| དབུས་པའི་དམག་འཇད་དུ་བྱུང་དུས་དངུལ་ཆུ་བ་རྣམས་ལ།དངོས་པོ་ལ་མ་ཆགས་པར་ཐམས་ཅད་བྲོས། འགྲོ་བ་མི་འོང་བའི་རྒས་པ་རྣམས་ཀྱི་གཡོག་ངས་བྱེད་པ་ཡིན་གསུང་སྟེ། བཤུལ་ན་ཡོད་པ་རྣམས་ཀྱིས་བྲེད་ནས་དྲུང་དུ་འཚོགས་ནས་བསྡད་པའི་དུས་དམག་མི་རྣམས་ཁྲོ་ཞིང་རྔམ་པའི་ཚུལ་གྱིས་དྲུང་དུ་བྱུང་སྟེ། ཞལ་མཐོང་བ་དང༌། འཕྲལ་དུ་གཏུམ་པ་དང་ཁྲོ་ཞིང་རྔམ་པ་རྣམས་ཀྱང་ཞི་ནས་དྲུང་ན་འཁོད་པ་རྣམས་ལ་གནོད་པ་མི་བྱེད་པར་བྱིན་རླབས་ཞུས་ཀྱིན་འགྲོ། འགའ་ཞིག་དད་པ་སྐྱེས་ཏེ་མཆི་མ་འབྱིན་ཅིང༌། མི་བསད་པའི་སྡིག་བཤགས་བྱེད་ཞེས་གྲག་གོ། །དྲུང་ན་འཁོད་པའི་སློབ་མ་རྣམས་ཀྱང་ང་ཁོ་ན་ལ་མཉེས་ཤིང་བྱམས་སྙམ་དུ་ཐམས་ཅད་དེ་ལྟར་དུ་སེམས་ཤིང༌། དེ་རྣམས་ཀྱང་གཅིག་ལ་གཅིག་མཐོང་ཆེ་ཞིང་བྱམས་པས། ཕན་ཚུན་ཆེ་མི་རྩོད་པར་གྲལ་འོག་ཏུ་སྡོད་པ་ལ་ཧབ་ཐོབ་བྱེད་ཅིང་གཅིག་ལ་གཅིག་སྙན་པར་སྨྲའོ། །སེམས་དཔའ་ཆེན་པོ་འདི་ནི། དཔེར་ན་མ་བུ་གཅིག་པུ་ཡིད་དུ་འོང་བ་ལ་བརྩེ་བ་ལྟར་སེམས་ཅན་རྣམས་ལ་སྙིང་རྗེ་ཆེན་པོ་མངའ་ཞིང༌། ཁྱད་པར་དུ་དངོས་སུ་སྡུག་བསྔལ་བ་དང༌། སྡུག་བསྔལ་གྱི་རྒྱུ་ལ་སྤྱོད་པ་ལ་བརྩེ་སྟེ། དགུང་ལོ་བཅུ་དྲུག་ཙམ་ལོན་པའི་དུས་ཟང་ཟིང་གིས་ཕན་འདོགས་བག་ཙམ་བྱས་པའི་དགེ་བཤེས་གཅིག་གིས་སང་ཉིན་སླེབ་པ་དགོས་པའི་དོན་གལ་ཅན་ཞིག་གི་བང་ཆེན་བཅོལ་ཏེ། བོ་དོང་ནས་ས་སྐྱར་འབྱོན་པའི་ཕྱེད་ལམ་ཙམ་ན་སླེབ་པའི་ཐང་དཀྱིལ་ཞིག་ན། ཁྱི་གུ་བཞི་ལྔ་ཞིག་སྐྱེས་པ་མས་བོར་ནས་སོང་འདུག་པ་གཟིགས་པ་དང༌། སྙིང་རྗེ་ནས་བཤུམས་ཤིང༌། དེ་རིང་འདི་པ་སྐྱེལ་དུ་ཕྱིན་ན་ནི་ཁོང་གི་དོན་མི་འགྲུབ། དེ་རིང་བཞག་ནས་ཕྱིན་ན་ནི་དགུན་ཡིན་པས་འཁྱགས་ནས་ཀྱང་འཆི། བྱ་རོག་དང་གཅན་གཟན་དག་གིས་ཀྱང་གསོད་སྙམ་དུ་བསམ་ནས་དེ་རིང་འདི་པ་བསྐྱལ་ལ། དོ་རེད་མཚན་ལ་འགྲོ་དགོས་པ་ཡིན་དགོངས་ཏེ། ཁྱི་གུ་སྐྱེལ་བ་ལ་ལོག་ནས་བྱོན་པས། དགེ་བཤེས་དེ་དང་ད་རེས་མ་འཕྲད་པ་བྱ་དགོས་དགོངས་པ། སྲང་བར་གཅིག་ཏུ་འཕྲད་པས།ཉིད་ཀྱིས་དོན་གལ་ཅན་གྱི་སྟབས་བཅོག་པར་འདུག་ཟེར་ནས་འཐབ་ཏུ་བྱུང་བས་སྐྱེངས་པོ་བྱུང་གསུང༌། དེ་ནས་དེ་མ་ཁད་ལོག་ནས་བྱོན་པས་ཐོ་རངས་ཁ་ས་སྐྱར་ཕེབས་ལན་བསྒྱུར། ཚ་བ་གཅིག་གསོལ་ནས་བྱོན་པས་དགོང་མོ་བོ་དོང་དུ་ཕེབས།དགེ་བཤེས་དེ་ན་རེ་ངོ་མཚར་ཆེ་ངས་འཐབས་པ་དེ་ཡང་བཟོད་པར་གསོལ་ཟེར་བྱུང་གསུང༌།ཡང་དགུང་ལོ་ཉི་ཤུ་ཙམ་ལོན་པའི་དུས་སུ་ཨེའི་དགེ་འདུན་རྣམས་ཆོས་གཞི་བཏེག་པས། རྒྱ་སྒོའི་འགག་ན་སྤྲང་མོ་ཞ་མ་གཅིག་ཡོད་པ་དེ་ངུ་ཡིན་འདུག་པས་ཐུགས་ཀྱིས་མ་བཟོད་དེ་ཅིས་ཉེས་དྲིས་པས། བཙུན་པ་ཐམས་ཅད་འབྱོན་པར་འདུག དེས་ན་ང་ལ་ལྟོ་སྟེར་མི་མི་ཡོང་ཟེར། ངས་ཁྱོད་ལེན་དུ་འོང་གི་སྡུག་བསྔལ་མ་བྱེད་གསུང་སྟེ། ཐག་པ་ཁྱེར་ནས་ལོག་བྱོན་ཏེ། ང་ལ་ཁུར་གསུངས་པ་ལ་མོས་ཁུར་མི་ནུས་པ་འདུག་ཟེར། སྔ་ལ་མོའི་གོས་སྟན་རྣམས་བསྐྱལ། དེ་ནས་མོ་རང་ཁུར་ནས་ཆོས་བར་སར་བསྐྱལ་གསུང༌། དེས་ན་སེམས་ཅན་དངོས་སུ་སྡུག་བསྔལ་བ་གཟིགས་ན་ལྟ་སྨོས་ཀྱང་ཅི་འཚལ།གཞན་གྱིས་སེམས་ཅན་སྡུག་བསྔལ་བ་འདི་འདྲ་འདུག་ཟེར་བ་གསན་ན། ངའི་མ་རྒན་རེ་སྙིང་རྗེ་གསུང་སྟེ་བཤུམས་ནས་གསུང་གླེང་ཀྱང་འཕྲོ་ཆད་ནས་འགྲོ་ཞིང༌། གླང་རི་ཐང་པ་ལ་གཞན་གྱིས་ངོ་ནག་པོ་བྱས་པ་གསན་པས། ངའི་མ་རྒན་སེམས་ཅན་གྱི་སྡུག་བསྔལ་འདི་ལ་བསམས་ན་ངོ་གདོང་དཀར་པོ་ཡོང་ས་མི་འདུག་གསུང་ཟེར། དེ་ཁོང་པ་མད་པར་གདའ་གསུང་ནས་སྤྱན་ཆབ་ཉིལ་ཉིལ་མཛད་ཅིང་འདི་ལྟར་ཡང་གསུང་ངོ༌། །སྡུག་བསྔལ་མང་གཟིར་འགྲོ་འདི་ཡལ་བོར་ནས། །རང་ཉིད་ཞི་བདེ་འབའ་ཞིག་དོན་གཉེར་བ། །ཕ་མ་མེ་ཡིས་འཚིག་པ་ཡལ་བོར་ནས། །རང་ཉིད་བསིལ་བའི་རྫིང་བུར་ཁྲུས་བྱེད་འདྲ། །འགྲོ་འདིས་རང་གི་བདེ་བ་ཡལ་བོར་ནས། །བདག་གི་དོན་དུ་སྡུག་བསྔལ་ཁུར་བླངས་པ།།ས་དང་རྒྱ་མཚོའི་རྡུལ་བས་ཆེས་མང་ན། །དེ་དག་བདག་གིས་ཇི་ལྟར་ཡལ་བར་འདོར། །ཐོག་མེད་དུས་ནས་ལན་མང་ཕན་བཏགས་པའི། །འགྲོ་མང་བཟོད་དཀའི་སྡུག་བསྔལ་གྱིས་གཟིར་བ། །མཐོང་ཐོས་དྲན་ཀྱང་གས་པར་མ་གྱུར་པ། །བདག་གི་སྙིང་འདི་ལྕགས་ལས་བྱས་སམ་ཅི། །སྔོན་ཆད་ཡང་ཡང་སྡུག་བསྔལ་སེལ་བྱེད་མ། །མནར་མེད་མེ་ཡི་ནང་དུ་ཚིག་གྱུར་ན། །དེ་ལ་སྙིང་རྗེའི་བསམ་པ་མི་སྐྱེ་པ། །བདག་འདྲ་མི་ཡི་ལུས་ཅན་དུད་འགྲོར་ཟད། །ཅེས་གསུངས། དབུས་པའི་དམག་རྟིང་མ་འཇད་དུ་བྱུང་དུས་དངུལ་ཆུའི་མདུན་གྱི་ཐང་ཆེན་པོ་དེ་དམག་གིས་གང་བ་གཟིགས་པས་སྡུག་གེ་ཚོ་སྡུག་གེ་ཚོ་ངའི་མ་རྒན་འདི་ཙམ་ཞིག་འཁྲུལ་ནས་སྡུག་བསྔལ་གྱི་རྒྱུ་ལ་སྤྱོད་པ་དེ་སྙིང་རེ་རྗེ་སྙིང་རེ་རྗེ་གསུང་ཞིང་བཞུགས་གདན་གྱི་སྟེང་དུ་འདྲེ་ལྡོག་མཛད་ཅིང་བཤུམས་པའི་མཐར་བརྒྱལ་བརྒྱལ་གྱི་བར་དུ་བཤུམས་པ་ཞིག་བྱུང༌། གཞན་ཡང་འདི་ལྟར་གསུངས་ཏེ། ངན་སོང་གསུམ་སྟེ་ཨ་ཅང་ཆེ། མིའི་ནང་ནས་ཀྱང་སྡུག་བསྔལ་དངོས་སུ་སྤྱོད་པ་འདི་རྣམས་སྙིང་ཤིན་ཏུ་ཡང་རྗེ་མོད། བསམ་བློ་ལེགས་པར་བཏང་ན་སྡུག་བསྔལ་གྱི་རྒྱུ་ལ་སྤྱོད་པ་འདི་རྣམས་སྙིང་རྗེ་གསུང་ཞིང༌། ད་ལྟ་འཇིག་རྟེན་གྱི་མི་ཆེ་རུ་རེ།གྲུང་དུ་རེ།འཁོར་མང༌། ཁ་དྲགནོར་ཆེ། ལས་སུ་སྡིག་པ་འབའ་ཞིག་བྱེད་པ་དེ་འདྲ་རྣམས་གཟིགས་པའམ། དྲན་པའམ། དེ་དག་གི་གླེང་མོ་བྱུང་ཙ་ན་ཡང་སྤྱན་ཆབ་འབྱིན་ཅིང༌། ཕ་རོལ་པོ་རྣམས་རྟོག་སྐྱེར་ཡོང་བསམ་པ་བྱུང་ནས་ཉམས་སྣ་དཀྱིལ་གྱིན་ཚོད་བཟུང་བ་མིན་ན། དེ་འདྲ་རྣམས་དང་ཕྲད་པ་ན་མཆི་མ་རང་དབང་མེད་པར་ཡོང་གི་འདུག་གསུང༌། འོ་སྐོལ་ཆོས་པ་འདི་རྣམས་སྡུག་བསྔལ་གྱི་རྒྱུ་ལ་སྤྱོད་པ་འདི་རྣམས་ལ་སྙིང་རྗེ་སྐྱེ་ཐང་བ་ཅིག་འདུག་པ་ལ། སྐྱེ་བ་ཉུང་བ་དེ་རང་རེ་རྣམས་ཀྱང་ཚེ་འདིའི་དཔལ་འབྱོར་ཁ་དྲག་དེ་རྣམས་ལ་སྐྱོན་དུ་མི་ལྟ་བའི་བློ་ངན་དེ་ཕུགས་སུ་ཞུགས་པས་ལན་འདུག 11/23 མདུན་ངོས། 上一页 9 10 11 12 13 14 下一页 尾页 |
