| འོ་སྐོལ་དང་པོ་གྲྭ་སའི་དུས་ནས་དངོས་པོ་གསོག་པའི་བློ་མ་སྐྱེས་པས་འཕྲལ་ལྟོ་སྐྱིད་པ་ཅིག་བྱུང་གསུངས། རྒྱལ་སྲས་འདི་སྦྱིན་པའི་ཕར་ཕྱིན་ལ་སློབ་པར་མཛད་པའི་ཚེ་ལུས་དང་ལོངས་སྤྱོད་ཐམས་ཅད་སེམས་ཅན་ལ་དངོས་སུ་གཏོང་བར་མཛད་དེ། ལྷོ་སྒོ་རུ་ནད་པ་སྙོམས་ཆུང་ཡུན་རིང་ན་བ་ཟ་རྒྱུ་མེད་པ་གཅིག་ལ། བསོད་སྙོམས་མཛད་པའི་རྩམ་པ་བོང་རྒྱབ་གཅིག་ཡོད་པ་དེ་བྱིན་པས། ད་དེ་འཆི་བའི་འདྲེ་མེད་པར་བྱས་ཟེར་ནས་ངུ་ཡིན་འདུག དེ་ལ་སྙིང་རྗེ་དྲག་པོ་སྐྱེས་གསུངས། ལན་ཅིག་ས་སྐྱ་ན་སྤྲང་པོ་འཆི་ལ་ཁད་ཅིག་འདུག་པ་ལ་མ་ཤི་བར་ནམ་ལ་ཁྱིས་ཟ་བར་འདུག་ཟེར་ནས་སེམས་ལས་ཆེན་པོ་འདུག་པས་བྱ་བྲལ་བ་གཅིག་ལ་རྔན་པ་བྱིན་ནས་བསྲུང་དུ་བཅུག་པས་དེའི་ནུབ་མོ་ཤི་འདུག སྦྱིན་པ་དེ་གཉིས་ཆུང་ཡང་ཡིད་ཚིམ་པར་བྱུང་གསུང༌། བཤད་ཉན་མཛད་དུས་བཤད་གསར་བས་བཤད་སློངས་ཞུས་པ་ན་ནང་དུ་འདོང་གསུང་ནས་ནང་དུ་ཕེབས་པ་དང༌། ཁྱེད་རང་འདི་ནས་གང་དགའ་བ་ཞིག་ཁྱེར་སོང་གསུང་ནས་གྲུམ་ཙེ་བཟང་པོ་ཞིག་ཡོད་པ་ཁྱེར་སོང་གསུང་བ་དང་། ཡང་བྲོ་པས་གནང་སྦྱིན་ཞུས་པས། ཁྱོད་རང་འདི་ནས་གང་དགའ་བ་ཞིག་ཁྱེར་གསུང་པས་གསོལ་སྡེར་ཁྱེར་སོང་གསུང་བ་དང༌། གཞན་ཡང་ན་བཟའ་སོགས་གང་ཡོད་གནང་ཞིང༌། གྲྭ་སྐོར་བ་སོགས་ལ་གཞན་གནང་རྒྱུ་མེད་ན་ཡོལ་བ་བླ་བྲེ་ནས་ཀྱང་བྲེགས་ཀྱིན་གནང་ངོ༌།།ཐེངས་ཅིག་ཉན་པའི་སེར་སློངས་པ་བྱུང་ནས་སློང་དུ་བྱུང་བ་ལ་གཞན་སྟེར་རྒྱུ་མེད་པར་ཆོས་སྟན་གྱི་གྲུམ་ཙེ་གཅིག་ཡོད་པ་བྱིན་པས། སློབ་དཔོན་གྱིས་ཚོར་ནས་ཁོང་ཚོ་ལ་ནས་ཁལ་གཅིག་བྱིན་གྲུམ་ཙེ་བླངས་ཏེ་ཁྱེར་བྱུང་ནས་སྟན་གཅིག་པོ་ལས་མེད་པ་གསུང་ནས་འཐབ་ཏུ་བྱུང་གསུང༌། ཡང་རྩེ་གདོང་དུ་ཆོས་བར་ལ་བྱོན་དུས་ཉི་མ་དཔལ་ཟེར་བའི་གྲྭ་པ་ཞིག་གི་ཕྱམ་རྩེ་རྐུན་མ་གཅིག་གིས་ཁྱེར་བ་ལ་ཁོ་ལ་སེམས་ལས་ཆེན་པོ་འདུག་པ་ལ། སེམས་དཔའ་ཆེན་པོ་རང་ལ་ཕྱམ་རྩེ་གཉིས་ཡོད་པའི་གཅིག་ཁོ་ལ་གནང་སྟེ།དེ་དུས་མཁན་ཆེན་བསོད་ནམས་གྲགས་པ་བོ་དོང་དུ་བྱོན་ནས་དགུན་གཅིག་སྲོད་ཐོ་རངས་གཉིས་ཀ་ཆོས་གསུང་བ་གསན་དུ་བྱོན་པས། ཕྱམ་རྩེ་གཅིག་ལས་མེད་པ་དེས་གྲང་མོ་བྱུང་ཡང་སློབ་དཔོན་ལ་གཡར་ན་ཡོང་སྟེ་འཐབ་ཏུ་ཡང་བསམས་ནས་གཡོར་མ་ནུས་གསུང༌། གྲྭ་སའི་དུས་སུ་རྩམ་པ་ཆེན་པོ་མེད་ཀྱང་སྤྲང་པོ་ལ་སྡེར་མས་བཅུས་ཀྱིན་གནང་ཙ་ན། དེ་བཞིན་མཛད་ན་ཉིད་རང་ལ་གསོལ་རྒྱུ་མི་ཡོང་ཞུས་ཙ་ན་ནམ་ཟད་ཙ་ན་བལྟ་རྒྱུ་ཞིག་ཡོང་གསུང་ནས།རང་ཉིད་དབུལ་བོར་གནས་ཀྱང་སློང་བ་པོའི་སེམས་སྤོང་བ་མི་སྲིད་དོ། །དངུལ་ཆུར་ཉེ་གནས་མེད་པའི་བཤུལ་དུ་སེར་སློང་ལ་བྱང་དང་ར་ནས་ཡོངས་པའི་མི་སུམ་ཅུ་ཙམ་ཞིག་སློང་དུ་བྱུང་བ་ལ་ན་བཟའ་བེར་ཐུལ་གཅིག་དང་རྩམ་པ་གང་ཡོད་གནང༌། ཡང་སྤྲང་པོ་གཅིག་སློང་དུ་བྱུང་བ་ལ་ཕྲུག་ཕྱམ་གཅིག་སྔོན་ལ་གནང་བ་ལ་བཟང་པོ་སྟེར་རྒྱུ་ཡོད་བཞིན་དུ་མི་སྟེར་བ་དགོངས་ཏེ། ཕྱམ་རྩེ་བླངས་ནས་བེར་ཐུལ་གཅིག་གནང་བས། ཕྱི་ལོ་ཡང་བརྙོགས་ནས་སློང་དུ་བྱུང་བ་ལ་ཕྲུག་གི་རིང་འགག་གཅིག་གནང་གསུང༌།ཡང་ཐེངས་ཅིག་ཉེ་གནས་མེད་པའི་བཤུལ་དུ་སྤྲང་སློང་གཅིག་སློང་དུ་བྱུང་བ་ལ་གཞན་གནང་རྒྱུ་མེད་པར་ར་ལྤགས་ཀྱི་སྦུད་པ་གཅིག་ཡོད་པ་ཡང་གནང་ངོ༌། །དེ་ལྟར་རྒྱལ་སྲས་བདག་ཉིད་ཆེན་པོ་འདིས་ལོ་ཉི་ཤུ་རྩ་གྲངས་སུ་ཁོར་ཡུག་ཏུ་སྐུ་མཚམས་དམ་པོ་མཛད་པ་དེ་གྲོལ་བའི་རྗེས་ཤིག་ལ། དངུལ་ཆུར་དགེ་འདུན་དང་སྐྱེ་བོའི་ཚོགས་ཆེན་པོ་ལ་སེམས་བསྐྱེད་དང༌།བློ་སྦྱོང་དང༌།སྐྱེས་རབས་དང༌།བྱང་ཆུབ་སེམས་དཔའི་ས་ལ་སོགས་པ་གསུངས་པའི་དུས་སུ་ལྷའི་མེ་ཏོག་གི་ཆར་ཁ་བ་བུ་ཡུག་འཚུབས་པ་ཙམ་བབས་སོ། །ཡང་ཐེངས་ཅིག་བྱང་ཆུབ་སེམས་དཔའི་སྤྱོད་འཇུག་གསུངས་པའི་དུས་སུ་ལྷའི་མེ་ཏོག་གི་ཆར་སྔར་བཞིན་དུ་བབས་སོ།།དེ་ནས་ཏའི་སི་ཏུ་སོགས་དབུས་ཕྱོགས་ཀྱི་ཆེན་པོ་མང་པོས་སྤྱན་དྲངས་ཏེ་དགུང་ལོ་དྲུག་ཅུ་རེ་བདུན་བཞེས་པའི་དུས་སུ་གླང་ལོ་ཟླ་བ་དང་པོའི་ཚེས་བཅུ་དྲུག་ལ་བོ་དོང་ནས་བཏེག་སྟེ། དཔལ་སྡིང་དང་ཆུ་མིག་དང་ཞ་ལུ་ལ་སོགས་པ་རྣམས་སུ་ཡང་དགེ་འདུན་དང་སྐྱེ་བོའི་ཚོགས་ཆེན་པོ་ལ་ཆོས་ཀྱི་སྦྱིན་པ་མཛད་ནས། མཁན་ཆེན་བུ་སྟོན་རིན་པོ་ཆེ་དང་རིན་སྤུངས་པར་བསྡེབས་ནས་བྱོན་པའི་ལམ་ཁར་མཛོ་མོ་ཞིག་ཡོད་པ་ལ་ཕྱགས་ཕྱི་བ་རྣམས་ཀྱིས་ཟན་མང་པོ་བྱིན་པས་འགྲངས་དྲགས་ནས་ན་བ་ལ། མཁན་ཆེན་པས་ཁྲོ་བོའི་དྲག་སྔགས་ལ་སོགས་པ་བགྲངས་ཀྱིན་བྱིན་བརླབས་བྱས་ཀྱང་མ་ཕན་པར་མཛོ་མོ་ཤི་བས།སེམས་དཔའ་ཆེན་པོས་མཛོ་མོའི་སྤྱི་བོ་ཐེན་ཐེན་མཛད་ཅིང༌། ངའི་མ་རྒན་རེ་སྙིང་རྗེ་གསུང་ཞིང་ཡུན་རིང་བཤུམ་པ་ལ་མཁན་ཆེན་པས། བླ་མ་པ་ད་གཤེགས་པར་ཞུ་གསུངས་པས།དྲུང་པ་སྔོན་ལ་གཤེགས་པར་ཞུ། འོ་སྐོལ་དུམ་པས་མི་འགྲོ་གསུང་ནས་ཡུན་རིང་པོའི་བར་བཤུམ་ཞིང་བཞུགས། རྗེས་ལ་མཁན་ཆེན་པའི་གསུང་གིས། མཛོ་མོའི་དོན་གྲུབ། དུད་འགྲོ་གཅིག་ལ་དེ་ལས་ཚོགས་བསགས་པ་མི་ཡོང་གསུང༌། དེ་ནས་ཏའི་སི་ཏུ་བྱང་ཆུབ་རྒྱལ་མཚན་གྱིས་ཞུ་འབྲོག་ལྷ་ཁང་ནས་བསུ་བ་བྱས་ཏེ་རིན་སྤུངས་སུ་ཕེབས་པའི་དུས། དེ་ནས་མི་མཐོང་བའི་སར་སུས་ཀྱང་ཞུས་པ་མེད་པར། ངུར་སྨྲིག་གི་སྒྲོལ་མ་རང་བྱོན་བཞུགས་ས་དེ་རི་ཕ་གིའི་མདུན་ན་བདོག་གམ་གསུང༌། དེ་ནས་སི་ཏུ་བྱང་རྒྱལ་བས་རྫོང་རྣམས་སུ་རིམ་པ་བཞིན་དུ་ཞབས་ཏོག་བྱས་ནས། དབུས་ཀྱི་ས་ཆ་བསམ་ཡས་ལ་ཉིན་ལམ་གཉིས་ཙམ་ཡོད་པའི་ལམ་ཁ་གཅིག་ཏུ་ཕེབས་པ་དང༌། སྤྲིན་དཀར་པོ་གཅིག་ལ་ཚད་བཙུགས་ནས་ཕ་གིའི་ཐད་ན་གང་ཡོད་གསུང་བ་ལ། ས་སྣ་བ་ཅིག་ན་རེ།ཕ་གིའི་ཐད་ན་བསམ་ཡས་ཡོད་ཟེར་བས། དེ་ཚོད་ཅིག་འདུག་ངོ་མཚར་ཆེ་གསུང་བ་ལ། 16/23 མདུན་ངོས། 上一页 14 15 16 17 18 19 下一页 尾页 |
