ད་སྔ་གཟིགས་བཞིན་པ།  མདུན་ངོས། > མི་སྣ་མཚམས་སྦྱོར། > མཁས་བའི་ཁྱུ་མཆོག
༄༅། །ལམ་རིམ་བླ་མ་བརྒྱུད་པའི་རྣམ་ཐར་ལས་རྒྱལ་བ་ཐམས་ཅད་མཁྱེན་པ་བློ་བཟང་བསྐལ་བཟང་རྒྱ་མཆོའི་རྣམ་ཐར།
སྤེལ་དུས།05-16  ཡོང་ཁུངས། ཀྲུང་གོའི་བོད་ཀྱི་སློབ་གསོ་དྲ་བ།  རྩོམ་པ་པོ། ཡོངས་འཛིན་ཡེ་ཤེས་རྒྱལ་མཚན།
དེ་ནས་མུ་འཐུད་དེ་སེ་ར་སྔགས་པ་ཚོགས་ཡོངས་དང་དགེ་བའི་བཤེས་གཉེན་ཆེས་མང་བ་བཅས་ལའང་དཔལ་རྡོ་རྗེ་འཇིགས་བྱེད་ཀྱི་དབང་སྟ་གོན་དང་བཅས་པ་རྒྱས་པར་སྩལ། བྲག་གཡབ་སྤྲུལ་པའི་སྐུས་གསོལ་བ་བཏབ་སྟེ་དགེ་འདུན་སྟོང་ཕྲག་ལྷག་ཙམ་ལ་བྱང་ཆུབ་ལམ་རིམ་ཆེན་མོའི་བཤད་ལུང་རྒྱས་པར་སྩལ་ཞིང༌།   ཉུང་ཤས་ཤིག་ལ་ཐུགས་རྗེ་ཆེན་པོ་བཅུ་གཅིག་ཞལ་དཔལ་མོ་ལུགས་ཀྱི་དབང་ཆེན་ཡང་སྩལ། དེ་ནས་ཁྲི་ཆེན་ངག་དབང་མཆོག་ལྡན་ལ་རྡོ་རྗེ་འཇིགས་བྱེད་ཀྱི་འཁྲུལ་འཁོར་ཁམས་གསུམ་ལས་རྣམ་པར་རྒྱལ་བའི་ཉི་འོད་མ་བུ་རྣམས་ཀྱི་གཟབས་བཤད་གསན་ཞིང་ཕྱག་ལེན་ཡང་སྦྱོང་བར་མཛད༌།   གཞན་ཡང་ཁྲི་ཆེན་ལ་ནཱ་རོ་ཆོས་དྲུག་གི་ཟབ་ཁྲིད་དང༌། དགའ་ལྡན་ཕྱག་རྒྱ་ཆེན་པོའི་ཟབ་ཁྲིད་དང༌།   དུས་འཁོར་སྦྱོར་དྲུག་གི་ཟབ་ཁྲིད་རྣམས་རྒྱས་པར་གསན། དེ་ནས་ཨང་དཀར་ཞབས་དྲུང་གིས་གསོལ་བ་བཏབ་ནས་བདེ་ལམ་གྱི་ཟབ་ཁྲིད་སེམས་བསྐྱེད་མཆོད་པ་དང་བཅས་རྒྱས་པར་གནང༌།   དེ་ནས་སྐུ་མཚམས་ཤིག་གི་ནང་དུ་མི་རྟག་པའི་སྣང་ཚུལ་ལ་མགུར་དབྱངས་མཛད་པ་ནི། ནེའུ་གསིང་སྤང་ལ་སྐྱེས་པའི། །སྤང་རྒྱན་མེ་ཏོག་བཀྲ་ཡང༌། །དགུན་གྱི་ཁ་རླུང་འཚུབ་དུས།   །རྡུལ་ཕྲན་ཙམ་དུ་འཐོར་བས།  །ད་ལྟ་མདངས་བཀྲག་མཚར་དུས།   །དཀོན་མཆོག་དྲུང་དུ་ཕུལ་དང༌།   །སྔོན་བསགས་སྦྱིན་པའི་འབྲས་བུ།   །འདོད་དགུའི་ལོངས་སྤྱོད་འབྱོར་ཡང༌།   །ནམ་ཞིག་གང་ཟག་གཞན་གྱིས། །བདག་བཟུང་རྗེས་སུ་འགྱུར་བས།   །ད་ལྟ་རང་དབང་ཡོད་དུས།   །སྦྱིན་པའི་ཞིང་ལ་ཕུལ་ཞིག   །རྩལ་གསུམ་དར་ལ་རྫོགས་པའི།   །གཡུ་འབྲུག་སྐད་གསང་མཐོ་ཡང༌།   །དབྱར་གསུམ་ནམ་ཟླའི་ཐ་མར།   །སྒྲ་སྐད་ཉམས་་པར་འགྱུར་བས། །ད་ལྟ་མཁའ་ལ་འཕྱོ་དུས། །དབྱར་རྔ་དལ་བུས་སྒྲོགས་དང༌།  །མཐུན་འཇུག་འཇིག་རྟེན་ལས་ལ། །གསུང་སྙན་འགྱུར་ཁུགས་འཁྲོལ་ཡང༌།   །ནམ་ཞིག་མགྲིན་པའི་ལམ་ལ།   །དབུགས་ཀྱང་ཆད་པར་འགྱུར་བས།   །ད་ལྟ་སྨྲ་ལྕེ་བདེ་དུས།  །གྲག་སྟོང་བཟླས་པར་འབུངས་ཤིག   །མཁའ་ལ་རྒྱན་དུ་ཆགས་པའི།   །སྤྲིན་དཀར་ལང་ཚོ་གསར་ཡང༌། །དྲག་པོའི་རླུང་དང་འཕྲད་ནས།   །ཕྱོགས་བཅུར་འཐོར་བར་ངེས་སོ།   །ད་ལྟ་ལང་ལོང་འཁྲིགས་དུས།   །སྦྲང་ཆར་བཅུད་དུ་ཕོབ་དང༌།   །ཁུ་ཁྲག་གཞན་གྱི་རྫས་ལ།    །བདག་བཟུང་ལུས་འདི་འཕྱོར་ཡང༌།   །ནམ་ཞིག་མི་གཙང་རྫས་བཞིན།  །འབྲེལ་མེད་འདོར་བར་འགྱུར་བས།    །ད་ལྟ་རྩལ་སྟོབས་ལྡན་དུས།   །དགེ་བའི་བྲན་དུ་བཀོལ་ཞིག །དྭངས་བསིལ་ཡིད་ལ་འཐད་པའི། ། ཉལ་འགྲོ་ལྷུང་ལྷུང་འབབ་ཀྱང༌།   །མི་རིང་ཐིགས་པ་ཙམ་ཡང༌།   །ལུས་མེད་སྐམས་པར་འགྱུར་གྱི།  །ད་ལྟ་རྒྱུན་བཟང་འབབ་དུས། །རྩི་ཐོག་གསོས་སུ་དྲོངས་དང༌། །རང་བདེ་གཞན་ལ་གནོད་པའི།  །ཐབས་ཚུལ་སྣ་དགུ་འགྱུ་ཡང༌། །ནམ་ཞིག་མིང་དོན་ཙམ་ཡང༌།  །འཆར་མེད་རྨོངས་པར་འགྱུར་གྱི།   །ད་ལྟ་བློ་རིག་གསལ་དུས།   །ཟབ་རྒྱས་གདམས་ངག་སྒོམས་ཤིག   །ཚོང་དུས་ས་ཡི་ལྟེ་བར།   །ལྷོ་བྱང་ཚོང་ཕྲུག་འཛོམ་ཡང༌།   །ཞག་གསུམ་ནང་པར་དུས་སུ།   །སོ་སོར་གྱེས་པར་འགྱུར་བས།   །ད་ལྟ་ཡུད་ཙམ་འཚོགས་དུས།   །འཁོན་དང་མཐུན་འགྲོགས་སྤོངས་དང༌།   །ཚེ་སྔོན་ལས་ཀྱིས་བཀུག་པའི།   །དགྲ་གཉེན་བྱམས་སྡང་ཆེ་ཡང༌།   །མི་རིང་རིགས་དྲུག་གནས་སུ། །སོ་སོར་འགྲོ་བར་འགྱུར་བས།   །ད་ལྟ་རིས་སུ་བཅད་ནས།   །དགོས་མེད་ཆགས་སྡང་སྤོངས་ཤིག །སྟོན་དུས་མཁའ་ལ་ཤར་བའི།  །ཉ་རྒྱས་ནམ་འཕང་མཐོ་ཡང༌།   །འཛམ་གླིང་ས་འདིར་གནས་པའི།   །སྐྱེ་བོ་ཚ་གདུང་ཅན་ལ།  །ལུས་སེམས་དགའ་བདེ་སྐྱེད་པའི།   །ཤུགས་འབྱུང་འོད་དཀར་འགྱེད་དོ།   །གཞན་ལ་ཕན་བདེ་འདོད་པ།   །རང་སེམས་ཁོང་ན་གནས་ཀྱང༌།   །ཕྱོགས་དུས་སྐྱེ་བོ་ཀུན་གྱིས།   །དོན་གཉིས་དཔལ་དུ་འགྱུར་བས།   །ལུས་ངག་ཚུལ་འཆོས་སྤངས་ཏེ།   །ལྷག་བསམ་བཟང་པོ་སྐྱེད་ཅིག །ཀླུ་དབང་གཙུག་གི་ནོར་བུ།   །ཕྱོགས་ལྷུང་རྟོག་པ་མེད་ཀྱང༌།   །མཆོད་དང་བཀུར་སྟི་ཆེན་པོས།   །རྩེ་གཅིག་གསོལ་བ་བཏབ་ལ།  །གང་བསམ་རེ་བའི་འབྲས་བུ།   །ལག་རྩེར་སྩོལ་བར་ངེས་སོ།   །བླ་མ་སྐུ་གསུམ་དབང་ཕྱུག །འགྲོ་ལ་ཉེ་རིང་སྤངས་ཀྱང༌། །མོས་གུས་ལྟེམ་རྐྱང་མེད་པས།   །རྩེ་གཅིག་དྲན་པ་དེ་ལ། །འདི་དང་ཕྱི་མ་ཀུན་གྱི།  །ལེགས་ཚོགས་འགྲུབ་པར་ངེས་སོ།   །དབང་པོ་བསླད་པའི་མཐུ་ཡིས།     །མཁའ་ལ་སྣང་བཀྲག་མཆར་ཡང༌།   །གསོ་དཔྱད་མིག་སྨན་རྣོན་པོས།    །སྦྱངས་པའི་དེ་མ་ཐག་ཏུ།    །རབ་རིབ་སྣང་བ་ལོག་པའི།    །སྟོང་གསལ་རྗེན་པར་འཆར་རོ།   །དངོས་འཛིན་གདོན་གྱིས་དཀྲུགས་པས།   །ཀུན་རྫོབ་ཅི་ཡང་འཆར་མོད།   །འཁྲུལ་པའི་རང་མཚང་གཅོད་པའི། །རིགས་ཤེས་ལྟ་བའི་ངོ་ན། །བློ་བྲིད་སྣང་བ་ལོག་པའི།   །གནས་ལུགས་ལྟད་མོ་ལྟོས་ཤིག   །སྟོང་གསལ་མཁའ་ཡི་ངོས་ན།   །ཚུགས་ཐུབ་བདེན་པར་མེད་ཀྱང༌།   །རྒྱུ་རྐྱེན་རྟེན་འབྲེལ་མང་པོ།     །ཚོགས་པའི་འཇའ་ཚོན་རི་མོ།   །གཏད་མེད་ཅི་ཡང་འཆར་བའི།   །ངོ་མཚར་འདི་ལ་ལྟོས་དང༌།   །དཔྱད་ན་འདི་ཞེས་བྱ་བའི།   །ངོས་བཟུང་ཅི་ཡང་མེད་ཀྱང༌།  །རྒྱུ་རྐྱེན་ཆ་ཤས་མང་པོར།   བཏགས་ཡོད་མིང་ཙམ་འདི་ལ།   །བྱ་བྱེད་ཐམས་ཅད་འཐད་པའི།   །སྒྱུ་མ་འདི་ལ་གཟིགས་དང་།    །བདེན་དངོས་བསླུ་བ་མེད་པའི།   །དམིགས་གཏད་གང་ཡང་མེད་ཀྱང༌། །ཁོག་ཡངས་བྲག་གི་ཕུག་པར།   །སྒྲ་སྙན་བྲག་ཅའི་དབྱངས་ཀྱིས།   །རང་འཛིན་ཤེས་པ་བསྐྱེད་པའི། །ནུས་པ་ཐོགས་མེད་བཞིན་དུ།   །བསླུ་མེད་དོན་ལ་གྲུབ་པའི།   །སྙིང་པོ་ཆ་ཙམ་མེད་ཀྱང༌། །དོན་ལྡན་ཚིག་གི་ཕྲེང་བ། །འདི་ལྟར་སྤེལ་བའི་གཏམ་གྱིས།   །ཀུན་རྫོབ་འགྲོ་བ་མང་པོར།   །ཕན་པ་རྒྱ་ཆེན་གྱུར་ཅིག   །ཅེས་སོ།   །དེ་ནས་ཁྲི་ཆེན་ངག་དབང་མཆོག་ལྡན་ལ་རྒྱལ་ཚབ་དར་མ་རིན་ཆེན་གྱི་གསུང་ཕལ་ཆེ་བའི་ལུང་གསན་ནོ།   །དེ་ནས་ཁྲི་ཆེན་ངག་དབང་མཆོག་ལྡན་ལ་གསོལ་བ་ཡུན་རིང་དུ་བཏོབ་སྟེ་དཔལ་དུས་ཀྱི་འཁོར་ལོའི་དབང་མོ་ཆེ་རྗེ་ཡབ་སྲས་ནས་བརྒྱུད་པ་དེང་སང་རྒྱུན་ཆད་དུ་ཉེ་བ་ལ་ཐུག་པས་ཁྲི་ཆེན་རྡོ་རྗེ་འཆང་གིས་རྒྱུན་ཞིག་བཞེས་ནས་གནང་ཐུབ་པ་ཞིག་དགོས་ཞེས་ཡང་དང་ཡང་དུ་གསོལ་བ་བཏབ་པ་ན་ཁྲི་ཆེན་སྐུ་ན་མཐོ་ཡང་རྒྱལ་བ་མཆོག་གི་བཀའ་དང་འཇམ་མགོན་བསྟན་རྒྱུན་ལ་དགོངས་ཏེ་དཀའ་བ་ཆེན་པོས་གསན་ནས་ལྗགས་བསྙེན་སོགས་ལེགས་པར་གྲུབ་སྟེ་རྗེ་འདི་པ་ལ་འབུལ་བར་མཛད།    རྗེ་འདིས་ཀྱང་གོང་བསྙེན་སོགས་རྒྱུད་དང་མཐུན་པར་ལེགས་པར་གྲུབ་པར་མཛད་ནས་དཔལ་དུས་ཀྱི་འཁོར་ལོའི་དབང་དང་མན་ངག་འཆད་པ་ལ་འཇིགས་པ་མེད་པའི་གནས་ཐོབ་པར་མཛད་དོ།  །དེ་ནས་དྭགས་པོ་དགེ་བཤེས་ཀྱིས་གསོལ་བ་བཏབ་པ་ལ་བརྟེན་ནས་འབྲས་སྤུངས་འདུ་ཁང་ཆེན་མོར་སྡེ་སྣོད་འཛིན་པ་བཞི་སྟོང་ཙམ་ལ་དྲང་ངེས་རྣམ་འབྱེད་ཞག་ཉི་ཤུ་རྩ་གསུམ་གྱི་བར་དུ་དཀའ་བའི་གནས་རྣམས་དྲི་མ་མེད་པའི་རིགས་པས་མཐའ་ཆོད་པར་མཛད་དེ་རྒྱས་པར་གནང་བས་རྒྱལ་བ་ཙོང་ཁ་པ་རང་ཉིད་སླར་འཇིག་རྟེན་འདིར་དངོས་སུ་བྱོན་པ་ཇི་ལྟ་བ་བཞིན་དུ་གྱུར་ཏོ་ཞེས་དེ་དུས་ཀྱི་སྡེ་སྣོད་འཛིན་པ་མཐའ་དག་གསུང་ངོ༌། །དེ་ནས་ཁྲི་ཆེན་རྡོ་རྗེ་འཆང་ངག་དབང་མཆོག་ལྡན་ལ་ཕྱག་རྡོར་འཁོར་ཆེན་གྱི་དབང་གསན་ནས་ཡི་དམ་འདིའི་བསྙེན་བསྒྲུབ་སོགས་མཐར་ཕྱིན་པར་མཛད་དོ།  །དེ་ནས་འབྲས་སྤུངས་སྔགས་པ་བླ་ཟུར་ཞལ་སྔ་ནས་ཀྱིས་གསོལ་བ་བཏབ་ནས་སྡེ་སྣོད་འཛིན་པ་བདུན་བརྒྱ་སྐོར་ལ་དཔལ་གསང་བ་འདུས་པའི་རྩ་རྒྱུད་འགྲེལ་པ་སྒྲོན་གསལ།    རྗེ་བདག་ཉིད་ཆེན་པོས་མཛད་པའི་བསྡུས་དོན་མཆན་བུ་མཐའ་གཅོད་དེ་འགྲེལ་པ་བཞི་སྦྲགས་ཀྱི་བཤད་རྒྱུན་རྒྱས་པར་སྩལ་བས་གསང་ཆེན་རྡོ་རྗེ་ཐེག་པའི་བསྟན་པ་ཉི་མ་ལྟར་གསལ་བར་མཛད་དོ།    །
རྒྱབ་སྐྱོར།
返回首页
གཙོ་ངོས།
པར་ལྡན་རྩོམ་ཡིག
ཉེ་ལམ་གསར་བརྗེས།
ཀློག་མཁན་མང་ཤོས།
 
Copyright © 2005 - 2018 Teducn.com
phone:18997245213 QQ:89457590
དྲ་ཚིགས་འདིའི་པར་དབང་ཡོད་ཚད་ཀྲུང་གོའི་བོད་ཀྱི་སློབ་གསོ་དྲ་བར་དབང་།
ཡིག་ཟམ། gangjian_xn@hotmail.com
འབྲེལ་གཏུགས་ཁ་པར། ༡༨༩༩༧༢༤༥༢༡༣青ICP备18000196号