| དེ་ནས་ལམ་རིམ་ཆེན་མོའི་བཤད་ལུང་གསན་པས་རང་དང་གཞན་གྱི་གྲུབ་མཐའ་རྒྱ་མཚོའི་ཕ་རོལ་ཏུ་ཕྱིན་པར་གྱུར་ཏེ་གངས་རིའི་ཁྲོད་འདིར་བྱང་ཆུབ་ལམ་རིམ་འཆད་པ་ལ་སུས་ཀྱང་འགྲན་དུ་མེད་པ་མཁས་གྲུབ་སྨྲ་བའི་ཉི་མ་སླར་ཡང་བྱོན་པ་ཇི་ལྟ་བར་གྱུར་ཏོ། །དེ་ནས་རིམ་བཞིན་རྗེ་བཙུན་ངག་དབང་བྱམས་པའི་ཞབས་དྲུང་དུ་དཔལ་གསང་བ་འདུས་པའི་དབང་དང་འདུས་པའི་རྩ་རྒྱུད་འགྲེལ་པ་བཞི་སྦྲགས་ནས་འཆད་པའི་བཤད་སྲོལ་གསང་ཆེན་རྒྱུད་སྡེ་རྒྱ་མཚོའི་སྙིང་པོའི་བཅུད་ཕྱུང་བ་གོང་ན་མེད་པའི་ལེགས་བཤད་ཀྱི་གཏེར་ཆེན་པོ་གསན། དེ་ནས་དཔལ་གསང་བ་འདུས་པའི་རིམ་གཉིས་ཀྱི་ཁྲིད་དང༌། དཔལ་འཁོར་ལོ་སྡོམ་པའི་དབང་དང༌། དེའི་རིམ་གཉིས་ཀྱི་ཁྲིད། བདེ་མཆོག་དྲིལ་བུ་ལུགས་ཕྱི་ནང་གཉིས་ཀའི་དབང་དང༌།དེའི་རིམ་གཉིས་ཀྱི་ཁྲིད། དཔལ་རྡོ་རྗེ་འཇིགས་བྱེད་ཆེན་པོའི་རིམ་གཉིས་ཀྱི་ཁྲིད། བཀའ་གདམས་ཐིག་ལེ་བཅུ་དྲུག་གི་དབང་དང་མན་ངག་བཅས་གནང་སྟེ།རྗེ་བཙུན་བླ་མ་ངག་དབང་བྱམས་པས་རྗེ་འདི་གསང་ཆེན་བསྟན་པའི་བདག་པོར་མངའ་གསོལ་ཏོ། དེ་ནས་སྔགས་གྲྭའི་དགེ་འདུན་ཚང་མས་གསོལ་བ་ནན་གྱིས་བཏབ་ནས་རྗེ་འདི་སྔགས་ཁང་དུ་ཕེབས་ཏེ་སྔགས་པ་ཚོགས་ཡོངས་ཀྱི་ཐོག སྐལ་བ་དང་ལྡན་པ་གཞན་མང་པོ་བཅས་དགེ་འདུན་དྲུག་བརྒྱ་སྐོར་ལ་དཔལ་རྡོ་རྗེ་འཇིགས་བྱེད་ཆེན་པོའི་དབང་བཞི་སྟ་གོན་དང་བཅས་པ་རྒྱས་པར་སྩལ། དེ་ནས་རྗེ་བཙུན་བླ་མ་ངག་དབང་བྱམས་པས་བཀྲ་ཤིས་ལྷུན་པོའི་ཚོགས་ཆེན་ལ་ལམ་རིམ་གྱི་ཁྲིད་རྒྱས་པ་ཞིག་གནང་དགོས་སོ་ཞེས་བསྐུལ་མ་མཛད་ལྟར་ཚོགས་ཆེན་ལ་ལམ་རིམ་གྱི་ཁྲིད་རྒྱས་པ་སེམས་བསྐྱེད་མཆོད་པ་དང་བཅས་པ་གནང༌། དེ་ནས་ལྕང་སྐྱ་རིན་པོ་ཆེ་ཕེབས་ཏེ་རྗེ་འདི་ཚོགས་དབུར་སྤྱན་དྲངས་ནས་ཞབས་བརྟན་རྒྱས་པ་འབུལ་བར་མཛད་ཅིང་ཆོས་ཀྱི་བདུད་རྩི་སྩོལ་དགོས་པར་གསོལ་འདེབས་མཛད་པ་ལྟར་གཟིམ་ཆུང་ཉི་འོད་འཁྱིལ་པར་ལྕང་སྐྱ་རིན་པོ་ཆེ་འཁོར་བཅས་དང༌། དེ་སྐབས་བདག་ཀྱང་སྐྱབས་མགོན་མཆོག་གི་ཞལ་མཇལ་བར་འོངས་པ་དུས་འགྲིག་སྟེ་བདག་ཅག་རྣམས་ལ་དཔལ་རྡོ་རྗེ་འཇིགས་བྱེད་ལྷ་བཅུ་གསུམ་མའི་དབང་བཞི་ཆེས་རྒྱས་པར་སྩལ། གཞན་ཡང་ལྕང་སྐྱ་རིན་པོ་ཆེ་ལ་སྔགས་ཀྱི་ཟབ་ཆོས་མང་དུ་གནང་ཞིང༌། ལྕང་སྐྱ་རིན་པོ་ཆེ་འདི་ཉིད་མདོ་སྔགས་ཐམས་ཅད་ལ་མཁས་པའི་ཕུལ་དུ་ཕྱིན་པ་སུས་ཀྱང་འགྲན་དུ་མེད་པ་ཞིག་ཡིན་ཡང་རྗེ་བླ་མ་མཆོག་འདིའི་དབང་བཤད་རྣམས་ལ་ཐུགས་ཤིན་ཏུ་དགྱེས་ནས་ལེགས་སོ་བརྗོད་པར་མཛད། དེ་ནས་བདག་གིས་གསོལ་བ་བཏབ་སྟེ་གཟིམ་ཆུང་ཡིད་དགའ་ཆོས་འཛིན་དུ་བདག་དང་ཟླ་བོ་རི་ཁྲོད་པ་བཅུ་དྲུག་ཙམ་ཞིག་ལ་དཔལ་རྡོ་རྗེ་འཇིགས་བྱེད་ཆེན་པོའི་བསྐྱེད་རིམ་དང་རྫོགས་རིམ་གྱི་ཁྲིད་ལག་རྗེས་སྒྱུ་ལུས་མཆོད་པ་དང་བཅས་པ་རྒྱས་པར་སྩལ། དེ་ནས་ཚོགས་ཆེན་ལ་ལམ་རིམ་ཆེན་མོའི་བཤད་ལུང་རྒྱས་པར་སྩལ། རིམ་གྱིས་ཚོགས་ཆེན་ལ་གདུགས་དཀར་གྱི་དབང་ཆེན། ཚེ་དཔག་མེད་ལྷ་དགུའི་དབང་ཆེན།ཐུབ་པ་དམ་ཚིག་གསུམ་བཀོད་ཀྱི་དབང་ཆེན། དཔལ་མོ་ལུགས་བཅུ་གཅིག་ཞལ་གྱི་དབང་ཆེན་རྣམས་སོ་སོར་སྟ་གོན་དང་བཅས་རྒྱས་པར་སྩལ། དེ་ནས་ལྕང་སྐྱ་རིན་པོ་ཆེས་དབུས་སུ་སྤྱན་དྲངས་ཏེ་དཔལ་དུས་ཀྱི་འཁོར་ལོའི་དབང་ཆེན་གནང་དགོས་པར་གསོལ་བ་བཏབ་པ་ན་ཕོ་བྲང་ཆེན་པོ་པོ་ཏ་ལའི་གཟིམ་ཆུང་ཁམས་གསུམ་རྣམ་རྒྱལ་དུ་སློབ་མ་རྗེས་འཛིན་གྱི་ཆོ་ག་མཛད། དེ་ནས་ཚོམ་ཆེན་དུ་ལྕང་སྐྱ་རིན་པོ་ཆེས་དབུས་དགེ་འདུན་ཉིས་སྟོང་བརྒལ་བར་དཔལ་དུས་ཀྱི་འཁོར་ལོའི་དབང་སྟ་གོན་དང་བཅས་པ་ཡོངས་སུ་རྫོགས་པ་གནང་སྟེ་དཔལ་དུས་ཀྱི་འཁོར་ལོའི་བསྟན་པ་ཉིན་མོ་ལྟར་གསལ་བར་མཛད་དོ། །དེ་ནས་སེ་འབྲས་དགེ་གསུམ་རྒྱུད་སྟོད་སྨད་སོགས་དབུས་ཕྱོགས་ཀྱི་དགེ་འདུན་རྣམས་ལ་མདོ་སྔགས་ཀྱི་ཆོས་རྒྱ་ཆེར་སྩལ་ཏེ་བསྟན་པ་ལ་བྱ་བ་རྒྱ་ཆེར་མཛད་དོ། །དེ་ནས་གཙང་དུ་ཕེབས་བཞེད་པ་ན་དགའ་ལྡན་རྣམ་པར་རྒྱལ་བའི་གླིང་དུ་སྤྱན་དྲངས་ཏེ་གསེར་ཁྲིའི་སྟེང་ནས་བསྟན་པའི་རྩ་བ་སོ་སོ་ཐར་པའི་མདོ་འཆད་པ་སོགས་ཆོས་ཀྱི་འཁོར་ལོ་རྒྱ་ཆེར་བསྐོར། དེ་ནས་བཀའ་གདམས་བསྟན་པའི་འབྱུང་གནས་ར་སྒྲེང་དུ་ཕེབས་ཏེ་སྙུག་མར་གནས་པ་དང་ཕྱོགས་འདུས་ཀྱི་དགེ་འདུན་བགྲང་བ་ལས་འདས་པ་རྣམས་ལ་ཆོས་ཀྱི་འཁོར་ལོ་རྒྱ་ཆེར་བསྐོར། ཇོ་བོའི་སྐུ་འདྲ་དབུ་ཡོན་མར་གྲགས་པ་ལ་མཆོད་འབུལ་རྒྱ་ཆེན་པོ་དང་བཅས་གསོལ་འདེབས་ཤུགས་དྲག་མཛད་པ་ན་དག་པའི་གཟིགས་སྣང་དང་ཇོ་བོ་ཕྱིང་དཀར་བ་དགྱེས་པའི་མཚན་མ་ངོ་མཚར་བ་མང་དུ་བྱུང༌། ཡར་ལམ་དགའ་ལྡན་རབ་རྒྱས་སུ་ཆིབས་བསྐྱོད་དེ་ཞག་བཅོ་ལྔ་ཙམ་བཞུགས་ནས་ཆོས་འཁོར་རྒྱ་ཆེར་བསྐོར། དེ་སྐབས་རྒྱལ་བ་མཆོག་གི་སྤྲུལ་པའི་སྐུ་ཐོབ་རྒྱལ་ལྷ་རི་སྒང་དུ་ཕེབས་པ་ཕྱི་ཆར་དུ་མ་གྲགས་ཀྱང་རྒྱལ་བ་ཡབ་སྲས་གཉིས་ཡེ་ཤེས་སྒྲིབ་པ་མེད་པས་གཅིག་གིས་གཅིག་གསལ་བར་གཟིགས་ཏེ་ལྷ་རི་སྒང་པའི་ཡུམ་སྲས་བཅས་རྗེ་འདི་པ་མཇལ་དུ་བྱོན་པ་ན་རྒྱལ་བ་ཡབ་སྲས་གཉིས་ཞལ་མཇལ་ཏེ་གསང་བ་ཟབ་མོའི་བཀའ་མཆིད་མཛད་ཅིང་མྱུར་དུ་གསེར་ཁྲི་ལ་མངའ་གསོལ་བའི་རྟེན་འབྲེལ་བསྒྲིག་པར་མཛད་དོ། །དེ་ནས་གདན་ས་ཆེན་པོ་བཀྲ་ཤིས་ལྷུན་པོས་ཕེབས་ཏེ་གཞིས་བྱེས་ཀྱི་དགེ་འདུན་བགྲང་བ་ལས་འདས་པ་ལ་ཕྱག་དབང་དང་ཆོས་ཀྱི་འཁོར་ལོ་རིམ་པར་བསྐོར་བར་མཛད་ཅིང༌། རྗེ་བདག་ཉིད་ཆེན་པོའི་རྣམ་ཐར་ལྟར་ཤིང་རྟ་ཆེན་པོའི་གཞུང་རྣམས་ལ་སྦྱངས་པ་མཐར་ཕྱིན་པ་ཞིག་མཛད་བཞེད་ནས་རྣམ་འགྲེལ་གྱི་རིགས་ལུང་གོང་འཕེལ་ཐོག་མངོན་རྟོགས་རྒྱན་ཐུགས་ལ་བཟུང་སྟེ་ཕར་ཕྱིན་གྱི་གསན་སྦྱོང་དང༌། དབུ་མ་འཇུག་པ་ཐུགས་ལ་བཟུང་སྟེ་དབུ་མའི་གསན་སྦྱོང་དང༌། འདུལ་བ་མདོ་རྩ་བ་ཐུགས་ལ་བཟུང་སྟེ་འདུལ་བའི་གསན་སྦྱོང་དང༌། མངོན་པ་མཛོད་ཐུགས་ལ་བཟུང་སྟེ་མངོན་པའི་གསན་སྦྱོང་རྣམས་དང་རྒྱ་གར་མཁས་པའི་གཞུང་རྣམས་དང་རྗེ་ཡབ་སྲས་ཀྱི་གཞུང་རྣམས་ལ་ལེགས་པར་གཟིགས་ཏེ་མཐའ་ཆོད་པར་མཛད་ཅིང༌། འཛམ་བུའི་གླིང་གི་སའི་ཆ་མཐའ་དག་ནས་འདུས་པའི་ཆོས་དོན་གཉེར་བ་རྣམས་ལ་སྡེ་སྣོད་གསུམ་དང་རྒྱུད་སྡེ་བཞིས་བསྡུས་པའི་མདོ་སྔགས་ཀྱི་ཆོས་མཐའ་ཡས་པ་བརྒྱུད་མར་སྩལ། བསྟན་པའི་གསལ་བྱེད་རྗེ་ལྕང་སྐྱ་རིན་པོ་ཆེ་ནས་བསྐུལ་མ་མཛད་པ་ལྟར་སྔགས་ཁང་དུ་བདེ་མཆོག་གི་ཆོ་ག་གསར་འཛུགས་མཛད་རྒྱུར། སྔགས་པ་ཚོགས་ཡོངས་ལ་བདེ་མཆོག་གི་དབང་ཆེན་སྩལ་ནས་སྔགས་ཁང་དུ་བདེ་མཆོག་གི་ཆོ་ག་འཛུགས་པར་མཛད། སྔགས་པའི་དགེ་བཤེས་དྲག་རིམ་ནས་བདེ་མཆོག་གི་བསྙེན་པ་བྱེད་དགོས་པའི་བཀའ་འདོམས་མཛད་དེ་བསྙེན་སོང་མང་དུ་བྱུང་བ་ན་རྗེ་ཉིད་དགུང་ལོ་ཉི་ཤུ་རྩ་ལྔར་ཕེབས་པ་ཆུ་ཕོ་རྟའི་ལོ་ཟླ་བ་བཅུ་གཅིག་པའི་ཚེས་བཅུ་གསུམ་གཟའ་སྐར་འཕྲོད་སྦྱོར་ལེགས་པའི་ཉིན་ནས་བདེ་མཆོག་སྒྲུབ་མཆོད་ཀྱི་དབུ་ཚུགས་ཏེ་ཇི་སྲིད་རྒྱལ་བསྟན་ནམ་གནས་ཀྱི་བར་དུ་མི་ཉམས་པའི་བཀའ་འདོམས་མཛད། རྗེ་རྒྱལ་བ་གཉིས་པའི་བསྟན་པའི་སྙིང་པོ་གསང་ཆེན་རྡོ་རྗེ་ཐེག་པའི་བསྟན་པ་མཐར་ཐུགས་མ་རྒྱུད་ཀྱི་གཙོ་བོ་དཔལ་འཁོར་ལོ་སྡོམ་པའི་བསྟན་པ་གསལ་བར་མཛད་པ་ནི་ངོ་མཚར་རྨད་དུ་བྱུང་བའི་རྣམ་པར་ཐར་པ་ཞིག་གོ། །དེ་ནས་ས་སྐྱོང་ཞེས་པ་ཤིང་མོ་བྱའི་ལོ་དུས་འཁོར་གྱི་སྒྲུབ་མཆོད་འཛུགས་པར་མཛད་དེ་ཇི་སྲིད་རྒྱལ་བསྟན་ནམ་གནས་པར་ནག་པ་ཟླ་བའི་ནང་དུ་དུས་འཁོར་སྒྲུབ་མཆོད་ཆག་མེད་ཡོང་པའི་བཀའ་འདོམས་མཛད། དེའི་ཚེ་སྔོན་ཤམྦྷ་ལར་རིགས་ལྡན་འཇམ་དཔལ་གྲགས་པས་དྲང་སྲོང་ཉི་མའི་ཤིང་རྟ་སོགས་སྐལ་ལྡན་གྱི་སློབ་མ་བྱེ་བ་ཕྲག་མང་པོ་དཀྱིལ་འཁོར་ཆེན་པོར་འཛུད་པར་མཛད་པ་ལྟར་རྗེ་འདིས་ཀྱང་དཔལ་དུས་ཀྱི་འཁོར་ལོའི་བསྟན་མ་ཆེས་ཆེར་རྒྱས་པར་བྱ་བའི་རྟེན་འབྲེལ་དུ་བཀྲ་ཤིས་ལྷུན་པོའི་དགེ་འདུན་ཚང་མ་དུས་འཁོར་སྒྲུབ་མཆོད་ཀྱི་ཐོག་དཀྱིལ་འཁོར་མཇལ་བ་དང་རྗེ་ཉིད་ཀྱི་བྱིན་རླབས་ཞུ་བ་བཅས་ལ་གཏོང་བར་མཛད། དེ་སྐབས་གནས་གསུམ་གྱི་དཔའ་བོ་དང་དཔའ་མོ་རྣམས་ཆེས་ཆེར་དགྱེས་པའི་རྟགས་སུ་ནམ་མཁར་འཇའ་སྤྲིན་འཁྲིགས་པ་སོགས་ངོ་མཚར་བའི་ལྟས་མང་དུ་བྱུང་ངོ༌། །དེ་ནས་རྣམ་འདྲེན་རྒྱལ་བའི་དབང་པོས་སྤྱན་འདྲེན་ཞུས་ཏེ་དབུས་ཕྱོགས་སུ་ཕེབས། ཟླ་བ་དྲུག་པའི་ཚེས་བཞི་རྒྱལ་བས་ཆོས་འཁོར་བསྐོར་བའི་དུས་ཆེན་གྱི་ཉིན། 4/9 མདུན་ངོས། 上一页 2 3 4 5 6 7 下一页 尾页 |
