ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་རྒྱལ་བ་ཐམས་ཅད་མཁྱེན་པ་བློ་བཟང་བསྐལ་བཟང་རྒྱ་མཆོའི་རྣམ་ཐར།
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
འབྲོམ་རིན་པོ་ཆེའི་རྣམ་ཐར་རྗེས་སུ་བསྐྱངས་ཏེ་རིགས་ཀྱི་ཅོད་པན་པཎ་ཆེན་ཐམས་ཅད་མཁྱེན་པ་ཆེན་པོ་མཇལ་བར་རིངས་ནས་ཕོ་བྲང་དུ་ཕེབས་འཕྲལ་སྙན་གསན་མཛད་ཀྱང་དེ་ལོ་སྐུ་ན་མཐོ་བའི་ཁར་སྐུ་ཁམས་བསྙེལ་ཚུལ་ཆེ་བས་ཕེབས་ཐབས་མ་བྱུང་བར་འབྲུག་ལོའི་ནང་དུ་གཙང་དུ་ཆིབས་ཁ་བསྐྱོད་དེ་པཎ་ཆེན་ཐམས་ཅད་མཁྱེན་པ་ཆེན་པོ་མཇལ་བར་ཕེབས། བླ་བྲང་རྒྱལ་མཚན་མཐོན་པོར་ཡབ་སྲས་མཇལ་མ་ཐག་ཐུགས་ཡིད་གཅུགས་པའི་གསུང་གླེང་བག་ཕེབས་པར་མཛད་ཅིང༌། ལམ་རིམ་མྱུར་ལམ་གྱི་ཁྲིད་སོགས་ཆོས་བཀའ་མང་དུ་ཞུ་བའི་སྙན་གསན་མཛད། རྗེ་འདི་པས་ཐོས་བསམ་གླིང་དུ་བཞུགས་ཏེ་བླ་བྲང་རྒྱལ་མཚན་མཐོན་པོར་ཡང་ཡང་ཕེབས་ནས་པཎ་ཆེན་ཐམས་ཅད་མཁྱེན་པ་ལ་ལམ་རིམ་མྱུར་ལམ།   སྒྲོལ་དཀར་ཡིད་བཞིན་འཁོར་ལོའི་རྗེས་གནང༌། ཚེ་རྟ་ཟུང་འབྲེལ་གྱི་དབང་སོགས་ཆོས་བཀའ་མང་ཙམ་གསན་ཞིང༌། རྗེ་འདིས་བཀྲ་ཤིས་ལྷུན་པོའི་ཚོགས་ཆེན་ལ་ལམ་རིམ་བསྡུས་དོན་གྱི་ལུང་གི་ཐོག་ལམ་གྱི་ལུས་ཡོངས་སུ་རྫོགས་པའི་གསུང་བཤད་རྒྱས་པར་གནང༌།   དེ་ནས་ཡབ་སྲས་གཉིས་འབྲལ་མི་ཕོད་པར་ཐུགས་ཡིད་གཅུགས་པའི་བཀའ་མཆིད་ཟབ་མོ་རྒྱ་ཆེར་མཛད་ཅིང༌། འཇམ་མགོན་བསྟན་པ་འཛིན་སྐྱོངས་སྤེལ་གསུམ་གྱི་གནད་ལས་བརྩམས་པའི་གསང་བའི་བཀའ་མཆིད་མང་པོ་ཞིག་ཀྱང་མཛད་ནས་རྗེ་འདིས་ཕོ་བྲང་དུ་ཆིབས་བསྐྱོད་མཛད། དེ་ནས་རྗེ་འདིས་ཆོས་ཀྱི་འཁོར་ལོ་རྒྱ་ཆེར་བསྐོར་བའི་དུས་ལ་བབ་པ་ན་རྒྱ་གར་ཆུ་བོ་གངྒྰ་ཚུན་ལ་འགྲན་ཟླ་དང་བྲལ་བའི་རིག་སྔགས་འཆང་བའི་སྡེ་དཔལ་ལྡན་སྨད་རྒྱུད་གྲྭ་ཚང་གི་དགེ་འདུན་ཚང་མས་གསོལ་བ་རྩེ་གཅིག་ཏུ་བཏབ་སྟེ་ཚོམ་ཆེན་རྙིང་པར་རྒྱུད་སྨད་ཚོགས་ཡོངས་ཀྱི་ཐོག་སྤྲུལ་སྐུ་མང་པོ་དང་བླ་ཆེན་མང་པོས་གཙོས་དགེ་འདུན་ཁྱོན་སྟོང་དང་ལྔ་བརྒྱ་སྐོར་ལ་དཔལ་གསང་བ་འདུས་པ་འཕགས་ལུགས་མི་སྐྱོད་པའི་དབང་སྟ་གོན་དང་བཅས་པ་རྒྱས་པར་སྩལ་བས་གསང་ཆེན་རྡོ་རྗེ་ཐེག་པའི་བསྟན་པ་ཉི་མ་ཤར་བ་ལྟར་མཛད་དོ།   །དེ་ནས་ཡོངས་འཛིན་ངག་དབང་མཆོག་ལྡན་ལ་རྡོ་རྗེ་ཕྲེང་བའི་དབང་རྫོགས་པར་གསན་ཞིང༌། རིམ་བཞིན་བདེ་མཆོག༌ལྰུ་ཨི་པའི་བསྐྱེད་རྫོགས། དྲིལ་བུ་པའི་བསྐྱེད་རྫོགས། སྲད་རྒྱུད་ལུགས་ཀྱི་ཁྲིད་ཆེན་དྲུག སྨད་རྒྱུད་ལུགས་ཀྱི་ཁྲིད་ཆེན་བརྒྱད་རྣམས་ལེགས་པར་གསན། དེ་ནས་ཐུགས་གཉེར་ཞབས་ཕྱི་རྣམས་ཀྱིས་བསྐུལ་ནས་གསང་འདུས་དབང་བཤད་ཆེན་མོ་དབང་དོན་དེ་ཉིད་ཡང་གསལ་ཞེས་བྱ་བ་སྔོན་མེད་པའི་ལེགས་བཤད་ཆེན་པོ་འདི་མཛད་དོ། །དེ་ནས་དཔལ་ལྡན་སྟོད་རྒྱུད་གྲྭ་ཚང་གི་དགེ་འདུན་རྣམས་ཀྱིས་གཙོས་སྡེ་སྣོད་འཛིན་པ་སྟོང་དང་བརྒྱ་སྐོར་ལ་དཔལ་འཁོར་ལོ་སྡོམ་པ་ལྰུ་ཨི་པའི་ལུགས་ལྷ་རེ་གཉིས་པའི་དབང་སྟ་གོན་དང་བཅས་པ་རྒྱས་པར་སྩལ་ཏེ་གསང་ཆེན་རྡོ་རྗེ་ཐེག་པའི་བསྟན་པ་ཆེས་ཆེར་འཕེལ་བར་མཛད་དོ།  །དེའི་ཚེ་རྒྱུད་སྡེ་དང་མཐུན་པའི་ཉམས་རྟོགས་ཁྱད་པར་ཅན་འཁྲུངས་ནས། དགྱེས་པའི་མགུར་དབྱངས་བཞེས་པ་ནི། ལྷུན་སྟུག་རིན་ཆེན་ལས་གྲུབ་པ་ངོ་མཚར་གྱི་ཕོ་བྲང༌། །ཡེ་ཤེས་འཇའ་ཚོན་དུ་འཁྲུགས་པ་དྭངས་གསལ་གྱི་འོད་ཕུང༌།  །ལྔ་ལྡན་དཀྱིལ་འཁོར་གྱི་བདག་པོ་སྐུ་བཞི་ཡི་དབང་ཕྱུག །དྲིན་ཅན་རྗེ་བཙུན་གྱི་བླ་མ་སྙིང་དབུས་སུ་བཞུགས་ཤིག །སྔོན་བསགས་ལེགས་བྱས་ཀྱིས་འཕངས་པའི་དལ་འབྱོར་གྱི་རྟེན་བཟང༌།  །རང་འབར་མེ་འོབས་དང་འདྲ་བའི་ཁྱིམ་གནས་ལས་ཕྱུང་ནས། །མཉམ་མེད་ཟས་གཙང་གི་སྲས་པོའི་བུ་རྒྱུད་དུ་སྙེག་པ།  །བསམས་ཀྱིན་བློ་བདེའི་ཉམས་དབྱངས་ཤིག་ལེན་པ་རང་སྤྲོའོ། །མཚན་ལྡན་བླ་མ་ཡི་ཞལ་ནས་གདམས་ངག་གི་ཉིང་ཁུ།  །སྡེ་སྣོད་རིན་པོ་ཆེ་རྣམ་གསུམ་མཛུབ་འཁྲིད་དུ་བསྟན་ནས། །དུས་གསུམ་སངས་རྒྱས་ཀྱི་གཤེགས་བཤུལ་བྱང་ཆུབ་ཀྱི་སེམས་ལ། །ཡིད་ཆེས་གོལ་ས་ལས་ལྡོག་པས་ཞེ་བློ་རང་བདེའོ།   །གང་སྣང་ཆུགས་ཐུབ་ཀྱི་བློ་འདི་འཁྲུལ་པ་རུ་གོ་ནས། །སྤྲོས་མེད་ནམ་མཁའ་དང་འདྲ་བའི་ལྟ་བ་ཡི་རྒྱལ་པོ།   །སྣང་སྟོང་སྒྱུ་མ་ཡི་གཟིགས་མོ་ལམ་ལམ་དུ་ཤར་ནས། །རྟག་ཆད་གཡང་ས་ལས་གྲོལ་བས་ཞེ་བློ་རང་བདེའོ། །འཁྲུལ་བྲལ་རྒྱུད་ལུང་གི་ངེས་པས་ཚང་མ་རུ་གྲུབ་ཅིང༌།  །ཆད་མེད་བརྒྱུད་ལྡན་གྱི་བླ་མར་བྱིན་རླབས་ཀྱི་བཀའ་བབས། །མ་དག་དྲི་མ་ཀུན་སྦྱོང་ནུས་དབང་བཞི་ཡི་ཆུ་བོ།  །སྙིང་གི་ཟིལ་དངར་དུ་ཐོབ་པས་ཞེ་བློ་རང་བདེའོ། །སྣོད་བཅུད་ཡེ་ཤེས་ཀྱི་རོལ་པ་དཀྱིལ་འཁོར་དུ་ཤར་ཞིང༌། །མཚར་སྡུག་ཕྱག་རྒྱ་ཡི་གར་སྟབས་ཤིག་ཤིག་ཏུ་བསྒྱུར་བས། །རང་སེམས་བདེ་སྟོང་གི་གཞོན་ནུ་ཏིང་འཛིན་གྱི་འཆར་སྒོ།   །གུ་ཡངས་རྩེད་འཇོ་ལ་བྲེལ་བའི་དགའ་སྟོན་ཞིག་མྱོང་ངོ༌།   །མ་རིག་སྙིང་དབུས་ཀྱི་སྦུབས་ལས་རང་བྱུང་དུ་འཁྲུངས་པ། །ཁྱབ་བདག་ཧེ་རུ་ཀའི་ཞལ་བཟང་མངོན་སུམ་དུ་མཐོང་བའི། །འཁྲུལ་མེད་ལམ་བཟང་འདི་རྙེད་པ་བླ་མ་ཡི་བཀའ་དྲིན། །འཇམ་དཔལ་སྙིང་པོ་ཡི་བཀའ་དྲིན་འཁོར་ཐབས་རང་མེད་དོ། །སྒོ་གསུམ་བག་མེད་ལས་དབེན་པའི་བསམ་གཏན་གྱི་ཁང་བུར།   །ཆོས་བརྒྱད་འདི་སྣང་གི་འཁྲི་བ་ཕར་རྒྱབ་ཏུ་བསྐྱུར་ནས། །ཚེ་མཇུག་དོན་ལྡན་དུ་བྱེད་ནུས་སྒྲུབ་པ་ཡི་མཆོད་པས།  །ལྷ་དང་བླ་མ་ཀུན་མཉེས་པའི་ཡིད་སྨོན་ཞིག་འཆའོ། །ཞེས་སོ།   །དེ་ནས་རྗེ་བདག་ཉིད་ཆེན་པོའི་གསུང་འབུམ་ཡོངས་རྫོགས་ཀྱི་ལུང་གསན།   འདི་དག་གི་སྐབས་ལམ་ཀྱི་ལུས་ཡོངས་སུ་རྫོགས་པ་ལ་ཉམས་བཞེས་ལྷུར་མཛད་པས་སྐྱེས་བུ་ཆུང་ངུའི་མི་རྟག་པའི་དམིགས་སྐོར་ལ་མྱོང་བ་ཕུལ་ཕྱིན་འཁྲུངས་ཏེ་སྐྱོ་ཤས་ཀྱི་མགུར་དབྱངས་གསུངས་པ་ནི། ཕ་དྲན་པས་གདུང་བ་སེལ་མཛད་པའི། །སྐྱབས་བླ་མ་ལྷ་ལ་གསོལ་བ་འདེབས།   །བློ་འཆི་བ་སྙིང་ནས་དྲན་པ་དང༌། །ཆོས་རྣམ་དག་འགྲུབ་པར་བྱིན་གྱིས་རློབས། །སྤང་སེར་པོ་གསེར་གྱི་རི་བོ་ལ། །རླངས་ན་བུན་དངུལ་མདོག་སྐེད་ལ་འཁྲིགས། །དེ་ད་ལྟ་ཡོད་ལ་ད་ལྟ་མེད། །རྐྱེན་འདིས་ཀྱང་མི་རྟག་དྲན་ནས་བྱུང༌། །དབྱར་དྲོད་གཤེར་དུས་སུ་འཛོམ་པ་ན། །ལོ་ཡགས་ཀྱི་སྙེ་མ་གཡུ་ཡི་མདོག །སྟོན་མཐའ་མར་ཞིང་སྟོང་སྐྱ་བོར་སོང༌། །རྐྱེན་འདིས་ཀྱང་མི་རྟག་དྲན་ནས་བྱུང༌། །ཤིང་ལྗོན་པ་འདབ་རྒྱས་ལོ་མ་རེར། །སྨིན་ལེགས་ཀྱི་འབྲས་བུ་ཕང་ཕུང་ཆགས།   །མཐར་གཅིག་ཀྱང་མི་སྡོད་ས་ལ་བྲུལ། །རྐྱེན་འདིས་ཀྱང་མི་རྟག་དྲན་ནས་བྱུང༌། །ཤར་རི་བོ་སྤོ་མཐོའི་རྩེ་མོ་ནས།   །ཁྲི་གདུགས་ཀྱི་ཉི་མ་དགུང་ལ་ཤར། །དེ་མི་སྡོད་ནུབ་ཀྱི་རི་རྩེར་སོང༌། །རྐྱེན་འདིས་ཀྱང་མི་རྟག་དྲན་ནས་བྱུང༌། །སྐྱེས་ཕོ་མོ་གཞོན་ནུ་ལང་ཚོ་ཅན། །ནངས་ཤི་དང་ནུབ་ཤི་རྒྱུན་མི་འཆད། །ཡར་འདྲེན་དང་སྐྱེ་བརྟག་ཞུའོ་ཟེར། །རྐྱེན་འདིས་ཀྱང་མི་རྟག་དྲན་ནས་བྱུང༌།   །སྤྲིན་དཀར་པོ་མཁའ་ལ་ལང་ལོང་འཁྲིགས། །སྦྲང་ཆར་གྱི་ཐིགས་པ་འབབ་ལ་ཁད།   །རླུང་དམར་ནག་འཚུབ་མས་ཕྱོགས་བཅུར་གཏོར། །རྐྱེན་འདིས་ཀྱང་མི་རྟག་དྲན་ནས་བྱུང༌། །ས་ཡངས་པོ་དཔལ་མོའི་ཐང་གི་དབུས། །ཕྱོགས་འགྲོན་པོའི་གུར་གྲལ་སྐར་མ་འདྲ། །སང་གར་བབས་རྩྭ་ཤིང་ལུད་སྙིགས་ཙམ།   །རྐྱེན་འདིས་ཀྱང་མི་རྟག་དྲན་ནས་བྱུང༌། །དབྱར་ས་ལ་དྲོད་བབས་རྩི་ཐོག་རྒྱས། །བློ་བག་ཕེབས་དུས་ཀྱི་དེ་མ་ཐག   །དགུན་ཁ་རླུང་འཚུབས་པའི་གྲང་བས་སྐྱོ། །རྐྱེན་འདིས་ཀྱང་མི་རྟག་དྲན་ནས་བྱུང༌། །སྟེང་སྒྲ་དབྱངས་སྒྲོག་པའི་གཡུ་འབྲུག་དང༌། །བར་གསུང་སྙན་འཇེབས་པའི་ཁུ་བྱུག་སོགས། དུས་ཡལ་ཡོལ་གར་སོང་ཆ་མེད་ཐལ། །རྐྱེན་འདིས་ཀྱང་མི་རྟག་དྲན་ནས་བྱུང༌། དངོས་ཞལ་ནས་ཆོས་ཀྱི་སྨན་མཆོག་གིས། །སེམས་ཉོན་མོངས་ནད་སེལ་དམ་པ་མང༌། །དུས་དེང་སང་དག་པའི་ཞིང་ནས་གཟིགས། །རྐྱེན་འདིས་ཀྱང་མི་རྟག་དྲན་ནས་བྱུང༌། །ལུས་སྐྱེད་པའི་དྲིན་ཅན་མ་ལ་སོགས།    །གཉེན་མཛའ་བཤེས་འབྲལ་གླགས་མི་ཕོད་ཀྱང༌། །དུས་དེང་སང་འདུ་བའི་འབྲེལ་བ་ཆད།   །རྐྱེན་འདིས་ཀྱང་མི་རྟག་དྲན་ནས་བྱུང༌། །ཕོ་རྒོད་པོ་འཕྱིས་ཀྱི་སོ་ཚིས་ཅན། །ལོ་ཟླ་བ་རྟིང་མའི་གྲབས་བཤོམ་བྱེད། །ལས་འཕྲོར་ལུས་རང་ཉིད་གར་སོང་མེད།   །རྐྱེན་འདིས་ཀྱང་མི་རྟག་དྲན་ནས་བྱུང༌།   །དཔལ་འཆི་མེད་རྡོ་རྗེའི་་སྐུ་བརྙེས་པ། །སྐྱབས་སངས་རྒྱས་དེ་ཡང་འདའ་ཚུལ་སྟོན། །ལུས་ཤ་ཁྲག་པགས་ལས་གཡོགས་པ་འདི། །འཇིག་ངེས་པ་ཆུ་ཡི་ལྦུ་བ་འདྲ། །ནར་སོན་པའི་ཕ་མས་རང་གི་བུ། །སྐྱེས་ཙམ་ནས་དུར་དུ་སྦ་བ་སྣང༌། །དེ་མཐོང་ནས་བདག་ཀྱང་གཞོན་ནོ་ཞེས། །འཆི་བདག་ལ་གཤོལ་འདེབས་རེ་བ་ཆད། །དུས་ད་ནང་དགྲ་འདུལ་གཉེན་སྐྱོང་གི། །གྲོས་བྱེད་དུས་ལུས་བདེ་སེམས་ཀྱང་རྒོད།    །དགུང་དྲོ་ལ་བབ་དུས་དུར་ཁྲོད་དུ། །ལུས་བྱ་ཁྱིས་ཟ་བ་ཅང་བདེན་ནམ། །ལར་མཐོང་ཐོས་ཡུལ་དུ་གྱུར་པ་ཡི། །ཁོང་འགྲོ་བ་མི་ཡི་སྐྱེས་བུ་རྣམས། །དུས་རིང་མཐའ་ལོ་བརྒྱ་ཚུན་ཆད་དུ།  །གཅིག་ཙམ་ཡང་མི་སྡོད་འཆི་བར་ངེས།   །ཕྱི་སྣོད་བཅུད་སྣང་བ་གང་ལ་ཡང༌།   །ཡིད་ལེགས་པར་གཏད་ནས་བསམས་པའི་ཚེ། །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2018 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་ཀྲུང་གོའི་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号