| དེས་སྒོ་ལྕགས་དེ་ཕྱེ་ནས་སྒོ་ཕྱེ་བ་དང་དུས་མཉམ་དུ་ཤར་ཕྱོགས་ནས་སྤྲིན་དང་བྲལ་བའི་ཉི་མའི་དཀྱིལ་འཁོར་འོད་ཟེར་ཤིན་ཏུ་གསལ་བ་ཞིག་ཤར་བ་ཁང་པ་དེའི་ནང་དུ་བསྟན་པའི་བདག་པོའི་སྐུ་ཤིན་ཏུ་ཆེ་བ་ཞིག་བཞུགས་འདུག་པ་དེའི་ཐུགས་ཀར་འོད་ཟེར་ཕོག་པས་སྐུ་དེ་ལས་ཀྱང་འོད་ཟེར་འཕྲོས་པས་ཁང་བ་དེ་ཉིད་གང་ནས་འོད་དང་འོད་ཟེར་ཕྱོགས་བཅུར་འཕྲོ་བ་ཞིག་རྨིས། ཐོ་རེངས་མནལ་སད་ཙ་ན་རྨི་ལམ་ཡ་མཚན་ཅན་དེ་འདྲ་ཅི་ཡིན་ནམ་སྙམ་བཞུགས་པས་ཕན་ཚུན་གྱི་སྤྱིལ་པོ་རྣམས་ཀྱི་ཁར་རྡོ་འཕེན་པར་འདུག་པས། རྨི་ལམ་ལ་དཔགས་ན་དེ་རིང་བཀའ་ཆོས་ཤིག་གནང་བར་ཐག་ཆོད་སྙམ་ནས་མྱུར་དུ་བླ་བྲང་དུ་བྱོན་པས། རྩ་བའི་བླ་མ་དེ་ཉིད་བཞུགས་ཁྲི་ཕུན་སུམ་ཚོགས་པ་ཞིག་གི་སྟེང་ན་སྐུ་སྟོད་གཅེར་པུ་མཛད། ཆོས་གོས་རྣམ་གསུམ་ལེགས་པར་བཞེས་ཕྱག་ཏུ་ལམ་རིམ་ཆེན་མོའི་གླེགས་བམ་བསྣམས། ཉི་མ་དྲོ་ས་ཞིག་ན་དང་བ་འདྲེན་པ་ཞིག་མཛད་ནས་བཞུགས་འདུག རྨི་ལམ་ལ་དཔགས་ན་རང་ངོས་ནས་བྱུང་ཕྱིན་བླ་མ་སངས་རྒྱས་ཡིན་པར་ཐག་ཆོད་པའི་ངེས་ཤེས་ཆེན་པོ་སྐྱེས། བླ་མས་དགྱེས་བཞིན་དུ་ལམ་རིམ་ཆེན་མོའི་བཤད་ལུང་རྒྱས་པར་གནང་བས་བླ་མ་དང་ཆོས་ལ་ངེས་ཤེས་ཁྱད་པར་ཅན་འཁྲུངས་ཏེ་ལུས་ཀྱི་བ་སྤུ་ལྡང༌། མིག་ནས་མཆི་མ་འཁྲུག་བཞིན་པས་བླ་མ་རྒྱང་འབོད་ལ་འབད་ཅིང༌། རེས་དགའ་བསྟན་པའི་བདག་པོའི་བཀའ་དྲིན་དྲན་ནས་སྐབས་གསུམ་པ་མང་དུ་བཏོན་ནས་དད་པ་དང་སྐྱོ་ཤས་འགྲན་པ་ཞིག་ཡོད་ཅིང༌། བླ་མ་ལ་བཀའ་དྲིན་དྲན་པའི་དད་གུས་རྒྱུན་མི་འཆད་པ་བྱུང་ཞིང་བླ་མའི་བྱིན་རླབས་ཞུགས་པའི་མཚན་མའང་ཐོབ། རྒོད་ཚང་རི་ཁྲོད་ཀྱི་བསྒྲིགས་ལ་ཞུགས་ནས་ལོ་གསུམ་བཞུགས། ལམ་རིམ་གཙོ་བོར་བསྐྱངས་པའི་བར་བར་དུ་བཀྲ་ཤིས་ལྷུན་པོར་སྔགས་ཆེན་རྡོ་རྗེ་འཛིན་པ་དཀོན་མཆོག་རྒྱལ་མཚན་པའི་དྲུང་ནས་གསང་བདེ་འཇིགས་གསུམ་སོགས་ཀྱི་དབང་ཆེན་དུ་མ་དང༌། ཆོས་སྐྱོང་སྐོར་ཕལ་ཆེར་གྱི་རྗེས་གནང༌། སྒྲུབ་ཐབས་དུ་མའི་ལུང་བཅས་ཆོས་བཀའ་ཅི་རིགས་པ་གསན་ནོ། །དེ་ནས་དྲུང་པ་རྟ་ཕུག་པས་དམ་པ་འདི་ཉིད་དབུས་ཕྱོགས་སུ་རྗེའི་བསྟན་པ་ལ་ཕན་པ་ཆེན་པོ་འབྱུང་བར་གཟིགས་ནས་ཉིན་གཅིག་སྐུ་མདུན་དུ་བོས་ནས། ད་ཁྱེད་དབུས་ལ་སོངས་གསུངས་ཏེ་ཉིད་ཀྱི་སྐུ་འགག་བཞེས་པ་དེ་ཕུད་ནས་གནང༌།དབེན་པ་བསྟེན་པའི་ཚེ་དཀའ་སྤྱད་དགོས་ཚུལ། སྒྲུབ་པ་བྱེད་ཚུལ། དེ་ལ་བརྟེན་ནས་བསྟན་པ་དང་འགྲོ་དོན་ཇི་ལྟར་བྱ་བའི་བསླབ་དོན་རྒྱས་པར་གནང༌། ཁྱད་པར་དུ་གོས་རྒྱབ་དྲོས་དང༌། འཚོ་བ་རྩམ་པས་ཆོག་ཤེས་གྱིས་ལ་དབེན་པར་ལམ་རིམ་རང་ལ་དྲིལ་ཅིག་གསུངས། དེ་ནས་བླ་མ་སངས་རྒྱས་སུ་མཐོང་བའི་དད་པ་དང༌། བཀའ་དྲིན་དྲན་པའི་གུས་པ་ཆེན་པོས་དྲངས་པའི་མཆི་མས་བརླན་ཞིང་འབྲལ་མི་ཕོད་པ་བྱུང་ཡང་བཀའ་བཞིན་སྒྲུབ་པ་བླ་མ་མཉེས་པའི་མཆོད་པའི་མཆོག་དང་བཀའ་དྲིན་གཞལ་བའི་མཆོག་དུ་གཟིགས་ཏེ་དབུས་སུ་བྱོན་པས་སྙེ་ཐང་དུ་ཕེབས་པའི་ཚེ་སེ་རའི་རྒྱབ་རིའི་ལྡེབས་ན་རྗེའི་སྒྲུབ་ཁང་གི་ཆུ་མེག་དང་ཤིང་ནགས་གཟིགས་པས་དགའ་བ་དང་སྐྱོ་བ་འདྲེས་པའི་སྤྱནཆབ་མང་དུ་བྱུང༌། ང་ཡ་གི་རང་དུ་སྒྲུབ་པ་བྱས་ལ་འདུག་སྙམ་པ་བྱུང༌། དེ་ནས་སྒྲུབ་ཁང་དུ་ཕེབས་གནས་དེར་ཟིལ་གནོན་དམིགས་པ་སྐོར་གསུམ་མཛད།ཕྱག་བདར་ལེགས་པར་བྱས།ཤིན་ཏུ་བག་ཕེབས་པ་དང༌།དབེན་པ་བསྟེན་པའི་དགའ་བས་ཐུགས་རབ་ཏུ་ཚིམ་ནས་རྩྭའི་གདན་ལ་བཞུགས་ནས་ལམ་རིམ་དང་གཅོད་གཉིས་ཀ་ལ་བརྩོན་པར་མཛད་པས། ནུབ་དང་པོ་ནས་སྒོའི་རྩར་ཤུ་རྒྱགས་པ་དང་འགྲམ་ལྕག་གཏོང་བ་དང༌། རྨི་ལམ་དུ་པོ་ཏ་ལའི་རྒྱབ་ནས་བཟུང༌། སྒྲུབ་ཁང་གི་བར་དུ་གུར་ཁྲ་ཆེམ་མེ་བའི་སྒར་པ་ཆེན་པོའི་མཐའ་ཐམས་ཅད་འབྲོག་པའི་ཆ་ལུགས་ཅན་གྱི་རྟ་པ་ཁོར་གསུམ་ཚེར་མ་འདྲ་བ་བཏགས་པས་བསྐོར་བ་དང༌། ཉང་བྲན་ཕུ་ནས་གཡག་ནག་པོ་རི་འདྲ་བ་ཞིག་ངར་སྒྲས་ས་གཞི་འདར་ཞིང་མེ་སྟག་འཕྲོ་བའི་རླུང་འཚུབ་དང་བཅས་བྱུང་བས་སྒྲུབ་ཁང་འོག་གཞི་དང་བཅས་པ་རྭ་རྩེར་བསྐོར་བ་རྣམས་གཅོད་ཀྱི་དམིགས་པ་བརྟན་པོས་གཟིར་བས། གཡག་རྒོད་དེ་ཆུང་དུ་ཆུང་དུ་སོང་བའི་མཐར་ཐ་འོག་པའི་ལྷ་རྟེན་གྱི་རྩར་མར་མེ་ཆུང་ངུ་ཞིག་ཏུ་གྱུར་སོང་ཞིང༌། ཐབས་ཤེས་སྤྱོད་ཀྱི་ཉམས་ལེན་ལ་རྒྱུན་བེསྐྱངས་པས་བདག་འཛིན་འགོང་པོའི་ཆོ་འཕྲུལ་རང་ཞི་ལ་སོང་བའི་མཐར་གནས་དེའི་གཞི་བདག་རྣམས་བྲན་དུ་ཁོལ་ཏེ་ཕྱིན་ཆད་བཀའ་བཞིན་དུ་འཕྲིན་ལས་སྒྲུབ་པ་ཞིག་བྱུང་ངོ༌། ། དེ་ནས་དུས་རེ་ཞིག་ནས་ན་བཟའ་དང་འཚོ་ཆས་རྣམས་ཟད་པ་ན། རི་ནས་རྩྭ་བརྔས་ནས་གདན་དང་གཡས་གཡོན་རྣམས་སུ་རྩྭ་སྤུངས་ནས་སྒོམ་པར་མཛད། དེའི་ཚེ་གཡས་གཡོན་མདུན་རྒྱབ་གང་གྲང་ས་དེར་རྩྭ་མང་བར་སྤུངས་ནས་བསྒོམས། མཆོད་བ་གཞན་ཆེར་མེད་པས་ཕོར་པ་བཀྲུས་ནས་ཡོན་ཆབ་དུས་དྲུག་རེ་ཉིན་ལྟར་ཕུལ་ཏེ་བྱང་ཆུབ་ལམ་རིམ་བསྒོམ་པ་ལ་བརྩོན་པ་ཆུ་བོའི་རྒྱུན་བཞིན་མཛད་དོ།།དེ་ལྟར་བྱང་ཆུབ་ལམ་རིམ་གྱི་དམིགས་རྣམ་སྐྱོང་བ་ལ་འབད་པས་ཐུགས་རྒྱུད་ལ་རྟོགས་པ་སྐྱེ་པའི་རྐྱེན་ནི་སྒོམ་པའི་ཐུན་བར་ཞིག་ལ་ཆུ་ལེན་པར་ཕེབས་པས་ལམ་ཁ་ན་སྦྲང་བུ་ཞིག་ཅུང་ཟད་འཕུར་ནས་ས་ལ་ཡང་ཡང་ལྷུང་བར་འདུག འདི་ཅི་ཡིན་སྙམ་ཞིབ་ཏུ་གཟིགས་པས་སྦྲང་བུའི་བྲང་ལ་གྲོག་མ་ཞིག་གིས་མཆུ་བཙུགས་ནས་འདུག དེས་རྐྱེན་བྱས་ནས་ལས་འབྲས་ལ་བསམ་པས། རང་གིས་ལས་ངན་ཞིག་བསགས་ཕྱིན་ཇི་ལྟར་བྱས་ཀྱང་འབྲས་བུ་མྱོང་དགོས་འདུག 4/8 མདུན་ངོས། 上一页 2 3 4 5 6 7 下一页 尾页 |
