| ད་ལྟ་བོད་གངས་ཅན་གྱི་ཁྲོད་ན་ཆོས་ཤེས་ནས་ཉམས་སུ་བླང་ཤེས་པ་རྒྱལ་སྲས་ཐོགས་མེད་པ་ཙམ་གཅིག་ཡིན། ངས་ཀྱང་ཆོས་ཤེས་པ་ཤེས་ཏེ། ཀུན་མཁྱེན་འཕགས་པ་འོད་ཀྱིས་བསྟན་པའི་དོན་དུ་བཤད་ཉན་དང་མདོ་རྒྱུད་ཀྱི་འགྲེལ་པ་མང་དུ་རྩོམས་ཞེས་གསུང་བ་ལ་བརྟེན་ནས་བཤད་ཉན་བྱེད་དགོས་པ་བྱུང་པས། ཁོང་འདྲ་བའི་ཉམས་ལེན་བྱུང་བ་མེད།འདི་ལྟ་བུའི་བྱང་ཆུབ་སེམས་དཔའ་ལ་ཆོས་འབྲེལ་ཐོགས་པ་ཙམ་གྱིས་ཀྱང་འཁོར་བ་མཐའ་ཅན་དུ་འགྱུར་ངོ་ཤེས་པ་ཡིན་པས། མཚམས་ལ་ཡོད་པ་རྣམས་ཀྱང་གསེང་ལ་ཆོས་ཞུས། དེ་བར་གྱི་ཞབས་ཏོག་ཐམས་ཅད་བླ་བྲང་ནས་བྱེད་པ་ཡིན་གསུང༌། དེའི་རེས་སེམས་དཔའ་ཆེན་པོས་ཀྱང་ཟླ་བ་གཅིག་ཞ་ལུར་བཞུགས་ནས་གང་ལ་གང་འདོད་ཀྱི་ཆོས་གསུངས་ཏེ་འགྲོ་བ་དཔག་ཏུ་མེད་པའི་དོན་མཛད་དོ། །རྒྱལ་སྲས་འདིའི་རྩར་གཞན་དག་གིས་རང་རེའི་ཆོས་བརྒྱུད་དང་བླ་མ་དང༌།རང་ལ་སྨོད་པ་བྱུང་བའི་དུས་སུ་མད་ལགས་བྱས་པས།དེ་ཀས་ཚིག་སྐེ་ཡང་ཆད་ནས་ཕན་ཚུན་རྒྱུད་སྲེག་རེས་ཀྱང་མི་ཡོང༌།རང་རེ་བཟོད་ལྡན་དུ་ཡང་འགྲོ་བ་ཡིན་གསུངས་ནས་དམ་བཅའ་ཡང་འདི་ལྟར་མཛད་དེ། འགྲོ་མང་དབུས་སུ་སྡང་མིག་ལྡན་པའི་མས། ཚིག་ངན་བཟོད་པར་དཀའ་བས་སྨ་ཕབ་ནས། །གདོང་པ་ལེགས་པའི་སྐབས་ཀྱང་མེད་བྱས་ན། །དེ་ཚེ་དམ་བཅའ་འདི་དག་དྲན་པར་གྱིས། །ཞེས་གསུངས། ཡང་བསྟན་པ་དང་སེམས་ཅན་སྤྱི་མཐུན་ལ་གནོད་པ་ཆེན་པོ་བྱེད་པ་དེ་འདྲ་རྣམས་ལ། འགའ་ཞིག་གིས་འདི་ལྟ་བུ་ཀུན་ཧ་ཅང་མི་རིགས་དྲགས་འདུག་ཟེར་ནས་ཞེ་སྡང་བསྒོམ་པ་གཟིགས་ཙ་ན། ཧ་ཅང་མི་རིགས་དྲགས་པ་ད་ཀ་སྙིང་རྗེ་བ་ཡིན་གསུངས་ནས། དེ་ལྟ་བུ་རྣམས་ལ་ལྷག་པར་ཡང་བརྩེ་བར་མཛད་ཅིང༌། འདི་ལྟར་གསུང་སྟེ། བདག་གམ་བདག་གི་ཕྱོགས་ལ་གནོད་བྱེད་དམ། །བསྟན་དང་འགྲོ་བ་ཡོངས་ལ་གནོད་བྱེད་པའི། །མ་རུངས་སྐྱེ་བོ་མཐོང་ཐོས་དྲན་གྱུར་ན། །ལྷག་པར་སྙིང་རྗེའི་གནས་སུ་ཤེས་བྱས་ནས། །རྙེད་བཀུར་སྙན་སྨྲས་སོགས་ཀྱིས་དངོས་སུ་ཕན། །གདགས་པར་ནུས་ན་གདགས་ཤིང་མ་ནུས་ནའང༌། །བྱམས་དང་སྙིང་རྗེ་དྲག་པོས་བདག་ཉིད་ཀྱི། །བདེ་དགེ་ཅི་ཡོད་དེ་དོན་བསྔོ་བ་གཅེས། །ཞེས་གསུང་ངོ༌། །རང་ལ་གཞན་གྱིས་དངོས་སུ་ཚིག་ངན་སྨྲ་བ་དང་བརྙས་པ་བྱེད་པའི་ཚེ་དེའི་ལན་མ་བྱས་ན་ཕ་རོལ་པོ་ཡང་ཞེ་སྡང་མི་བསྐྱེད་ཅིང༌། རང་རེ་ཡང་སྐྱོན་མེད་ཀྱི་སྐྱེས་བུ་བཟོད་ལྡན་དུ་འགྲོ་བ་ཡིན། གཞན་གྱིས་མི་རིགས་པ་བྱས།རང་རེས་ཀྱང་དེའི་ལན་བྱས་ཙ་ན། གཉིས་ཀ་སྐྱོན་ཅན་དུ་འགྲོ་བ་ཡིན་གསུང༌།དེ་ལྟར་མཛད་པ་རྣམ་ཐར་གང་གི་ཐད་ནས་ཀྱང་སའི་སྟེང་ན་འགྲན་གྱི་དོ་ཟླ་ཐམས་ཅད་དང་བྲལ་བའི་སེམས་དཔའ་ཆེན་པོ་འདིའི་སྙན་པའི་དྲི་བསུང་གྲགས་པའི་དྲི་བཞོན་གྱིས་སའི་སྟེང་ཐམས་ཅད་ཁྱབ་པར་བྱས་པས།རྒྱ་ནག་པོའི་ཡུལ་ནས་ཀྱང་སྟོབས་ཀྱིས་འཁོར་ལོས་བསྒྱུར་བའི་རྒྱལ་པོ་ཆེན་པོ་དང༌། རྒྱལ་པོ་ཆེན་པོ་ཧོང་ཐའི་ཙྪི་དང༌། རྒྱ་གར་དང༌། བལ་ཡུལ་དང༌། ཡ་རྩ་དང༌།མངའ་རིས་ལ་སོགས་པའི་རྒྱལ་ཕྲན་ཐམས་ཅད་ཀྱིས་ཀྱང་མོས་གུས་ཆེན་པོས། ཤཱཀྱ་ཐུབ་པའི་རྒྱལ་ཚབ་སྟན་པའི་བདག་པོ་བོ་དོང་ཐོགས་མེད་ཅེས་སོགས་ཀྱིས་བསྟོད་པ་དང༌། གདམས་པ་བསྐུར་བར་ཞུ་ཞེས་པའི་འཕྲིན་ཡིག་འབུལ་པ་དང་བཅས་པ་རིམ་པར་བསྐུར་ཞིང་དད་པ་ཆེན་པོས་སྤྱི་བོའི་གཙུག་ཏུ་སྒོམ་པར་བྱེད་པ་དང༌།དངོས་སུ་མི་ཆེན་གྱི་སློབ་བུའི་རིགས་འདུས་པ་ལ་ཡང༌། འཇམ་དབྱངས་ཆེན་པོ་དོན་ཡོད་རྒྱལ་མཚན་དཔལ་བཟང་པོ། ཆོས་རྗེ་བསོད་ནམས་རྒྱལ་མཚན་དཔལ་བཟང་པོ། ཏི་ཤྲྰི་ཆེན་པོ་བསོད་ནམས་བློ་གྲོས་སྐུ་མཆེད།ཏ་དབེན་གུ་ཤྲྰི་ཀུན་དགའ་རིན་ཆེན་རྒྱལ་མཚན་དཔལ་བཟང་པོ་དང༌། ཏ་དབེན་གུ་ཤྲྰི་ཀུན་དགའ་ལེགས་པའི་རྒྱལ་མཚན་དཔལ་བཟང་པོ་ལ་སོགས་པ་དཔལ་ལྡན་ས་སྐྱ་པའི་གདུང་རྒྱུད་རྣམས་དང༌། མཁན་ཆེན་ཐམས་ཅད་མཁྱེན་པ་བྱང་ཆུབ་རྩེ་མོ། མཁས་བཙུན་དཀོན་མཆོག་རྒྱལ་མཚན་དང༌། མཁས་གྲུབ་ཆེན་པོ་ཁྱུང་པོ་བ་དང༌། དབུས་ཕྱོགས་ཀྱི་ཡང་ཕག་མོ་གྲུ། སྟག་ལུང༌།ཚལ་པ། རྒྱ་མ་ལ་སོགས་པའི་རིན་པོ་ཆེ་རྣམས་དང༌།མདོར་ན་དབུས་གཙང་གཉིས་ཀྱི་དགེ་བའི་བཤེས་གཉེན་མཁས་བཙུན་བཟང་གསུམ་འཛོམ་པ་ཕལ་ཆེར་སློབ་མར་འདུས་ཤིང༌། གཞན་ཡང་དབུས་གཙང་གི་ཏ་དབེན།གུ་ཤྲྰི།སི་ཏུ།དཔོན་ཆེན།དུ་དབེན་ཤ་ལ་སོགས་ཀྱི་ལས་ཀ་འཛིན་པའི་མི་ཆེན་ཐམས་ཅད་ཀྱིས་ཀྱང༌། སྤྱི་བོའི་གཙུག་ཏུ་བཀུར་ཞིང་མཆོད་དོ། །རྒྱལ་སྲས་བདག་ཉིད་ཆེན་པོ་འདི་ནི་ཡིད་བཞིན་གྱི་ནོར་བུ་རིན་པོ་ཆེ་ལྟར་དགོས་འདོད་ཐམས་ཅད་རྩོལ་མེད་དུ་འབྱུང༌།འདས་མ་འོངས་ཐམས་ཅད་མཁྱེན་པའི་མངོན་པར་ཤེས་པ་ཐོགས་མེད་དུ་མངའ། ཡི་དམ་གྱི་ལྷ་སྟོན་གནམ་དྭངས་པའི་སྐར་ཚོགས་ཙམ་གཟིགས། ཇི་ལྟ་བ་དང་ཇི་སྙེད་པའི་དོན་ལ་དབང་འབྱོར་ཀྱང་ཐུགས་ལ་རློམ་པ་དང༌། ཁེངས་པ་རྡུལ་ཙམ་ཡང་མི་མངའ་ཞིང༌།འདི་ལྟར་གསུང་ཏེ། རང་གི་ཉེ་དུའི་བཀུར་སྟི་རབ་སྤངས་ནས། ། གཞན་གྱི་བཀུར་སྟི་འདོད་ན་བློས་བཏང་ཉམས། །དེ་ཕྱིར་གང་དུ་སུ་དང་འགྲོགས་ཀྱང་རུང༌། །མཐོ་དམན་འབྲིང་གསུམ་སྤྱི་བོར་འཁུར་བ་གཅེས། ཞེས་པ་དང༌། འོ་སྐོལ་ཆོས་པ་རྣམས་ལ་ཡང་མཁས་བཙུན་བཟང་གསུམ་གྱི་ཡོན་ཏན་གང་ཡོད་ཀྱང༌། དེས་རང་མཆོག་ཏུ་འཛིན་ཅིང་ང་རྒྱལ་གྱིས་རང་ལས་དམའ་བ་ལ་བརྙས་པ། མཉམ་པ་ལ་འགྲན་སེམས། མཐོ་བ་ལ་ཕྲག་དོག་བྱེད་ན་ཆོས་གནད་དུ་མ་སོང་བ་ཡིན། དཔེར་ན་སྨན་གྱིས་ནད་བསྐྱེད་པའམ་འདྲེ་ཤར་ནས་གནོད་པ་ལ་གླུད་ནུབ་སྒོར་སྐྱེལ་བ་དང་འདྲ་གསུང༌། རྒྱལ་སྲས་བདག་ཉིད་ཆེན་པོ་འདི་ནི་སྐྱེ་བོ་ཀུན་གྱིས་མཆོད་པའི་གནས་སུ་བཟུང་ཡང་འདོད་ཡོན་ལ་སྲེད་པ་ཆུང་བས་གསོལ་གང་དྲངས་ཀྱང་ཞིམ་པ་དང་མི་ཞིམ་པའི་ཞལ་སྙད་མི་མཛད་པར་གང་དྲངས་པ་གསོལ་བས་གཞན་གྱིས་བཀུར་བ་དང༌། བསྒྲུབས་པ་དང༌། ཞབས་ཏོག་སླ་ཞིང་འདི་ལྟར་ཡང་གསུང་ངོ༌། །ཆུ་རྒྱ་མཚོ་ཆེ་ལ་འཕྱོ་བའི་ཉ། །རྐན་ལྕགས་ཀྱུ་རྣོན་པོས་ཕུག་པ་དེ། །རང་ཟས་ལ་སྲེད་པ་ཆེས་པས་ལན། །སྲེད་ཞེན་གྱིས་ཟས་ལ་མ་རྒྱུགས་ན། ལྕགས་ཀྱུ་ཡིས་ཡ་རྐན་འབུག་དོན་མེད། །ཡུལ་མཐུན་རྐྱེན་གྱིས་འཁོར་བར་འཛིན་པ་འདི། །རང་འདོད་ཡོན་ལ་སྲེད་པ་ཆེས་པས་ལན། །འདོད་ཡོན་གྱི་སྲེད་པ་སྤངས་ཙ་ན། །ཡུལ་མཐུན་རྐྱེན་ལམ་གྱི་གྲོགས་སུ་འཆར།།འདོད་ཡོན་སྤྱད་ཀྱང་ཞེན་མེད་ཤིན་ཏུ་གཅེས། །གསུང་བ་དང༌། 15/23 མདུན་ངོས། 上一页 13 14 15 16 17 18 下一页 尾页 |
