ད་སྔ་གཟིགས་བཞིན་པ།  མདུན་ངོས། > སྲོལ་རྒྱུན་སློབ་གསོ། > ནང་བའི་གྲུབ་མཐའ།
༄༅། ། གྲུབ་པའི་མཐའ་རྣམ་པར་བཞག་པ་ཐུབ་བསྟན་ལྷུན་པོའི་མཇེས་རྒྱན་ལས་ས་བཅད་གཉིས་པ། རང་གི་སྡེ་བའི་ལུགས་ཀྱི
སྤེལ་དུས།03-28  ཡོང་ཁུངས།http://www.teducn.com  རྩོམ་པ་པོ། ལྕང་སྐྱ་རོལ་བའི་རྡོ་རྗེ།
དེ་ལྟར་ན་འདས་པའི་མཚན་ཉིད་ནི།   ཁྱོད་དུས་གང་དུ་འཇོག་པ་དངོས་པོ་གང་གི་རང་དུས་ལ་ལྟོས་ནས་གཞག་དགོས་པའི་ལྟོས་སར་གྱུར་པའི་དངོས་པོའི་རང་དུས་དེ་ལས་ཐལ་ཟིན་པ།   མ་འོངས་པའི་མཚན་ཉིད།   ཁྱོད་དུས་གང་དུ་འཇོག་པ་དངོས་པོ་གང་གི་རང་དུས་ལ་ལྟོས་ནས་གཞག་དགོས་པའི་ལྟོས་སར་གྱུར་པའི་དངོས་པོའི་རང་དུས་དེར་མ་སླེབས་པའི་ཆོས། ད་ལྟར་བའི་མཚན་ཉིད། རང་དུས་ན་སྐྱེས་ལ་མ་འགག་པའི་ཆོས་སོ།    །མཚན་ཉིད་དེ་དག་ཀྱང་གཞུང་ཆེན་མོ་རྣམས་ལས་འབྱུང་་བ་ལྟར་གོ་ཐོབ་ཀྱི་དབང་དུ་བྱས་པ་ཡིན་གྱི་སྐྱོན་ཅན་དང་རྫས་སྤྱི་སོགས་ཀྱི་ཚིག་འཁྲི་གཅོད་པ་གཙོ་བོ་བྱས་པ་མ་ཡིན་ཏེ།    རིགས་པར་སྨྲ་བ་རྣམས་ལ་གཏམ་དུ་བྱས་པ་ཡིན་གྱི་ལྟག་ཆོད་ཀྱིས་ཉི་མ་འཕུལ་ཐབས་ལྷུར་ལེན་པའི་བྱིས་པའི་བརྡོལ་ཐབས་སྨྲ་བ་རྣམས་ལ་གཏམ་དུ་བྱ་བ་མ་ཡིན་པའི་ཕྱིར་རོ། །ལ་ལ་དག་འདས་པ་དང་མ་འོངས་པ་གཉིས་གཞི་མ་གྲུབ་པར་སྨྲས་ནས་ཡང་དེ་གཉིས་ཀྱི་མཚན་ཉིད་རྣམ་པར་འཇོག་པར་བྱེད་པ་ནི་གྲུབ་མཐའ་སྨྲ་བ་བཞི་པོ་གང་གི་ཡང་ལུགས་མ་ཡིན་གྱི་སྔོན་གྱི་བླུན་པོ་སྙིང་ཁམས་ཅན་དག་གི་ཟེར་སྒྲོས་འབའ་ཞིག་གཞིར་བཞག་པར་ཟད་དེ། རི་བོང་རྭའི་མཚན་ཉིད་འཇོག་པའི་ངལ་་བ་བྱེད་པའི་མཁས་པ་སུ་ཡང་མེད་པའི་ཕྱིར་རོ།  །
གཉིས་པ་ཞར་བྱུང་སེལ་བའི་རྣམ་བཞག་ལ། འདིར་སེལ་བ་དང་དགག་པ་དོན་གཅིག་པས་དེ་ལ་དབྱེ་ན། མ་ཡིན་དགག་གི་གཞན་སེལ་དང་མེད་དགག་གི་གཞན་སེལ་གཉིས།   དང་པོ་ལ་དོན་ཆོས་དང་བློ་ཆོས་གཉིས་རྣམས་སུ་ཡོད་དེ། སློབ་དཔོན་ཞི་བ་འཚོས། འདིར་ནི་སེལ་བ་རྣམ་གཉིས་ཏེ། །མ་ཡིན་པ་དང་མེད་པའོ།   །མ་ཡིན་པ་ཡང་རྣམ་གཉིས་ཏེ། །བློ་དང་དོན་གྱི་དབྱེ་བས་སོ། །ཞེས་་གང་གསུངས་པའོ། །དེ་ལ་དོན་གྱི་དབང་དུ་བྱས་པའི་མ་ཡིན་དགག་གི་གཞན་སེལ་ནི། བུམ་པ་མ་ཡིན་པ་ལས་ལོག་པ་དང་སྒྲ་མི་རྟག་པ་མ་ཡིན་པ་ལས་ལོག་པ་ལ་སོགས་པ་ལྟ་བུ་སྟེ།   རྣམ་འགྲེལ་ལས། སྒྲུབ་་བྱེད་སྔ་མ་དག་གིས་ནི། །མ་ཡིན་སྒྲུབ་པར་བྱེད་ཕྱིར་རོ།   །ཞེས་སོ། །བློའི་གཞན་སེལ་ནི། བུམ་འཛིན་རྟོག་པ་ལ་བུམ་པ་མ་ཡིན་ལས་ལོག་པར་སྣང་བ་ལྟ་བུ་སྟེ། འདི་ལ་བསལ་བྱ་དངོས་སུ་བསལ་བའི་སྒོ་ནས་རྟོགས་པ་ཞིག་དགོས་སོ། །མཚན་ཉིད་ནི། སེལ་བ་ཙམ་གྱི་མཚན་ཉིད། དགག་བྱ་དངོས་སུ་བསལ་བས་སྒོ་ནས་རྟོགས་པར་བྱ་བའོ།   །མ་ཡིན་དགག་གི་སེལ་བས་མཚན་ཉིད།   སེལ་བ་གང༌།   བསྒྲུབ་པའི་ཆོས་གཞན་འཕེན་པའོ།   །མེད་དགག་གི་སེལ་བའི་མཚན་ཉིད། སེལ་བ་གང༌། བསྒྲུབ་པའི་ཆོས་གཞན་མི་འཕེན་པའོ།   །འདིའི་ཆོས་གཞན་འཕེན་པ་དང་མི་འཕེན་པ་ཡང་རང་གི་དགག་བྱ་བཀག་ཤུལ་དུ་འཕེན་མི་འཕེན་ལ་བྱའོ།   །བློའི་གཞན་སེལ་གྱི་མཚན་ཉིད།   མ་ཡིན་དགག་གི་སེལ་བ་གང༌།   བློས་སྒྲོ་བཏགས་པ་ཙམ་དུ་གནས་པ།   དོན་གྱི་གཞན་སེལ་གྱི་མཚན་ཉིད།   མ་ཡིན་དགག་གི་སེལ་བ་གང༌།   སྒྲོ་བཏགས་ཙམ་མིན་པར་རང་གི་མཚན་ཉིད་ཀྱིས་གྲུབ་པའོ།   །གལ་ཏེ་དེ་ལྟ་ན་བུམ་པ་རང་མཚན་ཡང་གཞན་སེལ་དུ་འདོད་དགོས་ཏེ། བསལ་བྱ་རིགས་མི་མཐུན་སེལ་བའི་ཕྱིར་རོ་སྙམ་ན།   འོ་ན་ཁྱོད་རང་ལ།   དེ་དགག་པར་ཡང་ཐལ། དགག་བྱ་རིགས་མི་མཐུན་འགོག་པའི་ཕྱིར་རོ། །མ་ཡིན་དགག་གི་ཆོས་གཞན་འཕེན་ཚུལ་ལ་ཡང་བཞི་ཡོད་དེ།   མཆོད་སྦྱིན་ཚོན་པོ་ཉིན་པར་མི་ཟ་བ་ཞེས་པ་ལྟ་བུ་བསྒྲུབ་ཆོས་གཞན་དོན་གྱིས་འཕངས་པ་དང༌། བདག་ལས་མ་སྐྱེས་པ་ཡོད་ཅེས་པ་ལྟ་བུ་ཚིག་གཅིག་གིས་དགག་བྱ་གཅོད་པ་དང་ཆོས་གཞན་དངོས་སུ་འཕེན་པ་གཉིས་ཀ་སྟོན་པ་དང༌།   མཆོད་སྦྱིན་ཚོན་པོ་ཉིན་པར་མི་ཟ་བ་རིད་པ་མིན་པ་ཡོད་ཅེས་པ་ལྟ་བུ་ཚིག་གཅིག་གིས་དངོས་ཤུགས་གཉིས་ཀར་ཆོས་གཞན་འཕེན་པ་དང༌། སྐྱེས་བུ་གཅིག་རྒྱལ་རིགས་དང་བྲམ་ཟེའི་རིགས་གང་རུང་ཞིག་ཏུ་ངེས་ཤིང་ཁྱད་པར་མ་ངེས་པའི་སྐབས་སུ། འདི་བྲམ་ཟེ་མ་ཡིན་ཞེས་པ་ལྟ་བུ་སྐབས་སྟོབས་ཀྱིས་འཕྲངས་པ་སྟེ་བཞིའོ། །དེ་ལྟར་ཡང༌། ཤེས་རབ་སྒྲོན་མེའི་འགྲེལ་བཤད་དུ་དྲངས་པ་ལས། དགག་པ་དོན་གྱིས་བསྟན་པ་དང༌། །ཚིག་གཅིག་སྒྲུབ་པར་བྱེད་པ་དང༌། །དེ་ལྡན་རང་ཚིག་མི་སྟོན་པ།།མ་ཡིན་ཞེས་དང༌།   དེ་བཞི་གང་ཡང་མ་འཕངས་པའི་དགག་པ་ནི་མེད་དགག་སྟེ། གཞན་པ་གཞན་ཡིན་ནོ་ཞེས་སོ།   །དེས་ན་དངོས་པོ་ལ་དགག་བྱ་བཅད་པས་མི་ཆོག་གི་རང་བརྗོད་པའི་སྒྲས་བཅད་པ་དང་རང་རྟོགས་པའི་བློ་ལ་དངོས་སུ་དགག་བྱ་བཅད་པའི་རྣམ་པ་ཅན་དུ་འཆར་བ་གང་རུང་ཞིག་དགོས་སོ།    །ཆོས་གཞན་འཕངས་པ་ལའང་མ་ཡིན་དགག་དང་སྒྲུབ་པ་གང་རུང་ཞིག་དགོས་ཀྱི་ཆོས་གཞན་མེད་དགག་འཕངས་ཀྱང་མ་ཡིན་དགག་ཏུ་མི་འགྱུར་རོ།  །དངོས་པོ་ཐམས་ཅད་ངོ་བོ་ཉིད་ཀྱིས་རང་རང་གི་ངོ་བོ་གཞན་དང་མ་འདྲེས་པར་གནས་པ་ཡིན་པས་རིགས་མཐུན་རིགས་མི་མཐུན་ཀུན་ལས་ལོག་པར་གནས་པ་ཡིན་ལ། དེས་ན་གཞི་སྒྲ་ལྟ་བུ་གཅིག་ལ་ཡང་རིགས་མཐུན་ལས་ལོག་པ་དང་རིགས་མི་མཐུན་ལས་ལོག་པའི་ལྡོག་པ་དུ་མ་ཞིག་དབྱེར་རུང་བ་ཡིན་ཏེ། རིགས་པའི་དབང་ཕྱུག་གིས།   གང་ཕྱིར་དངོས་ཀུན་རང་བཞིན་གྱིས། །རང་རང་ངོ་བོ་ལ་གནས་ཕྱིར། །མཐུན་དངོས་གཞན་གྱི་དངོས་དག་ལས། །ལྡོག་པ་ལ་ནི་བརྟེན་པ་ཅན། །ཞེས་གསུངས་སོ། །ལྡོག་པ་དེ་དག་གི་སྒོ་ནས་སྒྲ་མི་རྟག་པ་ལྟ་བུའི་རང་གི་མཚན་ཉིད་དཔྱིས་ཕྱིན་པར་རྟོགས་པས་དགག་སྒྲུབ་ཀྱི་དངོས་རྟེན་དོན་དམ་པར་མ་གྲུབ་ཀྱང་དེ་ལ་བརྟེན་ནས་དོན་དམ་པའི་གནས་ལུགས་ལེགས་པར་རྟོགས་ནུས་པ་འདི་ནི་ཐ་སྙད་པའི་ཚད་མ་དོན་དམ་པའི་གནས་ལུགས་རྟོགས་པའི་རྒྱུར་འགྱུར་ཚུལ་སོགས་ལུགས་འདི་དག་གི་བདེན་གཉིས་ཀྱི་རྣམ་དབྱེ་ཤེས་པ་ལ་མེད་དུ་མི་རུང་བ་ཡིན་ནོ།     །དེས་ན་ད་དུང་ཞིབ་ཏུ་གཏན་ལ་འབེབས་དགོས་མོད་ཀྱང་མངས་པས་འཇིགས་ནས་མ་བྲིས་སོ། །
གཉིས་པ་ཕྱི་དོན་འདོད་ཚུལ་ལ། དངོས་དང༌།   རྣམ་པར་རིག་བྱེད་མ་ཡིན་པའི་གཟུགས་ཀྱི་འདོད་ཚུལ་ལོ།   །དང་པོ་ནི། ལུགས་འདིས་ཀྱང་རྡུལ་ཕྲན་ཆ་མེད་འདོད་པ་ཡིན་ཏེ། དེ་ཡང་རྡུལ་ཕྲ་བའི་མཐར་ཐུག་པ་དང་དེ་ལས་ཆུང་ངུར་གསིལ་དུ་མེད་པར་འདོད་དེ།   མངོན་པ་ཀུན་ལས་བཏུས་ལས།   རྡུལ་ཕྲ་རབ་བསགས་པ་ནི་གཟུགས་འདུས་པའོ་ཞེས་གང་བརྗོད་པ་དེ་ལ་རྡུལ་ཕྲ་རབ་ལུས་མེད་པར་རིག་པར་བྱའོ།   །བློས་མཐར་རབ་ཏུ་ཕྱེ་ནས་རྡུལ་ཕྲ་རབ་ཏུ་རྣམ་པར་བཞག་སྟེ། ཞེས་སོ། ། དེ་ལྟ་བུའི་རྡུལ་ཕྲ་རབ་དེའང་འབྱུང་བ་བཞི་དང་འབྱུང་འགྱུར་བཞིའི་བདག་ཉིད་ཅན་ཡིན་ཡང༌། བྱེ་བྲག་སྨྲ་བ་ལྟར་རྫས་རྡུལ་ཡན་གར་བ་བརྒྱད་འདུས་སུ་འདི་པ་མི་འདོད་དོ། །རྡུལ་ཕྲ་རབ་དང་རྡུལ་ཕྲན་ཙམ་ལའང་ཁྱད་ཡོད་དེ། རྡུལ་ཕྲ་རབ་བདུན་འདུས་པ་ལ་རྡུལ་ཕྲན་གཅིག་ཏུ་འདོད་པའི་ཕྱིར་ཏེ།མཛོད་ལས། སྐད་ཅིག་ཕྲ་རབ་རྡུལ་དང་ནི། །རྡུལ་ཕྲན་དང་ནི་དེ་བཞིན་དུ།   །ཞེས་སོགས་གསུངས་པས་སོ།    །རྡུལ་ཕྲ་རབ་བསགས་པས་བེམ་པོ་འགྲུབ་ཚུལ་ནི། སྔར་བྱེ་སྨྲའི་སྐབས་སུ་བཤད་པ་ལྟར་འབྱར་བ་དང་སྐོར་བ་དང་བར་མེད་པ་སྟེ་གསུམ་དུ་ཡོད་དེ།    དབུ་མ་རྒྱན་རྩ་འགྲེལ་གྱི་བཤད་པ་དེ་བྱེ་མདོ་གཉིས་ཆར་ལ་སྦྱར་ཆོག་པའི་ཕྱིར།   མཁས་པ་ཁ་ཅིག །རིགས་པའི་རྗེས་འབྲང་གི་མདོ་སྡེ་པ་ལ་རྡུལ་ཕྲ་རབ་ཆ་བཅས་སུ་འདོད་པ་ཡོད་དེ། མདོ་སེམས་གཉིས་བརྩད་པའི་ཚེ་ཆ་དང་བཅས་པའི་རྡུལ་ཕྲ་རབ་ཚོགས་ཚེ་རེ་རེས་ཀྱང་རང་འདྲའི་རྣམ་པ་གཏོད་པར་མདོ་སྡེ་པས་ཁས་བླངས་པར་་དམིགས་བརྟགས་རྩ་འགྲེལ་ལས་བཤད་པའི་ཕྱིར། ཞེས་གསུངས་སོ།  །འོན་ཀྱང་དེ་ནི་གཞུང་དེར་རྣམ་རིག་པའི་རིགས་པས་འཕུལ་བའི་ཚེ་མདོ་སྡེ་པས་རྡུལ་ཕྲ་རབ་དུ་མ་ཚོགས་ནས་རགས་པར་གྱུར་པ་ན།རགས་པ་དེ་ཕྱོགས་ཀྱི་ཆ་དང་བཅས་ལ་དེས་རང་འདྲའི་རྣམ་པ་གཏད་པ་ན་རང་གི་རྩོམ་གཞིར་གྱུར་པའི་རྡུལ་ཕྲ་རབ་ཀྱིས་ཀྱང་རང་གི་རྣམ་པ་གཏོད་པ་མི་འགལ་བར་སྨྲས་ན་དེ་འགོག་ལུགས་འདི་ལྟར་བྱེད་ཅེས་བཤད་པ་ཙམ་ཡིན་གྱི་མདོ་སྡེ་པ་རང་གི་རྩ་བའི་གྲུབ་མཐའ་ལ་རྡུལ་ཕྲ་རབ་ཆ་བཅས་སུ་ཁས་བླངས་པར་བཤད་པ་མིན་ནམ་སྙམ་སྟེ།   དེའི་རྒྱུ་མཚན་ཡང་མང་དུ་ཡོད་མོད་འདིར་མ་བྲིས་ཏེ།   བློ་ལྡན་རྣམས་ཀྱིས་ཞིབ་ཏུ་བརྟག་པར་བྱའོ།    །གཉིས་པ་ནི།   ལུགས་འདིས་རྣམ་པར་རིག་བྱེད་མ་ཡིན་པའི་གཟུགས་ཡོད་ཀྱང་དེ་གཟུགས་མཚན་ཉིད་པ་མ་ཡིན་པར་འདོད་དེ། བདེར་གཤེགས་གཞུང་གི་རབ་བྱེད་ལས།   །ཐོགས་པ་མེད་པའི་གཟུགས་ཡོད་མིན།   །ཅེས་དང༌།    ཊིཀ་ཆེན་དེ་ཉིད་སྣང་བ་ལས་ཐོགས་པ་མེད་པའི་རྣམ་པར་རིག་བྱེད་མིན་པའི་གཟུགས་གཟུགས་མཚན་ཉིད་པར་གྱུར་པ་ཡོད་པ་མ་ཡིན་ནོ།   །ཞེས་གསུངས་སོ།   །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2024 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号