དེས་ན་མཐའ་བཞིར་འཛིན་པ་རྣམ་སྤངས་ཏེ། །དབུ་མའི་ལམ་ལ་མཉམ་པར་འཇོག་པར་མཛོད། །རང་གི་སྟོབས་ཀྱིས་སྡུག་བསྔལ་ཀུན་བསྐྱེད་པའི། །དངོས་འཛིན་ནད་ཆེན་ཞི་བར་མ་ནུས་ན། །བཤེས་གཉེན་སྨན་པ་མཁས་པ་ཉེར་བསྟེན་ཅིང༌། །དམ་ཆོས་སྨན་བཟང་རྙེད་པའི་དགོས་པ་ཅི། །དེ་བས་ཡོངས་འཛིན་མཁས་པའི་གསུང་བཞིན་དུ། །རིགས་པས་ལེགས་པར་བརྟགས་ནས་དམ་ཆོས་སྨན། །ཚུལ་བཞིན་འཐུངས་ནས་དངོས་འཇིན་ནད་སྤངས་ཏེ། །རང་གཞན་དོན་གཉིས་སྒྲུབ་ལ་བརྩོན་པར་མཛོད། །བསླབ་གསུམ་བླངས་པས་ཉེས་ལྟུང་དྲི་མས་གོས། །ཐོས་བསམ་བྱས་པས་ཚིག་བཞིའི་གཏིང་མ་རྙེད། ། གཞན་དོན་བྱས་པས་རང་དོན་མེ་ལྟར་འབར། །དབེན་པར་བསྡད་པས་སྙོམས་ལས་དབང་སོང་བ། །བདག་འདྲས་གཞན་ལ་བསྐུལ་བ་མི་རིགས་མོད།།འོན་ཀྱང་སྙིང་གཏམ་ཡི་གེར་བཀོད་པ་འདི། །ཁྱེད་ལ་ཕན་པར་འདོད་པ་མ་གཏོགས་པ། །བདག་ལ་ཞེ་འདོད་འགའ་ཡང་ཡོད་མིན་པས། །ལེགས་པར་བརྟགས་ཏེ་ཉམས་སུ་བླང་བར་མཛོད། །ཕྲད་ཀྱང་འདི་ལས་གཞན་པ་སྨྲ་རྒྱུ་མེད། །ཤི་ཡང་ཁ་ཆེམས་གཞན་འགའ་མ་མཆིས་སོ། །ཞེས་སོགས་གདམས་ངག་གནང་ནས་བཏང་ངོ༌། །དེ་ནས་ལོ་འགའི་བར་དུ་གསོལ་འདྲེན་པའི་བུ་ག་མ་གཏོགས་སྒོ༌བཀག་སྟེ་སུ་ཡང་ནང་དུ་གཏོང་བར་མ་མཛད། ཕྱི་ནས་འབུལ་བའི་དད་རྫས་རྣམས་ཀྱང་མ་བླངས། ཐང་ཅིག་སློབ་དཔོན་ཡོན་ཏན་དར་ཉེ་གནས་ལ་ཡོད་དུས། ཤ་གསར་ཟུག་གཅིག་དང༌། ཞོ་རྫ་གང༌།ཕུད་དམ་གང་འབུལ་བ་བྱུང་བ་ཉེ་གནས་ཀྱིས་བླངས་པས། ཉིད་རང་གསོལ་གསུང་ནས་གསོལ་དུ་མ་གནང༌། ཉེ་གནས་ཀྱིས་ཀྱང་མ་ནུས་པར་ཆང་དང་ཞོ་གཉིས་ཕོ། ཤ་དེ་ཆུ་སྐྱེལ་མི་ལ་བྱིན་ཅེས་གྲག་གོ། །ཉིད་ཀྱི་ཞལ་ནས། རི་ཁྲོད་དབེན་པའི་གནས་སུ་རྙེད་བཀུར་ལ།།རེ་བ་མེད་ཅིང་ཁ་ཟས་ཞིམ་པ་ཡི། །རོ་ལ་ཆགས་པ་སྤངས་ཏེ་འཁོར་བ་ཡི། །ར་བ་ལས་ནི་ཐར་བར་བྱ་ཕྱིར་འབད། །ཅེས་སོགས་གསུངས་ཏེ། ལོ་ཉི་ཤུ་རྩ་གྲངས་ཀྱི་བར་དུ་སྐུ་མཚམས་ཁོར་ཡུག་ལ་བཞུགས་ཏེ། དེ་དུས་ཆོས་རྗེ་ཀུན་མཁྱེན་པས་དངུལ་ཆུར་བྱོན་ནས་རང་རེ་ཞལ་ཞིག་མཇལ་བར་ཞུ། ཆོས་ཀྱི་གསུང་གླེང་མཛད་པ་ཡིན་གསུང་བ་ལ། ད་ལྟ་མཚམས་དམ་པོའི་དམ་བཅའ་ཞིག་བདོག་པས། མི་མཇལ་བར་ཞུ། ད་གཟོད་ངེད་མཇལ་དུ་འོང་ཞེས་པ་ཞལ་དང་ཁོང་གི་དྲི་བའི་ལན་ཞུ་ཡིག་ཕུལ་ཏེ་སྐུ་མཚམས་མ་ཕྱེའོ། །དེ་དུས་ཆོས་རྗེ་བསོད་ནམས་རྒྱལ་མཚན་པ་བོ་དོང་དུ་བྱོན་ནས་མཇལ་དུ་འབྱོན་གསུངས་ལ་ཡང་ད་རེས་མི་འབྱོན་པར་ཞུ་ཞེས་ཞུ་བ་བསྐུར་ཏེ། དེའི་དུས་སུ།མི་ཆེ་ལ་ཁ་དྲག་པ་སུས་ཞུས་ཀྱང་སྐུ་མཚམས་མ་ཕྱེ་བར། སྐུ་ནི་འདུ་འཛིའི་གཡེང་བས་དབེན།གསུང་ནི་བྲེ་མོའི་གཏམ་གྱིས་དབེན། ཐུགས་ནི་གཟུང་འཛིན་རྟོག་པས་དབེན་པར་གྱུར་ཏོ། །དེ་ལྟར་དབེན་པར་སྒྲུབ་པ་རྩེ་གཅིག་ཏུ་མཛད་པས་རྟོགས་པ་རྣམས་རིམ་གྱིས་འཁྲུངས་ཏེ། ཉིད་ཀྱི་ཞལ་ནས། གནས་དབེན་པར་རིག་པ་དྭངས་པའི་དུས་སུ།མི་འདི་དང་འདི་ཞེས་བྱ་བ་ཤི་ཟེར་བ་ཐོས་ཙ་ན། འོ་སྐོལ་གྱི་ལུས་འདི་ལ་ཡང་ཆུའི་ལྦུ་བ་འམ། རླུང་ནང་གི་མར་མེ་བཞིན་དུ་སྐད་ཅིག་ཀྱང་སྡོད་པའི་མཐུ་མེད་པར་རིག་ནས་བཟོད་གླགས་མེད་པ་ཅིག་ཡོང་གིན་འདུག་གསུང༌། ཉེ་གནས་ཀྱིས་གཟིམ་ཁང་ལ་མཁར་ལྷན་ཞིག་བྱེད་པ་ཡིན་ཞུས་པས། འོ་སྐོལ་གྱིས་ཡུན་རིང་སྡོད་པའི་ངེས་པ་མེད། དེའི་རྐྱེན་གྱིས་སེམས་ཅན་མང་པོ་འཆི་གསུང་ནས་མ་གནང༌།རྒྱལ་སྲས་རིན་པོ་ཆེ་བླ་མ་རིན་ཡེ་པའི་སར་བྱོན་པའི་བཤུལ་དུ་ཉེ་གནས་ཀྱིས་གསངས་ནས་གཟིམ་ཁང་བྱས་པས། རྒྱལ་སྲས་རིན་པོ་ཆེས་སེམས་ཅན་མང་པོ་ཤི་ཡོད། གཟུངས་སྔགས་འདྲེན་དགོས་སྡུག་གེ་ཀུན་དེ་ལ་ཅི་བདེར་འདུག སྙིང་རེ་རྗེ་གསུང་ཞིང༌། དེའི་དུས་སུ་གསུངས་པ། ན་མོ་ལོ་ཀེ་ཤྭ་རཱ་ཡ། མཁྱེན་བརྩེ་ནུས་པ་ཕུལ་ཕྱིན་འགྲོ་བའི་མགོན། །སྤྱན་རས་གཟིགས་ལ་གུས་པར་ཕྱག་འཚལ་ནས། །སྙོམ་ལས་ཅན་གྱི་སྤྲང་པོ་མ་ཎི་བ། །རང་ལ་རང་གིས་བསྐུལ་ཕྱིར་འདི་སྐད་སྨྲ། །མི་བཟད་སྐྱེ་བའི་བཙིན་རར་ཆུད་གྱུར་ཅིང༌། །ན་དང་རྒས་པའི་ལྕགས་སྒྲོག་གིས་བཅིངས་ཏེ། །འཆི་བདག་མཚོན་ཆ་ཕྱར་བའི་དྲུང་གནས་ན། །ཚེ་འདིར་གཏན་དུ་སྡོད་སྙམ་ཁྱོད་སེམས་སམ། །འཁོར་བའི་རྒྱ་མཚོ་གཏིང་མཐའ་ཡངས་པ་འདིར། །ལས་དང་ཉོན་མོངས་རླུང་ཤུགས་དྲག་པོས་བསྐྱོད། །འཇིགས་རུང་ངན་འགྲོའི་ཀློང་འཁྱིལ་ཁར་གནས་ན། །རྙེད་བཀུར་གྲགས་པ་བསྒྲུབ་པ་ཁྱོད་དྲན་ནམ།།ལང་ཚོའི་ཉིན་བྱེད་ལོ་ཟླའི་ནུབ་རིས་བསྒྲིབས། །ལུས་ཀྱི་རི་ཀླུངས་རྒས་པའི་གྲིབ་མས་ནོན། །འཆི་ཁའི་མུན་ནག་མྱུར་དུ་འབྱུང་ངེས་ན། །སོས་དལ་སྐྱིད་ཆོས་བྱེད་པར་ཁྱོད་ཁོམ་མམ། ། མགོ་ལ་སྐྲ་དཀར་ལྕགས་ཀྱུ་རྣོན་པོས་བཏབ། །ལུས་ནི་གཉེར་མའི་ཞགས་པ་དམ་པོས་བཅིངས། །བརྩེ་མེད་འཆི་བདག་སྦར་མོར་ཆུད་གྱུར་ན། ། བག་མེད་གཉིད་ཀྱིས་ལོག་པར་ཁྱོད་ཁོམ་མམ། །རྒྱབ་ནས་ལོ་ཟླ་མང་པོའི་དམག་གིས་བདས། །མདུན་དུ་ཐར་མེད་འཆི་བའི་གཡང་སར་ཐུག ། གང་དུ་བལྟས་ཀྱང་འགྲོ་ས་མི་འདུག་ན། །དོན་མེད་ལོང་གཏམ་སྨྲ་བར་ཁྱོད་ཁོམ་མམ། །ཤིན་དུ་ཉམ་ཆུང་ཆུ་བུར་ལྟ་བུའི་ལུས། །སྣ་ཚོགས་རྐྱེན་ངན་རླུང་གིས་རབ་བསྐྱོད་ནས། །སྐད་ཅིག་གནས་པའི་གདེང་ཡང་མི་འདུག་ན། །ཆོས་མིན་ཡིད་ལ་སེམས་པའི་ལོང་འདུག་གམ། །དེ་རིང་ཙམ་ཡང་མི་འཆིའི་གདེང་མེད་ཅིང༌། །ཤི་ནས་གར་སྐྱེ་རང་དབང་མེད་བཞིན་དུ། །དོན་མེད་ཚེ་འདིའི་བྱ་བ་ལྷུར་བླངས་ན། །རང་གིས་རང་ཉིད་བསླུས་པར་མི་འགྱུར་རམ། །ནོར་ལྡན་ལག་སྟོང་སྒྲེན་མོར་འགྲོ་འགྱུར་ཞིང༌། ། 8/23 མདུན་ངོས། 上一页 6 7 8 9 10 11 下一页 尾页 |