| རིགས་ཐམས་ཅད་ཀྱི་བདག་པོ་དང་དཀྱིལ་འཁོར་ཐམས་ཅད་ཀྱི་སློབ་དཔོན་དུ་མངའ་གསོལ་ཏེ་ཆོས་ཀྱི་རྒྱལ་སྲིད་དུ་དབང་བསྐུར་བར་མཛད་དོ། །དེ་ནས་བདེ་འབྱོར་བླ་མས་གསོལ་བ་བཏབ་ནས་ཉུང་བསྡུས་ཤིག་ལ་བཅུ་གཅིག་ཞལ་གྱི་དབང༌། ཕྱག་རྡོར་འཁོར་ཆེན་གྱི་དབང༌། རྣམ་སྲས་བཀའ་མི་འདྲ་བ་བཅོ་ལྔའི་རྗེས་གནང་བཅས་སྩལ། དེ་ནས་འཇམ་དབྱངས་བཞད་པའི་སྤྲུལ་པའི་སྐུས་གསོལ་བ་བཏབ་ནས་འབྲས་སྤུངས་འདུ་ཁང་ཆེན་མོར་དགེ་འདུན་ལྔ་སྟོང་སྐོར་ལ་བདེ་ལམ་གྱི་ཁྲིད་དབེན་ས་སྙན་རྒྱུད་ཀྱི་མན་ངག་ལྟར་ཞག་ཉི་ཤུའི་བར་རྒྱས་པར་སྩལ། དེ་ནས་ཆོས་གསན་པ་སྔ་མ་རྣམས་ཀྱི་ཐོག་ནས་བླ་མེད་ཀྱི་དབང་ཆེན་ཐོབ་པ་སྟོང་དང་ལྔ་བརྒྱ་སྐོར་ལ་འགྲེལ་པ་བཞི་སྦྲགས་ཀྱི་གཟབས་བཤད་རྒྱས་པར་སྩལ། དེ་ནས་མེ་བྱི་ལོ་ཆོས་འཁོར་རྒྱལ་དུ་ཕེབས་བཞེད་ནས་ལམ་ཞོར་སེ་རར་ཕེབས་ཏེ་མཁན་པོ་དཔལ་འབྱོར་གྲགས་པས་གསོལ་བ་བཏབ་ནས་དགེ་འདུན་སྟོང་དང་སུམ་བརྒྱ་སྐོར་ལ་འཇམ་དབྱངས་ཆོས་སྐོར་ནས་འཇམ་དབྱངས་ཨ་ར་པ་ཙ་ནའི་རྗེས་གནང་སོགས་གནང༌། རྗེ་ངག་དབང་བྱམས་པས་གསོལ་བ་བཏབ་ནས་གནས་བཅུའི་རྗེས་གནང་སྩལ། དེ་ནས་རིམ་གྱིས་དགའ་ལྡན་རྣམ་པར་རྒྱལ་བའི་གླིང་དུ་ཕེབས་ཏེ་གསེར་ཁྲིའི་སྟེང་ནས་སེར་སྐྱ་བགྲང་བ་ལས་འདས་པ་ལ་ཕྱག་དབང་དང་ཆོས་ཀྱི་བདུད་རྩི་སྩལ། བླ་མ་སངས་རྒྱས་ཆོས་འཕེལ་གྱིས་གསོལ་བ་བཏབ་ནས་དགེ་འདུན་སྟོང་བརྒལ་བར་སྙིང་པོ་དོན་གསུམ་གྱི་ཁྲིད་རྒྱས་པར་སྩལ། དེ་ནས་རྒྱལ་དུ་ཆིབས་ཁ་བསྐྱོད་དེ་མངའ་དྭགས་རྒྱལ་གསུམ་གྱི་དགེ་འདུན་འདུས་པ་ལ་དགའ་ལྡན་ལྷ་བརྒྱ་མའི་ཟབ་ཁྲིད་རྒྱས་པར་སྩལ་ཞིང༌། དཔལ་ལྡན་ལྷ་མོ་ལ་རྒྱལ་བསྟན་གཉེར་དུ་གཏད་པའི་འཕྲིན་འཆོལ་རྒྱས་པར་མཛད། རྗེ་འདིས་རྒྱལ་དུ་ལན་གསུམ་ཆིབས་བསྐྱོད་གནང་བར་ཕེབས་རེས་ཀྱིས་དྭགས་པོ་དང་འོལ་ཁའི་རྗེའི་སྒྲུབ་གནས་རྣམས་ལ་མཆོད་འབུལ་སྨོན་ལམ་རྒྱ་ཆེར་མཛད་ཅིང༌། ལྷག་པར་རྗེ་བཙུན་ཙོང་ཁ་པ་ཆེན་པོའི་སྒྲུབ་གནས་ཁྱད་པར་ཅན་དྭགས་པོ་ལྷ་སྡིངས་སུ་ཕེབས་ཏེ་མཆོད་འབུལ་སྨོན་ལམ་རྒྱ་ཆེར་མཛད་ཅིང་རྗེ་བདག་ཉིད་ཆེན་པོའི་མཛད་པ་རྣམ་ཐར་དྲན་པའི་ཐུགས་དད་དང་ངེས་འབྱུང་སྐྱོ་ཤས་ཤུགས་དྲག་འཁྲུངས་ཏེ་གདུང་ཤུགས་ཀྱི་གསོལ་འདེབས་པའི་མགུར་དབྱངས་མང་དུ་མཛད་ཅིང༌། ལྷག་པར་རྒྱལ་བ་ཙོང་ཁ་པ་ཆེན་པོའི་བཀའ་དྲིན་ལས་གསུང་རབ་དགོངས་འགྲེལ་དང་བཅས་པའི་སྙིང་པོའི་བཅུད་བསྡུས་པ་མདོ་སྔགས་གཉིས་ཀའི་ལམ་གྱི་ལུས་ཡོངས་སུ་རྫོགས་པ་ལ་འདོད་དགུར་ལོངས་སྤྱད་དུ་ཡོད་པ་འདི་འདྲ་བའི་བཀའ་དྲིན་འཁོར་ཐབས་མེད་དོ་སྙམ་དུ་རྗེ་བླ་མའི་བཀའ་དྲིན་དྲན་པའི་དད་གུས་ཤུགས་དྲག་པོ་འཁྲུངས་ཏེ་རྗེ་རིན་པོ་ཆེས་གཙོས་བརྒྱུད་པ་གསུམ་ལྡན་གྱི་བླ་མ་རྣམས་ལ་གསོལ་བ་འདེབས་པའི་གདུང་དབྱངས་འདི་ལྟར་མཛད་དེ། ན་མོ་གུ་རུ། བདེ་ཆེན་སྐུ་གསུམ་དབང་ཕྱུག་ཁྱབ་བདག་སྟོན་པ་རྡོ་རྗེ་འཆང༌། །དེ་ཡིས་བྱིན་བརླབས་གྲུབ་མཆོག་མདའ་བསྣུན་ལྰུ་ཨི་པ། །རྗེ་བཙུན་དྲིལ་བུ་པ་དང་ཌོཾ་ངྷི་ནཱ་རོ་སོགས། །ཉམས་ལེན་བྱིན་རླབས་བླ་མས་བདག་ཅག་སྐྱོབ་ཏུ་གསོལ། །མི་མཇེད་ཞིང་གི་མགོན་པོ་རྣམ་འདྲེན་ཟས་གཙང་སྲས། །དགའ་ལྡན་ལྷ་བརྒྱའི་གཙུག་རྒྱན་མི་ཕམ་ཆོས་ཀྱི་རྗེ། །རྒྱལ་སྲས་ཐོགས་མེད་སྐུ་མཆེད་གྲོལ་སྡེ་ཞི་འཚོ་སོགས། །རྒྱ་ཆེན་སྤྱོད་པའི་བླ་མས་བདག་ཅག་སྐྱོབ་ཏུ་གསོལ། །རྒྱལ་ཀུན་མཁྱེན་པའི་རང་གཟུག་ས་མགོན་པོ་འཇམ་དཔལ་དབྱངས། །འཕགས་མཆོག་ཀླུ་སྒྲུབ་ཞབས་དང་དེ་སྲས་འཕགས་པ་ལྷ། །གྲུབ་བརྙེས་སངས་རྒྱས་བསྐྱངས་དང་དཔལ་ལྡན་ཟླ་བ་སོགས། །ཟབ་མོ་ལྟ་བའི་བླ་མས་བདག་ཅག་སྐྱོབ་ཏུ་གསོལ། །ལྔ་བརྒྱའི་གཙུག་གི་ནོར་བུ་མགོན་པོ་ཨ་ཏི་ཤ །རྒྱལ་བ་རྒྱ་མཚོས་བྱིན་བརླབས་འབྲོམ་སྟོན་སྤྱན་རས་གཟིགས། །དེ་ཡི་རྒྱུད་འཛིན་རིགས་གསུམ་སྤྲུལ་པ་མཆེད་ལ་སོགས། །བཀའ་གདམས་བརྒྱུད་པའི་བླ་མས་བདག་ཅག་སྐྱོབ་ཏུ་གསོལ། །འཇམ་དབྱངས་མི་ཡི་གར་མཛད་ཀུན་མཁྱེན་བློ་བཟང་གྲགས། །སྤངས་རྟོགས་ཡོན་ཏན་རྫོགས་པའི་དག་པའི་འཁོར་སློབ་དང༌། །འཕྲིན་ལས་མཁའ་དང་མཉམ་པའི་འགྲོ་མགོན་བཀའ་དྲིན་ཅན། །བྱིན་རླབས་བརྒྱུད་འཛིན་བླ་མས་བདག་ཅག་སྐྱོབ་ཏུ་གསོལ། །སྤྲོས་བྲལ་བདེ་ཆེན་རང་བཞིན་བླ་མ་ཆོས་ཀྱི་སྐུ། །ལྷུན་གྲུབ་ཡན་ལག་བདུན་ལྡན་བླ་མ་ལོངས་སྤྱོད་རྫོགས། །གང་འདུལ་ཅིར་ཡང་འཆར་པའི་བླ་མ་སྤྲུལ་པའི་སྐུ། །དྲིན་ཅན་རྩ་བའི་བླ་མས་བདག་ཅག་སྐྱོབ་ཏུ་གསོལ། །ཚེ་འདིའི་ལོ་འདོད་ཁོ་ནས་ཉིན་མཚན་བྲེལ་ན་ཡང༌། །འཇིག་རྟེན་ཕྱི་མར་འགྲོ་ཚེ་སྒྲེན་མོ་ལག་སྟོང་འཁྱམས། །དེ་རིང་ཙམ་ཡང་སྡོད་པའི་གདེང་ཚད་མ་མཆིས་པས། །མགོན་མེད་ཉམ་ཐག་བདག་ཅག་ཐུགས་རྗེས་སྐྱོབ་ཏུ་གསོལ། །ཕན་པས་ཕར་ལ་བསྐྱངས་བཞིན་ཚུར་ལ་འཁང་བའི་གྲོགས། །རང་འདོད་ཐབས་དགུས་བསགས་ཀྱང་གཞན་གྱིས་ཟ་བའི་ནོར། །རང་བདེའི་ཆེད་དུ་བསྒྲུབས་ཀྱང་ཕྱི་ཕྱིར་སྡུག་བསྔལ་བསྐྱེད། །འདོད་པ་མེ་འོབས་འདི་ལས་བདག་ཅག་སྐྱོབ་ཏུ་གསོལ། །ལས་ཉོན་འཆིང་བས་བཅིངས་པའི་བཙོན་རའི་གནས་ན་མནར། །སྐྱེ་རྒ་ན་འཆིའི་གཅོང་གིས་སོས་དུས་མེད་པར་ཟིན། །ཟག་བཅས་རྡོས་སུ་ཆེ་བའི་ཕུང་པོའི་ཁུར་གྱིས་མནན། །འཁོར་བ་སྡུག་བསྔལ་གནས་ནས་བདག་ཅག་དྲང་དུ་གསོལ། །ཕན་བྱེད་ཐབས་ཀྱིས་མཆོད་ན་སྐྱབས་གནས་དཀོན་མཆོག་བཞིན། །འདོད་དགུ་ཐམས་ཅད་སྩོལ་བའི་དྲིན་ཅན་ཕ་དང་མར། །དགྲར་བཟུང་ཡལ་བར་འདོར་བའི་བསམ་བརླག་བདག་ཅག་ལ། །སྙིང་རྗེ་ལྷག་བསམ་བཟང་པོའི་དྲན་པ་སྩལ་དུ་གསོལ། །བརྟགས་ན་གཞི་རྩ་བྲལ་བའི་ཆོས་ཀྱི་གནས་ལུགས་འདི། །མ་རྟོགས་རང་སེམས་འཁྲུལ་པས་རང་ཉིད་དམ་དུ་བཅིངས། །གཏི་མུག་མུན་པར་འཁྱམས་པའི་དམུས་ལོང་བདག་ཅག་ལ། །ཆོས་ཉིད་རྗེན་པར་མཐོང་བའི་སྣང་བ་སྩལ་དུ་གསོལ། །རྣམ་དག་ཚུལ་ཁྲིམས་མཆོག་གིས་ཕྱི་དང་ནང་དུ་གཙང༌། །བདེ་གསལ་ཏིང་འཛིན་རོལ་པས་ཉིན་དང་མཚན་དུ་བདེ། །ཤེས་རབ་སྣང་བ་འབར་བས་འཕྲལ་དང་ཡུན་དུ་གསལ། །བསླབ་གསུམ་བསྟན་པ་དར་བའི་དགེ་མཚན་སྩལ་དུ་གསོལ། །མཐུ་ལྡན་མཁའ་འགྲོ་སྲུང་མས་བགེགས་དང་བར་གཅོད་བསྲུང༌། །ཆོས་དང་ཕུན་ཚོགས་རྒྱས་པས་མཐའ་དང་དབུས་སུ་བདེ། །བཀྲ་ཤིས་དཔལ་གྱི་འབྱོར་པས་སྣོད་དང་བཅུད་དུ་ཁྱབ། །རང་གཞན་དོན་ཀུན་འགྲུབ་པའི་དངོས་གྲུབ་སྩལ་དུ་གསོལ། །ཞེས་སོ། །དེ་ནས་ཕོ་བྲང་དུ་ཕེབས་ཏེ་མཐའ་དབུས་རིས་སུ་མ་ཆད་པའི་སྐྱེ་འགྲོ་རྣམས་ལ་ཐུགས་བསྐྱེད་རྒྱ་ཆེན་པོས་སྒོ་གསུམ་གྱི་སྤྱོད་པ་ཅི་མཛད་ཐམས་ཅད་རྒྱལ་བསྟན་སྤེལ་བའི་ཐབས་ཁོ་ནར་མཛད་ཅིང༌། བར་སྐབས་ཤིག་ཤེས་བྱའི་གནས་མཐའ་དག་ལ་ཐུགས་ཀྱི་མཁྱེན་པ་ཆེས་ཆེར་འཕྲོ་བས་ཐོལ་བྱུང་གི་མགུར་དབྱངས་འདི་བཞིན་མཛད་དེ། ཨོཾ་སྭ་སྟི། རྒྱུན་བཟང་ཆུ་བོ་རྣམ་བཞི་གཡས་སྐོར་དུ་འབབ་ཅིང༌། །དགོས་འདོད་ཡིད་བཞིན་འཁྱིལ་བའི་མ་དྲོས་ཀྱི་རྒྱ་མཚོ། །དེ་ན་བཞུགས་པ་གདེངས་ཀ་བདུན་ལྡན་གྱི་ཀླུ་དབང༌། །ས་འདིར་བཀྲ་ཤིས་སྤེལ་བའི་བྱེད་པོ་རང་ལོས་ཡིན། །མི་རིགས་རྣམ་བཞི་རྒྱུ་བའི་གྲོང་ཁྱེར་གྱི་ལྟེ་བ། ། 10/12 མདུན་ངོས། 上一页 8 9 10 11 12 下一页 尾页 |
