ཨོ་སྭ་སྟི་སངྔྷཾ། མཁའ་ཁྱབ་འགྲོ་བ་ཀུན་ལ་རབ་བརྩེ་བའི། །སྙིང་སྟོབས་ཆེན་པོས་བགྲང་ཡས་བསྐལ་པའི་བར། །ཚོགས་གཉིས་བསྐྲུན་ཏེ་བྱང་ཆུབ་མཆོག་བརྙེས་པ། །ཐུབ་དབང་ལྷ་ཡི་བླ་མར་ཕྱག་འཚལ་ལོ། །མགོན་པོ་དེ་ཡིས་འགྲོ་བ་སྐྱོབ་པའི་སླད། །རྒྱ་མཚོའི་རྡུལ་སྙེད་ཞིང་ཁམས་མཐའ་ཀླས་པར། །གསང་གསུམ་བཀོད་པ་རབ་འབྱམས་སྤྲུལ་མཛད་པ།།ཀུན་ཀྱང་ལྷར་བཅས་འགྲོ་བའི་མཆོད་པའི་འོས། །ཁྱད་པར་བསྟན་པའི་འཁོར་ལོས་བྱིན་བརླབས་པའི། །ཙི་ནའི་རྒྱལ་ཁབ་ཆེན་པོའི་རྟེན་གྱི་གཙོ། །འཛམ་གླིང་རྒྱན་གཅིག་མཆོད་རྟེན་ཆེན་པོ་ཡི། །ལོ་རྒྱུས་མདོ་ཙམ་འདི་རུ་དགོད་པར་བྱ།།
དེ་ཡང་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་དེ་ཉིད་ཀྱིས་མཐའ་ཡས་པའི་འགྲོ་བ་རྣམས་ལ་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་བསྐོར་བ་སོགས་གསང་གསུམ་གྱི་མཛད་པ་བསམ་གྱིས་མི་ཁྱབ་པས་སྨིན་གྲོལ་གྱི་ལམ་ལ་འགོད་པར་མཛད་ངི་སྐུ་དངོས་ཀྱི་གདུལ་བྱར་མ་གྱུར་པའི་ཕྱི་རབས་ཀྱི་སྐྱེ་བོ་རྣམས་ལ་ཡང་ཐར་པ་དང་ཐམས་ཅད་མཁྱེན་པའི་ས་བོན་བསྐྲུན་པའི་ཆེད་དུ་སྐུ་གདུང་ཤ་རི་རེ་ཆ་བརྒྱད་དུ་བྱིན་གྱིས་བརླབས་པ་ལས་རླབས་པོ་ཆེའི་སྨོན་ལམ་གྱི་མཐུ་བཟང་པོས་ཆེས་མང་པོར་འཕེལ་ཏེ་ལྷ་དང་མི་དང་ཀླུའི་ཡུལ་དུ་མཆོད་སྡོང་བྱེ་བ་ཕྲག་སྤྲུལ་པ་རྣམས་སྐྱེ་རྒུའི་བསོད་ནམས་བསོག་པའི་ཞིང་ས་བླ་ན་མེད་པར་གྱུར་ཏོ།།
དེ་ནས་མ་ཧཱ་ཙི་ནའི་ཡུལ་གྲུ་འདི་ནི།འཕགས་པ་འཇམ་དཔལ་གྱི་རྩ་བའི་རྐྱུད་ལས།རྒྱ་དང་རྒྱ་ནི་ཆེ་ཉིད་ན། །འཇམ་པའི་དབྱངས་ནི་རབ་བསྒྲུབ་འགྱུར།།ཞེས་བཅོམ་ལྡན་འདས་རང་ཉིད་ཀྱིས་འཇམ་དཔལ་གྱིས་བྱིན་གྱིས་བརླབ་པའི་གནས་སུ་ལུང་བསྟན་ཅིང༌། སྟོན་པ་མྱ་ངན་ལས་འདས་ནས་ལོ་བརྒྱ་ཕྲག་གཉིས་ལྷག་ཙམ་ན་དགྲ་བཅོམ་པ་མ་རྫུ་ག་དང༌།པརྟི་ཏ་གོ་ལྷ་ར་ན་ཞེས་པ་གཉིས་ཀྱིས་སྟོན་པའི་རིང་བསྲེལ་བུམ་པ་གང་དང༌། ཐེག་པ་ཆེ་ཆུང་གི་མདོ་སྡེའི་གླེགས་བམ་མང་པོ་དང༌། སྟོན་པའི་སྐུ་བརྙན་རས་བྲིས་སུ་བཞེངས་པ་རྣམས་བསྣམས་ཏེ་ཕྱོགས་འདིར་བྱོན།དེའི་དུས་སུ་ཧན་མིང་ཧི་རྒྱལ་པོ་ལ་མནལ་ལམ་ཡ་མཚན་པ་བྱུང་བ་དང་བསྒྲིགས་ཏེ་རྒྱལ་པོ་འཁོར་བཅས་དད་པ་སྐྱེས། དགྲ་བཅོམ་པས་རི་བོ་རྩེ་ལྔའི་གནས་སྒོ་ཕྱེ། མཆོད་ཡོན་རྣམས་ཀྱིས་རིང་བསྲེལ་གྱི་སྙིང་པོ་ཅན་གྱི་མཆོད་རྟེན་མང་དུ་བཞེངས་པར་བཤད་འདུག་པས་རྒྱལ་ཁབ་ཆེན་པོ་འདི་ཉིད་ཀྱི་མཆོད་རྟེན་དཀར་པོར་གྲགས་པ་འདིའི་རྩ་བའི་མཆོད་རྟེན་ཀྱང་དེའི་སྐབས་སུ་བཞེངས་པར་གསལ་ཏེ། མཆོད་རྟེན་འདི་ལ་ཐང་གི་རྒྱལ་པོ་སོགས་ཀྱིས་ཀྱང་བ་སྟོད་པ་མཛད་པ་སྣང་བའི་ཕྱིར་རོ། །དེ་དུས་ཀྱི་རྩ་བའི་མཆོད་རྟེན་དེ་ནི་ཐུར་ཧྭན་ཀྭན་གྱི་བྱང་ཕྱོགས་ཡུན་ཨན་སེ་ཞེས་པའི་ལྷ་ཁང་དུ་བཞུགས་པར་སྣང༌། དུས་ཕྱིས་ལིའུ་གུར་གྱི་ཤེའུ་ཆང་རྒྱལ་པོའི་ལོ་གཉིས་པའི་དཔྱིད་ཟླ་ཐ་མའི་ཚེས་བཅོ་ལྔ་ལ། འཕགས་པའི་གང་ཟག་ཆེན་པོ་ཏོའུ་ཆན་ཞེས་བྱ་བས་ཉམས་གསོས་དང་སྲི་ཞུ་རྒྱ་ཆེར་མཛད། མཆོད་རྟེན་འདིའི་ནང་ན་སྟོན་པའི་ཤ་རི་རཾ་འཁྲུལ་མེད་རྡོག་ཉི་ཤུ་དང༌། དྲི་བཟང་ལས་བསྐྲུན་པའི་མཆོད་རྟེན་ཆུང་བ་སྟོང་ཕྲག་གཉིས། གཙུག་ཏོར་དྲི་མེད་གདུགས་དཀར་སོགས་ཆོས་སྐུའི་རིང་བསྲེལ་སྡེ་ལྔ་རྣམས་ནོར་བུ་ཆུ་ཤེལ་གྱི་སྒྲོམ་དུ་བཞུགས་པ་ཡིན་པར་སྣང་བ་ལ་མཆོད་རྟེན་གྱི་ཕྱི་ངོས་སུ་མཁན་པ་རྩ་ལྡུམ་མང་དུ་སྐྱེ་ཞིང་ཆེར་མི་མངོན་ལ། དགྲ་དང་མེ་ཆུའི་འཇིགས་པས་མི་ཚུགས་པར་གྲགས། སྐབས་སྐབས་སུ་མཚན་མོ་སྨག་རུམ་ལ་ཡང་སྣང་བ་ཆེན་པོ་ཡང་ཡང་བྱུང་བར། དྲུང་བའི་སྐྱེ་བོ་རྣམས་ཀྱིས་མེའི་འཇིགས་པ་བྱུང་ངམ་སྙམ་ནས་ཧ་ལས་ཏེ་བལྟ་བར་ཕྱིན་པ་ན་རིང་བསྲེལ་གྱི་མཆོད་རྟེན་ཉིད་ནས་བྱུང་བའི་འོད་ཟེར་ཡིན་པར་ཤེས་ཏེ་ངོ་མཚར་ཞིང་དད་པ་དང་སྤྲོ་བ་ཆེན་པོས་ཕྱག་འཚལ་བ་ལ་བརྩོན་པར་གྱུར་ཏོ།།
རིམ་གྱིས་རྒྱལ་པོའི་མདུན་ན་འདོན་ཆེན་པོ་ཐུ་ལེའི་ཞེས་པས་ཐོས་ཏེ་རྒྱུ་མཚན་རྣམས་རྒྱས་པར་རྒྱལ་པོའི་སྙན་དུ་གསོལ་བས་རྒྱལ་པོ་ཡང་མཆོག་ཏུ་དད་དེ་མཆོད་རྟེན་གྱི་དྲུང་དུ་བྱོན་ནས། ནང་ན་ཅི་ཡོད་སྙམ་ནས་མཆོད་རྟེན་གྱི་ཞལ་ཕྱེ་ནས་བལྟས་པས། དྲི་བཟང་གི་མཆོད་རྟེན་རྣམས་ཀྱི་འོག་ཏུ་རྡོའི་སྒྲོམ།
དེའི་ནང་དུ་ལྕགས་ཀྱི་མཆོད་རྟེན། དེའི་ནང་དུ་ཟངས་ཀྱི་བུམ་པ་བདུད་རྩི་ཤེལ་གྱི་མདོག་ལྟ་བུས་གང་བའི་ནང་དུ་ཟོང་སྲེལ་རྣམས་གསེར་འོད་འཕྲོ་བ་བཞུགས་པ་དང༌། བུམ་པའི་འོག་ནས་ཀླུའི་རྒྱལ་པོ་གཉིས་ཀྱིས་བཏེགས་པའི་རྣམ་པ་ཅན་སྣང་ཞིང༌། ཁྲིའི་ནང་དུ་མདོ་སྡེ་ཟབ་མོ་སྡེ་ཚན་ལྔའི་གླེགས་བམ་རྣམས་གཙང་ཞིང་དྲི་མ་མེད་པ་བཞུགས་ཤིང༌། གསེར་དང༌།མུ་ཏིག་དང༌།རིན་པོ་ཆེ་སྣ་བདུན་དང༌།སྨན་དང་འབྲས་བུ་སྣ་ཚོགས་པས་བཀང་ཞིང༌། རྒྱན་གྱི་བཀོད་པ་དུ་མས་ཤིན་ཏུ་མཛེས་པར་བྱས་པ་མཐོང་ངོ༌། །ཡང་བུམ་པའི་ཞབས་སུ་གསེར་གྱི་དོང་ཙེ་ཞིག་འདུག་པ་བླངས་ནས་བལྟས་པས། དོང་ཙེའི་ངོས་ལ། ཊི་ཡྭོན་ཐུང་པོའུ་ཞེས་པའི་ཡི་གེ་འབུར་དུ་དོད་པ་མཐོང༌།ཊི་ཡྭོན་ནི་རྒྱལ་པོ་རང་ཉིད་ཀྱི་མིང་ཡིན་པས་མ་འོངས་འབྱུང་འགྱུར་གྱི་དོན་གསལ་བར་སྟོན་པའི་འཕགས་ཆེན་དམ་པ་རྣམས་ཀྱི་མཛད་པ་བསམ་གྱིས་མི་ཁྱབ་པ་ལ་གུས་པ་བླ་ན་མེད་པ་སྐྱེས། དེ་ནས་ཉི་ཝོན་རྒྱལ་པོའི་ལོ་བརྒྱད་པའི་དཔྱིད་ཟླ་ཐ་ཆུང་གི་ཉི་ཤུ་ལྔ་ལ། རྒྱལ་པོ་བཙུན་མོ་དང་བཅས་པས་རྒྱུ་དངོས་མང་དུ་སྦྱར་ཏེ་མཆོད་རྟེན་སྔར་ལས་ཀྱང་རྒྱ་ཆེ་ཞིང་དཔངས་མཐོ་བར་བསྐྲུན་ཏོ། །དེ་ནས་རྩ་བའི་མཆོད་རྟེན་དེ་ཉིད་སྐྱེ་བོ་ཁྲི་ཕྲག་མང་པོས་མཆོད་པའི་བྱེ་བྲག་བསམ་གྱིས་མི་ཁྱབ་པས་མདུན་ནས་བདར་ཏེ་མཆོད་རྟེན་ཆེན་པོའི་ནང་དུ་བཞུགས་སུ་གསོལ། མཆོད་རྟེན་ཆེན་པོའི་ཕྱི་ངོས་སུ་ཡི་དམ་སངས་རྒྱས་བྱང་སེམས་དུ་མའི་སྐུ་བརྙན་འབུར་དུ་དོད་པ་དང༌། མཆོད་པའི་ལྷ་མོ་མཆོད་རྫས་སྣ་ཚོགས་ཐོགས་པའི་གཟུགས་བརྙན་མཛེས་པར་བྱས་ཤིང༌། 1/3 1 2 3 下一页 尾页 |
