ངག་དབང་བྱམས་པས་དབུ་མཛད་དགེ་སློང་རྣམས་ཀྱིས་ཟླ་བ་གཅིག་གི་བར་འདུ་ཁང་དུ་དགོང་མོ་རེ་རེ་བཞིན་བརྐྱང་ཕྱག་ལྔ་བརྒྱ་རེ་ལ་ཉུང་ཐ་བྱས་ནས་བསག་སྦྱངས་ལ་བརྩོན་པར་མཛད་པས་ཐུགས་ཤིན་ཏུ་མཉེས་ནས་ང་ལས་ཁྱེད་ཚོ་སྙིང་རུས་ཆེ་བ་འདུག ཆུང་ངུའི་དུས་ནས་རྗེ་བླ་མ་ལ་བློ་སྙིང་གཏད་ནས་རི་ཁྲོད་ཅིག་ལ་འགྲོ་བསམ་པ་ཡོད། སྙིང་རུས་ཁྱེད་ཚོ་ཙམ་མེད་གསུངས། ལམ་རིམ་ཆེན་མོའི་བཤད་ལུང་དང་འཇམ་དཔལ་ཞལ་ལུང་གི་ཁྲིད་རྒྱས་པར་གནང༌། དེ་ནས་ར་ཁ་བྲག་སྒྲུབ་སྡེ་ཆགས་ཏེ་སེ་ར་རྩེ་དང་ཕུར་བུ་ལྕོག་གི་དགེ་འདུན་རྣམས་ཀྱང་སྤྱན་དྲངས་ནས་སེམས་བསྐྱེད་མཆོད་པ་རྒྱས་པར་མཛད། ཐོག་མར་དགེ་སློང་བཅུ་གཉིས་ཆགས། དེ་ནས་རིམ་གྱིས་ཇེ་འཕེལ་དུ་གྱུར་ཏོ། །དེ་ནས་བཟུང་སྒྲུབ་སྡེ་སོ་སོར་ཟླ་བ་ཡར་ངོ་མར་ངོའི་གསོ་སྦྱོང་དང་དབྱར་གནས། དགག་དབྱེ་སོགས་བསྟན་པ་རིན་པོ་ཆེའི་རྩ་བ་སོ་སོར་ཐར་པའི་ཕྱག་ལེན་རྣམ་པར་དག་པ་འཛུགས་པར་མཛད། ས་མོ་གླང་ལོའི་ཟླ་བ་དང་པོ་ནས་སྒྲུབ་སྡེ་ཕན་ཚུན་སོ་སོར་སེམསབསྐྱེད་མཆོད་པ་ཞུ་མི་དུ་མ་བྱུང་བ་ལ་སྤྱན་དྲངས་པ་བཞིན་སྐྱ་སེར་མང་པོ་ལ་ཐེག་པ་ཆེན་པོའི་སེམས་རིན་པོ་ཆེའི་གསུང་བཤད་གནང༌། ཟླ་བ་གསུམ་པའི་ནང་དུ་ལྷ་རི་བླ་མ་ལྷོ་རྟིང་སྐྱེས་བླ་མ་སེ་འབྲས་དགེ་གསུམ་རྒྱུད་སྟོད་སྨད་ཀྱི་དགེ་བའི་བཤེས་གཉེན་མང་པོ་དང་སྒྲུབ་སྡེ་གསུམ་གྱི་དགེ་སློང་རྣམས་གཙོ་བོར་བྱས་པའི་ཐར་འདོད་ཉིས་བརྒྱ་མ་ལོངས་ཙམ་ལ་བྱང་ཆུབ་ལམ་གྱི་རིམ་པའི་མྱོང་ཁྲིད་ཟླ་བ་གཅིག་གི་བར་དུ་གནང་ངོ༌། །དེ་ནས་མ་འོངས་པའི་བསྟན་རྒྱུན་ལ་དགོངས་ཏེ་སྡེ་སྣོད་རིན་པོ་ཆེ་གསུམ་གྱི་བརྗོད་བྱ་ལག་ལེན་དུ་འདེབས་ཚུལ་སྤོང་བ་པའི་ཁྲིམས་སུ་བཅའ་བ། པཎ་ཆེན་རིན་པོ་ཆེ་བློ་བཟང་ཡེ་ཤེས་དཔལ་བཟང་པོས་མཛད་པ་དེ་ལ་དམ་པ་ཉིད་ཀྱིས་ཅུང་ཟད་ཁ་བཀང་སྟེ་སྒྲུབ་སྡེ་སོ་སོར་གནང་ནས་སྒྲིགས་ལམ་དེ་ག་སོར་གནས་དགོས་ཚུལ་གྱི་བསླབ་སྟོན་རྒྱས་པར་གནང་སྟེ།ར་ཁ་བྲག་ཏུ་དབྱར་ཞལ་བཞེས་མཛད། 6/8 མདུན་ངོས། 上一页 4 5 6 7 8 下一页 尾页 |
