| རེས་ཐུགས་བྲེལ་ཆེ་ཞིང་སྐུ་གཟུགས་མི་བདེ་བ་ཇི་ལྟ་བུ་ལ་འང་མི་གཟིགས་པར་ཤིན་ཏུ་རྒྱས་པར་གསུང་ངོ༌། །དེ་ལྟར་ཕར་ཕྱིན་ཐེག་པའི་དབང་དུ་བྱས་ནས་ཡོན་ཏན་རྒྱ་ཆེན་པོ་དང་ལྡན་པར་མ་ཟད། གསང་སྔགས་རྡོ་རྗེ་ཐེག་པའི་དབང་དུ་བྱས་ནས་ཀྱང་རྫོགས་རིམ་གྱི་རྟོགས་པ་ཁྱད་པར་ཅན་བརྙེས་ཏེ། སྐུ་ཚེའི་སྨད་ལ་དཔལ་རྡོ་རྗེ་འཇིགས་བྱེད་ཀྱི་ལམ་རིམ་པ་གཉིས་ལ་གཙོ་བོར་བརྩོན་པར་མཛད་ཅིང་ཞལ་ནས་སྔར་ཡིན་ན་ང་ཞག་རེ་མི་མང་སར་བསྡད་ན་སུན་སྣང་ཆེན་པོ་འོང་བ་ཡིན་ཏེ། ད་མི་མང་སར་བསྡད་པ་དང་ཐང་སྟོང་ཞིག་ཏུ་རང་གཅིག་པུར་བསྡད་པ་དང༌། རི་ཁྲོད་དུ་མཐུན་རྐྱེན་འཛོམ་པོ་བྱས་ནས་བསྡད་པ་གང་བྱས་ཀྱང་བླ་མ་དཀོན་མཆོག་གི་ཐུགས་རྗེས་བདེ་བ་ཆེན་པོ་ངམ་ངམ་ཤུགས་ཀྱིས་སྐྱེ་བ་ཞིག་ཡོད་གསུང༌།དེ་ལྟར་མཁས་པ་འཆལ་པར་མ་ཤོར་བ། བཙུན་པོ་རྨོངས་པར་མཤོར་བ། བཤད་པ་ཁ་བཤད་དུ་མ་ཤོར་བ། སྒྲུབ་པ་རང་དོན་དུ་མ་ཤོར་བའི་སྐྱེས་མཆོག་དམ་པ་འདིས་མཐོན་པོའི་ཁྲི་ལ་བཟང་པོའི་ཟས་གོས་ལ་སྤྱོད་ཅིང་རྨོངས་པའི་འཁོར་གྱིས་བསྐོར་བས་བསྟན་པ་དང་འགྲོ་བའི་དོན་མི་འོང་བར་གཟིགས་ནས། མི་མེད་ལུང་སྟོང་འགྲིམས། འཚོ་བ་བྱ་འཚེལ་མཛད། ཡོན་ཏན་ཐམས་ཅད་སྦས། འོག་ནས་འགྲོ་བ་ཆུ་ལས་མེད་པའི་དམན་ས་བཟུང༌། ཆོས་བརྒྱད་ངན་སྐྱུགས་བཞིན་དུ་དོར།བསླབ་ཁྲིམས་རྣམས་ཁས་བླངས་ཙམ་ལ་མ་བཞག་པར་ངོ་ལྐོག་མེད་པར་བསྲུངས། དཀོན་མཆོག་སྤྱི་བོར་ཁུར། ཉམ་ཆུང་བརྩེ་བས་བསྐྱངས། སྡེ་སྣོད་གསུམ་གྱི་དོན་ཐམས་ཅད་སྐྱེས་བུ་གསུམ་གྱི་ལམ་རིམ་དུ་བསྡུས་ནས་ཉམས་སུ་བླངས་པས་ཐེག་པ་ཆེན་པོའི་དགེ་བའི་བཤེས་གཉེན་གྱི་མཚན་ཉིད་ཐམས་ཅད་ཚང་བར་མཛད། ཕྱི་འདུལ་བ་ལྟར་དང་ནང་གསང་སྔགས་ལྟར་གྱི་མཛད་པས་བཀའ་གདམས་རིན་པོ་ཆེའི་རྣམ་ཐར་གཙང་མ་ལེགས་པར་ཕྱག་ལེན་ལ་ཐེབས་པར་མཛད་པས་རྨད་དུ་བྱུང་བའི་རྣམ་པས་ཐར་པ་མཆིས་སོ། །དེ་ནས་སྐུ་ཚེ་འདིའི་དངོས་ཀྱི་གདུལ་བྱ་རྫོགས་པ་ན་དགུང་ལོ་དོན་གསུམ་ལ་ཕེབས་པ་ཆུ་མོ་སྦྲུལ་ལོ་ཟླ་བ་དང་པོའི་ཚེས་བདུན་གྱི་ཉིན་ཕུར་བུ་ལྕོག་ཏུ་སྐུའི་བཀོད་པ་བསྡུས་ཏེ་དགའ་ལྡན་ཆོས་ཀྱི་ཕོ་བྲང་དུ་ཕེབས་སོ། །རྗེ་སྒྲུབ་ཁང་པ་ཆེན་པོ་འདིས་འཇམ་མགོན་བསྟན་པའི་སྲོག་ཤིང་བཟུང་སྟེ་བྱང་ཆུབ་ལམ་གྱི་རིམ་པ་རྒྱ་ཆེར་སྤེལ་བས་རྒྱུད་འཛིན་གྱི་སློབ་མ་བསམ་གྱིས་མི་ཁྱབ་པ་བྱུང་ཞིང་ཐུགས་སྲས་དམ་པ་རྗེ་ཉིད་ཀྱི་རྒྱལ་ཚབ་ཏུ་དབང་བསྐུར་བ་ཐུབ་བསྟན་ཡོངས་རྫོགས་ཀྱི་བདག་པོ་ནི་རྗེ་བཙུན་བླ་མ་ངག་དབང་བྱམས་པ་ཡིན་ལ། གཞན་ཡང་མཁར་རྡོ་མཁན་པོ་བཟོད་པ་རྒྱ་མཚོ་དང༌། རྒྱུད་སྨད་མཁན་པོ་ངག་དབང་མཆོག་ལྡན་དང༌། ཁྲི་རིན་པོ་ཆེ་བློ་བཟང་དར་རྒྱས་སོགས་འཕྲིན་ལས་རྒྱ་ཆེར་སྤེལ་བའི་བསྟན་འཛིན་དམ་པ་མང་དུ་བྱོན་ནོ། །དེས་ན་བྱང་ཆུབ་ལམ་གྱི་རིམ་པ་ལ་བློ་སྦྱོང་བར་འདོད་པ་རྣམས་ཀྱིས་རྗེ་སྒྲུབ་ཁང་པ་དགེ་ལེགས་རྒྱ་མཚོ་ལ་གསོལ་བ་འདེབས་ཤིང༌། རྗེ་འདིའི་རྣམ་ཐར་ལྟར་དཔལ་ཨ་ཏི་ཤ་དང་རྒྱལ་བ་ཙོང་ཁ་པའི་བསྟན་པའི་སྙིང་པོ་བྱང་ཆུབ་ལམ་གྱི་རིམ་པ་ལ་ཚེ་དང་སྒྲུབ་པ་མཉམ་པ་ཞིག་བྱ་བ་ལ་སྐྱེས་བུའི་རྩལ་ཅི་ཡོད་ཀྱིས་འབད་པར་བྱའོ། ། 8/8 མདུན་ངོས། 上一页 6 7 8 |
|
|
|
|
|
 |
ཉེ་ལམ་གསར་བརྗེས། |
|
|
|
|
|
|
|
|
ཀློག་མཁན་མང་ཤོས། |
|
|
|
|
|
|
| |
|
