| རྗེ་བཙུན་བླ་མ་ངག་དབང་བྱམས་པ་རིན་པོ་ཆེ་བཞུགས་ཁྲི་མཐོན་པོ་དང༌།རྗེ་རང་ཉིད་སྟན་དམའ་བའི་སྟེང་དུ་བཞུགས་ཏེ་ཆོས་གསན་པའི་ཀུན་སྤྱོད་འདུལ་བ་དང་མདོ་སྡེ་ནས་འབྱུང་བ་ལྟར་མཛད་པས་བསྟན་པའི་མིག་རྒྱན་དུ་གྱུར་པ་མཛད་དོ། །རྗེ་འདི་པས་བླ་མ་རིན་པོ་ཆེ་དེ་ཉིད་ལ་ཐུགས་དད་ཚད་མེད་པ་མཛད་ཅིང༌། ལམ་སྒྲོན་གྱི་ལུང་གསན་སྐབས་དབུ་ཤོག་ཕྱག་ཏུ་ཕུལ་བ་སྨྲ་བརྗོད་གཙང་ཞིང་ཤར་རྒྱག་ཀློག་པ་གནང་བས་བླ་མ་རིན་པོ་ཆེ་ཐུགས་ཤིན་ཏུ་དགྱེས་པ་བྱུང་ངོ༌། །དེ་ནས་དགུང་ལོ་དྲུག་ཏུ་ཕེབས་པ་ཆུ་མོ་ཕག་གི་ལོ་ཟླ་བ་དང་པོའི་ཚེས་བཅུ་གཅིག་གི་ཉིན་གྲུབ་པའི་དབང་ཕྱུག་སྔགས་ཆེན་ཞལ་སྔ་ནས་བློ་བཟང་བཟོད་པ་ཡོངས་འཛིན་དུ་མངའ་གསོལ་ཏེ། ཐོག་མར་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱི་གསུང་འབུམ་ནང་ནས་རྗེ་བཙུན་ཙོང་ཁ་པ་ཆེན་པོ་ལ་བརྟེན་པའི་བླ་མའི་རྣལ་འབྱོར། དབྱངས་ཅན་མའི་བསྟོད་པ་ལྷའི་གླུ་དབྱངས། འཇམ་དཀར་གྱི་སྒྲུབ་ཐབས་ཤེས་རབ་མཆོག་སྦྱིན། འཇམ་དབྱངས་ཨ་ར་པ་ཙ་ནའི་སྒྲུབ་ཐབས་ནོར་བུ་ཆུ་ཤེལ་དང་བློ་གསལ་ཀུཎྜའི་དགའ་བྱེད། སྨྲ་སེང་གི་སྒྲུབ་ཐབས་རྨོངས་པའི་རྙོག་སེལ་ནོར་བུ་ཆུ་དྭངས་མ་དང་ཤེས་རབ་གསལ་བྱེད།དབྱངས་ཅན་མའི་སྒྲུབ་ཐབས། འཇམ་དབྱངས་ཀྱི་བསྟོད་པ་ཤེས་རབ་གསལ་བྱེད། འཇམ་དཀར་གྱི་བསྟོད་པ་བློ་གྲོས་མིག་འབྱེད་ཀྱི་ཐུར་མ་དང༌།རྗེའི་གསུང་ཐོར་བུ་ནས་དབྱངས་ཅན་མའི་སྒྲུབ་ཐབས་རྣམས་ཀྱི་ལུང་གསན་པར་མཛད་དོ། །དེ་ནས་ཡོངས་འཛིན་རིན་པོ་ཆེ་འདི་ལ་བདེ་གསང་འཇིགས་གསུམ་གྱི་དབང་དང་རྗེས་གནང་མང་པོ་དང༌། བཀའ་འགྱུར་རིན་པོ་ཆེའི་ལུང་དང༌། རྗེ་རིན་པོ་ཆེའི་གསུང་འབུམ་གྱི་ལུང་སོགས་གསན་པས་རྩ་བའི་བླ་མ་བཀའ་དྲིན་ཟླ་མེད་དུ་འཛིན་པར་མཛད་དོ། །དེ་ནས་རྗེ་འདི་པ་དགུང་ལོ་བདུན་དུ་ཕེབས་པ་ཤིང་ཕོ་བྱི་བའི་ལོ་བཀྲ་ཤིས་ལྷུན་པོའི་དགེ་འདུན་ཚང་མས་འདུས་པ་རྒྱ་མཚོའི་དབུས་སུ་མི་འཇིགས་སེང་གེའི་ཁྲི་ལ་ཕེབས་ནས་དགེ་འདུན་ཚང་མར་ཕྱག་དབང་དང་ཆོས་ཀྱི་བདུད་རྩི་གནང་དགོས་ཞེས་ཡང་ཡང་གསོལ་བ་བཏབ་པ་ན་ཡོངས་འཛིན་རིན་པོ་ཆེ་བློ་བཟང་བཟོད་པ་ལས་བསླབ་སྡོམ་བཞེས་ཏེ་ངུར་སྨྲིག་གི་རྒྱལ་མཚན་གསོལ་ནས་ཟླ་བ་དགུ་པའི་ཚེས་བཅུའི་ཉིན་མི་དབང་བསོད་ནམས་སྟོབས་རྒྱས་ཀྱིས་སྤྱན་དྲངས་ཏེ་གཙུག་ལག་ཁང་ཆེན་པོར་མི་འཇིགས་སེང་གེའི་ཁྲི་ལ་ཕེབས་ནས་ཚངས་པའི་དབྱངས་ཀྱིས་མཆོག་གསུམ་གྱི་ཐུགས་རྗེ་བསྐུལ་ཏེ་བདེན་པའི་མཐུ་བརྗོད་པའི་ལྗགས་བསྔོ་གནང་ཞིང་དགེ་འདུན་ཚང་མར་ཕྱག་དབང་སྩལ་བས་དགེ་འདུན་རྣམས་ཐུགས་ཡིད་ཚིམ་པར་མཛད། རྒྱལ་བ་མཆོག་ནས་ཀྱང་དགེ་འདུན་གྱི་སྡེ་ཆེན་པོའི་དབུས་སུ་ཆོས་ཀྱི་བདུད་རྩི་གནང་བའི་དབུ་ཚུགས་པ་ལེགས་ཞེས་རྟེན་འབྱུང་གི་དངོས་པོ་རྒྱ་ཆེ་བསྩལ་ཞིང༌། མི་དབང་བསོད་ནམས་སྟོབས་རྒྱས་སོགས་ཆེ་དགུ་ཚང་མས་སྲིད་ན་དཀོན་པའི་འབྱོར་པའི་ཁྱད་པར་སྣ་ཚོགས་པ་ཕུལ་ཏེ་མཆོད། དེ་ནས་རྗེ་འདི་ཉིད་དགུང་ལོ་བཅུ་གཉིས་སུ་ཕེབས་པ་ས་མོ་སྦྲུལ་གྱི་ལོ་སྔགས་ཆེན་ཞལ་སྔ་ནས་བློ་བཟང་དཔལ་འབྱོར་གྱིས་དབུས་སྔགས་གྲྭའི་དགེ་འདུན་ཚང་མས་ཞབས་བརྟན་གསོལ་འདེབས་ཤིག་གི་བཀའ་རྩོམ་ཞུས་པར། ཨོ་བདེ་ལེགས་སུ་གྱུར་ཅིག །བློ་གྲོས་དཔག་བསམ་ལྗོན་པའི་རྩ་བ་བརྟན། །བཟང་པོའི་ཡལ་ག་ལོ་མ་མེ་ཏོག་རྒྱས། །དཔལ་ལྡན་ཡེ་ཤེས་འབྲས་བུས་འགྲོ་བ་ཀུན། །ཚིམ་མཛད་རྗེ་བཙུན་བླ་མར་གསོལ་བ་འདེབས། །དགེ་ལེགས་ཡོན་ཏན་ཀུན་གྱི་གཞིར་གྱུར་པའི། །བློ་བཟང་རྒྱལ་བའི་བསྟན་པ་འཛིན་པ་ལ། །དཔལ་ལྡན་མཁས་ཀུན་གཙུག་གི་རྒྱན་གྱུར་པ། ཡེ་ཤེས་མཚན་ལྡན་ཞབས་ལ་གསོལ་བ་འདེབས། །བློ་བཟང་མཁྱེན་བརྩེའི་དཀྱིལ་འཁོར་རྒྱས་པ་ལས།།དཔལ་ལྡན་ཡེ་ཤེས་སྣང་བ་འབུམ་འཕྲོ་བས། །གདུལ་བྱའི་ཉོན་མོངས་མུན་པ་མ་ལུས་པ། །སེལ་མཛད་རྗེ་བཙུན་བླ་མར་གསོལ་བ་འདེབས། །ཐུབ་མཆོག་ཟས་གཙང་སྲས་པོའི་བསྟན་པ་དང༌། །ཁྱད་པར་བློ་བཟང་རྒྱལ་བའི་རིང་ལུགས་ཀུན། སྤེལ་ཞིང་འགྲོ་རྣམས་ཐར་ལམ་འགོད་མཛད་པའི།།དཔལ་ལྡན་ཡེ་ཤེས་དབང་པོ་ཞབས་བརྟན་ཤོག །དེང་ནས་བདག་སོགས་འགྲོ་བ་མ་ལུས་པ། ཐེག་མཆོག་དགེ་བའི་བཤེས་ཀྱིས་རྗེས་བཟུང་ནས། །མདོ་སྔགས་ཟུང་འབྲེལ་ཉམས་ལེན་མཐར་ཕྱིན་ཏེ།ས་བཅུ་རིམ་བགྲོད་རྣམ་མཁྱེན་མྱུར་ཐོབ་ཤོག །ཅེས་པ་དང༌། བླ་བརྒྱུད་གསོལ་འདེབས་ཁ་སྐོང་དུ་བཅུག་ཆོག་པའི་ཚིགས་བཅད་གཅིག་དགོས་ཞུས་པར། བློ་བཟང་རྒྱལ་བའི་རིང་ལུགས་པདྨོའི་ཚལ།།དཔལ་ལྡན་ཡེ་ཤེས་འོད་ཀྱིས་རྒྱས་མཛད་པའི། རིས་མེད་འགྲོ་བའི་འདྲེན་པ་ཀུན་གྱི་གཙོ། །རྗེ་བཙུན་བླ་མའི་ཞབས་ལ་གསོལ་བ་འདེབས། །ཞེས་པ་གནང་སྟེ་འདི་གཉིས་ནི་སྐུ་ཚེ་འདིའི་བཀའ་རྩོམ་གྱི་ཐོག་མ་ཡིན་ཞིང༌། དེ་སྔ་སྙན་ངག་ལ་སྦྱོང་བར་མ་མཛད་ཀྱང་སྙན་ངག་གི་ཚིག་རྒྱན་ངོ་མཚར་བའི་ཚིག་སྦྱོར་ཕུན་སུམ་ཚོགས་པ་ཐོགས་མེད་དུ་གནང་བ་འདི་འདྲ་བ་ངོ་མཚར་ཆེའོ་ཞེས་མཁས་པ་རྣམས་ཡ་མཚན་དུ་འཛིན་ཅིང༌། སྐུ་ཚེ་འདིར་མཁས་གྲུབ་སྨྲ་བའི་ཉི་མ་སླར་དངོས་སུ་བྱོན་པ་འདྲ་བ་ཞིག་ངེས་པར་འབྱུང་ངོ་ཞེས་དགེ་འདུན་ཚང་མ་ཡིད་ཆེས་ཀྱི་དད་པ་ཐོབ་སྟེ། རྗེ་འདིའི་བསྟོད་བསྔགས་འབའ་ཞིག་བརྗོད་པས་གཏམ་གཞན་གླེང་པའི་གོ་སྐབས་ཕྲོགས་པ་ལྟ་བུར་གྱུར་ཏོ། ། དེ་ནས་རྗེ་འདི་པ་རྒྱལ་བ་ཐམས་ཅད་མཁྱེན་པ་ཆེན་པོ་མཇལ་བར་ཤིན་ཏུ་རིངས་པར་གྱུར་ནས་ལོ་འདིར་རྒྱལ་བ་ཐམས་ཅད་མཁྱེན་པ་ཆེན་པོའི་ཞལ་མཇལ་ཞིང་དགེ་ཚུལ་གྱི་སྡོམ་པ་ཞུ་བ་སོགས་ཀྱི་ཆེད་དུ་ཕེབས་ཆོག་པ་དགོས་ཞེས་རྒྱལ་དབང་མཆོག་ལ་ཞུ་བར་མཛད་པ་ན་རྒྱལ་བ་ཐམས་ཅད་མཁྱེན་པ་ཆེན་པོ་ཡང་ཐུགས་ཤིན་ཏུ་དགྱེས་ནས་ངེད་ཀྱང་པཎ་ཆེན་མཆོག་གི་སྤྲུལ་པའི་སྐུ་མཇལ་འདོད་སྐོམ་པ་ཆུ་འདོད་ལྟ་བུར་ཡོད་པས་དབུས་ཕྱོགས་སུ་ཕེབས་བཞེད་པ་ཅིས་ཀྱང་ལེགས་ཞེས་མགྲོན་གཉེར་ཡོན་ཏན་ལེགས་གྲུབ་སོགས་དྲུང་འཁོར་ཁ་ཤས་ཕེབས་བསུར་གཏོང་བ་གནང༌། དེ་ནས་བཀྲ་ཤིས་ལྷུན་པོ་ནས་ཆིབས་བསྐྱོད་དེ་ལམ་བར་གྱི་དད་ལྡན་ཐམས་ཅད་མཐོང་ཐོས་དྲན་རེག་གི་སྒོ་ནས་སྨིན་གྲོལ་ལ་བཀོད་ཅིང༌། ཟླ་བ་བཞི་པའི་ཚེས་བཅུའི་ཉིན་ཕོ་བྲང་ཆེན་པོ་པོ་ཏ་ལར་ཕེབས་ཏེ་རྒྱལ་བ་ཡབ་སྲས་གསེར་ཞལ་ལྷན་རྒྱས་ནས་ལྷ་མི་ཐམས་ཅད་ཚིམ་པར་མཛད། 2/9 མདུན་ངོས། 上一页 1 2 3 4 5 6 下一页 尾页 |
