| ད་ལྟ་སྡུག་བསྔལ་པ་རྣམས་ལ་སྙིང་རྗེ་སྐྱེ་བ་དེ། སྡུག་བསྔལ་དེ་ལ་རང་རེ་སྐྱོན་དུ་ལྟ་བས་ཡིན་པར་འདུག་སྟེ།དེ་གཉིས་རང་སྐྱོན་གང་ཆེ་མི་ཤེས་གསུང༌། ཚོགས་ཆོས་གསུང་བའི་དུས་སེམས་ཅན་གྱི་སྡུག་བསྔལ་ལ་གཟིགས་ནས་སེམས་དཔའ་ཆེན་པོ་ཉིད་ཀྱིས་བཤུམས་ཙ་ན་ཚོགས་པ་བྱིངས་པོ་ངུ་ཅོ་ཐེག་ཐེག་ཡོང་བ་དེ་ལ་མཚན་ཉིད་པ་ཅིག་ན་རེ། མཁན་ཆེན་བུ་སྟོན་པ་དང༌།བླ་མ་པཎ་ཆེན་པ་ཆོས་གསུང་ཙ་ན།བཞད་གད་ཐེག་ཐེག་ཉམས་དགའ་ཞད་ཆེ་བར་འདུགའདི་པས་ཆོས་གསུང་བ་དེ་སྡུག་ཞད་ཆེ། མི་གཅེས་ཤི་བ་བཞིན་དུ་ངུ་ཅོ་ཐེག་ཐེག་ཡོང་ཟེར། རྒྱལ་སྲས་འདི་སྐུ་མཚམས་དམ་པོ་ལ་བཞུགས་པའི་དུས།མཁན་ཆེན་རིན་པོ་ཆེ་བསོད་ནམས་གྲགས་པ་ཞིང་གཞན་དུ་གཤེགས་པ་མངོན་པར་ཤེས་པས་མཁྱེན་ཏེ།མཚམས་ཧུར་ཐོན་མཛད་ནས་བྱོན་པའི་ལམ་ཁར་མི་གཉིས་ཀྱིས་ར་གཅིག་མི་འགྲོ་བཞིན་ཁྲིད་འགྲོ་བ་དང་ཕྲད་པ་ན་ཅི་བྱེད་དྲིས་པས། ཧོར་འདྲ་ལ་སྤྲོད་པ་ཡིན་ཟེར། སྙིང་རྗེ་ནས་བཤུམས་ཏེ་གསེར་ཞོ་ཕྱེད་བྱིན་ནས་འདི་ཧོར་འདྲ་ལ་སྤྲོད་ལ་ར་འདི་མ་གསོད་ང་ལ་བླངས་བྱས་གསུང༌། དེ་ནས་ཤངས་ཀྱི་མདའི་གད་སྐྱིབས་ཤིག་ཏུ་ཕེབས་པ་དང༌།འདིར་ཇ་སྐོལ་ངལ་གསོ་བ་ཡིན་གསུང་བ་ལ། འདི་ན་ཆུ་མི་གདའ་ཞུས་པས། ཆུའི་ཁག་ངས་ཁུར་མེ་ཤིང་ཐུས་ལ་ཤོག་གསུང༌། ཤིང་བཏུས་ནས་སླེབ་པ་དང༌། ཆུ་འདི་ན་གདའ་ཡིས་གསུང་ནས་ཕྱག་གིས་བྱེ་མ་ལ་རུད་རུད་མཛད་པ་ལ་སྔར་མེད་པའི་ཆུ་བྱུང་བས་ཞབས་ཏོག་པ་རྣམས་ཀྱི་བསམ་པ་ལ་མིག་འཕྲུལ་ཡིན་ནམ་བསམ་པ་བྱུང་ཟེར།ཇ་གསོལ་ཟིན་པའི་རྗེས་ལའང་ཆུ་འདུག ཡར་ལམ་ཆེད་ཀྱིས་བལྟས་པས་ཆུའི་རྗེས་ཡང་མི་འདུག་ཟེར་རོ། །དེ་ནས་མཁན་ཆེན་རིན་པོ་ཆེ་དང་མཇལ་བས་ཉིད་བྱོན་པ་དེ་དགའ་གསུང་ནས་མཉེས་ཚོར་ཆེན་པོ་མཛད། འཇུག་པ་སེམས་བསྐྱེད་འདི་སྔར་བླ་མ་རིན་ཡེ་བ་ལ་ཐོབ་ལགས་ཏེ་ཡིན་ཀྱང་དྲུང་དུ་གཅིག་ཐོབ་ན་བསམ་པས་སྐུ་ཁམས་ཀྱིས་ལྕོགས་ཙམ་གདའ་ན་ཐུགས་ལ་འདོགས་པར་ཞུ་ཞུས་པས། དེ་དུས་བསྙུང་རབ་འདུག་སྟེ་ཤིན་ཏུ་ཡང་སྤྲོ་ཡོ། ད་ལྟ་རང་མཆོད་པ་ཤོམས་ཤིག་གསུང༌། སེམས་བསྐྱེད་ཀྱི་ཆོ་ག་དངོས་གཞི་གྲུབ་ནས་མཁྱེན་པར་གསོལ་བ་གདབ་པའི་སྐབས་སུ།ས་ཆེན་པོ་ནི་རབ་ཏུ་གཡོས་ལྷའི་མེ་ཏོག་ནི་ཆར་བཞིན་དུ་བབས། སྤོས་ཀྱི་དྲི་ཞིམ་པོའི་ངད་པ་ནི་རྣམ་པར་ལྡང༌། རོལ་མོའི་སྒྲ་སྙན་པ་ནི་དབྱར་གྱི་འབྲུག་བཞིན་དུ་གྲག སྤྲིན་རྣམས་ཀྱིས་ཀྱང་འཇའ་ཚོན་སྣ་ལྔའི་བླ་རེ་བྲེས་པར་གྱུར་ཅེས་གྲག་གོ། །ཆོ་ག་ཚར་བའི་རྗེས་ལ་མཁན་ཆེན་རིན་པོ་ཆེའི་ཞལ་ནས། ཆོས་བདག་པོའི་ལག་ཏུ་འཕྲོད།ད་སྟེ་བཙུན་རྒན་དེ་རིང་ཤི་ཡང་འགྱོད་པ་མེད་དོ་གསུང་ནས་རྒྱལ་ཚབ་ཏུ་དབང་བསྐུར་ཏེ། དེ་ནས་རིང་པོ་མ་ཐོགས་པར་སྐུ་གཤེགས་ཤིང༌།གཤེགས་ཁར་སྒྱུ་མའི་དཔེ་བརྒྱད་པོ་དེ་ནར་བ་གཅིག་གསུང་ནས་གཤེགས་ཞེས་གྲག་གོ། །མཁན་ཆེན་རིན་པོ་ཆེའི་སློབ་མ་རྣམས་ཀྱིས། བླ་མ་རྒྱལ་སྲས་པ་དེ་ལ་མངོན་པར་མཁྱེན་པ་ཡོད་མེད་ཐེ་ཚོམ་མི་འདུག མཁན་ཆེན་རིན་པོ་ཆེ་གཤེགས་ལ་ཁད་དེར་ཁོང་གིས་ཕེབས་ཟེར། དེ་ནས་སེམས་དཔའ་ཆེན་པོ་ཉིད་ཀྱང་ཉིན་ཞག་རེ་ལ་དུས་གསུམ་དུ་སྨོན་འཇུག་གི་སེམས་བསྐྱེད་བསྡུས་པ་རེ་ལེན་ཅིང༌། འདི་ལྟར་གསུངས་ཏེ། གང་གིས་རང་གི་བདེ་བ་ཡལ་བོར་ནས། །ཡུ་བུའི་དོན་དུ་སྡུག་བསྔལ་ཁུར་བླངས་པའི། །སེམས་ཅན་ཚོགས་འདི་བློ་ཡིས་ཡལ་བོར་ན། །ཐེག་ཆེན་དམ་ཆོས་ཐོས་པའི་དགོས་པ་ཅི།།དེས་ན་མཐའ་ཡས་སེམས་ཅན་བསྒྲལ་བྱའི་ཕྱིར། །བླ་མེད་བྱང་ཆུབ་མཆོག་ཏུ་སེམས་བསྐྱེད་དེ། །རང་དོན་སྤངས་ཏེ་དངོས་སམ་བརྒྱུད་ནས་ཀྱང༌། །གཞན་དོན་སྒྲུབ་དེ་སྐྱེས་བུ་མཆོག་ཡིན་ནོ།།ཞེས་སོགས་གསུངས་ཤིང༌། དབུས་གཙང་ཁམས་གསུམ་གྱི་དགེ་བའི་བཤེས་གཉེན་དང༌།སྐྱེ་བོའི་ཚོགས་ཁྲི་ཕྲག་དུ་མ་ལ་བྱང་ཆུབ་སེམས་ཀྱི་སྡོམ་པ་གནང་ནས།བྱང་ཆུབ་སེམས་དཔར་གྱུར་པར་མཛད་ཅིང༌།དུས་ཕྱིས་མཁན་ཆེན་བྱང་ཆུབ་རྩེ་མོས་དབུ་མཛད་པའི་དགེ་བའི་བཤེས་གཉེན་འབའ་ཞིག་ཚོགས་པ་ལ།འཇུག་པ་སེམས་བསྐྱེད་གསུངས་པའི་སྐབས་སུ་འོ་སྐོལ་གྱིས་མཁན་ཆེན་རིན་ཆེན་པ་ལ་འདི་ཞུས་པའི་དུས་སུ། ཆོས་བདག་པོའི་ལག་ཏུ་འཕྲོད་པ་ཡིན་གསུང་ནས་མཉེས་ཚོར་ཆེན་པོ་མཛད་ཅིང་གདའ། འོ་སྐོལ་ལ་བདག་པའི་བདག་རྒྱུ་ཙམ་མེད་དེ། ཁོང་པ་དེ་སྐད་གསུང་གིན་གདའ།འོན་ཀྱང་བྱས་པས།ཇོ་བོ་རྗེ་ཡབ་སྲས་སྐུ་མཆེད་གསུམ་ལ་སོགས་པའི་དུས་སུའང༌།ཆོས་འདི་ལ་བཀའ་དོག་པ་ཡིན་པར་འདུགདུས་ཕྱིས་ཀྱང་འདི་འབོགས་པ་ཉུང་བར་གདའ། གང་ལྟར་ལགས་ཀྱང༌།འོ་སྐོལ་ལས་དབུས་གཙང་གཉིས་ན་ཆོས་འདི་འབོགས་པ་མང་བ་མེད། སྔར་ཡང་རྒྱུད་ལ་སྐྱེས་པ་མང་པོ་བྱུང་ཞིང༌། 12/23 མདུན་ངོས། 上一页 10 11 12 13 14 15 下一页 尾页 |
